Futbollisti Sulejman Maliqati

[Albo]

Shuhet në moshën 94-vjeçare ikona e portës shqiptare



Është shuar në moshën 94-vjeçare Sulejman Maliqati, ”Macja e Zezë” e futbollit shqiptar, Heroi i Lajpcigut, mbrojtësi i sigurtë i portës së Partizanit dhe kombëtares shqiptare, në periudhën 1950-1964.

”Mjeshtër i Merituar i Sportit”, ”Nderi i Kombit”, futbollist, trajner, kuadër i edukimit fizik, baba i dhëmbshur, bashkëshort i përkushtuar, gjysh ideal, shok dhe mik gati i të gjithë shqiptarëve. Kështu do të kujtohet Sulejman Maliqati.

Para pesë ditësh, Maliqati është rrëzuar dhe është dëmtuar rëndë. Me gjithë përkujdesjen e mjekëve, ai nuk mundi t’i përballonte dëmtimet dhe nuk mbijetoi.

Dy vite më parë, ai u nderua nga Presidenti Ilir Meta me titullin e lartë ”Nderi i kombit”, ndërkohë që për kontributin e dhënë ndër vite në sportin e futbollit portieri legjendar është nderuar edhe me titullin “Qytetar nderi” i Kavajës dhe “Mjeshtër i merituar i sportit”.

Koha Jone

[Albo]

Presidenti Meta nderon “macen e zezë”, “Nderi i Kombit” për legjendën e portës



1 gusht 2020

Presidenti i Republikës së Shqipërisë ka dekoruar gjatë ditës së sotme një nga portierët më të mëdhenj që ka nxjerrë futbolli shqiptar. Ilir Meta ka dekoruar Sulejman Maliqatin me titullin e lartë “Nderi i Kombit”, duke ia bërë të paharrueshëm 92-vjetorin e lindjes.

“Urimet më të përzemërta në 92-vjetorin e lindjes për Profesor Sulejman Maliqati, një nga portierët më të famshëm të të gjithë kohëve të futbollit shqiptar, legjendën e padiskutueshme të Partizanit dhe Ekipit Kuq e Zi, 7 herë kampion kombëtar dhe Nënkampion i lojërave të Leipzigut të vitit 1958.

I cilësuar si “macja e zezë” dhe mburojë e pakalueshme e portës shqiptare, portieri që nuk luajti kurrë me doreza, pasi e ndiente topin jo vetëm me duar e gishta por e njësonte me vetë qenien e tij, Sul Maliqati, për gjithçka i ka dhënë futbollit gjatë karrierës, është një shembull frymëzues për historinë e sportit tonë dhe model frymëzimi i rrugës drejt suksesit për fëmijët dhe brezat e ardhshëm të sportistëve.

Për kontributin e çmuar, talentin dhe personalitetin e jashtëzakonshëm, si një nga ikonat e historisë së futbollit shqiptar dhe në vlerësim të sakrificave për arritjen e rezultateve të shkëlqyera duke përfaqësuar denjësisht fanellën e Partizanit dhe ngritur lart emrin e Shqipërisë në arenat ndërkombëtare sportive, duke na bërë krenarë të gjithëve, pata kënaqësinë ta çmoja me Dekoratën e lartë ‘Nderi i Kombit‘.

Jetë të gjatë e me shëndet të plotë Sula ynë, njeriu me vlera dhe integritet të lartë qytetar, edukatori shembullor për brezat më të rinj si model i mjeshtërisë dhe atdhedashurisë!“, shkruan presidenti i Republikës së Shqipërisë.

abcnews.al