Shqiptarët në protesta kërkojnë dorëheqjen e ministrave përgjegjës për vdekjen e vogëlushes në plazh

[Albo]

Mbyllet protesta, qytetarët: Peticion në gjithë Shqipërinë për shkarkimin e ministrave



Protesta për herë të dytë, ku kërkohet drejtësi për 7-vjeçaren Jonada Avdia filloi para Ministrisë së Brendshme në orën 19:30 dhe u mbyll para Kryeministrisë në orën 21:00.

Qytetarët provuan edhe të telefonojnë live kryeministrin Edi Rama, për t’i kërkuar dorëheqjen e ministrave si prindër, por megjithëse zilja ra, nuk pati përgjigje. Ata kanë deklaruar se do të vijojnë të kërkojnë drejtësi për Jonadën dhe paralajmëruan një peticion për shkarkimin e dy ministrave.

“A duhet të mbahet përgjegjësi nga dikush në këtë vend. Ne do vazhdojmë duke kërkuar drejtësi për Jonadën. Ne do të ndërmarrim një peticion në gjithë Shqipërinë, online dhe fizikisht duke i kërkuar kryeministrit të shkarkojë Kumbaron dhe Çuçin. Këtë e bëjmë për Jonadat e tjera”, tha e afërmja e 7-vjeçares.

Qytetarët kërkojnë dorëheqjen e ministrit të Brendshëm, Bledi Çuçi, ministres së Turizmit, Mirela Kumbaro dhe të drejtorit të Policisë, Gledis Nano. Qytetarët kishin vendosur një afat prej 72 orësh, por një natë më parë afati skadoi. Kjo është hera e dytë që qytetarët dalin në shesh për të njëjtën arsye.

[Albo]

Fëmijët ulen në shkallët e Kryeministrisë: Drejtësi për Jonadën

Të ulur këmbëkryq te shkallët e Kryeministrisë në protestën për Jonadën, janë edhe fëmijët që janë edhe sa mosha e 7-vjeçares. Fëmijët e shoqëruar nga prindërit mbajnë pankarta në duar që shkruajnë: “Drejtësi maksimale që Jonada të pushojë në paqe”.



Koha Jone

[Albo]

Bojë e kuqe në murin e Ministrisë, qytetarët: Është gjaku i Jonadës dhe i çdo jete të prerë në mes



Në mënyrë simbolike, qytetarët kanë lyer me bojë me të kuqe murin e Ministrisë së Brendshme. Sipas tyre, boja e kuqe përfaqëson gjakun e humbur të Jonada Avdias dhe të gjithë jetëve të prera në mes për fajin e shtetit.

“Ky është gjaku që ka shkaktuar Kumbaro, ky është gjaku që ka shkaktuar Çuçi, ky është gjaku që shkaktoi Nano, ky është gjaku i Jonadës dhe jo vetëm, gjaku i çdo jete të prerë në mes”.



Koha Jone

[Albo]

Pas “gjakut” që lyen Ministrinë, qytetarët ulen këmbëkryq para Kryeministrisë



Zhvendoset protesta nga ana e qytetarëve për vdekjen e 7-vjeçares Jonada Avdia, nga Ministria e Brendshme përballë Kryeministrisë.

Qytetarët dhe aktivistët e Shoqërisë Civile qëndruan përreth 40 minutash para Ministrisë.

Ata kërkojnë dorëheqjen e ministrave Bledi Çuçi dhe Mirela Kumbaros si dhe Drejtorit të Përgjithshëm të Policisë së Shtetit, Gledis Nanos.

Koha Jone

[Albo]

“Çdo i fortë në këtë vend na i shëmton jetën”, avokati Adriatik Lapaj i bashkohet protestës



Edhe avokati Adriatik Lapaj i është bashkuar protestës së sotme qytetare para ministrisë së Brendshme, ku kërkohet drejtësi për vrasjen e vogëlushes Jonada Avdia nga skafi që drejtohej nga komisari Arjan Tase.

“Unë babai i një vajze, fatkeqësisht mund të ndodhej ime bie. Ne duhet të reagojmë edhe kur dëmi ndodh tek te tjerët. Ajo që ka ndodhur aty është dështimi i sistemit, dështimi i strukturave për të zbatuar menaxhimin e plazheve. Kjo bën që humbet një jetë. Jeta e asaj vajze është potencialisht jeta e cdo fëmije

Duke neglizhuar, duke e trajtuar hallin si të tjetrit ne qëndrojmë një shoqëri e përçarë dhe cdo i fortë me 5 lekë në këtë vend na i shëmton jetën dhe cdo ministër na shpërfill.

Qeveritë zgjidhen për të marrë masa që mos shkohet tek ngushëllimet. Kryeministri shprehet me vendime. Vendimet që duhet të marrë në këtë rast duhet të jenë shkarkime të personave përgjegjës, për të dhënë mesazhin që ne nuk i marrin në mbrojtje ata që shkelin ligjin. Kjo është një protestë shumë qytetare që ka në qendër jetën”, tha Lapaj per News24.

Koha Jone

[Albo]

“Do vijnë ditë më të zeza në shtator”, qytetari në protestë: Të ikë Rama i pari



Këtë të hënë po mbahet protesta e dytë e organizuar nga shoqëria civile e mbështetur nga partitë politike për vrasjen e 7-vjeçares Jonada Avdia nga skafi që drejtohej nga polici Arian Tase. Qytetarët janë mbledhur sërish te Ministria e Brendshme. Ata shprehen se ka shumë arsye për të protestuar dhe se shteti nuk ka derë të hapur për hallet e qytetarëve. Njëri prej tyre tha se është Edi Rama ai që duhet të iki i pari, si edhe foli për një skenar me ditë më të zeza në shtator.

“Sot jam në këtë protestë për të protestuar kundër kokëfortësisë së kryeministrit që nuk shkarkon dy ministra. Nuk kam ardhur as për të mbështetur as ndonjë forcë politike, jam qytetar i lirë, i thjeshtë. Jam kundër kësaj arrogance. Në Holandë policia qëlloi një studente dhe ministri dha dorëheqjen.

Ministrisë së Brendshme duhet t’i hiqet drejtuesi politik që është koka e gjarprit. Ministrisë së Turizmit duhet t’i hiqet Kumbaro që shiti Butrintin. Në Shqipëri po komandojnë globalistët.

Arrogancën e kryeministrit dhe kokëfortësinë e tij për ta quajtur një gjë kalimtare, e dënoj me forcën e votës dhe shpirtit. Është arrogant, i pari që duhet të japë dorëheqjen është kryeministri. Pastaj ministri Çuçi dhe Kumbaro. Është ai përgjegjësi. Prisni se do vijnë ditë më të zeza në shtator. E keqja është derë më derë. Shqiptarët kanë 30 vjet që flenë gjumë. Kur të vijë e keqja, do thonë ua ç’na gjeti, prandaj duhet të protestojmë”.

Koha Jone

[Albo]

Qytetarja e telefonon për t’i kërkuar shkarkimin e ministrave, Rama nuk i përgjigjet



Pak para se protesta qytetare për vrasjen e 7-vjeçares Jonada të përfundonte, një qytetare mori në telefon Edi Ramën. Pedagogia dhe e afërmja e vogëlueshes, Ilirjana Kuçana, kërkoi të fliste, por kryeministri nuk e hapi telefonin.

“Po telefonojmë live kryeministrin për t’i kërkuar dorëheqjen e ministrit të Brendshëm dhe asaj të Turizmit. Rama nuk e hap telefonin. Ai nuk është kryeministri i popullit, por ne do të vazhdojmë të kërkojmë drejtësi për Jonadën në çdo institucion.

Ne do të ndërmarrim një peticion në gjithë shqipërinë, duke i kërkuar Kryeministrit të vendit të shkarkojë Kumbaron dhe Çuçin. Këtë do ta bëjmë për Jonadat e tjera të Shqipërisë. A duhet që në këtë vend të mbahet përgjegjësi”, tha Kuçana.

Koha Jone