Dosja e inceneratorëve: SPAK arreston ish-ministrin e mjedisit Lefter Koka

[Duke_Of_Arberia]

Në fillim të këtij shtatori, pak ditë para se të fillonte sesioni i ri parlamentar, shumëkush mbeti i çuditur kur dëgjoi se deputeti i sapo zgjedhur i PS-së, Lefter Koka kishte dhënë dorëheqjen. Kjo habi bëhej edhe më e madhe nga mungesa e arsyetimit të këtij akti në njoftimin që vetë Koka bëri në Facebook. Shprehja se “…është gjithmonë e vështirë të ndalesh një moment dhe të vlerësosh se kur është koha e duhur për të mbyllur një cikël,” nuk i thoshte asgjë kureshtarëve.


Por, për ata që i njohin kulisat dhe prapaskenat e politikës nuk kishte asnjë mister. Lefter Kokën po e lëshonin ata që e kishin mbrojtur dhe përdorur, për ta hedhur në kthetrat e drejtësisë. Edi Rama ia kishte rrëmbyer atë Ilir Metës, e kishte përdorur për ta lënë LSI-në pa deputet në Durrës, e kishte bërë pjesë të listës përkrah me emrin e tij në këtë qytet, tani ia kishte hequr vështrimin dhe mbështetjen. Ashtu si me skenarin e arrestimit të zyrtarëve të uniformave të policisë, që u pushuan nga puna para se të prangoseshin edhe me Kokën u ndoq e njëjta linjë. Kryeministri që kontrollon gjithçka edhe në SPAK, e mënjanoi Kokën nga grupi parlamentar në mënyrë që kur të vinte ora e spektaklit me drejtësinë, ai dhe partia në pushtet të njolloseshin sa më pak.

Ky moment mbërriti tre muaj më pas dhe sot ish ministri, kryebashkiaku dhe deputeti 57 vjeçar akuzohet nga SPAK për veprat penale: “shpërdorim detyre”, “pastrim parash” dhe “korrupsion” në mega aferen e inceneratorëve.

Pak a shumë, në sferat e larta të politikës të gjithë e dinin se kjo do të ndodhte. Rreth një muaj para zgjedhjeve, edhe e hidhëruar që Koka e kishte tradhëtuar, shefja e LSI-së, Monika Kryemadhi e denoncoi atë në prokurorinë speciale për aferën e inceneratorëve. LSI e akuzoi Kokën si përfitues të 3.3 milionë eurove nga koncesionari i incineratorit të Elbasanit, një kontratë që u lidh nga vetë Koka si Ministër i Mjedisit.

Sipas denoncimit, ish ministri kishte ngritur një skemë kompanish fantazëm me të afërm të tij, ku këto lekë paguheshin nga kompanitë e incenerattorëve. Denoncimet e bëra me gojën e Kryemadhit shkuan edhe më tej. Sipas tyre, Lefter Koka si ish ministër i Mjedisit është vetëshpallur si autoriteti nënkontraktor që do të negocionte me kompaninë e inceneretaorit të Tiranës, ndërkohë që këtë tagër e ka vetëm Këshilli i Ministrave. Gjithashtu Koka nuk ka lënë gjurmë vetëm me këtë veprim. Ai dyshohet se ka gënjyer Këshillin e Ministrave duke nënshkruar me dorën e tij se ngritja e inceneratorit nuk do të kishte impakt mbi buxhetin e shtetit. Këtë deklarim ai e ka paraqitur edhe pranë Këshillit të Ministrave gjatë procedurës së miratimit të VKM për Dhënien e Bonusit prej 8% të pikëve shoqërisë “Integrated Energy BV”. Po Lefter Koka ka shkelur ligjin duke mos organizuar një garë ndërkombëtare me investitorë të huaj, sikurse kërkohet.

Natyrisht e gjithë kjo panoramë e zymtë nuk ka qenë e tillë vite më parë, kur Rama e falenderonte Lefter Kokën teksa me një ceremoni pompoze e inaguroi inceneratorin e parë të Elbasanit duke e shpërngulur gjithë qeverinë në kantierin e tij. “I jam mirënjohës ministrit të Mjedisit (Lefter Koka) dhe ministrit të Financave, që ndonëse gjirokastrit, e zgjidhi deri në fund qesen…,” tha Rama nga podiumi i përurimit në Prill 2017.

Dy vjet më pas, Lefter Koka do të bëhej edhe më i domosdoshëm. Kur e gjithë opozita dogji mandatet, i shantazhuar me nënshkrimet që pati hedhur për inceneratorët, Koka nuk pranoi ta linte parlamentin. Ai u bë një nga deputetët e perferuar të ambasadave perëndimore që i përshëndetën të gjithë ata që nuk shkuan pas interesave personale të liderëve që “për interesat e tyre personale minonin të ardhmen e vendit”.

Por Ramës, Lefter Koka nuk iu desh vetëm për të bërë rolin e opozitarit fallco. Për të gjithë është tashmë e njohur ajo video e kryeministrit me “Terin”, në të cilën, nën avujt e disa shisheve verë, ftonin dhe Nasip Naçon të braktiste LSI-në dhe t’i bashkohej fushatës zgjedhore të PS-së.

Ajo që u pa në ato imazhe vulgare dhe të neveritshme për këdo që ka një koncept normal për politikën, pas pak kohësh u bë realitet. Edhe Koka edhe Naço konkuruan me PS-në dhe arritën t’i heqin LSI-së dhe opozitës më së paku një mandat në Durrës dhe një mandat në Berat.

Dhe këtu misioni i Lefter Kokës mbaroi. Firmat e tij të dikurshme, që shërbyen për ta shantazhuar qoftë për të bërë opozitën fallco, qoftë për ta përdorur si rilindas në zgjedhje, tani mund t’i shpiheshin drejtësisë. Kujdesi i fundit duhej të ishte që pasi e përdorën si mish për top në garën elektorale, tani Koka as mos e njolloste PS. Ai u detyrua të japi dorëheqjen në shtator, tre muaj para se SPAK ta akuzonte për korrupsion dhe pastrim parash. Tani mbi të rëndojnë firmat që ka hedhur për shpënien përpara të aferës së inceneratorëve, një mega skandal për të cilin Edi Rama ka vënë të nënshkruajnë vetëm vartësit.

©Lapsi.al

[Albo]

Dosja e inceneratorëve/ SPAK arreston ish-ministrin e Mjedisit Lefter Koka, akuzohet për shpërdorim detyre dhe korrupsion



TIRANË
Arrestohet nga SPAK ish-ministri i Mjedisit Lefter Koka. Sipas burimeve, bëhet fjalë për hetimin e nisur për çështjen e inceneratorëve, një kallëzim i bërë nga Lëvizja Socialiste për Integrim. Raportohet se Koka, akuzohet për shpërdorim detyre, korrupsion dhe pastrim parash.

Koka, ka qenë Ministër i Mjedisit nga LSI në vitet 2013-2017, më pas deputet i PS, 2017-2021. Ai fitoi mandatin në 25 prill, por më pas hoqi dorë. Urdhër-arresti për të u firmos nga prokurorët Dritan Premci dhe Vladimir Mara.

(BalkanWeb)

[Albo]

“Lefter Koka, peshku i vogël, maja e ajsbergut”, Klodiana Lala zbulon: Zyrtarë të niveleve të larta, ministra dhe deputetë, gati të arrestohen nga SPAK

Gazetarja e ‘News24’ Klodiana Lala deklaroi se të tjerë zyrtarë të lartë, në novel ministrash dhe deputetësh priten që të arrestohen nga SPAK.

E ftuar në “Opinion’ Lala tha se arrestimi i ish-ministrit Lefter Koka, është vetëm maja e ajsbergut, pasi sipas saj, ai është vetëm peshku i vogël në këtë skemë të madhe abuzimi me inceneratorët.

“Pak para zgjedhjeve, LSI, pas një ‘divorci’ të vështirë që pati me zotin Koka, dërgoi një kallëzim të detajuar, që në thelb është konfuzioni i ditës së sotme. LSI ngrinte pretendime në atë kohë se Lefter Koka asokohe ministër i Mjedisit, ka përfituar nga dy kompanitë koncensionare, rreth 3.6 mln euro. Pardje u firmos urdhri i arrestit ka një vendim të marrë në mungesë nga gjykata. Dje është bërë sekuestrimi i inceneratorit të Elbasanit, një kompani e zotit Koka. SPAK ka nën hetim dhe disa zyrtarë dhe ish-zyrtarë të tjerë, të cilët në fakt, nuk mund ta aludojë me emra, janë gati duke u arrestuar. Zyrtar të niveleve të lartë, ministra dhe deputetë. Janë dy inceneratorë të tjerë që nuk janë prekur. Janë duke u hetuar. Po të shihni sot varësit e zotit Koka, ata janë deputetë të Kuvendit. Nuk është peshku i madh Lefter Koka. Ai ka qenë ministër i Mjedisit, si autoritet, që firmoste kontratat e koncensionit, Por shumat e parave, lidhjet e biznesmenëve me zyrtarët, zoti Koka është pjesë e një afere shumë të madhe. është goditje e SPAK që duhet përgëzuar. Nëse ngelet në këtë nivel, është goditje gjysmake. Është maja e ajsbergut.”, tha Lala.

Kujtojmë se biznesmeni Klodian Zoto dhe Stela Gugalli janë shpallur në kërkim, ndërsa ndaj tyre është caktuar masa ‘arrest me burg’.

(BalkanWeb)

[Albo]

'E dinim prej 4 ditësh që do arrestohej'/ Artan Hoxha tregon bisedën me Nard Kokën, vëllanë e Lefter Kokës



Gazetari Artan Hoxha ka zbuluar bisedën me Nard Kokën, vëllanë e ish-ministrit Lefter Koka, pas arrestimit të këtij të fundit lidhur me aferën e inceneratorir rë Elbasanit.

Hoxha thotë se ish-ministri i Mjedisit e dinte prej 4 ditësh që do të arrestohej por nuk ishte arratisur.

Një gjë të tillë atij ia ka pohuar në bisedë e sipër Nard Koka.

Në emisionin 'Log' në ABC, gazetari Artan Hoxha tha se pronarët e inceneratorëve Klodian Zoto dhe Stela Gugalja ndodhen brenda Shqipërisë, pasi nga sistemi TIMS nuk rezultojnë të jenë larguar.

Sipas tij, ata janë informuar për arrestimin, duke theksuar se operacioni i SPAK është dekonspiruar.

"Një nga pronat e sekuestruara është kantina e pijeve "Skënderbeu". Unë dua të jap vetëm dy gjëra që më ranë në sy, së pari këto lloj arrestimesh kryhen me një skuadër të ngushtë të BKH me njësi të caktuara të policisë kryesisht janë njësi civile që marrin një objektiv dhe e mbajnë në vëzhgim para se të marrin vendimin e gjykatës.

Koka u kap sot në mëngjes në një lokal. Ndërkohë, Klodian Zoto nuk rezulton të ketë dalë nga Shqipëria, pra, ai është në Shqipëri. Edhe fakti që, policia s’e ka gjetur dot, por nga kërkimet e tjera rezulton se ai është në Shqipëri.

Personi i 3-të, Stela, thuhet se është brenda Shqipërisë, por nga informacionet që kam unë, ajo është jashtë.

Nëse u arrestua i pari Koka, pse duhet të dilte kaq shpejt lajmi pa u arrestuar dy të tjerët? A ka ndonjë rrjedhje informacioni që këta dy të tjerët i morën masat?

Nga kontakti me Nard Kokën, një personazh shumë kontravers e kam pyetur në lidhje me arrestimin, atij i kanë thënë kemi këtë urdhër duhet të shkojmë në shtëpi, atje është bërë kontrolli i shtëpisë nja dy orë. E pyeta a keni pasur dijeni? Nardi më tha “na thanë po na ka ardhur një informacion para katër ditësh dhe vëllai zgjodhi këtë, që të mos largohej”, tha Hoxha.

Syri

[Albo]

VIDEO-SYRI TV/ Rama mbrojti inceneratorin e Elbasanit kur u pyet nga Shkullaku

1 vit më parë, kryeministri Edi Rama ka marrë në mbrojtje publikisht procedurat e ndjekura nga qeveria për inceneratorin e Elbasanit. Në përgjigje të pyetjeve te ngritura nga gazetari Armand Shkullaku, Edi Rama ka justifikuar shumë fakte që lidheshin me dhënien e koncesioneve pa garë, procedura të kryera brenda një dite të vetme apo për kompani që nuk kishin kapitalin e nevojshëm për sipërmarrje të tilla si inceneratori i Elbasanit

SYRI TV

Kryeministri Edi Rama ka marrë në mbrojtje publikisht procedurat e ndjekura për inceneratorin e Elbasanit, të cilat rezultuan një skemë e mirëfilltë korrupsioni pas arrestimit nga SPAK të ish-ministrit Lefter Koka dhe shpalljes në kërkim të biznesmenëve të përfshirë në këtë afere. Jo më larg se në tetor të vitit të kaluar, Edi Rama u dha përgjigje pyetjeve të ngritura nga gazetari Armand Shkullaku ku ngriheshin dyshime të forta mbi procedurat e dhënies së koncesioneve pa garë apo me një ofertues të vetëm.



1) Përse procedura e dhënies së koncensioneve PPP u bë pa garë, me një ofertues të vetëm dhe fituesit nuk kishin as kapitalin e nevojshëm dhe ekspertizën (ose punë të ngjashme) për një ndërmarrje të tillë që na kushton dhjetëra-milionë euro?

Procedura për Ndërtimin e Impiantit të Prodhimit të Energjisë nga Mbetjet në Fier dhe në Tiranë është zhvilluar nëpërmjet një tenderi ndërkombëtar, ku për mbi 50 ditë i është dhënë mundësia çdo operatori vendas apo të huaj të paraqesë ofertën e tij.

Sipas legjislacionit në fuqi, kriteret e përgjithshme dhe të veçanta të pjesëmarrjes në tender kanë qenë të tilla që i jepnin mundësinë çdo operatori vendas apo të huaj me eksperiencën e nevojshme dhe aksesin në burimet e nevojshme financiare për të marrë pjesë. Prezantimi ose jo i një oferte është më pas zgjedhje individuale e çdo operatori dhe s’mund të imponohet nga qeveria.

Ndërkohë, procedura e ndjekur për ndërtimin e impiantit të prodhimit të energjisë Elbasan është ajo e negociimit pa shpallje paraprake, ku kontrata është miratuar me Vendim të Këshillit të Ministrave, procedurë e bazuar tërësisht në ligj, ardhur si rezultat i shpalljes së gjendjes së emergjencës mjedisore nga Këshilli Bashkiak Elbasan, si fillim, edhe më pas nga Komiteti Ndërministror i Menaxhimit të Mbetjeve, i cili është organi më i lartë për menaxhimin e mbetjeve në vend.

Në çdo rast ofertuesi, referuar legjislacionit në fuqi, ka provuar shkresërisht se ka të gjithë ekspertizën e nevojshme si dhe aksesin në burimet financiare të nevojshme për të ndërtuar një kryevepër të tillë inxhinierike.

Kapitali të cilit ju i referoheni nuk është i konglomeratit të shoqërive që kanë marrë përsipër ndërtimin e këtyre veprave, por i shoqërisë koncensionare, e cila është një SPV (Special Purpose Vehicle) e cila krijohet dhe regjistrohet vetëm mbas shpalljes së fituesit sipas kërkesave të ligjit për koncensionet.

Janë shoqëritë themeluese të kësaj SPV-ve që kanë edhe eksperiencën e nevojshme dhe aksesin në burimet financiare për një sipërmarrje të tillë.

Kryeministri Rama ka justifikuar në këtë mënyrë, procedurat e ndjekura nga qeveria e tij për shpalljen e fituesit për inceneratorin e Elbasanit, pas shqetësimeve që brenda një dite mbyllet e gjithë kjo procedurë, përfshirë transfertat e parave drejt kompanisë private.

2) Si ka mundësi që brenda një dite të vetme, shpallet fituesi, mbyllen ankimimet, negociohet një kontratë 40 faqe, nënshkruhet, bëhen disa VKM dhe nisin transfertat e parave nga buxheti drejt kompanisë private?

Komenti në formë pyetje është tërësisht i pavërtetë! Procedura për Impiantin e Prodhimit të Energjisë Fier ka filluar në datën 5 Tetor 2015 kur është paraqitur dhe propozimi i pakërkuar dhe ka përfunduar me nënshkrimin e kontratës në datën 24 Tetor 2016.

Pra, një procedurë e cila ka kaluar nëpërmjet një tenderi ndërkombëtar dhe ka zgjatur plot 12 muaj. Gjatë kësaj procedure është miratuar vetëm një VKM, sipas parashikimeve të legjislacionit në fuqi, nëpërmjet së cilës i jepen pikët bonus shoqërisë që ka paraqitur propozimin e pakërkuar.

Procedura për Zonën e Trajtimit të Mbetjeve Sharrë ka filluar në datën 23 Qershor 2016 kur është paraqitur dhe propozimi i pakërkuar dhe ka përfunduar me nënshkrimin e kontratës në datën 31 Gusht 2017.

Pra dhe kjo një procedurë ka kaluar nëpërmjet një tenderi ndërkombëtar dhe ka zgjatur plot 14 muaj. Gjatë kësaj procedure është miratuar vetëm një VKM, sipas parashikimeve të legjislacionit në fuqi, nëpërmjet së cilës i jepen pikët bonus shoqërisë që ka paraqitur propozimin e pakërkuar.

Procedura e ndjekur për Impiantin e Elbasanit ka qenë ajo Negociimit pa shpallje paraprake ku kontrata është miratuar me vendim të Këshillit të Ministrave, procedurë kjo e parashikuar plotësisht në ligj dhe miratuar si rezultat i shpalljes së gjendjes së emergjencës fillimisht nga Këshilli Bashkiak Elbasan dhe më pas nga Komiteti Ndërministror i Menaxhimit të Mbetjeve si organi më i lartë përgjegjës për menaxhimin e mbetjeve.

Kur aplikohet procedura e negociimit në kushtet e emergjencës, të gjitha institucionet e përfshira janë të detyruara/angazhuara të japin kontributin e tyre në një kohë sa më të shpejtë. Në situata të emergjencës së shpallur, angazhimi për të mbyllur të gjitha proceset e parashikuara në ligj në një kohë sa më të shpejtë është detyrim ligjor dhe jo shkelje.

Gjithashtu, duhet sqaruar se për Impiantin e Elbasanit, qeveria shqiptare i ka filluar pagesat 7 muaj mbas fillimit të punimeve, kur subjekti koncensionar kishte bërë një sasi të konsiderueshme të punimeve. Në momentin e përfundimit tërësor të impiantit me vlerë 21 milionë euro pa tvsh, qeveria kishte paguar vetëm 5.57 milionë euro ose 26.5%.

Gjithë pjesa tjetër e investimit ishte mbuluar nga vetë koncensionari. Prej vitit 2017 e deri sot koncensionari po vazhdon ta mirëmbajë dhe operojë këtë impiant pa asnjë të ardhur shtesë nga shitja e energjisë, duke mbuluar vetë të gjitha kostot operative, ndryshe nga sa ishte parashikuar në studimin e fizibilitetit.

Por prokuroria e posaçme, me arrestimin e Leftër Kokës dhe shpalljen në kërkim të biznesmenëve të përfshirë në këtë aferë korruptive multimilionere, ka rrëzuar justifikimet e sipërpërmendura të Kryeministrit Edi Rama. Transparenca e pretenduar nga Edi Rama, vetëm për inceneratorin e Elbasanit ka rezultuar në 5 milion euro abuzim nga paratë e taksapaguesve shqiptarë.

Syri

[Albo]

“Po Alqi po vrapon?”/ Ish-deputetja e LSI denoncon deputetin socialist: Babai i tij është paguar nga inceneratorët 10 mln lekë në muaj



Në një postim në rrjetet sociale, duke publikuar edhe dy dokumente, Silva Caka pyet “a po fshihet babai i Alqit?”.

“Po babai Alqit që është paguar nga Inceneratorët 10 mln leke/muaj po fshihet??”.

“Po Alqi po vrapon??? Apo është ulur këmbëkryq në Parlamentin Shqiptar??? Nëse doni prova, i keni mu në mes të Kuvendit!!!”, e mbyll reagimin ish deputetja e LSI-së.

Reagimi i saj vjen pasi Prokuroria e Posaçme ka lëshuar urdhër arrest ndaj ish ministrit të Mjedisit Lefter Koka. Ndërsa GJKKO ka caktuar masat e sigurisë “arrest në burg” për dy administratorët e kompanive të përfshira në inceneratorin e Elbasanit, Klodian Zoto dhe Silva Gugallia.

“Po Alqi po vrapon?”, është pyetja e ish deputetes, e cila lidhet me reagimin e ambasadores amerikane Yuri Kim pas veprimet të SPAK.

“Veprimet e SPAK, sidomos këtë javë, tregojnë se askush nuk është mbi ligjin. Mund të vraponi por nuk mund t’i fshiheni më ligjit. Reforma në drejtësi po jep rezultate konkrete”, shkruajti ambasadorja Yuri Kim në Twitter.






Panorama

[Albo]

Zbardhet skema/ Si i përfitoi Lefter Koka 3,6 milionë euro nga dy kompanitë e inceneratorëve! Ja pronat që u vendosën në sekuestro

SPAK ka zbardhur skemën se si ish-ministri Lefter Koka është paguar nga dy kompanitë koncensionare të Inceneratorëve, të drejtura nga Klodian Zoto dhe nga Stela Gungallia.

Sipas SPAK ish-ministri i Mjedisit, Lefter Koka ka përfituar rreth 3, 685, 000 euro nga kompanitë “Albtek Energy me administatore dhe ortake të vetme Stela Gugallia dhe “Integrated Technology Services”, e drejtuar nga Klodian Zoto.

Prokuroria e Posaçme Anti-Korrupsion bën të ditur se paratë ndaj ish-ministrit janë dhënë tërhorazi nga kompani të të afërmëve të tij dhe janë maskuar sikur këto të fundit kanë ofruar shërbime.

“Nga veprimet hetimore të kryera dhe nga vlera provuese e provave të mbledhura krijohen dyshime të arsyeshme dhe të bazuara në prova dhe krijohet bindja se nga shoqëritë tregtare “Albtek Energy” sh.p.k. (shoqëria që ka përfituar konçensionin) dhe “Integrated Technology Services” sh.p.k. (shoqëria që ka zbatuar punimet për ndërtimin e objektit të konçensionit) janë pranuar fatura tatimore shitje dhe janë paguar detyrimet financiare për këto fatura tatimore për disa shoqëri tregtare, për punime që në të vërtetë nuk janë kryer nga këto shoqëri tregtare.

Shoqëria “Albtek Energy” sh.p.k. ka deklaruar në librin e blerjes faturat tatimore të shitjeve nga këto shoqëri tregtare në total në vlerën 368.672.760 lekë (ose rreth 2.950.000 Euro). Shoqëria “Integrated Technology Services” sh.p.k. ka deklaruar në librin e blerjes faturat tatimore të shitjeve nga këto shoqëri tregtare në total në vlerën 91.963.141 lekë (ose rreth 735.000 Euro).

Gjatë hetimeve paraprake për këtë proçedim penal janë mbledhur dhe janë siguruar provat e nevojshme që krijojnë dyshimin e arsyeshëm se shumat monetare 368.672.760 lekë dhe 91.963.141 lekë, që iu janë faturuar shoqërive “Albtek Energy” sh.p.k. dhe “Integrated Technology Services” sh.p.k. dhe që janë paguar më pas nga këto dy shoqëri tregtare, përbëjnë përfitime materiale të parregullta që i janë dhënë shtetasit L.K., në cilësinë e ish Ministrit të Mjedisit, në këmbim të favorizimit të padrejtë të shoqërisë “Albtek Energy” sh.p.k. në zhvillimin e proçedurës së dhënies së konçensionit dhe në lidhjen e kontratës së konçensionit me objekt “Ndërtimin dhe administrimin e impiantit të trajtimit të mbetjeve urbane të Qarkut Elbasan, për prodhimin e energjisë”.

Shtetasja S.G., në cilësinë e ortakut të vetëm dhe administratorit të shoqërisë “Albtek Energy” sh.p.k dhe shtetasi K.Z., në cilësinë e ortakut të vetëm dhe administratorit të shoqërisë “Integrated Technology Services” sh.p.k., kanë përdorur një skemë fiktive të kryerjes së pagesave, të realizuar nëpërmjet dy shoqërive tregtare respektive, për të mbuluar dhe për të fshehur natyrën e vërtetë të origjinës së paligjshme të shumave monetare, natyrën e vërtetë të transferimit dhe të zhvendosjes së tyre, të cilat në të vërtetë përbëjnë “përftim të parregullt”, si rrjedhim edhe produkt të veprës penale të korrupsionit.

Shtetasi L.K., në cilësinë e ish Ministrit të Mjedisit, ka kërkuar, ka pranuar dhe ka marrë nga shoqëritë tregtare “Albtek Energy” sh.p.k. dhe “Integrated Technology Services” sh.p.k., që janë përfitueset e kontratës së konçensionit, përfitimet e parregullta monetare, në mënyrë të tërthortë, nëpërmjet krijimit të një skeme fiktive për kryerjen e punimeve në shoqërinë konçensionare, duke përdorur disa shoqëri tregtare të tjera të kontrolluara në mënyrë të tërthortë prej tij, të kontrolluara prej personave familjarë të tij, si dhe të kontrolluara prej subjekteve tregtare në zotërim të tij. Marrja e përfitimeve është realizuar nëpërmjet skemës fiktive të kryerjes së punimeve dhe të kryerjes së pagesave, për të mbuluar dhe për të fshehur natyrën e vërtetë të origjinës së paligjshme të shumave monetare, natyrën e vërtetë të transferimit dhe të zhvendosjes së tyre, të cilat në të vërtetë përbëjnë “përftim të parregullt”, si rrjedhim edhe produkt të veprës penale të korrupsionit.

Bazuar në argumentet e mësipërme, janë krijuar dyshime të arsyeshme se shtetasit S.G. dhe K.Z. kanë konsumuar veprat penale “Korrupsioni aktiv i funksionarëve të lartë shtetërorë ose i të zgjedhurve vendorë”, kryer në bashkëpunim, si dhe “Pastrimi i produkteve të veprës penale apo i veprimtarisë kriminale” , kryer në bashkëpunim, të parashikuar nga nenet 245 e 25 dhe 287/2 i Kodit Penal”, thekson SPAK.

Po ashtu SPAK bën të ditur se ka vënë në sekuestro disa prona të Leftër Kokës.

“ Caktimi i masës së sigurimit pasurore “sekuestro preventive” për personin juridik “Albtek Energy” sh.p.k., me seli qëndrore në Elbasan, së bashku me pasuritë e paluajshme dhe të luajtshme në pronësi të tij, si pasuri që është përdorur për kryerjen e veprave penale.

Caktimi i masës së sigurimit pasurore “sekuestro preventive” për personin juridik “Integrated Technology Services” sh.p.k., me seli qëndrore në Tiranë, së bashku me pasuritë e paluajshme dhe të luajtshme në pronësi të tij, si pasuri që është përdorur për kryerjen e veprave penale.

Caktimi i masës së sigurimit pasurore “sekuestro preventive” për pasurinë në zotërim të shtetasit L.K., të “88, 19 %” të aksioneve në pronësi të tij në shoqërinë tregtare “Kantina e Pijeve Gjergj Kastrioti Skenderbeu” sh.a., me Nipt J61811527M, me seli në Rrashbull, Durrës, që iu korespondon vlera prej 442.972 lekë, si pasuri ekuivalente me një pjesë të produkteve të veprës penale.

Shërbimet e policisë gjyqësore të Drejtorisë së Policisë së Shtetit kanë ekzekutuar sot në datën 14.12.2021 masën e sigurimit personale të vendosur ndaj shtetasit L.K., si dhe janë duke u kryer veprimet e nevojshme për vënien në administrim të Agjensisë për Administrimin e Pasurive të Sekuestruara dhe të Konfiskuara Tiranë, të tre personave juridikë për të cilët është vendosur masa e sigurimit pasurore “sekuestro preventive”.”, thekson SPAK.

Panorama

[Albo]

Afera e inceneratorëve/ Basha paralajmëron: Duhen gjetur ata që janë në kërkim përpara se t’i vrasë dikush, në veçanti Stela Gugallja, se ata të tjerët janë ustallarë

TIRANË
Kryetari i PD-së Lulzim Basha tha sot se dy personat e shpallur në kërkim nga SPAK për aferën e inceneratorëve, Klodian Zoto dhe Stela Gugallja duhen gjetur përpara se t’i vrasë dikush duke theksuar se në krye të skemës është kryeministri Edi Rama. Ai tha se PD është në ballë të betejës me denoncimet, me kallëzimet, me kërkesën për vettingun e politikanëve, dhe do të vazhdojë të jetë në ballë të betejës derisa drejtësia t’i shkojë deri në fund.

“Komisioni hetimor do vazhdojë punën, jo për të hetuar, por për të ndihmuar. Komisioni parlamentar ka kërkuar transparencë, ata që pengojnë transparencën duhet të merren forcërisht dhe të çohen para komisionit”, tha Basha.

I pyetur nëse PD ka të tjera dosje dhe denoncime për afera korruptive, Basha pohoi, por deklaroi se sot thelbi është mafia e inceneratorëve dhe se nuk do të devijojë nga kjo çështje.

“Përgjigjja është po, por nuk kam ndërmend t’i jap kënaqësinë askujt të devijojë nga thelbi, thelbi sot është mafia e inceneratorëve, që beteja jonë është e drejtë, që duhet vazhduar me arrestime të tjera. Që duhet vënë në ndjekje penale kryeministri, sekretari i përgjithshëm i kryeministrisë etj. Duhen gjetur këta që janë në kërkim përpara se t’i vrasë dikush, në veçanti kjo Stela, se ata të tjerët janë ustallarë. Të gjenden llogaritë jashtë shtetit, pagesat.

Pa diskutim që ka afera të tjera, do vazhdojmë t’i diskutojmë dhe aferat e tjera, por sot do bëj gjithë përpjekjet e mia që t’ju jap fuqi ju si gazetarë dhe mediave tuaja që të mos i ikin as sot, as nesër, as pasnesër këtij skandali, kësaj mega afere që do të kishte çuar 4-5 drejtues të qeverisë në pranga”, tha kreu i PD.

Duke u kthyer tek korrupsioni në kohën e qeverisjes së PD, Basha garantoi se “jemi të vetëdijshëm dhe për gabimet tona dhe nuk do të bëhemi mburojë dhe nuk do ndalemi së pastruari brenda vetes këdo që ka shfrytëzuar pushtetin në kohën tonë për t’u pasuruar nëpërmjet korrupsionit”.

“Kam thënë fare qartë që pa diskutim ish-qeverisja e PD ka pasur korrupsion dhe që ne jemi të vendosur ta luftojmë atë për të ecur përpara për të ardhmen e shqiptarëve. Ta luftojmë atë brenda partisë sonë. Kemi gjëra për t’u krenuar, por edhe gjëra që na vjen turp.

Disa prej protagonistëve të këtyre aferave i tha thithur Rama si lubi, disa i ka bërë aleatë, disa në strukturat e tij, sepse ndajnë të njëjtat vese.

Nuk jemi të pavetëdijshëm që ka ndodhur korrupsion dhe në kohën tonë dhe që kjo plagë e madhe për shoqërinë nuk është krijuar vetëm nga Rama dhe PS, pa diskutim afera e inceneratorëve dhe afera të tjera, si në raportet ndërkombëtare tregojnë që qeveria Rama është qeveria më e korruptuar e 31 viteve tranzicion dhe më e korruptuar e Europës. Ne do bëjmë gjithçka për ta pastruar Shqipërinë nga kjo plagë, për ta luftuar armikun e mirëqenies së shqiptarëve. Po e bëjmë këtë me ata që kanë 8 vjet që qeverisin. Ka 4 vite që i ka çelësat e gjithçkaje. Kjo është detyra e parë, e dytë dhe e tretë, por ju garantoj se jemi të vetëdijshëm dhe për gabimet tona dhe nuk do të bëhemi mburojë dhe nuk do ndalemi së pastruari brenda vetes këdo që ka shfrytëzuar pushtetin në kohën tonë për t’u pasuruar nëpërmjet korrupsionit”, deklaroi Basha.

Balkanweb

[Albo]

Arrestimi i Lefter Kokës, reagon Rama: Çështja e ish-ministrit me SPAK, nuk është politike dhe partiake, por individuale

Kryeministri Edi Rama ka reaguar për herë të parë në lidhje me arrestimin e ish-ministrit Lefter Koka, si i përfshirë në aferën e inceneratoreve

Kreu i qeverise i ka kthyer përgjigje ndjekësve në rrjetin social ‘Facebook’, duke theksuar se çështja e ish-ministrit me SPAK-un dhe drejtësinë, nuk është as çështje politike dhe as partiake, as kolektive, po çështje individuale.

“Çështja e ish-ministrit me SPAK-un dhe drejtësin, nuk eshte as ceshtje politike, as ceshtje partiake, as ceshtje kolektive, po ceshtje individuale. Ne nuk e kemi udhehequr dhe nuk e mbeshtesim pa kushte Reformen ne Drejtesi, si pale politike po si force udheheqese politike e morale e shqiptareve pa dallim, keshtu qe per mua e per Partine Socialiste mbetet e pandryshuar vija e kuqe e dites se pare ne detyre”, përgjigjet Rama.

Sipas kryeministrit, cilidoqoftë, pa dallim partie duhet të përballet vetë me drejtësinë.

REAGIMI I RAMËS

Syrja Islami halle halle kjo dynja halli hallit nuk i ngjan thote populli��

Por qe t’i përgjigjem thelbit te komentit tënd, edhe impiantet moderne te përpunimit të mbetjeve, që i kane hapur rrugën e shpëtimit afatgjate nga ndotja e rende e plehrave zonës se Elbasanit, Tiranes e Fierit gjithashtu, edhe Reforma ne Drejtesi po se po, jane vepra te shumices sone qeverise per te cilat une jam e do te jem gjithnje krenar, keshtu qe euforia baltosese e atyre qe bejne politike me akuza e me moton shpif e shpif se dicka do mbetet, per arsye te ndalimit dje nga SPAKU te ish-ministrit te mjedisit, nuk me ben asnje përshtypje, sepse nga njera ane investimi ne Elbasan eshte aty, ne syte e te gjitheve e ne baze te kontrates tanime ai eshte prone publike e bashkise se Elbasanit qe do te sherbeje per te vazhduar mbrojtjen e zones nga ndotja, ndersa nga ana tjeter ceshtja e ish-ministrit me SPAK-un dhe drejtesine, nuk eshte as ceshtje politike, as ceshtje partiake, as ceshtje kolektive, po ceshtje individuale. Ne nuk e kemi udhehequr dhe nuk e mbeshtesim pa kushte Reformen ne Drejtesi, si pale politike po si force udheheqese politike e morale e shqiptareve pa dallim, keshtu qe per mua e per Partine Socialiste mbetet e pandryshuar vija e kuqe e dites se pare ne detyre: Cilidoqofte, pa dallim partie duhet te perballet vete me drejtesine! Dhe cilindoqofte nder ne, qe merret si i pandehur nga organet e pavarura te drejtesise, duhet te ballafaqohet me drejtesine bashke me avokatin e vet, sepse Partia Socialiste nuk eshte zyre avokatie e askujt prej nesh dhe deri ne vendimin perfundimtar gjyqesor, askush nder ne qe ka pune me drejtësinë nuk mund te jete pjese e familjes sone politike. Kaq.

Kjo eshte Partia Socialiste. Ky jam une miku im. Te pershendes ��



ARRESTIMI

Skuadra e Policisë Speciale e mbështetur edhe nga efektivë të Policisë së Durrësit zbarkuan paraditen e të martës në lagjen 1 të qytetit bregdetar për të vënë në pranga një nga individët më me influencë të zonës dhe jo vetëm, Lefter Kokën.
Pa shumë bujë, disa efektivë u ngjitën në pallatin ku banon familja Koka dhe bashkë me të u larguan.

“Pashë disa efektivë të Policisë që parkuan aty dhe pak minuta më vonë dolën bashkë me Lefterin. S’na shkoi mendja fare, pasi ishte pa pranga dhe fare i qetë si ai edhe policët që e shoqëronin. Menduam se mos kishte ndodhur ndonjë gjë nga bizneset e tij, pastaj mësuam se e kishin arrestuar. Nëpërmjet televizorit e morëm vesh. Na erdhi shumë keq pasi Teri (Lefter Koka) është një njeri me reputacion të mirë jo vetëm këtu në zonën e Vollgës, por në të gjithë Durrësin”, u shpreh një banor për “Panorama.al“.

Panorama

[Albo]

Monika Kryemadhi dorëzon në SPAK materiale shtesë për aferën e inceneratorëve

Dy ditë pas arrestimit të ish-ministrit Lefter Koka, kryetarja e LSI, Monika Kryemadhi ka dorëzuar në Prokurorinë e Posaçme (SPAK) materiale të tjera shtesë, të cilat sipas saj provojnë abuzimet në lidhje me aferën e inceneratorëve.

Materialet shtesë që i dorëzohen SPAK-ut janë për inceneratorin e Tiranës, të Elbasanit dhe të Fierit.

Në shkresën dorëzuar SPAK, Kryemadhi shprehet se mbetet e hapur për të bashkëpunuar që të kontribuojë për një hetim sa më objektiv të kësaj çështjeje.

Lëvizja Socialiste për Integrim ka depozituar më herët tre padi, të shoqëruara me dokumente për inceneratorin e Tiranës, të Elbasanit dhe Fierit.



Koha Jone

[Albo]

“Kam zbatuar ligjin”, zbardhet dëshmia. Ja çfarë deklaroi ish-ministri Lefter Koka para trupit gjykues pas akuzave për korrupsion me inceneratorët

Ish-ministri i Mjedisit, Lefter Koka ka mbajtur një qëndrim mohues ndaj 3 akuzave që rëndojnë ndaj tij në lidhje me çështjen e abuzimit me inceneratorët.

Gazetarja Klodiana Lala ka siguruar për ‘BalkanWeb’ detaje nga seanca e sotme gjyqësore, ku Kokës do t’i komunikohet edhe masa e sigurisë. Ai ka pohuar para togave të zeza se ka zbatuar vetëm ligjin. “Kam zbatuar ligjin”, mësohet të jetë shprehur Koka.

Koka akuzohet për veprat penale “Shpërdorimi i detyrës”, “Korrupsioni aktiv i funksionarëve të lartë shtetërorë ose i të zgjedhurve vendorë”, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”.

Kujtojmë se në kërkim janë shpallur biznesmeni Klodian Zoto dhe Stela Gugallja.

Balkanweb

[Albo]

ORA NEWS

[Albo]

Me zë dhe figurë/ Si e mbuloi Rama aferën e inceneratorëve me flamurin e Partisë Socialiste



Arrestimin e Lefter Kokës, kryeministri e përcolli si një ngjarje periferike. Pa shpjegime, me sa më pak vëmëndje dhe me një koment të thjeshtë në Facebook tentoi ta minimizojë përgjegjësinë e tij si kryeministër, për një aferë korrupsioni që do të kishte qenë e pamundur të ndodhte pa lëvizur mekanizmin e të gjitha ministrive nën qeverinë e tij.

Një komentuesi në Facebook, Rama iu përgjigj se arrestimi “nuk i bën përshtypje” dhe se “Partia Socialiste nuk është zyrë avokatie e askujt”.

Në fakt, logon e Partisë Socialiste, para zgjedhjeve e përdori për t’iu bërë mburojë aferës që mbante erë, sepse i duhej ndikimi i Lefter Kokës në Durrës dhe lidhjet e tij me të pakënaqurit në LSI për zgjedhjet e 25 Prillit.



E bëri këtë në 21 Tetor të 2020, dy ditë pasi kallëzimi për Lefter Kokën u dorëzua në SPAK.
Rama mori foltoren e partisë, banderolat me logon e PS, karriget dhe regjinë lëvizëse të ERTV dhe i çoi të gjitha në inceneratorin e Elbasanit nga ku nisi të flasë për prurjet e reja në Partinë Socialiste, por edhe duke sulmuar opozitën për inceneratorët. Futja e Rilindjes brenda në incenerator e shndërroi partinë më më të madhe në vend në avokatin numër një të Lefter Kokës. E gjitha ishte në kundërpërgjigje për hetimet e prokurorëve të SPAK, që kishin në dorë dosjen e përgatitur nga opozita. Video më poshtë:



Edhe në emisionin Opinion, kur u vu përballë parregullsive që kishin dalë për procedurat e koncensionit të inceneratorit të Elbasanit, bëri të njëjtën gjë. Në studion e Opinion u shfaq një ekran i ndarë në dysh, ku në njërën anë ishte një fushë plehrash dhe në anën tjetër inceneratori, mbi të cilin shkruhej Partia Socialiste e Shqipërisë.

“Kjo është prona e shtetit shqiptar me partinë tënde. Kjo është prona e shtetit shqiptar me qeverinë time. Kjo është pronë publike. Privati ka mbaruar punë dhe tani ia kalon shtetit” shprehej kryeministri për projektin për të cilin sot është në qeli ish-Ministri i tij i Mjedisit. Video më poshtë:



Koncesionet e inceneratorëve u kanë kushtuar shqiptarëve deri më tani mbi 12 miliard lekë. Për inceneratorin e Elbasanit janë paguar, 4.1 miliardë, për atë të Fierit 3.6 miliardë, ndërsa për atë të Tiranës deri në fund të këtij viti llogariten të paguhen 4.5 miliardë lekë.

Për aferën e incineratorëve janë kallëzuar në SPAK nga opozita edhe Sekretari i Përgjithshëm i qeverisë, ëngjëll Agaçi, kryetari i Bashkisë së Tiranës, Erjon Veliaj, zv.kryeministri aktual, Arben Ahmetaj dhe deputeti i PS, Alqi Bllako.

I vetmi që provoi prangat është Lefter Koka, ndërkohë që Rama premton se nuk do ta përdorë më flamurin e PS për mburojë nga drejtësia e re. Në aktet e denoncuara për inceneratorët nuk gjendet asnjë firmë e Edi Ramës, sepse në mbledhjet ku janë marrë vendimet ka firmosur ish-zëvendësi i tij Niko Peleshi.

Lapsi.al

[Albo]

Inceneratori i Tiranës/ Dokumenti me firmë që akuzon Veliajn



Një shpërthim i papritur replikash mes Erion Veliajt dhe gazetarit investigativ, Artan Hoxha, i nisur fillimisht për përdorimin e një veture Mercedes nga kryebashkiaku, është shndërruar papritmas në një denoncim për implikimin e Lali Erit me çështjen e nxehtë të inceneratorëve. Artan Hoxha duke u përgjigjur se ai nuk është pjesë e grupit të gazetarëve që paguhen nga Bashkia, për ta vërtetuar këtë ka bërë publik edhe një dokument me nënshkrimin e Veliajt për miratimin e inceneratorit të Tiranës. Ai e ka shoqëruar atë me shënimin: “Nuk kam qenë, nuk jam dhe nuk do të jem kurrë në listë-pagesën e borderosë tuaj, sepse është borderoja më e madhe kriminale se çdo organizatë kriminale në këtë vend. Ja si mbyllet shkresa, me numër protokolli 9275, ku jepet miratimi për ndërtimin e inceneratorit 128 milionë euro të Tiranës” ka shkruar ai.



Nisur nga ky denoncim, Lapsi.al është përpjekur të mësojë se pse kjo shkresë dhe ky nënshkrim duhet ti djegë së tepërmi kryebashkiakut aktual?

Për të kuptuar këtë duhet njohur pak historia e kësaj afere. Kompania ‘Integrated Energy BV u angazhua që do të ndërtonte djegësin e Tiranës i cili do të financohej nëpërmjet një tarife për incenerimin e mbetjeve nga njësitë e qeverisjes vendore të qarkut Tiranë.

Sipas të dhënave të mëvonshme që nxori Kontrolli i Lartë i Shtetit dhe i bëri publike opozita, kjo qe një ndërmarrje korruptive që do ti kushtonte publikut shqiptar tre fish më shtrenjtë. Po cili qe roli i Veliajt në këtë ‘grup të strukturuar” që dyshohet se ka ndyer duart në një grabitje?

Hipotezat që dalin nga kqyrja e dokumentit që i ka rikujtuar Artan Hoxha janë dy. E para, se me qëllim përshpejtimin e ndërtimit të një vepre, disa nga nismëtarët e së cilës sot janë në arrest nga SPAK, Erion Veliaj ka tejkaluar kompetencat e tij duke marrë edhe ato të këshillit bashkiak. Por sipas raportit të Kontrollit të Lartë të Shtetit, që ka lexuar Lapsi.al, Veliaj nuk e ka tagrin për ta miratuar projektin, pasi ai vetëm e propozon buxhetin e bashkisë, i cili miratohet nga Këshilli Bashkiak. “Angazhimi për dakordësinë duhet të përfshijë marrjen e vendimit nga Këshilli Bashkiak përkatës, si autoriteti kompetent për miratimin e buxhetit, ndërkohë që aprovimi është dhënë nga autoriteti i kryetarit të Bashkisë që ka për kompetencë vetëm propozimin e buxhetit në këshill,” thekson KLSH.

Por, përpos këtij implikimi të drejtëpërdrejtë kryebashkiaku akuzohet edhe tërrthorazi se në bashkëpunim me të tjerë, është bërë pjesë e devijimit të procedurave për ngritjen sa më shpejt të inceneratorit të Tiranës. Gjatë një koresponndence mes ministrisë së Ekonomisë, asaj të Mjedisit dhe Bashkisë është kërkuar që të jepej miratimi i katër Bashkive të qarkut të Tiranës (pra dhe Vora, kamza dhe Kavaja) që do të digjnin mbetejet e tyre dhe do të paguannin inceneratorin. Por procedura është kryer duke marrë vetëm firmën e Veliajt dhe duke i anashkaluar tre të tjerat.

“Kontrata koncesionare është një kontratë problematike, pasi që në hyrje të saj thuhet shprehimisht se koncensionari do të furnizohet me mbetje nga të gjitha njësitë përbërëse të qarkut Tiranë, konkretisht Bashkia Tiranë, Vorë, Kavajë dhe bashkia Kamëz, duke cënuar kështu autonominë e këtyre të fundit lidhur me çështjen e mbetjeve urbane, pasi nga asnjë korrespondencë, nuk rezulton që këtyre t’ju jetë marrë pëlqimi për të qenë pjesë e kontratës koncesionare”, tha në hapje të komisionit hetimor deputetja Jorida Tabaku që e ka ndjekur qe ne fillim kete skandal.

Por, nëse në këtë rast të dytë, Veliaj mund të mbrohet pasi mund ti shmanget përgjegjësisë për mënyrën se si e kanë interpretuar të tjerët firmën e tij, për akuzën e parë, atë se ka firmosur në një shkresë pa marrë miratimin e këshillit bashkiak ai del krejtësisht zbuluar.

Kaq do të mjaftonte që një SPAK, i drejtë dhe i paanshëm, të trokiste në zyrën e tij si në derën e një njeriu që është bërë pjesë në një mega aferë që do ti kushtojë publikut diçka më pak se 500 milionë euro.

Dhe pikërisht sepse këtu Veliaj është shah mat, gazetari Artan Hoxha, i kujtoi dokumentin më firmën e tij që tashmë është bërë viral në rrjet.

Lapsi.al

[Albo]

Skandali i Inceneratorëve/ Dyshime mbi 125 mijë eurot e deputetit Bllako



Pas arrestimit të Lefter Kokës nga SPAK në qendër të akuzave për aferën skandaloze të inceneratorëve është vënë deputeti aktual i PS-së dhe ish sekretari i përgjithshëm i Ministrisë së Mjedisit, Alqi Bllako.

Në një video të publikuar nga Monika Kryemadhi, ai është akuzuar se ka marrë rryshfet nga inceneratori i Tiranës, plot 125 mijë euro, duke e kamufluar këtë si pagë fiktive për të atin e tij, që rrezulton në borderotë e pagave të kësaj kompanie me një rrogë me 10 mijë dollarë në muaj. Pra aludimi i LSI-së është i qartë, në këmbim të nënshkrimeve dhe favoreve që djali ka bërë në detyrën e tij si funksionar publik, Bllakot, at e bir, kanë ngritur një skemë të kamufluar për të marrë ryshfet.



Deputeti i PS-së dhe ish bashkëpuntori i Lefter Kokës i ka mohuar këto akuza duke thënë se ai nuk është në konflikt interesi dhe e dyta se i ati i tij është paguar si një inxhinjer i thjeshtë për punën që ka bërë.
Një një sqarim publik të botuar këtë të hënë ai thekson se nuk ka qenë në konfikt interesi pasi ai e kishte lënë detyrën rreth një muaj përpara 31 gushtit 2017, kur u shpall fituesi për impiantin e Tiranës. Edhe përpara kësaj date kur ka qenë Sekretar i Përgjithshëm, ai thekson se kurrë nuk ka qenë anëtar i asnjërit prej 3 komisioneve përgjegjëse për dhënien e 3 konçensioneve, për të cilat hidhen akuza.

Lapsi.al i ka krahasuar faktet e bëra deri më tani publike për të parë kush është më pranë të vërtetës, LSI që akuzon, apo Bllako që thotë se ndaj tij po bëhet një hakmarrje personale.

Deri më tani në publik kanë dalë shumë dokumenta të korrespondencës midis ministrive për të ndihmuar proceduarat në favor të inceneratorëve dhe në to duket qartë se ndryshe nga ç’pretendon Bllako është në brendësi të gjithë praktikave dhe dokumentat zyrtare siglohen për djeni të tij (poshte).



Por pika ku ai del më zbuluar se kurrë është një dokument ku i përgjigjet një shkrese të ish ministrit të Financave, Arben Ahmetaj. Duke qenë se Inceneratori i Tiranës do të grumbullonte mbetjet e qarkut të Tiranës, pra të Bashkive Tiranë, Vorë, Kavajë dhe Kamëz, ministri i financave i kërkon me shkrim homologut të tij të mjedisit, miratimin e këtyre institucioneve për të shkuar përpara me projektin (letra poshtë).



Por këtu ka një problem. Disa nga bashkitë kontrollohen nga opozita dhe dalin jashtë qerthullit të mbyllur të rilindjes. Dhe Alqi Bllako bën një manovër për ti lehtësuar punën e fitimit të tenderit inceneratorit. Ai i jep atributet e qarkut të Tiranës vetëm Erion Veliajt. Merr miratimin e tij dhe nuk i shkruan kryetarëve të bashkive, Kamëz, Kavajë dhe Vorë (Poshte).



Fiks nje vit më pas inceneratori i Tiranës fillon të paguajë me 10 mijë dollarë në muaj si inxhirer babain e Alqi Bllakos. Në denoncimet e LSI-së aludohet se kjo është shuma e parave që u dha si rryshfet për të birin. Por, Alqi Bllako mbrohet duke thënë se i ati Edmondi ishte një inxhinjer mekanik në pension që iu rikthye punës “Si inxhinier mekanik, i specializuar për industrinë është profesionist dhe sipërmarrës i mirënjohur në këtë fushë prej 31 vitesh. Im atë, ka lidhur një kontratë afatshkurtër me afat të përcaktuar, si përgjegjës për detajimin e projektit mekanik, pjesë kjo e projektit tërësor të zbatimit, projektim i ardhur nga një kompani ndërkombëtare” ka shkruar ai.

Po a është e besueshme kjo alibi?

Ndonëse këtë punë e vendos drejtësia është e vështirë të besohet se një inxhnjer shqiptar të paguhet me 125 mijë euro për punën që bën sado e veçantë të jetë ajo. Aq më tepër që ky inxhinjer paguhet nga një kompani që ka përfituar nga nënshkrimet shtetërore të të birit. Akoma dhe më e dyshimtë bëhet e tëra kur mendon se Edmond Bllako është specialisti më i paguar në tërë borderonë e inceneratorit të Tiranës, ndonese kjo ndermarje punon ende si lanfild, para s’ka pasur nevoje per mekanike.

Pra në rastin më të mirë alibia e deputetit socialist është shumë larg të qenit bindëse. Firmat që ai ka hedhur dhe paratë që i ati ka marrë janë një tjetër anë e errët e skandalit të madh të inceneratorëve.

Lapsi.al

[Albo]

Pagesat për inceneratorët, ekspertët sugjerojnë pezullim të kontratave koncesionare

Ndryshe nga kryeministri Edi Rama, ekspertët mendojnë se qeveria i ka mekanizma për t’i pezulluar apo prishur kontrat koncesionare të inceneratorëve, ndërsa ngrenë shqetësimin se qeveria po ndikon hetimet e SPAK.

Pas një hetimi të gjatë, ish-ministri i Mjedisit, Lefter Koka u arrestua më 14 dhjetor me akuzat e ‘shpërdorimit të detyrës’, ‘korrupsionit pasiv’ si dhe ‘pastrimit të produkteve të veprës penale’ gjatë procedurave për dhënien e koncesionit për ndërtimin e inceneratorit të Elbasanit. Dy pronarët e kompanive të lidhura me inceneratorët, Stela Gugallja dhe Klodian Zoto u akuzuan gjithashtu për ‘korrupsion aktiv’ dhe “pastrim të produkteve të veprës penale”, por janë në arrati. Të dy ata zotërojnë kompanitë që kanë aktualisht kontrata për ndërtimin e inceneratorëve të Fierit dhe Tiranës me vlerë qindra milionë euro.

Qeveria shqiptare e gjendur përballë këtij skandali nuk ka preferuar që të rishikojë kontratat koncensionare me Gugalljan dhe Zoton, përkundrazi ka vijuar pagesat nga thesari i shtetit në adresë të kompanive të tyre.

Vendimi u justifikua nga kryeministri Edi Rama si një detyrim ligjor i qeverisë për të respektuar kontratat me këto kompani, ndërsa inceneratorët i quajti “vepra të mëdha” që s’kanë lidhje me korrupsionin që kanë bërë individët.

“Janë marrëdhënie kontraktuale të cilat imponohen nga ligji për të vazhduar deri kur të ketë vendime të formës së prerë nga gjykatat,” tha Rama në një konferenc për shtyp në prag të Vitit të Ri.

“Janë marrëdhënie kontraktuale që duhet të zbatohen derisa të flasë drejtësia,” shtoi ai.

Ndërsa ministrja e Infrastrukturës dhe Energjisë Belinda Balluku theksoi më herët se rrezikohej arbitrazhi ndërkombëtar në dëm të shtetit shqiptar nëse ndërpriteshin këto kontrata.

Por ekspertë të ekonomisë dhe jurispudencës e konsiderojnë naive dhe të qëllimshme justifikimin e qeverisë duke argumentuar se kontratat koncensionare mund të pezullohen ose të prishen nga shteti kur kemi të bëjmë me afera korruptive.

Ish-avokatja e shtetit, Ledina Mandia, i tha BIRN-it se arbitrazhi është një arsyetim naiv nga ana e qeverisë, pasi sipas saj ekzistojnë raste kur arbitrazhi e ka cilësuar të drejtë prishjen e një kontrate, kur ajo është marrë në mënyrë korruptive.

Edhe eksperti i ekonomisë Zef Preçi, drejtor ekzekutiv i Qendrës për Kërkime Ekonomike, u shpreh se ky argument nuk qëndron.

“Një kontratë e fituar në mënyrë të paligjshme nuk ka gjykatë në botë që e mbron,” tha ai.

“Kontrata duhet prishur”


Incenetarori i Elbasanit. Foto: Ivana Dervishi/BIRN

Ndërkohë që qeveria shqiptare thotë se i ka duart e lidhura nga kontrata, ekspertët mendojnë se ajo nuk po mbron interesin publik duke hedhur miliona euro në xhepat e njerëzve që kërkohen nga drejtësia për pastrim parash dhe korrupsion.

“Ngjarja është shumë e rëndë dhe bëhet fjalë për miliona euro të shqiptarëve që nuk dihet në xhepat e kujt shkojnë”, thotë Mandia, e cila i sugjeron qeverisë që të konsultohet me avokatë të njohur në fushën e arbitrazhit për të prishur kontratën.

Mandia, e cila është lektore e Arbitrazhit Ndërkombëtar, duke iu referuar praktikave të tribunaleve të arbitrazhit, thotë se ato “janë shumë sensitive në raste të tilla dhe nga praktika ka patur raste ndaj shteteve të tjera kur nuk kanë gjetur shkelje dhe nuk kanë ngarkuar me detyrim financiar shtetet per prishje të njëanshme të kontratës”.

Zef Preci shprehet se janë evidente tashmë provat që ka sjellë SPAK për procedurën e paligjshme me të cilën është fituar kjo kontratë, procedura ku sipas tij, nuk janë zbatuar praktikat e qeverisjes së mirë të fondeve publike.

“Një kontratë e fituar në mënyrë të paligjshme nuk ka gjykatë në botë që e mbron”, komenton ai, ndërsa sugjeron pezullimin e kontratës.

“Mungesa e reagimit të agjencive shtetërore duhet parë si mungesë e vullnetit të tyre për të respektuar ligjin, minimalisht pezullimin e transaksioneve të mëtejshme dhe marrjen në kontroll të këtyre aseteve,” shtoi Preçi.

Për Mandinë është papërgjegjshmëri që qeveria nuk reagon, por justifikohet me frikën e arbitrazhit. Ajo bën sugjerime specifike juridike për qeverinë për të prishur kontratat konçensionare me personat që janë në hetim dhe kërkim nga drejtësia.

“Qeveria, që të nesërmen e njoftimit nga SPAK do duhej të kishte ngritur grupin e gjerë të punës për të vlerësuar dokumentacionin , kontratat, dhe gjetur mundësi të prishjes së kontratave në mënyrë që të mos ketë pasoja financiare për Republikën e Shqipërisë”, i tha ajo BIRN-it.

Mandia beson se nëse ka vullnet nga qeveria për të ndihmuar SPAK në zbardhjen e të vërtetës dhe ndiqen korrekt procedurat nuk përsëritet rasti “Becchetti’.

Sipas saj qeveria duhet të niste një operacion profesional dhe mekanizma diskrecionarë duke përfshirë avokatë të huaj për shmangur pasojat financiare. Por, nëse qeveria nuk merr hapa dhe justifikohet me përmbushje të kushteve kontraktore, ‘kjo të lë të mendosh se është e kapur’, shtoi ajo.

Rama po ndikon hetimin


Ministrja e Infrastrukturës dhe Energjisë, Belinda Balluku. Foto: LSA

Sipas Zef Precit reagimet e kryeministrit ndaj aferës së inceneratorëve dhe mbrojtja publike që i bën ai procedurave të ndjekura për koncensionet, synojnë të ndikojë hetimin e SPAK-ut. Ai mendon se të njëjtin mesazh për organet hetuese jep dhe vijimi i pagesave për personat e shpallur në kërkim.

“Ajo çka unë konstatoj me keqardhje në reagimet e Ramës dhe zyrtarëve të tjerë të lartë po ndikohet procesi hetimor i SPAK,” tha ai.

“Shihet qartë se në mënyrë indirekte po tentohet të shmanget hetimi i hollësishëm i procedurës së ndjekur deri në nënshkrimin e këtyre kontratave klienteliste të dyshuara në mënyrë të arsyeshme për korrupsion dhe abuzim me fondet publike,” shtoi Preçi.

Duke iu referuar ndërhyrjeve publike të Ramës, Preçi e shikon sjelljen e kryeministrit si “orientim” i hetimeve për të lënë jashtë tyre procedurën e dhënies së këtyre kontratave.

“Jo vetëm që po ndikohen hetimet, por edhe për faktin se po krijohet një situatë absurde, p.sh. mjafton qe pronari i një kompanie të korruptojë një zyrtar duke përfituar një kontratë në mënyrë të paligjshme dhe kështu askush nuk mund ta prekë se ai “tund kontratën dhe kërcënon se do të shkojë në gjykatë” dhe qeveria paguan duke ‘respektuar’ ligjin”, theksoi ai.

Sipas Preçit kjo sjellje nuk ndodh as në vendet më të korruptuara të botës.

“Kudo kontrata e dyshuar dergohet për vleresim në gjykatë, ndersa qeveria apo enti publik pezullon pagesat deri në zbardhjen e situatës”, tha Preçi.

Nga ana tjetër Mandia nuk beson se hetimet e SPAK ndikohen nga vendimi i qeverisë për të paguar pronarët e kompanive konçensionare.

“SPAK duhet të ndërhyjë në lidhje me zbatimin e këtyre kontratave, nëse me të vërtetë ka elementë të veprave penale,” tha ajo.

Ndërkohë Preçi këmbëgul se SPAK duhet të sqarojë opinionin publik për paligjshmërinë e këtyre kontratave dhe përfshirjen e zyrtarëve të tjerë në aferën korruptive.

“Si mundet që një bashki (Elbasani në rastin e parë) të shpallë gjendjen e emergjencës kur pagat i kanë marrë të gjithë, madje edhe me shtesa personeli, kur fondet i kanë pasë në dispozicion dhe përse nuk kanë përmbushur detyrat sipas ligjit për pastrimin e qytetit,” pyet ai.

“Këtu mendoj se fillon afera dhe këtu nis zinxhiri i veprimeve të dyshimta të mëvonshme,” përfundoi Preçi.

Blerina Gjoka
BIRN

[Albo]

Qark i shkurtër: Si përfunduan paratë e buxhetit në xhepat e Lefter Kokës


Kryeministri Edi Rama, ish-ministri i Mjedisit Lefter Koka dhe zyrtarë të tjerë të PS në inaugurimin e impiantit të Elbasanit. Në foto (djathtas) aksionerja e Albtek Energy, Stela Gugallja. Foto: Facebook.

Hetimi i SPAK për inceneratorin e Elbasanit zbulon se si një numër kompanish u hapën nga ‘punëtorë të thjeshtë’ për transferuar miliona euro të taksapaguesve te kompanitë e familjes Koka, në një skemë aspak të komplikuar pastrimi parash, që shtetit shqiptar iu deshën katër vjet për ta hetuar.

Më 26 shtator 2016, Arbër Denizi – magazinier i kompanisë shtetërore “Hekurudha Shqiptare” u bë strumbullar i krijimit të një kompanie të re me fushë të gjerë veprimi; nga import-eksporti i ushqimeve tek inertet dhe transporti.

Kompania u quajt Pivot-04 dhe ndonëse qe jetëshkurtër, rezultoi shumë e suksesshme.

Mes 28 shtatorit 2016 dhe 31 janarit 2017, Pivot-04 i faturoi dy kompanive ‘Albtek Energy’ dhe ‘Integrated Technology Services’ 160 milionë lekë punime, ndërsa këto dy kompani i transferuan asaj në llogarinë bankare 214 milionë lekë [gati 2 milionë euro].

Mbi 171 milionë lekë nga këto të ardhura u transferuan më pas në kompaninë Sucralba që administrohej nga vëllai i ish-ministrit Koka, përmes faturave që shënonin: “oriz” ose “sheqer”. Me të mbaruar transfertat, në vitin 2018, të dyja kompanitë, Pivot-04 dhe Sucralba deklaruan pezullim të aktivitetit.

Pivot-04 ishte një nga shtatë kompanitë e vogla, ekzistuese apo të sapokrijuara, të cilat Prokuroria e Posaçme, SPAK i ka identifikuar si instrumente të transferimit të parave nga kompanitë e inceneratorëve te xhepat e familjarëve të ish-ministrit të Mjedisit, Lefter Koka.

Sipas vendimit gjyqësor mbi masën e sigurisë, të shtatë kompanitë e lidhura me Kokën i faturuan kompanive të inceneratorëve në Elbasan dhe Fier si dhe kompanisë mëmë Integrated Technology Services, ITS, mbi 460 milionë lekë ose 3.7 milionë euro në total.

SPAK pretendon se këto para përfunduan në xhepat e familjes Koka në një skemë aspak të komplikuar korrupsioni, që ndonëse u zhvillua tërësisht brenda territorit të Republikës së Shqipërisë, u hëngri gjithsesi institucioneve shtetërore katër vjet për ta zbardhur.

Ish-ministri i Mjedisit, Lefter Koka u arrestua më 14 dhjetor me akuzat e ‘shpërdorimit të detyrës’, ‘korrupsionit pasiv’ si dhe ‘pastrimit të produkteve të veprës penale’ gjatë procedurave për dhënien e koncesionit në favor të kompanisë “Albtek Energy” në Elbasan dhe përfitimeve të padrejta financiare.

Dy pronarët e kompanive të lidhura me inceneratorët, Stela Gugallja dhe Klodian Zoto u akuzuan gjithashtu për ‘korrupsion aktiv’ dhe “pastrim të produkteve të veprës penale”, por ata gjenden në arrati.

Në vendimin gjyqësor për masën e sigurisë së Kokës, SPAK thotë se është në gjendje të provojë se të shtata kompanitë u regjistruan në emër të personave me lidhje miqësore apo punësimi me familjen Koka dhe pavarësisht faturave marramendëse ndaj kompanive të inceneratorëve, nuk kishin aktivitet real biznesi.

Sipas SPAK, operacionet financiare për transferimin e 3.7 milionë eurove u kryen nga ‘e njëjta dorë’.

Ish-ministri Lefter Koka u deklarua i pafajshëm për të gjitha akuzat në gjykatë, ndërsa avokati i tij, Fatmir Braka deklaroi për mediat se nisja e procesit hetimor ka qenë politik.

‘E njëjta dorë’


Të dhënat e tre koncesioneve të trajtimit të mbetjeve urbane.

Prokuroria e Posaçme kundër Korrupsionit dhe Krimit të Organizuar, SPAK i nisi hetimet për tre koncesionet e inceneratorëve në vitin 2020, pas dy kallëzimeve penale të dorëzuara nga Partia Demokratike dhe Lëvizja Socialiste për Integrim.

Megjithatë, hetimet avancuan vetëm për koncesionin e Elbasanit.

Sipas hetimit të kryer nga SPAK, për transferimin e parave të taksapaguesve drejt ish-ministrit Lefter Koka u përdorën përveç Pivot -04 edhe kompanitë Sh.Sh., Deto, Belar Inert, Sili, J.P.Y dhe R.B –Ital Beton.

Tre prej tyre ndajnë të njëjtën adresë, ndërsa gjashtë prej kompanive kanë objekte veprimtarie pothuajse identike.

Krahasimi i akteve të regjistrimit të këtyre kompanive në Qendrën Kombëtare të Biznesit tregon se kompanitë Sh.Sh., Deto, Belar Inert, Sili, Pivot-04 dhe Y.P.Y. kanë objekt veprimtarie: “Prodhim, perpunim, transport, magazinim, tregtim me shumice e pakicë, brenda dhe jashtë vendit për import dhe eksport të inerteve të ndryshme…,’; fjali e kopjuar identike për të gjashta.

Ndërkohë, kompanitë J.P.Y., SILI dhe Sh.Sh., kanë të treja adresën: “Lagjja nr. 18, Rruga Aleksander Goga, Godina nr. 8556”, në Durrës.

Përveç këtyre përkimeve, kërkesa e SPAK për masat e sigurisë në gjykatë nënvizon se në fakt, firmat e faturave të lëshuara nga shtatë prej kompanive janë shkruar nga ‘e njëjta dorë’ pasi shënimet me dorë të numrave të sasisë dhe përshkrimi i mallit kanë ngjashmëri më njëri-tjetrin. Sipas konkluzioneve të prokurorisë, disa fatura me palë blerëse shtetasen Stela Gugallja, aktualisht në arrati dhe kompanitë e tjera si shitëse duket se janë firmosur nga i njëjti person si për blerësin ashtu edhe për shitësin.

Prokuroria ka kryer gjithashtu ekspertim të shkrimeve për të vërtetuar këtë dyshim.

“Nga analiza e aktit të ekspertimit grafik provohet se shoqëritë “Pivot 04”, “Sili”. Bellar Inert” (Bio Blend Fruit), “J.P.Y”, “Deto”, “R.B. – Ital Beton” (R.B-General Servis) dhe “SH.SH”, kanë lidhje me njëra-tjetrën dhe faturat janë shkruar dhe nënshkruar nga i njëjti person. Pra, duket se këto shoqëri i menaxhon dhe i shërbejnë të njëjtit person,” shkruhet në konkluzionet e prokurorisë.

Lidhje miqësore


Nga inaugurimi i inceneratorit të Elbasanit. Foto: Facebook.

Skema e përvetësimit të parave publike nga ish-ministri Lefter Koka sipas SPAK, përfshiu një numër të konsiderueshëm bashkëpunëtorësh, miq të tij, punëtorë të kompanive të tjera të familjes apo shokë të të birit.

Përgjatë kohës kur kompanitë nominalisht në emër të tyre lëshonin fatura me shifra marramendëse për kompanitë e inceneratorëve, personazhet e skemës ishin zyrtarisht të punësuar në punë të tjera.

Ndërkohë, disa persona të prezantuar nga kompanitë fantazmë si të punësuar prej tyre, kanë mohuar para prokurorëve të kenë qenë të punësuar apo të kenë pasur dijeni për punësimin në këto kompani.

Sipas hetimit të prokurorisë, Arbër Denizi, pronari i kompanisë Pivot-04, ka punuar si magazinier në hekurudhë me pagë 28 mijë lekë, ndërsa miqësia e tij me Arbi Kokën vërtetohet sipas hetimit me udhëtimet e tyre të përbashkëta jashtë vendit.

I pyetur nga prokurorët, Driza ka thënë se ka dërguar materiale inerte në Elbasan pavarësisht se nuk ka pasur mjete në pronësi. Ai u ka thënë prokurorëve se dërgimin e inerteve te incineratorët e ka kryer duke marrë mjete nga banorë të zonës, por se nuk ishte në gjendje të mbante mend ndonjë emër të tyre. Ai ka deklaruar gjithashtu se nuk i njihte “dy punonjësit’ e kompanisë së tij.

“Në kohën që pretendohet se shoqëria “Pivot 04” ushtronte aktivitet tregtar dhe në kohën kur shoqëritë tregtare Albtek Energy dhe ITS transferonin shumat monetare të konsiderueshme në drejtim të shoqërisë Pivot 04, si dhe në kohën që Pivot 04 bënte “blerje” nga shoqëria Sucralba, Arbër Denizi vijonte të ushtronte detyrën e magazinierit,” vëren prokurori Klodian Braho.

Kompania tjetër, SILI, drejtohej nga shtetasi Silvester Driza. Verifikimet e prokurorisë kanë zbuluar se ai ka punuar si punëtor në hekurudhë dhe më pas në Autoritetin Portual të Durrësit edhe gjatë kohës kur kompania e tij faturonte qindramijëra euro punime në tre kompani të incineratorëve, Albtek, ITS dhe Integrated Technology Waste Treatment Fier.

Sili, kompani e cila përshkruhet nga prokurorët si pikë shumice për shitje sheqeri, i ka transferuar paratë e marra nga inceneratorët te kompania Wind Co, e cila është nën pronësinë e bashkëshortes së ish-ministrit të Mjedisit, Brunilda Koka. Mënyra e transferimit është shitblerja e pronave të patundshme.

Një tjetër person, Ardian Bello, zyrtarisht pronar i Bellar Inert, kompanisë që i faturoi Albtek gjysmë miliardi lekë punime, rezulton që nga viti 1980, punëtor në Hekurudhë me pagë 30 mijë lekë në muaj.

Prokuroria thotë se këta dhe persona të tjerë, pronarë të kompanive fiktive kanë një gjë të përbashkët: njëri ka lidhje miqësore me Lefter Kokën dhe të tjerët me djalin e tij, Arbi Koka. Lidhja e tyre miqësore vërtetohet nga prokuroria për shkak të regjistrimeve të sistemit TIMS, ku rezulton se kanë udhëtuar shumë herë jashtë Shqipërisë nën shoqërinë e njëri-tjetrit.

Prokuroria nuk ka marrë të pandehur deri më sot askënd tjetër përveç ish-ministrit Koka si dhe shtetases Stela Gugallja, pronare e kompanisë “Albtek Energy” të inceneratorit të Elbasanit dhe Klodian Zotos, pronar i ITS – persona që u shfaqën nga asgjëja gjashtë vite më parë për të përfituar me propozim të pakërkuar tre koncesione të mëdha për trajtimin e mbetjeve urbane në Elbasan, Fier dhe Tiranë.

Prokuroria ka urdhëruar sekuestrimin e kompanive Albtek Energy dhe ITS, por nuk ka bërë të ditur se çfarë ka ndër mend të bëjë me dy kompanitë e tjera të inceneratorëve, Integrated Techonology Waste Treatment Fier dhe Integrated Energy B.V SPV.

Gjergj Erebara
BIRN

[Albo]

VIDEO-SYRI TV/ Dokumentet, Karlo Bolino merr qindra milionë lekë nga inceneratorët

Skandali i aferës së inceneratorëve, për të cilën është vënë në pranga edhe ish-ministri i Mjedisit, Lefter Koka, duket se vijon të thellohet. CNA.al ka siguruar të dhëna ekskluzive, që tregojnë sesi tentakulat janë shtrirë edhe në media. Gazetarë apo media janë paguar në shifra të majme nga kompanitë e inceneratorëve.

Një ndër mediat e paguara nga kompanitë e inceneratorëve është edhe ajo e Carlo Bollinos.

Carlo Bollino dhe mediat e tij paguhen prej vitesh nga pronarët e inceneratorëve me shuma që në total kalojnë qindra milionë lekë.



Sipas dokumenteve ekskluzive të siguruara nga CNA.al, MTSC e Carlo Bollinos është paguar rreth 40 mijë euro në 7 fatura të ekzekutuara, ku vetëm në muajin prill janë paguar 18 milionë lekë ose gati 17 mijë euro.

Sipas tabelës më poshtë, bëhet fjalë për shtatë pagesa, të ekzekutuara konkretisht nga muaji shkurt 2021, deri në muajin korrik 2021.

Pra, vetëm për një periudhë të shkurtër, në total për shtatë pagesa të ekzekutuara në vitin 2021 janë paguar për median e Carlo Bollinos 4.432.771 lekë.



Kush është MTSC

Sipas ekstraktit ligjor, MTSC është një kompani e themeluar në 17/06/2015 dhe me adresë në Tiranë, Njësia Bashkiak nr 2, rruga Niko Pushkin, prapa stadiumit Qemal Stafa, pranë liqenit artificial.

Po sipas ekstraktit mësohet se ortak i vetëm me 100% të kapitalit të kësaj kompanie është Carlo Bollino.

Ndërsa veprimtaria e shoqërisë është: “Aktivitet në fushën e transmetimeve radio-televizive. Prodhimi, transmetimi dhe ritransmetimi i programeve dhe prodhimeve të ndryshme audio-vizuale. Shoqëria ka të drejtë të ushtrojë çdo lloj aktiviteti të parashikuar nga ligji në përputhje me rregullat e dispozitat në fuqi.” Pra, bëhet fjalë për grupin mediatik të Carlo Bollinos.



CNA.al nuk do të ndalet në denoncimin e kësaj afere, ndoshta më e madhja e këtyre 30 viteve demokraci. Ditë pas dite CNA.al do të publikojë të gjithë klientelen mediatike, apo gazetarët që janë paguar nga kompanitë e një prej koncesioneve më të akuzuara në Shqipëri.

CNA.al

[Albo]

Rama: Qeveria do paguajë inceneratorët, por jo Francesco Becchettin



Kryeministri Edi Rama ka bërë të qartë se qeveria e tij do të vijojë të paguajë kompanitë koncensionare të inceneratorëve edhe pse pronarët e tyre janë shpallur në kërkim nga drejtësia. Ai u justifikua me kontratën ligjore, por në rastin “Becchetti” ai tha se nuk do të paguajë sepse “ai është në kërkim nga drejtësia”.

Kryeministri Edi Rama deklaroi të enjten se qeveria do të vazhdojë t’i paguajë kompanitë e inceneratorëve edhe pse pronarët e tyre janë shpallur në kërkim nga SPAK për korrupsion aktiv dhe pastrim parash.

Ai iu referua përgjigjes së një dite më parë të ministres së Infrastrukturës dhe Energjisë, Belinda Balluku, sipas së cilës, administrata duhet të zbatojë kontratën ligjore pa paragjykuar nëse personat përfitues janë në hetim.

I pyetur nga BIRN nëse mendonte se ishte politikë e mirë që paratë që merren nga xhepat e varfër të shqiptarëve të shkojnë për të paguar kompani koncensionare, pronarët e të cilave kërkohen nga drejtësia, Rama tha se ishte i detyruar nga kontrata ligjore me ta.

“Përgjigjia e ministres është përgjigjia e duhur sepse janë marrëdhënie kontraktuale të cilat imponohen nga ligji për të vazhduar deri kur të ketë vendime të formës së prerë nga gjykatat. Janë marrëdhënie kontraktuale që duhet të zbatohen derisa të flasë drejtësia”, tha Rama.

Me 14 dhjetor Struktura e Posaçme Anti Korrupsion ka marrë të pandehur ish-ministrin Lefter Koka. Po ashtu, janë shpallur në kërkim Stela Gugallja, pronare e kompanisë “Albtek Energy” të inceneratorit të Elbasanit dhe Klodian Zoton, pronar i ITS, dy persona që u shfaqën nga asgjëja gjashtë vite më parë për të përfituar me propozim të pakërkuar tre koncesione të mëdha për trajtimin e mbetjeve urbane në Elbasan, Fier dhe Tiranë. Të dy pronarët e kompanive i janë fshehur drejtësisë, ndërsa thesari i shtetit vijon të bëjë pagesa për kompanitë e tyre.

Ai i cilësoi inceneratorët “vepra të mëdha” që s’kanë lidhje me veprimet anti-ligjore individuale. “Për sa i përket veprave, asgjë që ka të bëjë me aktet individuale, dhe me gjasën e abuzimeve individuale nuk cënon rëndësinë e atyre veprave, që janë shpëtimtare për njerëzit që ju iu qani hallin”- u përgjigj ai.

Por, pyetjes se pse nuk kishte zbatuar të njëjtin standard ligjor në rastin e biznesmenit italian Francesco Becchetti, kryeministri tha se rastet nuk janë njësoj.

“Kur ai person, (Becchetti) që është në kërkim me kërkesë nga prokuroria për krime ndaj këtij vendi do t’i marrë ato lekë, atëherë hajdeni të flasim prapë,” tha ai, duke deklaruar se qeveria e tij nuk do ta paguante gjobën e arbitrazhit ndërkombëtar, të fituar nga biznesmeni italian.

Biznesmeni Francesco Beccheti, prej kohësh është një temë debati politik në Shqipëri, pasi fitoi në arbitrazh ndërkombëtar 110 milion euro nga shteti shqiptar, i cili i sekuestroi pasuritë përfshi televizionin “Agon”.

Ndërkohë, një ditë më parë ministrja e Infrastrukturës dhe Energjisë, Belinda Balluku aludoi për ngjashmërinë e rasteve, duke thënë se nëse qeveria nuk paguante pronarët e kompanive të inceneratorëve – Stela Gugallja dhe Klodian Zoto, qeveria rrezikonte të hidhej në gjyq në Arbitrazh për prishje kontrate.

“Në rast se ne nuk zbatojmë kontratat, nga ana e ligjit tregtar të kontratës, ne do t’i krijonim Republikës së Shqipërisë një dëm të tillë që me siguri do të përgjigjeshim në Arbitrazh,” tha Balluku.

BIRN

[Albo]

VIDEO- SYRI TV/ Lista e pagesave: Si u blenë mediat nga inceneratorët

Mediat me të rëndësishmë në vend janë paguar sistematikisht me paratë e aferës së incerenatoreve, që u ka kushtuar taksave të shqiptarëve miliona euro

SYRI TV

Gazetari Elvi Fundo, i ftuar në Syri Tv në “A show”, ka bërë një skaner të transaksioneve të miliona lekëve që kanë përfunduar tek mediat kryesore ne vend, ku në krye të listës edhe media që drejtohej nga Ben Blushi, gruaja e të cilit Eva Blushi rezulton ortake me Klodian Zoton, bosin shqiptar të “Integrated Technology Service” kompanisë të konçesionit të inceneratorëve, dhe me Mirel Mërtirin.

Ndërkohë miliona lekë kanë shkuar edhe per kompanitë e gazetarit Endrit Habilajt, vartës i Blushit, kompanitë e të cilit kanë përfituar rreth 50 mijë euro.

Kompania Fokus grup e biznesmenit Irfan Hysenbelliu që përfshin televizionin News 24, i vënë së fundmi në mbrojtje të Lulzim Bashës, ka marrë gjithashtu miliona lekë nga inceneratorët, ndërsa në listëpagesë ka qenë edhe kompania e televizionit Fax News.

Në tortë nuk ka munguar as gazetari biznesmen Karlo Bolino që sipas dokumenteve rezulton se ka marrë miliona lekë nga inceneratorët.

Ndërkohë edhe portalet e njohura për qëndrimet proqeveritare rezulton se nuk kanë mbetur pa llokmë nga inceneratorët.

Afera e inceneratorëve ka çuar në pranga ish-Ministrin e Mjedisit Lefter Koka, ndërkohë lidhur me mediat që kanë përfituar miliona lekë nuk dihet nëse SPAK do të vihet në lëvizje.



Syri