Albanistani i Ramës: Kapen në Turqi dy korrierë drogë që u nisën nga aeroporti i Rinasit

[Albo]

Trafik droge nga Rinasi, qeni zbuloi hashashin në Stamboll, rishikohen procedurat



Arrestimi i 2 shtetasve turq që kishin arritur të kalonin nga Rinasi në Stamboll 31.5 kg kanabis, ka vënë në lëvizje autoritetet e të dyja vendeve.

Në pamjet e publikuara nga mediat turke, valixhet me drogë që nuk u pikasën ne Rinas, janë zbuluar nga qeni anti-drogë në aeroportin e Stambollit.

Me interes për hetimin në Shqipëri është roli i dy shtetasve turq të arrestuar, identiteti i të cilëve nuk bëhet publik.

Nuk dihet nëse ata kanë qenë edhe më herët në Shqipëri, çka do të shtonte dyshimet për një linjë të përdorur edhe më parë për trafikimin e sasive të drogës.

Lidhur me këtë rast policia kufitare, doganat dhe Tirana Internacional Airport, po rishikojnë procedurat e kontrollit të bagazheve para imbarkimit në avionë.

Pak ditë më parë në Turqi u arrestua edhe polici rrugor Florenc Bicerri bashkë me ish-komandon dhe një shqiptar tjetër me rreth 100 kg kanabis.

Hetimi nuk ka përcaktuar ende mënyrën si është trafikuar droga ndërsa rastet nuk përjashtohet të kenë lidhje me njëra-tjetrën.

Arrestohet me drogë në Turqi, efektivi shqiptar përjashtohet nga Policia e Shtetit



Punonjësi i Komisariatit të Policisë Rrugore Tiranë, Florenc Bicerri është arrestuar në Turqi.

Ai u vu në pranga së bashku me dy shqiptarë të tjerë, pasi trafikonin lëndë narkotike.

Policia e Shtetit, përmes një reagimi, bëri me dije se Bicerri ka dalë nga Shqipëria nëpërmjet Rinasit, më datë 05.10.2022.

Për këtë punonjës policie, Drejtori i Përgjithshëm i Policisë së Shtetit, Muhamet Rrumbullaku ka urdhëruar përjashtimin e menjëhershëm dhe përgjithmonë, nga Policia e Shtetit.

Grupi i dedikuar hetimor, në bashkëpunim me Agjencinë e Mbikëqyrjes Policore dhe me homologët turq, po vijon punën për zbardhjen e rrethaneve të rastit, evidentimin dhe kapjen e personave të tjerë të implikuar në këtë rast të trafikimit të lëndëve narkotike.

Euronews

[Albo]

“Kanabisi shkëmbehet me heroinë”, eksperti tregon detaje nga arrestimi i policit



Eksperti i sigurisë Artan Rexhepi u shpreh në një intervistë për Euronews Albania se Policia e Shtetit duhet të largojë nga struktura personat e inkriminuar.

Rexhepi komentoi edhe rastin e efektivit të Policisë Rrugore, Florenc Bicerri, i cili u arrestua në Turqi për trafik droge.

Ai tha se nga informacionet që kishte marrë, bëhet fjalë për një shkëmbim të kanabisit me heroinën.

“Policia duhet të fillojë të pastrojë vetveten, kjo duhet bërë me hapa shumë të shpejtë. Rasti i drogës, nga informacionet që mora, kanabisi është i shtrenjtë në Turqi dhe flitet për këmbim të kanabisit me heroinë. Polici ka kaluar disa filtra para se të emërohej. Nuk mund të bëhet kushdo punonjës policie. Policia e Shtetit po kriminalizohet masivisht”, u shpreh ai.

Rexhepi nënvizoi më tej se komandot janë shumë të rrezikshëm në ngjarjet kriminale.

Euronews