Qeveria e Rilindjes dorëzohet, rikthen bastet sportive online

[Albo]

Rama paralajmëron rikthimin e basteve online



Katër vjet pasi i shpalli të paligjshme lojërat e fatit, kryeministri Edi Rama tha se aktiviteti kishte vazhduar njësoj në të zezë – duke pranuar dështimin e qeverisë së tij për ndalimin e aktivitetit si dhe legalizimin e basteve online.

Kreu i qeverisë, Edi Rama shfrytëzoi një dëgjesë publike me federatat e sportit të mërkurën për të lajmëruar rikthimin e lojërave të fatit online, duke pranuar njëherazi dështimin e qeverisë së tij për ta bllokuar këtë industri.

“Fakti që ky aktivitet nuk ka ardhur në rënie, që pavarësisht arrestimeve, dënimeve, në një pjesë të caktuar edhe gjykatat kanë dhënë kontributin e tyre negativ… sidoqoftë nuk ka rënë si aktivitet; nuk ka rënë si numër pjesëmarrësish, e bën të domosdoshëm këtë reflektim që bëjmë sot,” tha Rama.

Sipas tij, aktiviteti është zhvilluar në të zezë nga elementë kriminalë.

“Me gjithë konsultat me ekspertë të botës dixhitale rezulton e pamundur të bllokohet sistemi. Kjo më bën të hapur ndaj kësaj zgjidhjeje se është gjynah që kjo veprimtari të zhvillohet nga duar të njerëzve që shkelin ligjin dhe kanë rezultuar me përfitime krejt të paarsyeshme elementë me profil të lartë në krimin e organizuar,” shtoi ai.

Kryeministri e cilësoi ndërhyrjen si një zgjidhje që do të ndihmonte ekonominë, duke pranuar se bastet online qarkullonin 5 milionë euro në vit. Ai foli gjithashtu për licensim të kompanive ndërkombëtare në Shqipëri.

Industria e lojërave të fatit ishte një kalë beteje i fushatës elektorale të vitit 2013 që solli në pushtet kryeministrin Edi Rama. Operacioni i parë i qeverisë së tij, “Fundi i Marrëzisë” targetoi tregun e paligjshëm të lojërave të fatit dhe në vitin 2015, qeveria miratoi një ligj që u prezantua si radikal për frenimin e kësaj industrie.

Megjithatë, lojërat e fatit lulëzuan edhe më shumë pas miratimit të ligjit të ri, çka e shtyu qeverinë të vendoste ndalimin e plotë të tyre në vjeshtën e vitit 2018.

Në takimin me përfaqësuesit e federatave, ministri i Brendshëm, Bledi Çuçi e konsideroi rihapjen e kontrolluar të lojërave të fatit si mbrojtje ndaj konsumatorit.

“Konsumatori do të jetë i mbrojtur nga shteti dhe nuk mund të të kërcënohet nga një kriminel që drejton këtë aktivitet,” tha ai duke referuar numrin e lartë të çështjeve penale të hapura për shkak të borxheve të basteve.

Opozita e cilësoi hipokrizi vendimin e kryeministrit, duke i kujtuar aksionin e mbylljes së lojërave të fatit në fillimet e qeverisjes së tij.

“Duam t’i kujtojmë zotërisë së tij, që ua kushtonte nënave dhe motrave mbylljen e basteve se, sot nëpër Shqipëri ka shumë nëna dhe motra veshur në të zeza nga përplasja që nisi në vitin 2013 mes grupeve rivale në këtë biznes,”tha sekretari për Çështjet Ligjore në PD, Ivi Kaso, në një deklaratë për shtyp.

BIRN

[Albo]

Pse sekti Rama rikthen bastet?

Nga Bujar Leskaj

Pasi katër vite më parë u mburr se do t’ua kursente familjeve shqiptare me dhjetëra milionë euro të humbura në kompanitë e basteve, sekti Rama në qeverisje ka vendosur të ligjërojë aktivitetin e basteve sportive online, gjoja për të favorizuar me fonde sportin. Rilindja rilind një aktivitet parazitar që ushqen bixhozin online dhe do të shkaktojë sërisht drama familjare, me familjarë e kryefamiljarë që do ta kenë varësi të ligjshme tashmë, varësinë nga bixhozi i basteve online.

Këta dhjetëra mijëra qytetarë, me bekimin e sektit në pushtet, do të vijojnë, me herë më tepër tashmë, të shkatërrojnë familjet e tyre ne bixhoz, duke i varfëruar dhe më shumë familjet shqiptare dhe duke i pasuruar, kësaj rradhe ligjërisht, kompanitë e basteve me lidhje mafioze, të cilat do të jenë ato që do të marrin lejet e këtij aktiviteti bixhozi të ri-ligjëruar. Bastet e ligjëruara do të arrijnë të qarkullojnë mbi 140 milionë euro para-humbje të shqiptarëve brenda një vit. Janë këto kompani që do të menaxhojnë këto flukse dhe do t֝ë financojnë dhe blejnë zgjedhjet vendore 2023.

Pseudoargumenti se nuk do të ketë vendosje fizike bastesh është sa mjeran po aq edhe bosh, pasi bastet e paligjshme online lulëzuan këto katër vjet në bodrume dhe kthina shtëpish e lokalesh, me shtetin e sektit Rama krejtësisht të paaftë të pengojë ose kufizojë këtë aktivitet, të lënë tashmë në duar të kompanive okulte, të lidhura me krimin e organizuar.

Aq sa dhe vete Lideri Global ne vitin 2020, gjoja “kërcënonte” ish-mbretin mafioz të basteve të paligjshme, të zhdukur këto ditë, se “ia dinin edhe targën e makinës”, por që asnjëherë policia e Shtetit nuk e kapi për ta arrestuar.

Sportistët e dalluar duhet të shpërblehen dhe, në tërësi, sportistët dhe sportet duhet të ndihmohen. Këto janë detyra të shtetit të qytetarëve, jo favorizime të sektit në pushtet. Të ashtuquajturin “moral” të Ramës, të risjelljes së basteve për të ndihmuar sportin dhe sportistët, socialogu i mirënjohur Artan Fuga e ka dërrmuar me etiketimin “Është si të mirëmbash një manastir me lekë nga prostitucioni”. Botën fisnike të sportit dhe sportistëve të ndershëm nuk e lidh asgjë me paratë e basteve sportive, të luajtura skutave apo me “bekimin” e ligjit të Ramës dhe Lideri Global vetëm sa e fëlliq këtë botë, duke e marrë peng si alibi, për aktin monstruoz të tij.

Rama kërkon të fshehë arësyen e vërtetë pse po ligjëron bixhozin e basteve sportive online. Arësyeja e vërtetë janë paratë nën dorë dhe të paligjshme që i duhen atij dhe sektit që drejton, për zgjedhjet vendore 2023. Këto para do t’ia japin kompanitë që do të marrin lejet e ushtrimit të aktivitetit të basteve sportive online, të cilat do të jenë në pozicionin e subjekteve të operacioneve të OFL-së të dy-tre vite më parë, në rast se nuk do të “kolliten” bindshëm dhe dëndur, duke mbushur xhepat e sektit në qeverisje, për zgjedhjet vendore 2023.

Syri

[King Bardhyl]

Berisha: Pas zhdukjes së Martinajt, Olsi Rama bëhet ‘mbret’ i basteve



Kreu i PD-së Sali Berisha, në një deklaratë për mediat tha bastet sportive u kthyen sapo u zhduk i shumëkërkuari Ervis Martinaj , në mënyrë që ti marrë Olsi Rama,

Sipas tij lëvizjet e fundit që ka bërë Kryeministri Rama janë pjesë e një grushti shteti, ndërsa theksoi se tashmë mbreti i basteve është Olsi Rama.

“Olsi Rama mori dhe bastet. Dy kanë qenë personat në fushën e basteve, i pari Ervis Martinaj, ai ka qenë i njohur në këtë industri, ai ka qenë, dihet. Dhe Olsi Rama gjithashtu. E vërteta është se fill pas zhdukjes eliminimit apo largimit të Ervis Martinajt, bastet u rikthyen për t’i marrë Olsi Rama. Lëvizjet e fundit që ai ka bërë, janë një pjesë të grushtit të shtetit të pjesshëm. Është kështu apo jo? Sot mbreti i basteve u bë Olsi Rama. “- tha Berisha.

Euronews.al