Dokumentari "Fluturat", fëmijëria e kaluar në kampet komuniste të internimit

[Albo]

Të internuarat e kampeve komuniste kujtojnë fëmijërinë e humbur

Regjisori Bujar Alimani ka kapur dëshmitë e grave që kaluan fëmijërinë e tyre të internuara në një kamp pune në Shqipërinë komuniste për dokumentarin e tij të ri, “Fluturat”.


Njëra nga ish-të internuarat që kaloi fëmijërinë në kampin e Gradishtës. Foto kortezi: Bujar Alimani.

Jeta e 21 grave të lindura apo të internuara në kampin e punës së Gradishtës në jug të Shqipërisë ishte fokusi i dokumentarit “Fluturat” të Bujar Alimanit, i cili u shfaq premierë të martën në mbrëmje në Tiranë.

Alimani i tha BIRN në një intervistë se filmi ishte “një mënyrë për t’u kërkuar falje” viktimave të komunizmit, për të cilët ai beson se meritojnë një ndjesë nga shoqëria shqiptare.

“Të gjithë duhet ta bëjnë këtë, jo vetëm ata që kryen krime, por edhe ata që nuk folën, ata që qëndruan indiferentë dhe ata që i miratuan ato. Mendoj se si shqiptar, ky film është ndjesa ime për këta njerëz,” tha ai.

“Po kuptoj me kalimin e kohës se jam duke bërë një pastrim, një katharsis shpirtëror dhe unë isha shumë i ri në atë sistem, nuk isha anëtar i asnjë organizate [komuniste], asgjë. Por kjo është detyra juaj, është detyrimi juaj ndaj historisë së vendit tuaj,” këmbënguli ai.

Gratë që u internuan në kampin e punës në Gradishtë ishin fëmijë të njerëzve që ishin akuzuar për krime kundër regjimit represiv komunist, ose të afërm të atyre që ishin arratisur nga Shqipëria. Disa prej grave lindën në kamp, ndërsa të tjerat u dërguan atje me nënat e tyre kur ishin të vogla.

Familje të tëra u internuan në kampin e Gradishtës, thotë në film Fatmira Bajo: “Imagjinoni një fëmijë rreth 12 vjeç, gjyshen time të vjetër, mamanë shtatzanë dhe dy motrat e mia më të vogla”.

Të internuarit kishin disa të drejta dhe lejohej të dilnin nga kampi vetëm me leje – për të punuar në punë që u caktoheshin nga autoritetet ose për fëmijët që shkonin në shkollë.

Por ata konsideroheshin “armiq të popullit” nga komunistët. Ata jetonin në baraka të improvizuara dhe nuk kishin të drejtën e arsimimit pas moshës 14 vjeç, kur duhej të shkonin të punonin në ara.

Dokumentari ka përdorur pamje të arkivave për të treguar se si jetonin të internuarit dhe se si gratë kryenin punë të rënda në bujqësi. Njëra prej tyre, Eva Pervizi përshkruan kushtet tejet të vështira: “Litari i thesit më futej thellë në shpatull. Balta. Na caktuan të hapnim kanale me lopata dhe shata. I ftohti. Lagështira. Çizmet tona nuk e mbanin kurrë ujin jashtë”.

‘Njoha jetën e tyre’


Regjisori Bujar Alimani me protagonistet e dokumentarit “Fluturat”. Foto kortezi: Bujar Alimani.

Alimani është nga Patosi, jo larg nga kampi i Gradishtës. Ai iku nga Shqipëria në vitin 1992 për në Greqi dhe gjatë tetë viteve të fundit ka jetuar në Shtetet e Bashkuara.

“Kam shok një djalë që e takova në Shtetet e Bashkuara, ku unë jetoj. Ai kishte lindur dhe ishte rritur në kampin e Gradishtës, ndërsa familja e tij e kishte origjinën nga veriu. Kështu u interesova të dija për jetën e tyre,” tha ai.

Alimani e dinte ndërkohë që njerëzit e persekutuar nga sistemi komunist dërgoheshin në kampe internimi, por shoku i tij i tha shumë më tepër.

“Njoha përditshmërinë e tyre, stinët, mënyrën e jetesës, mënyrën e të jetuarit, fejesat, martesat, vdekjet. Shumë prej tyre ishin internuar për shkak se prindërit apo gjyshërit e tyre ishin të arratisur [nga Shqipëria], bënin jetë paralele në Perëndim dhe ishte shumë e çuditshme; a komunikonin me njëri-tjetrin, a sillnin gjëra, a i lejonte sistemi letrat, a e mernin vesh ata që gjyshi që ishte arratisur kishte vdekur?” pyet ai.

Ai zbuloi se zakonisht të internuarit e mësonin se i afërmi i tyre kishte vdekur, por shumë kohë pasi kjo kishte ndodhur.

‘Shqipërisë i vjen turp për kujtimet e saj’


Regjisori Bujar Alimani gjatë xhirimeve. Foto kortezi: Bujar Alimani.

Alimani thotë se beson se Shqipëria ka një problem me kujtesën kolektive të viteve komuniste. Dosjet e mbajtura nga regjimi i rrëzuar nuk janë hapur plotësisht për publikun, duke e bërë të vështirë krijimin e një panorame të plotë të asaj që ndodhi.

“Përsa kohë që dosjet e komunizmit nuk janë hapur, Shqipëria po i fshihet kujtimeve të veta,” tha ai.

“Ka turp për kujtimet e saj. Sigurisht, moshapja e dosjeve për kaq kohë çfarë tregon? E vërteta po fshihet”.

Pasi punoi ngushtësisht me ish-të internuarat, Alimani thotë se gjëja që i mbajti ato ishte “ndjenja e unitetit mes njëra-tjetrës” dhe “dinjiteti njerëzor”.

Shumica e grave u larguan nga vendi në vitet ’90, pas rënies së komunizmit.

“Disa prej tyre ia kanë mbyllur derën Shqipërisë dhe nuk duan t’ia dinë më për të dhe kjo për arsye të kuptueshme, vuajtjet që kanë kaluar. Disa prej tyre i kishin prindërit në burgje në Spaç dhe Burrel dhe disa prej tyre u pushkatuan,” tha ai.

“Njëra prej grave po më thoshte që ‘e shoh Gradishtën në ëndërr’. Pra, si mund ta kalosh këtë gjë, si mund t’i vendosësh kapakun?” pyet ai.

“Ti e jetove jetën tëndë atje…ata të morën rininë, morën gjithçka. E shkuara, edhe kur nuk mbahet mend drejtpërdrejt, është brenda jush”.

BIRN

[Albo]

[Albo]

“Fluturat”, dokumentari mbi rrëfimet e vajzave të kampeve të diktaturës: Për turpin tonë persekutorët vdiqën në shtëpi jo në burg



Në Ditën Ndërkombëtare të Personave të Zhdukur më 30 gusht u shfaq në Tiranë dokumentari i regjisorit Bujar Alimani, “Fluturat”, që ndjek jetën e 21 vajzave, të cilat jetuan në kampin e internimit të Gradishtës dhe Savrës në Lushnjë gjatë regjimit komunist në Shqipëri. Historitë e dënimit të familjarëve për arsye politike, persekutimit të tyre, dehumanizimit, e jetës me stigmën si armiq të popullit pasi ju ishte marrë liria e pasuria, vijnë të rrëfyera prej vetë 21 vajzave që tregojnë njëherësh edhe qëndresën e mbijetesën dhe luftën për të mos humbur veten.

Filmi ndjek rrëfimet e tyre në kamp, në kishën ku luteshin e gjenin forcë, ndërsa imazhet e tyre vijnë me ngjyra, për të treguar triumfin mbi të keqen, siç thekson regjisori.

“Nuk doja t’i trajtoja si viktimë. E kaluara jonë është e papastruar, kemi nevojë të përballemi me të shkuarën, për sa kohë ne do mbetemi i dosjeve në sirtar dhe i të vërtetës që nuk thuhet e i batutës, “ashtu ishte koha”, do mbetemi peng i së shkuarës. Duhet të pastrohemi njëherë e mirë me të, sado e fortë të jetë ajo”, tha Alimani.

Shfaqja e dokumentarit u bë në bashkëpunim me Autoritetin për Informim mbi Dosjet e Ish Sigurimit të Shtetit, ndërsa kryetarja dha një mesazh.

“Nëse lëmë dokumentet e Sigurimit të thonë të vërtetën tuaj është gabim. Ata thonë ata gjërat që duan të thonë. Duke bashkëpunuar me ju dhe me artistë se Bujari plotësojmë atë që është aty.”, pohoi Sula.

Ato që dukeshin ëndrrat e tyre më të pamundura brenda kampeve me tela me gjemba të diktaturës, sot i kanë realizuar duke e ndërtuar jetën e tyre mes Shqipërisë dhe Perëndimit. Megjithëkëtë, vajzat dhe familjet e tyre e kanë parashikuar se ardhja e lirisë nuk do të sillte drejtësi.

“E vetmja gjë që na ka mbetur është të merremi me kujtesën. Fatkeqësisht për turpin tonë si shoqëri, persekutorët, bashkëpunëtorët, kriminelët e diktaturës kanë dhënë shpirt paqësisht në shtretërit e tyre dhe në komfortin e shtëpisë së tyre dhe jo në burgjet ku do të ishin. Pjesa tjetër kanë depërtuar në institucionet shtetërore. Ne jemi ende të persekutuar”, theksoi Ritvana Mena.

Jetët e tyre në kamp duken si ëndërr. Kampet janë shkatërruar si për të fshirë atë që ndodhi në to, duke zhytur në baltën që i rrethonte, vragat e forta të jetëve që u syrgjynosën atje. Balta tashmë është shpërndarë kudo si metaforë e mohimit të fateve njerëzore dhe përgjegjësive shoqërore e shtetërore. Ndërsa “Fluturat”, përtej triumfit personal, u rrekën të ikin larg nga atdheu që në fillim i izoloi dhe më pas nuk ju dha vendin e mohuar.



Balkanweb