Islami radikal vazhdon te rrezikojeShqiperine dhe Kosoven

[pirro2019]

Koment

Islami radikal vazhdon të rrezikojë Shqipërinë dhe Kosovën

               PUBLIKUAR NË : 10:35 - 02/08/19PIRRO PRIFTI

 

23

 

 

 

 

 

Pirro Prifti

Në një kohë kur Shqipëria, Kosova, janë përfshirë në vorbullat e konflikteve politike dhe të korrupsionit, në një kohë kur Bosnjë dhe Hercegovina (ish-Dukagjini), megjithëse të lëna në varfërinë e tyre dhe në paqe të brishtë politike (Bosnja pas luftërave etnike dhe fetare), këto vende, ku emigracioni është i madh, varfëria e madhe, praktikisht në ditët e sotme, po përmbyten heshturazi nga ideologjia radikaliste dhe nga xhamitë që po ngrihen kudo.

Në një kohë kur SHBA dhe BE po përpiqen të integrojnë Shqipërinë dhe Maqedoninë, dhe u japin shpresa Serbisë dhe Bosnjës, duke u shpjeguar dhe duke dhënë kushte se si t’i realizojnë ato në mënyrë që të integrohen, nga ana tjetër një lumë i madh i ideologjisë radikaliste vazhdon heshturazi të futet në të çarat e demokracisë së brishtë të këtyre shteteve, sidomos në pjesët rurale të vendit, aty ku injoranca dhe varfëria lulëzojnë ashtu si gjembaçët e shkretëtirës.

Por, si po ndodh ky fenomen pasi ISIL, Al Qaeda, Al Nusra, Vehabizmi, janë shpartalluar, pasi lajmi për djalin e Bin Ladenit – Hamza Bin Laden na qenka vrarë, kur Al Bagdadi jeton i fshehur diku në rrënojat e qyteteve sirianë. Kur talebanët e mundur vazhdojnë të dëmtojnë dhe të mos u lënë kënaqësinë amerikanëve për të shijuar fitoren ndaj radikalizmit islamik në Afganistan?

Përballë idesë së BE për të përfshirë, integruar edhe Ballkanin Perëndimor në shtetin e madh demokratik europian, BE, vazhdon të mbetet si kundërshtar i kësaj ideje – gjeopolitika turke (por dhe arabe) për të ribërë një perandori të re islame nën drejtimin e Turqisë (dhe Arabisë), duke pasur përparësinë në këto vende dikur nën varësinë e tyre, por përparësia më e fuqishme është ideologjia fetare islame, e cila ka zënë rrënjë 500-vjeçare në këto vende.

Dihet se islami radikal është politik dhe jo vetëm fetar.

Le të merremi me vendin tonë dhe me Kosovën e të shohim përse vërehet një indiferencë ndaj kontrollit të radikalizmit islam. Islami radikal ka ndryshuar taktikat, por jo objektivin: atë të bërjes me dhunë të një islami-stani ballkanik (madje dhe europian po mundën) me ligjet e sheriatit dhe të vehabizmit, duke shkatërruar laicizmin dhe demokracinë.

Praktikisht taktikat janë si ajo që shkruante Lenini dhe të KGB:

– Revolucioni socialist do të fitojë aty ku zinxhiri kapitalist është më i dobët. Këtu vetëm zëvendësoni fjalën socialist me fjalën islam dhe del taktika djallëzore. Kush janë vendet më të dobëta sot në zinxhirin kapitalist? Sigurisht vendet e Ballkanit: Shqipëria, Kosova, Bosnja Maqedonia;

– Varfëria dhe injoranca, sidomos në pjesët rurale të Shqipërisë, Kosovës dhe Ballkanit Perëndimor janë faktor tjetër ku po mbështetet invazioni i heshtur radikalist islamik, i cili jep ndihma dhe vazhdon të japë ndihma të kondicionuara në këto vende (pra me kushte që çdo ndihmë ose financim i madh nga shoqata islame apo të kamufluara të shoqërohen me ngritjen e xhamive dhe medreseve);

– Brishtësia dhe indiferenca e institucioneve të demokracisë perëndimore janë ato të çara ligjore dhe etike, mbi të cilat mbështetet invazioni radikalist i heshtur islamik. Kjo ka shkaktuar që emigrantët refugjatë me kalimin e kohës kërkojnë (duke shfrytëzuar ligjet laike europiane të ruajtjes dhe zbatimin e të drejtave të njeriut) ngritjen e institucioneve fetare në ato vende, ndërsa në Shqipëri, Kosovë, Bosnjë dhe Hercegovinë, për shkak të anarkisë ligjore dhe konflikteve politike, si dhe varfërisë, kanë abuzuar duke ndërtuar institucione fetare pa hesap;

– Ateizmi në rritje, i cili është armiku më i madh i demokracisë perëndimore, sepse nëpërmjet ateizmit, zbehen dhe shemben pragjet etike dhe morale të popullit dhe kombit, duke krijuar iluzionin masiv të lirisë pa kufi, sidomos te të varfrit dhe injorantët, të cilët bëhen skalioni i parë i ushtrisë radikaliste në shërbim të “ujqërve të vetmuar” dhe të të huajve,

– Emigracioni dhe refugjatët, një nga mënyrat më të kamufluara të hyrjes së radikalistëve islamikë në vendet e BE, SHBA, Kanada, Australi dhe Rusi, kurse në vendet e Ballkanit Perëndimor, refugjatët janë të paktë, më tepër vijnë individë që hapin biznese të vogla apo të mëdha, të cilët janë si ato celulat e heshtura të përhapjes së komunizmit dikur nga BRSS. Taktikat e përhapjes dhe invazionit radikalist islamik në mënyrë të fshehtë janë të ngjashme me taktikat e KGB.

– Zhgënjimi dhe depresioni masiv moral, social dhe ekonomik, nga rënia e sistemit komunist, sidomos në ish-vendet e bllokut komunist shkaktuan një anarki morale, institucionale dhe ishin “triger”-ët e radikalizmit fetar, madje dhe të atij kristian, ashtu siç ngjau në luftën në Bosnjë dhe Kosovë.

– Përkrahja me armë dhe me para në disa raste e radikalistëve fetarë muxhahedinë nga ana e SHBA-së për të luftuar BRSS në luftën e Afganistanit të viteve 1979-1989, si dhe nxitja e luftës civile, e cila nuk ka mbaruar akoma në Siri, shkaktoi dyndjen e luftëtarëve islamikë aty edhe nga Ballkani Perëndimor dhe Shqipëria. Mendohet se janë me qindra luftëtarë radikalistë që luftuan aty, dhe me dhjetëra luftëtarë, të cilët janë kthyer në Ballkanin Perëndimor.

Presidentja e Kroacisë, Kolina Kitaroviç, në një takim për 75-vjetorin e Holokaustit në Izrael, këto ditë deklaroi se “Bosnja dhe Hercegovina drejtohen nga islami radikal, i cili është përcaktues në rregullimin e axhendave”.

Sipas Koha.net, në Kosovë aktualisht ekzistojnë rreth 750 xhami, ku qytetarët kryejnë ritet e tyre fetare. Në mesin e tyre janë mbi 200 syresh që janë ndërtuar që nga përfundimi i luftës (pas 1999).

Xhamizimi i tokave shqiptare vazhdon me shpejtësi në Kosovë dhe Shqipëri dhe kjo nuk është rastësi, por një politikë religjioze e induktuar nga Gjeopolitika turko-arabe, e cila ka filluar që pas shembjes së komunizmit, të cilën e kam shpjeguar edhe në shkrimet e kaluara.

Në Shqipëri, pavarësisht largimit masiv të shqiptarëve në vendet e BE, SHBA, Angli, Australi, ku mendohet se janë 1.8 milionë shqiptarë të shpërndarë kryesisht në Greqi, Itali, Angli, SHBA dhe Belgjikë etj., gjendja në Kosovë është gjithashtu e ngjashme dhe mendohet se nga Kosova janë larguar rreth 1 milion banorë që pas 1993.

Popullsia që ka mbetur, kryesisht ajo fshatare (dihet që popullsia rurale në Shqipëri është 70% e popullsisë totale, e cila më 2013 zbriti në 50%) përballet nga dy probleme madhore: papunësia dhe varfëria. Zgjidhja momentale, sipas vetë mentalitetit fshatar, është: ardhja me shumicë në qytete dhe përqafimi i çdo lloj mundësie për të mbijetuar: si kriminaliteti, prostitucioni, amoraliteti, imoraliteti dhe radikalizimi.

Radikalizimi i individëve po ndodh pikërisht për shkak të ateizmit dhe propagandës islamike, e cila godet pikërisht plagët e kapitalizmit, si prishja dhe shthurja e familjes, e cila nuk do të ndodhte nëse, sipas islamit, do të kishte sheriat.

Kjo vërteton atë që ka thënë Xhorxh Bernard Shou, se “Nuk ka krim më të madh se të jesh i varfër”.

Ky invazion i fshehtë i radikalizmit islamik, i cili ka ndryshuar taktikën, nga sulmet dhe pretendimet e hapura si në rastin e luftës në Afganistan, Irak, Siri, Jemen, në luftën e fshehtë dhe të përhapjes së ideve të radikalizmit nëpërmjet investimeve politiko-religjioze dhe fondacioneve bamirëse apo ngritjes së bizneseve private.

Zonat tona rurale të varfra janë më të rrezikuara, duke pasur parasysh që edhe injoranca, traditat, përçarja dhe urrejtja janë duke zënë vend gradualisht, pikërisht për shkak të propagandës radikaliste, e cila godet pikat më të dobëta të demokracisë shqiptare: prishjen e familjes, ateizmin, i cili shoqërohet me anarki morale dhe sociale, varfërinë; sidoqoftë edhe popullsia qytetare është e prekur, sepse shumica e saj përbëhet nga të ardhur prej fshati, qoftë për të gjetur punë, qoftë për të mbijetuar me format e paligjshme, qoftë nga përdorimi i militantizmit politik, në të cilin njerëz pa kurrfarë identiteti emërohen drejtues në shtet. Këta janë më të rrezikshmit, sepse, sikundër thotë dhe Bibla, “ruaju nga fukarai që bëhet mbret”.

Detyra e shtetit është në radhë të parë të investojë për të të pakësuar varfërinë, për të rritur punësimin, për të përmirësuar arsimimin laik dhe për të ndihmuar që familjet të mos ndahen.

Shpresojmë që qeveritë e Shqipërisë dhe Kosovës të marrin parasysh këto mundësi dhe të marrin masa, pavarësisht nga ideja se na mbron SHBA dhe BE, sepse “Ujku, ujku, por çakalli vazhdon të bëjë namin” te ne…./Gazeta Liberale

 

23