Gjyqi maraton i Kolumbianve te Tiranes vazhdon.
shekulli shkruan:
Ja cthote italialianja:
E PENDUARA
Lidia Çestari sot dëshmon në Romë
TIRANË - Sot në një gjykatë të Romës do të realizohet marrja e dëshmisë së Lidia Çestarit në prani të trupit gjykues të gjykatës së Tiranës, prokurorëve dhe avokatëve mbrojtës të caktuar nga kjo gjykatë. Çestari pritet të rikonfirmojë dhe njëherë deklarimet që ka bërë më 29 mars 2001, dhe të realizojë njohjen e personave që ka takuar gjatë vizitës në Shqipëri nëpërmjet fotografive. Trupi gjykues i gjykatës së Tiranës ka mundësinë që të shfrytëzojë dëshminë e narkotrafikantes së penduar italiane për të provuar nëse akuzat e ngritura ndaj 6 pjesëtarëve të grupit "Kokaina" janë të vërteta, apo janë të pabaza. Dëshmia e Çestarit mendohet të krijojë një vizion më të qartë për trupin gjykues, nëse ka ekzistuar në të vërtetë një grup i organizuar që do të merrej me trafikun e kokainës, dhe kush ishin drejtuesit e tij. Duke qenë se Çestari është një dëshmitare e drejtpërdrejte që ka kryer negociata direkte me tre prej të pandehurve kryesorë, dëshmia e saj do të jetë mjaft e rëndësishme për vendimin përfundimtar të gjykatës.
...........
LETËRPOROSIA
Si dëshmoi Çestari për "Kokainën"
Viti 2001, e enjte 29 mars në ora 12.05, në Paliamo, pranë burgut lokal, përpara zëvendës Prokurorit Rajonal të Antimafias, Dr. Xhuzepe Kapoça. I asistuar për redaktimin nga M.O Lauria Fabricio IR.O.S. CC. "Lidia Çestari, lindur në Kazalnuovo (NA) më 18 .02.1964, e burgosur aktualisht këtu. Zyra bën të ditur se janë të pranishëm, në zbatim të letërporosisë së bërë nga Prokuroria e Përgjithshme e Shqipërisë, në datën 19.3 2001, zv/ Prokurori i Përgjithshëm i Shqipërisë, Ardian Visha, zv Prokurori i Përgjithshëm Pertef Hamzai, prokurori rajonal i Tiranës Thoma Jano, dhe oficeri i policisë gjyqësore pranë Ministrisë së Rendit, Sokol Selfollari. Është gjithashtu i pranishëm Brig. Etore Çiro i R.O.S.CC. të Romës. E autorizuar që të emërojë një mbrojtës, Çestari përgjigjet: "Konfirmoj emërimin e avokatit Renata Xhilji të Gjykatës së Çivitavekias, e pranishme. Zyra lajmëron zonjën Çestari se marrja në pyetje bëhet me kërkesë të autoritetit gjyqësor Shqiptar të cilin Prokuroria e Republikës së Leçes e ka lejuar me notën e datës 24.03. 2001. E lajmëruar e hetuara se ka mundësinë që të mos u përgjigjet pyetjeve, por që në rast refuzimi, sidoqoftë autoriteti procedues do të dorëzojë kopjen e procesverbaleve të saj të bëra për çështjet e hetimit që bën Prokuroria e Shqipërisë.
.......................
Koçiu përdorte automjetet e Prokurorisë së Përgjithshme për të siguruar lëvizjet e narkotrafikantëve në Shqipëri
Çestari implikon edhe funksionarë shtetërorë
Italiania 39- vjeçare përshkruan takimet me disa drejtues të institucioneve shtetërore
Alma Çuka
TIRANË - Sokol Koçiu ka patur nën kontroll disa funksionarë të lartë të institucioneve shtetërore, emrat e të cilëve Çestari nuk i ka përmendur në dëshminë e saj për shkak të mosnjohjes, por ajo ka përshkruar identikitin dhe funksionin e tyre. Pikërisht këto detaje të paraqitura nga Çestari mund t'i shërbejnë prokurorisë për të shkuar më tej në lidhjet e personave që ajo i ka marrë në cilësinë e të pandehurit. Çestari përmend në deklarimet e saj të 29 marsit 2001, se vazhdimisht ajo ka qenë e siguruar dhe e shoqëruar nga automjete shtetërore, më saktë të prokurorisë së përgjithshme, të cilat mbanin përsipër dhe fenelina policie. Lëvizjet e saj në territorin shqiptar kanë qenë të garantuara qysh në momentin e zbritjes në Rinas e deri ditën që ajo është larguar. Narkotrafikantja 39 vjeçare dëshmon se ka mbetur e mahnitur nga organizimi i grupit shqiptar që kërkonte të hynte në trafikun ndërkombëtar të kokainës duke marrë përsipër të furnizonte dy drejtime, tregun rus dhe tregun Evropiano-Perëndimor.
"Ata llogarisnin, që me paratë e nxjerra nga kjo shitje e parë, të nisnin një trafik tjetër kokaine që ta administronin në mënyrë autonome duke i caktuar pjesë në tregun e Lindjes dhe një pjesë në Evropën Perëndimore. Koli kishte ndërmend që të financonte, me të ardhurat e trafikut të kokainës një forcë politike që sipas fjalës së tij, do të fillonte një punë rindërtimi në Shqipëri , ndërsa ai do të vendoste njerëz të besuar prej tij në pika kyçe të administratës shtetërore. Për këtë qëllim ai më kërkoi edhe nëse do të mundja që të siguroja pajisje për spiunazhin dhe për përgjimin, meqë ai kishte ndërmend që të mbante nën kontroll të gjitha dhomat e zyrës së tij për të ditur se çfarë bënin njerëzit e tij dhe që të mundte me sa duket t'u bënte shantazh ose t'i eliminonte. Atë aktivitet ai e bënte me kohë por duke qenë se nuk i kishte ende ato instrumente që më kërkonte nuk kishte ende rezultate konkrete, edhe sepse më sqaroi se kishte njerëz të besuar të tij në zyra të ndryshme…Mëngjesin pasardhës erdhën të më merrnin në hotel Leko dhe Koli me Mercedezin si dhe më shoqëruan për në Portin e Durrësit, ku më prezantuan drejtorin e portit, një person rreth 50 vjeç, me flokë të bardhë, i fuqishëm i gjatë 1,70 m, i cili na tregoi një skelë të portit ku mund të ankoroheshin lehtësisht anije të vogla të afta të transportonin një ose dy kontenierë. Më kujtohet që u zhvendosëm nëpër skelë duke vërejtur gjendjen. Me sa kuptova, ishte Koli personi në raport direkt me drejtorin e portit. Në atë rast Leko nënvizoi aftësinë e tyre të plotë për të administruar çfardolloj ngarkese t'u mbërrinte, meqë kishin kontrollin e plotë të strukturës së portit. U shoqëruam edhe direkt në zyrën e drejtorit të portit që ndodhej në katin e ngritur të një ndërtese nga e djathta e hyrjes. Në atë moment erdhi një veturë, e cila kishte si shofer të riun që kisha parë ditën e mëparshme në aeroport dhe të gjithë së bashku u spostuam pranë një kantieri detar që administrohej nga një italian (toskan rreth 50 vjeç me flokë të dendur të gjatë të bardhë, mbase me mjekër). Brenda kishte skafe të shumtë dhe Leko më tha që aty ishte i depozituar një skaf në dispozicion të tyre që mund ta përdornin për të bërë dorëzime të vogla kokaine nga Shqipëria në Itali. Ai më tregoi skafin mbi të gjitha për të parë se në çfarë mënyre mund të fshihej droga në bord. Më kujtohet se me italianin folëm në zyrën e tij unë dhe Leko, ndërsa Koli ndenji afër makinës. Megjithatë pata përshtypjen se edhe në këtë rast Leko vepronte sipas urdhrave të Kolit, i cili mes të tjerash, nuk e fliste italishten (edhe pse e kupton) kështu që dialogjet e mija zhvilloheshin me Lekon në spanjisht. Përsa i përket pamjes së jashtme të Kolit, më kujtohet se ishte një person rreth 40 vjeç, i gjatë, flokë me thinja dhe sy me ngjyrë të çelët, me hundën si shqiponjë dhe i veshur mirë si dhe në zotërim të një pistolete ruse të kromuar".
.....................
TË PANDEHURIT
Pse kundërshtuan dëshminë e Çestarit
TIRANË - Gjashtë të pandehurit e procesit "Kokaina" dhe avokatët e tyre kanë tentuar vazhdimisht gjatë katër muajve të fundit që të nxjerrin jashtë loje dëshmitaren Çestari, si dhe i kanë kërkuar gjykatës ta vlerësojë të pavleshme dëshminë që ajo ka dhënë më 29 mars 2001. Taktikat e përdorura nga të pandehurit Koçiu, Bërballa dhe Durda kanë qenë nga të ndryshmet. Fillimisht ata kanë kërkuar të vënë në dyshim ekzistencën e Çestarit si dëshmitare dhe besueshmërinë e deklarimeve të saj, për shkak të implikimit që ajo kishte me narkotrafikun. Më pas të pandehurit, për të penguar dëshminë direkte te Çestarit përjashtuan avokatët e tyre mbrojtës dhe kërkuan që të mbroheshin vetë përballë 39- vjeçares së penduar. Por edhe kjo kërkesë e tyre u rrëzua nga gjykata duke caktuar avokatë kryesisht nga lista e saj. Tashmë të pandehurit e çështjes "Kokaina" shpresojnë vetëm në ndonjë "lajthitje" të mundshme të Çestarit në deklarimet e saj, gjë që do t'i nxirrte ata pa lagur nga një provë mjaft e fortë në duart e prokurorisë.
.......................
Ngarkesa e parë e kokainës që do të sillej në Shqipëri duhej të ishte 800 kg dhe do t'i shitej një grupi të mafias Ruse
"Koçiu, njeriu i kandidatit për president"
Lida Çestari rrëfen sesi ishte i organizuar grupi i trafikantëve shqiptarë të kokainës
Alma Çuka
TIRANË - Seanca e sotme që do të zhvillohet në një gjykatë të Romës për të marrë dëshminë e Lida Çestarit, pritet të rikonfirmojë dhe një herë deklarimet që Çestari ka dhënë për tre prokurorë shqiptarë më 29 mars 2001. Dëshmia e narkotrafikantes italiane që ka fituar statusin e të penduarës pritet të jetë një nga provat që do të fundosë gjashtë të pandehurit e çështjes "Kokaina". Deklarimet e Çestarit të dhëna më 29 mars 2001 kanë vënë në pozitë të vështirë të pandehurin Sokol Koçiu, i cili ka qenë sipas saj, njeriu kryesor i grupit që vepronte në Shqipëri, madje në disa raste e penduara dëshmon se njerëzit me të cilët ajo kontaktonte ishin nën urdhrat e Kolit. Në dëshminë e saj të 29 marsit 2001 Çestari tregon për vizitën e saj në Shqipëri, kontaktet me grupin shqiptar dhe me disa drejtues të institucioneve shtetërore, të cilët do të ndihmonin në garantimin e trafikut të kokainës. "Nga fundi i nëntorit 1999 shefi im, Jorge Meya i quajtur ndryshe Serxho, më lajmëron se do të kontaktoja me telefon nga një farë Leko, një shqiptar, për të rënë dakord në lidhje me një vizitën time në Shqipëri gjatë së cilës duhej të verifikoja se çfarë garancish Leko dhe grupi i tij mund të ofronin në lidhje me një trafik kokaine për të cilin ishin të interesuar. Në fakt u telefonova në telefonin tim celular nga Leko dhe unë i komunikova se në cilën ditë do të mbërrija në Tiranë. Ditën e caktuar mora fluturimin me Alitalian nga Milano, dhe mbërrita në Tiranë mbasdite. Sapo zbrita nga avioni dëgjova të thirrej emri im dhe m'u prezantuan dy persona, njëri prej të cilëve tha se ishte Leko dhe tjetri m'u prezantua me emrin Koli, i cili u cilësua si shefi i antimafias të Tiranës. Të dy ishin të shoqëruar nga dy persona të tjerë njëri prej të cilëve tha se ishte vëllai i Lekos, ndërsa për tjetrin nuk më kujtohet asgjë përveçse ishte i ri dhe se bënte punën e shoferit. Koli u kujdes që të merrte pasaportën time për problemet doganore, më pas në bordin e dy veturave me fenelinë policie me shoqëruan në hotel në qendër të Tiranës, në afërsi të një teatri dhe të një sheshi me një obelisk që më thanë se quhej Hotel Tirana, emër që unë e ngatërroja me Torino. Më kujtohet që të dyja veturat ishin me ngjyrë të errët dhe ajo e Kolit ishte një mercedes Gjerman, e zezë. Ai më tha se ishte veturë e shtetit që i ishte dhënë në përdorim atij. Më kujtohet gjithashtu se në hotel ishin sistemuar karabinierë të shumtë të policisë italiane dhe që edhe personeli i hotelit e fliste mirë italishten… Atë mëngjes dhe më pas në restorant ku shkuam në orën e drekës, Leko më tha në prani të Kolit, që vetë Koli ishte fija i presidentit (presidenti është kumbari i tij), duke më shpjeguar se bëhej fjalë për kandidatin për president në zgjedhjet e ardhshme kombëtare. Shtoi se edhe babai i Kolit ishte një personazh politik, i cili ishte mundur në një zgjedhje të mëparshme ndërsa atë vit kishte dalë fitues ( nuk më shpjegoi se për çfarë tip zgjedhjesh e kishte fjalën). Nga muhabetet që bëmë kuptova se verën e kaluar ata kishin patur kontakte me një grup tjetër kolumbianësh për furnizimin e kokainës, por nuk kishin arritur një marrëveshje. Në negociatën me grupin e Serxhios, për llogari të të cilit punoja unë, ishin përkundrazi në një pikë të mirë, meqë ato ofronin garanci për çdo fazë të trafikut, si edhe për marrjen e mallit, dorëzimin klientëve, transportin e parave me sistemin bankar, brenda të cilit thoshin se nuk kishin asnjë problem. Furnizimi i parë duhej të ishte prej 800 kilogramësh kokainë që ato thoshin se duhej që t'ia dorëzonin tërësisht një grupi rus që do të mbërrinte me një avoin duke u dorëzuar paratë dhe duke marë kokainën. Leko më shpjegoi se kishte njohje të mira mes agjentëve sekretë rusë dhe që ai ishte një treg shumë i mirë për kokainën…Unë iu drejtova kështu Luixhi Gaspirinit duke fiksuar edhe një takim në Romë që nuk u bë. Saktësoj se Leko në atë rrethanë do të përdorte një dokument në emër të Nikola Papës. Mbasi lamë restorantin, me makinën Mercedes të zezë, unë Leko dhe Koli shkuam për në jug të Shqipërisë, në drejtim të Greqisë, duke përshkuar rrugë në mal dhe duke mbërritur në një bazë ushtarake që mbrohej nga një roje dhe që përbëhej nga një gji i ngushtë në fund të së cilit ishte një portë e madhe metalike që mbyllte hyrjen e një shpelle në të cilën më thanë se mund të hynin nëndetëse që mund të kalonin nga ana tjetër e malit. Në ato rrethana Koli shpjegoi se do të mundnin të përdornin atë bazë si pikë zbarkimi për varkat e vogla që do të bënin transportin mes një anijeje në det të hapur dhe tokës, meqë mund të mbështetej në disponibilitetin e plotë dhe absolut të atij vendi. Sidoqoftë ai vendi ishte interesant sepse në atë periudhë Serxho kishte një ide që të blinte nga Rusia një nëndetëse për ta përshtatur për transportin e kokainës. Më kujtohet se nga ajo bazë shihej Greqia. Po atë mbasdite u spostuam në një qytezë pak më në veri, ku ishte një port i vogël dhe vura re se Koli ishte i njohur mirë prej njerëzve të vendit. Ai më tha se edhe ai porti i vogël mund të përdorej për të bërë zbarkimin e kokainës. Mbrëmjen në vazhdim fjetëm në një hotel të atij qyteti, pasi hëngrëm një një restorant me një tarracë panoramike. Në mëngjes u kthyem në Tiranë dhe vazhduam bisedimet tona. Në veçanti, më thanë se nuk kishin asnjë vështirësi për të përdorur bankat shqiptare që të futej paraja në Kolumbi dhe folëm edhe për modalitetet me të cilat do të transferohej kokaina në Evropën Perëndimore me kopertinën (mbulimin) e trafiqeve të ligjshme, sepse më shpjegoi Leko në Shqipëri po mbërrinin shumë ndihma nga shtetet e tjera dhe që kështu ishte e lehtë të mbuloje spedicionet me shkëmbim mallrash. Për këtë qëllim ne e kishim zakon që të përdornim çimento, material ndërtimi dhe tubatura, por Leko tha që mund të përdornin edhe miell dhe mallra ushqimore, ai shtoi se ai nuk kishte vështirësi që të arrinte disponueshmërinë e anijeve të mëdha. Leko dhe Koli folën edhe në rastin e vizitës në kantier, për një djalë shumë të zotë në drejtimin e skafeve dhe që ato mendonin që ta përdornin në transportin e kokainës, por që për momentin ishte i burgosur në Bari, sepse ishte i arrestuar për imigracion klandestin. Koli po interesohej për lirimin e tij, duke saktësuar se kishte miq në Policinë Italiane dhe për atë qëllim kishin ardhur më parë në Itali dhe që se kishin ndërmend që të ktheheshin aty, Koli me pasaportën e vet ndërsa Leko me pasaportë false ( pata konfirmim për këtë ardhje të tyre sepse më pas mbasi unë u ktheva në Itali, u kontaktova nga Leko që më tha se ndodhej në Itali). Atë ditë Leko më kërkoi edhe nëse kisha disponueshmërinë e një sasie më të kufizuar kokaine, meqë ai e kishte një klient në Spanjë. Unë fola për këtë me Serxhon që më tha se kishte kokainë gati në Madrid të barabartë me 50 kilogram. Dhe në telefonata ne iu referuam apartamentit 50 metra katrorë. Biznesi nuk parashikonte asnjë transport droge sepse unë dhe Leko vetë do të ndërmjetësonim në Madrid për shkëmbimin e drogës me para. Më pas nuk u bë asgjë.
Po atë mbasdite unë u ktheva në Itali me avion dhe me telefon e njoftova Serxhon për përfundimin e misionit tim, duke bërë vërejtjen se gjithçka që më ishte treguar dukej se kishte garanci absolute, por në fakt e vetmja garanci ishte roli institucional i Kolit dhe paketa e klientëve për të cilën krenohej Leko në Rusi dhe në Evropë. Mbas disa kohësh e pyeta Serxhon për gjendjen e bisedimeve dhe ai më referoi se Leko ishte i pranishëm në Kolumbi dhe se po negocionte direkt. Më pas unë nuk kam patur kontakte as me Lekon dhe as me persona të tjerë që i referohen atij".
..........
ububujaa...
Krijoni Kontakt