Arratiset nga Turqia, kapet në Shqipëri themeluesi i platformës së kriptovalutave Thodex

[Albo]

Historia më e madhe e mashtrimit në Turqi/ Arrestohet në Shqipëri themeluesi i ‘THODEX’, ja çfarë ka deklaruar në polici

Faruk Fatih Özer, themelues i platformës së shkëmbimit të kriptovalutave Thodex, i cili ishte arratisur nga Turqia për t’u strehuar në Shqipëri pasi ka vjedhur 2 miliardë euro është arrestuar nga autoritetet shqiptare.



News 24 raporton se Turqia është duke i kërkuar Shqipërisë ekstradimin e shtetasit turk. Ky i fundit në dëshminë që ka dhënë për autoritetet shqiptare nuk e ka pranuar akuzën e mashtrimit. Ky rast është trajtuar nga autoritetet turke si mashtrimi më i madh në historinë e Turqisë.

Mbrëmjen e djeshme ministri i Brendshëm turk Süleyman Soylu zhvilloi një telefonatë me homologun shqiptar Bledi Çuçi për kapjen e Özer-it.

Hetimi nga autoritetet turke

Drejtoria e Përgjithshme e Policisë e Turqisë tha se prokuroria turke në Stamboll i dërgoi një kërkesë policisë për lëshimin e një njoftimi të kuq dje në mbrëmje për Özer-in, themeluesin e bursës së shkëmbimit të kriptomonedhave Thodex, i cili u arratis drejt Shqipërisë.

Faruk Fatih Özer dyshohet se ka mashtruar rreth 400 mijë persona nëpërmjet platformës Thodex, bursë kriptovalutash e themeluar në vitin 2017 në Turqi.

Dje në Prokurorinë Republikane në Stamboll u paraqit një padi penale, kurse më vonë filloi hetimi kundër Özer-it, i cili dyshohet për krimin e “mashtrimit të kualifikuar”.

Raporti kundër tij thotë se ka pasur një problem me tërheqjen e parave në llogaritë bankare në bursë për shtatë ditë dhe se bursa u mbyll plotësisht më vonë.

Gjithashtu u theksua se faqja në internet “www.thodex.com” nuk është në dispozicion për dy ditë. Kjo është një faqe që ka rreth 400.000 përdorues, përfshirë 390.000 përdorues që tregtonin në mënyrë aktive kriptovaluta dhe financonin investime.

Përdorues të shumtë të Thodex-it kanë postuar në mediat sociale se nuk kanë qasje në bursë dhe se nuk kanë mundur të transferojnë paratë e tyre në llogari për disa kohë.

Pasi përdoruesit u ankuan se nuk kishin qasje në para në bursë, kompania u prononcua dy ditë më parë, duke shpjeguar se “të gjitha problemet do të zgjidhen pas 6 orësh të mirëmbajtjes së planifikuar”. Pas kësaj, platforma njoftoi përsëri duke deklaruar se kësaj here punimet e mirëmbajtjes do të zgjasnin 4-5 ditë.

Özer dyshohet të jetë arratisur nga Turqia më 20 prill.

Policia turke vale arrestimesh

Policia turke ka vënë në pranga 62 persona në lidhje me hetimin për mbylljen e një platforme të tregtisë së kriptomonedhave dhe pas arratisjes së Faruk Fatih Özer, themeluesit të THODEX.

Prokuroria Publike e Stambollit njoftoi dje se një hetim ka filluar në Thodex lidhur me pretendimet se platforma ka shkaktuar trishtim të madh për shumë qytetarë. Organi i hetimit të krimit financiar MASAK bllokoi llogaritë e kompanisë të mërkurën dhe nisi një hetim, tha një burim i MASAK.

Panorama

[Albo]

Në kërkim për mashtrim në Turqi, zbulohet kur hyri në Shqipëri biznesmeni turk. 27-vjeçari mohon akuzat, ja çfarë shkruan në rrjetet sociale



Të tjera detaje dalin në dritë në lidhje me kërkimet për kapjen e biznesmenit turk Faruk Ozer, i cili rezulton të jetë i shpallur në kërkim për mashtrim.

Policia e Shtetit ka ndërmarrë një operacion të gjerë në kryeqytet dhe në disa qytete të tjera me qëllim arrestimin e biznesmenit turk. 27-vjeçari Ozer është person i shpallur në kërkim ndërkombëtar nga autoritetet policore turke dhe nga Sekretariati i Përgjithshëm i Interpolit në Lyon pasi rezulton i dyshuar për mashtrim në shtetin turk nëpërmjet valutës elektronike bitcoin që kap vlerën rreth 2 miliardë dollar.

Burime nga Policia e Shtetit bëjnë me dije për gazetaren e ‘News24’ dhe ‘BalkanWeb’ Dorjana Bezat se Faruk Ozer rezulton të jetë futur në Shqipëri nga pika e kalimit kufitar të Rinasit më 20 prill të këtij viti.

Nga ana e tij, Faruk Ozer mohoi akuzat në një deklaratë në Twitter. Ai tha se kompania ishte në shënjestër të një fushate shpifjesh. Sipas tij, kompania pezulloi përkohësisht aktivitetin, pasi llogaritë treguan një aktivitet të pazakontë për shkak të një sulmi kibernetik. Ozer gjithashtu tha që pretendimet se paratë ishin zhdukur ishin të pavërteta.

Balkanweb

[Albo]

Mashtroi rreth 350 mijë investitorë dhe shkaktoi vjedhjen më të bujshme në historinë e Turqisë! Kush është Faruk Fatih Ozer ‘mjeshtri’ që zhduku 2 miliardë USD dhe fshihej në Elbasan



Faruk Fatih Ozer është konsideruar si një prej mashtruesve më të mëdhenj të historisë, që zhvati rreth 350 mijë investitorë, pjesa më e madhe të të cilëve ishin nga Turqia me kriptovaluta dhe platformën “Thodex”.

Ozer ishte themeluesi i kriptovalutës “Thodex”, e cila shpalli falimentin një vit me parë, duke shkaktuar një dëm prej rreth 2 miliardë dollarë.

Faruk Fatih Ozer është vënë nën hetim në prill të vitit 2021, pasi Kryeprokurori Publik i Anadollit njoftoi se përdoruesit nuk mund të hynin në llogaritë e tyre në platformën të quajtur “Thodex”.

Ai u shpall në kërkim ndërkombëtar nga autoritetet policore turke.

Ozer dyshohet se lëvizte gjithmonë me një hard disk me vlerën e 108 milion dollarëve.

Në vitin 2017, Faruk Fatih Ozer themeloi kompaninë “Thodex” nëpërmje të të cilës investitorë të ndryshëm virtual kishin llogaritë e tyre dhe me të cilat, blenin dhe shesin kriptovaluta. Në THODEX ishin gjithsej 400 mijë llogari dhe 391 mijë investitorë aktivë, duke pasur një vëllim mujor transaksioni prej 100 miliardë lira, afërsisht 12 miliardë dollarë.

Mediat turke e kanë cilësuar si Faruk Fatih Ozer si personin që ka kryer mashtrimin më të madhe në historinë e Turqisë me vlerë 2 miliardë dollarë.

Në prill të vitit 2021, Faruk Fatih Ozer është raportuar se është filmuar në Shqipëri.

Ndërkohë që ditën e sotme, është bërë e mundur ndalimi i Ozer në qytetin bregdetar të Vlorës. Ai ishte më pushime, ndërkohë që jetonte në një banesë në Elbasan në lagjen 5 maji.

Panorama

[Albo]

Ekstradimi në Turqi i bosit të kriptomonedhave/ Gazetari turk: Faruk Fatih Özer iu vodhën paratë në Shqipëri

Ndonëse Gjykata e Elbasanit vendosi ta ekstradonte turkun e famshëm Fatih Faruk Ozer, i cili akuzohet për një mashtrim të madh me vlerë rreth 2 miliardë dollarë, detaje të reja kanë ardhur nga një gazetar turk.

Ai ka zbuluar se në fakt Ozer është gjurmuar për shumë kohë me radhë nga ana e policisë turke në vendin tonë derisa ata kanë rënë në gjurmët e tij dhe më pas i kanë kërkuar policisë shqiptare që ta vënë në pranga. Por gazetari i njohur turk ka hedhur të dhëna mjaft interesante në lidhje me ndalimin dhe arrestimin e tij për të bërë me dije kështu faktin se paratë që ai kishte iu kanë rrëmbyer biznesmenit, por pa treguar se kush ua ka marrë ato, shqiptarët apo policia turke që po e ndiqte.

Kështu gazetari turk, Cevheri Guven, i cili është duke publikuar përmes kanalit të tij të YouTube skandale të shumta në vend, ka zbuluar detaje në lidhje me mënyrën e kapjes së Ozerit në Shqipëri si edhe “fatin” e qindra miliona dollarëve që ai mbante në një server në formë kriptomonedhash.

Përmes një videoje të publikuar dje në “YouTube”, Guven shpjegon se Turqia nisi një ekip të posaçëm disa muaj më parë për kapjen e Ozerit në Shqipëri, të cilët pas ndjekjes së konstatimit, njoftuan policinë shqiptare për kryerjen e arrestimit.

Sipas gazetarit në fjalë, fill pas arrestimit, kur ishte e qartë që ai do të nisej për në Turqi, i njëjti ekip i ardhur prej andej, e detyroi fillimisht që të dorëzonte paratë e vjedhura tek ata.

“Këto para nuk u morën për t’iu kthyer turqve, që ishin mashtruar prej kreut të THODEX-it, por u morën për të shkuar në xhepa të tjera. Në fillim, e lanë të vjedhë dhe të mashtrojë, pastaj shkuan e kapën në Shqipëri, i vodhën paratë që kishte vjedhur nga turqit dhe tani po e çojnë në Turqi”, tha Cevheri Guven në videon e tij.

Panorama

[Albo]

Turqia dënon me 11 shekuj burg “bosin” e kriptomonedhave që u ndalua në Shqipëri



Gjykata e Krimeve në Turqi ka dhënë një dënim të paprecedentë për bosin e kriptomonedhave Faruk Ozer, i cili akuzohet për mashtrimin e 391 000 qytetarëve, duke shkaktuar një dëm prej 2 miliardë dollarë.

Gjykata turke ka dënuar me 11 mijë e 196 vjet e 10 muaj e 15 ditë burg, vëllezërit Ozer, motrën e tyre dhe 4 të pandehur të tjerë, si pjesë e skemës mashtruse.

Në fjalën e tij në gjykatë Ozer hodhi poshtë akuzat për krijimin e një organizate kriminale.

Ai shtoi se së bashku me familjen e tij po përjetojnë padrejtësi dhe se kjo duhet të marrë fund.

Duke vënë në dukje se Thodex ishte thjesht një kompani dhe falimentoi, Özer tha, “Nuk përmendet asnjë organizatë kriminale në Thodex. Unë jam mjaft i zgjuar për të menaxhuar të gjitha institucionet në botë. Kjo është e dukshme nga kompania që themelova në moshën 22-vjeç. Nëse do të krijoja një organizatë kriminale nuk do të veproja aq amatorisht. Është e qartë se të dyshuarit në këtë dosje janë viktima prej më shumë se 2 vitesh”. tha ai.

Serap Özer, motra e tij, deklaroi se Thodex është themeluar në vitin 2017 dhe se ajo ka filluar punën në vitin 2018.

Duke pretenduar se ajo nuk punonte aty kur u themelua Thodex, Özer tha: “Unë u futa në këtë kompani jo për të kryer një krim, por për karrierën time. Do të kisha punuar edhe nëse kjo kompani ishte kompani e dikujt tjetër, jo e vëllait tim. Duke punuar në Kompania e vëllait nuk më ka dhënë asnjë privilegj, në këtë dosje nuk ka asnjë organizim”, tha ajo duke mohuar akuzat.

Ozer u arrestua në muajin gusht të vitit 2022 në Shqipëri, pasi ishte shpallur në kërkim nga autoritetet turke. 29-vjeçari turk ishte shpallur në kërkim ndërkombëtar, pasi Gjykata e Lartë e Stambollit në vitin 2021, kishte lëshuar urdhër arresti ndaj tij, per veprat penale “Krijimi i organizatës kriminale” dhe “Mashtrimi me pasoja të rënda”.

Euronews