Courrier des Balkans: Rama dhe Veliaj censorët e mediave

[Albo]

Nga Louis Seiller/“Demokracia në rrezik”, “Mediat nuk janë ofiçina”, “AMA dorëzohet” … të mbledhur para Bashkisë Tiranë, rreth njëqind persona përpiqen të ngrenë zërin që të dëgjohet zemërimi i tyre. Para disa ditësh, gazetarë të gazetës së njohur MAPO dhe të kanalit televiziv ABC, i cili shihet si më pranë opozitës, kanë njoftuar mosfirmosjen e kontratave të tyre.

Shenjë e dobësimit të pluralizmit mediatik, këto largime nuk janë raste të shkëputura. Ato janë vazhdimi i një sërë ngjarjesh shqetësuese: disa muaj para zgjedhjeve parlamentae një erë e keqe po fryn mbi shtypin shqiptar.

Me kartonin e kuq në dorë, Nertila Marku është njëra nga organizatorët e protestës. Nga pozita e aktivistes shoqërore ajo fshikullon mediat, duke u shprehur se ato “nuk ftojnë në emisionet e tyre veç pseudoanalistë që s’pushojnë së mburruri sukseset e qeverisë pasi ato punojnë me këta politikanë! Ato nuk ftojnë pothuajse asnjëherë ekspertë të vërtetë, të cilët mund të shpjegonin sfidat politike e shoqërore të vendit. Ne kemi nevojë për të vërtetën dhe nuk duam më nga këto gënjeshtra të përsëritura sa e sa herë.”

“Edi Rama e Erion Veliaj janë drejtorët e vërtetë të informacionit.”

Në Shqipëri, kanalet e lajmeve janë të shumtë. Ato i janë imponuar qytetarëve këto vitet e fundit si instrumente thelbësorë të jetës politike. Në kafe, restorante, dyqane ato janë të pranishme dhe shumë të ndjekura.

Por në këtë vërshim të pandalshëm imazhesh dhe temash, është e vështirë të gjesh zëra objektivë dhe jo partizanë. Shumica e mediave private janë në fakt pronë e biznesmenëve me ndikim. Kohët e fundit shumë njerëz janë të shqetësuar për afërsinë e këtyre “oligarkëve” me drejtuesit aktualë politikë. Nertila, e cila ka qenë më parë aktive kundër qeverisë së shkuar, është e sigurtë për këtë fakt dhe pohon: “Është më keq se në kohën e Berishës. Ajo që ishte veçse një bakterie është kthyer në një virus të vërtetë. Ne duhet t’i kundërvihemi!”

A mund të ketë arsye pushteti sociali për t’u ruajtur nga puna e gazetarëve sot? Që nga fundi i vitit 2015, nuk mund të mos vësh re që pushteti ka nisur një sulm të vërtetë ligjor për të “futur më mirë në kornizë” lirinë e shprehjes dhe të informimit: kriminalizimi i deklaratave fyese ndaj nëpunësve, dënime të rënda për autorët si dhe për faqet në rrjet ku strehon këto komente, dënime për gazetarët hetues për “ndikime antiligjore”, faqe informuese në rrjet të cilat duhet t’i nënshtrohen një autorizimi të detyruar qeveritar, etj.

Të gjitha masat e mësipërme nuk kanë arritur të zbatohen me sukses për shkak të kritikave që ato ngjallën. Por, përballë këtij dështimi ligjor, qeveria socialiste është kthyer tanimë drejt mjeteve të tjera duke përdorur ndikimin e saj tek pronarët e kanaleve të ndryshme.

I angazhuar prej shumë vitesh në lëvizjet e shoqërisë civile shqiptare, Sazan Guri shpjegon se: “Kryeministri dhe Kryetari i Bashkisë së Tiranës ndërhyjnë sistematikisht në funksionimin e mediave. Së fundmi, ata i kanë bërë qartazi presion ndaj AMA-s me qëllim që gazetarët të humbasin postin e tyre. Ata ndikojnë direkt mbi përmbajtjen dhe organizimin e emisioneve.”

Jo larg që këtu, para dyerve të AMA-s, Aulon Kalaja mobilizon turmën. Gazetar për një kanal televiziv privat, ai është ngritur për të marrë fjalën: “që nga viti 2013, rreth 20 emisione dhe shumë kanale janë mbyllur, shumë gazetarë të njohur e të respektuar për profesionalizmin e tyre kanë humbur vendin e punës. Ne nuk duam që të tjerë të gjejnë fatin e tyre së shpejti”.

Për Aulonin demokracia shqiptare është në rrezik pasi “dy drejtuesit kryesorë të informacionit në vend quhen Edi Rama dhe Erion Veliaj”, respektivisht kryeministri shqiptar dhe kryetari i Bashkisë Tiranë.

“Informacioni i lirë nuk është tjetër veçse iluzion”

Në shtatorin e shkuar, gazetari Artan Rama e pagoi në kurriz këtë qasje të re të linjave editoriale. Gabimi i tij ishte hetimi mbi menaxhimin e mbetjeve të Tiranës pas vdekjes, këtë verë, të një të riu shtatëmbëdhjetë vjeçar. Pas censurimit dhe ndalimit të emisionit tij, drejtuesit e televizionit Vizion PLUS, gjithashtu pronarë të një ndërmarrjeje ndërtimi, janë shpërblyer duke marrë një kontratë për ndërtimin e një godine publike në kryeqytet.

Që nga largimi prej këtij televizioni, Artan Rama denoncon funksionimin e sistemit mediatik shqiptar: “Mungesa e transparencës dhe korrupsioni i elitave politike [u shërbejnë] oligarkëve që përdorin mediat për të mbrojtur interesat e tyre”.

Për të, “informacioni i lirë nuk është më veçse një iluzion. Madje është instrumenti i një demagogjie të re”.

Më shumë se vetë censura, është rritja e autoçensurës që shqetëson. Ndërkohë që deri dje mediat kryesore funksiononin sipas një ndarjeje të qartë mes “një elite të vogël gazetarësh të njohur dhe një shumice gazetarësh nën mëshirën e tyre”, tani shumë prej tyre heshtin si “shërbëtorë të shërbëtorëve”. Duke flakur mënjanë etikën profesionale, ata janë të detyruar të vihen në shërbim të interesave të drejtuesve dhe pronarëve të kanaleve televizive. “Liria e shprehjes është duke vdekur në Shqipëri”, vëren me hidhërim Sazan Guri.

Viktima të kësaj autoçensure gjithnjë në rritje dhe të konkurrencës së tyre, shumë gazetarë ndjehen sot të pafuqishëm. Në dhjetëra procese gjyqësore kundër pushimeve abuzive nga puna, shumë pak kanë arritur t’ia dalin mbanë.

Përballë avokatëve të fuqishëm dhe në mungesë të provave, ata nuk kanë asnjë peshë. Shoqatat e gazetarëve ekzistojnë, por protestuesit mendojnë se ato kanë humbur çdo lloj besueshmëri. Më shumë pjesë e grupeve të organizuara të interesit se mbrojtëse të vërteta të të lirisë të informimit dhe të shprehjes, ato nuk bëjnë asgjë tjetër veçse mbrojnë pozitën e disave.

Aulon Kalaja denoncon gjithashtu “konflikte të pastra interesi” në funksionimin e shoqatës kryesore të gazetarëve “kryetari i të cilës është vëllai i njërit prej drejtuesve kryesorë të Policisë së Shtetit”. Prej katër vitesh kjo shoqatë nuk është shprehur për asnjë problem që lidhet me censurën.

Organizatorët e protestës po mendojnë për mjete të reja për të ruajtur pluralizmin dhe lirinë e gazetarëve. Një shoqatë kundër censurës mund të krijohet së shpejti. Po a do të jetë në gjendje ajo t’i kundërvihet presioneve politike të oligarkëve shqiptarë?

Nisur nga hendeku që i ndan me protestuesit, koha kur Edi Rama e Erion Veliaj militonin në unison me shoqërinë civile për një shoqëri më transparente dhe demokratike, duket shumë e largët.

Shkrimi është botuar në “Courrier des Balkans”

Koha Jone

[Albo]

Shkullaku: Rama si Erdogan e Putin, dëshiron pushtet të pakufizuar



Në emisionin “Komiteti” – i drejtuar nga Berat Buzhala – prodhim i Gazetës Express për RTV Dukagjini, gazetari Armand Shkullaku ka folur për qeverisjen e kryeministrit të Shqipërisë, Edi Rama.

Shkullaku ka thënë se Rama po provon të ketë rëndësi edhe jashtë kufijve të shtetit të tij dhe këtë pasi sipas tij, nuk mund ta arrijë me mënyrën e qeverisjes, për të cilën ka dështuar.

Fillimisht sipas gazetarit, Rama po provon që të rrisë ndikimin e tij në sy të ndërkombëtarëve dhe në Ballkan, duke bërë pajtimin historik shqiptaro – serb.

Shkullaku ka thënë se kryeministri nuk ka lënë hapësirë brenda partisë së tij për demokraci, duke e krahasuar atë me diktatorin Enver Hoxha.

Gazetari ka shtuar se kreu i Qeverisë shqiptare ka tendencë ashtu siç ka president turk Recep Tayyip Erdogan, apo ai rus, Vladimir Putin për pushtet të pakufizuar, dhe kontrollim të gjithçkaje brenda vendit.


Shkullaku për Berat Buzhala: Do jem pjesë TV KLAN, nuk bëj kompromise





Në emisionin “Komiteti” – i drejtuar nga Berat Buzhala – prodhim i Gazetës Express për RTV Dukagjini, gazetari Armand Shkullaku ka folur për largimin e tij nga pozita e drejtorit të televizionit ABC News.

Ai ka thënë se u largua nga ABC News sepse në momentin kur nuk e ndjente lirinë profesionale.

Shkullaku ka treguar se hapësira që kishin gazetarët në këtë televizion ishte vendi i fundit ku gazetarët kishin lirinë e tyre të të shprehurit në Shqipëri.

Gazetari ka shtuar se ndryshimi i kësaj, dhe tendenca për të ndërhyrë në lajmet e ABC News shtynë në largimin e tij nga ky televizion, pas katër vitesh punë.

Shkullaku në “Komiteti” ka treguar se do të jetë pjesë e TV Klan dhe siç ka thënë ai, asnjëherë nuk do të bëjë kompromise politike.

Ai ka thënë se kryeministri i Shqipërisë, Edi Rama, që në kohen kur udhëhiqte Tiranën, kishte njërin ndër qëllimet e tijm rreshtimin e mediave krah qeverisjes së tij.

Shkullaku ka treguar se Rama ofendon dhe provon të ulë portalet, sepse sipas gazetarit janë, e vetmja formë e informimit, të cilën kryeministri nuk arrin ta kontrollojë.

Gazetari ka thënë se Rama, përkundër faktit që provon të zvogëlojë besimin në portale, vetë kryeministri ka hapur disa portale.

Shkullaku ka shtuar se kryeministri blen mediat në forma të ndryshme kontraktuare, duke iu dhënë favore.

Koha Jone

[Albo]

Gazetarët Shkullaku e Lela flasin për largimet: Gjurmët të çojnë te një ujk!



“Zëri i Amerikës” ka marrë sot prononcimet e dy drejtuesve të medias që u larguan nga detyra një ditë më parë, Armand Shkullaku nga ABC NEWS dhe Alfred Lela nga MAPO. Ja çfarë shkruan “Zëri i Amerikës” për zhvillimet në median shqiptare.

***

Në Tiranë janë larguar këto ditë nga puna dy drejtues të njohur në mediat shqiptare; Armand Shkullaku nga TV ABC NEWS dhe Alfred Lela nga botimet MAPO.

Opinioni publik e ka ndjekur me shqetësim largimin nga detyrat të dy gazetarëve të njohur, ndërsa ata vetë pohojnë se politikat editoriale të mediave të tyre po ndryshojnë.

Në pamje të parë largimet nga puna të dy drejtuesve të mediave Armand Shkullaku dhe Alfred Lela janë përfundim apo ndërprerje të thjeshta kontratave të punës.

Por ata pohojnë se prapa kësaj rutine qëndrojnë përpjekje të pronarëve të mediave për të ndryshuar politikat editoriale pro qeverisë dhe në dëm të parimeve gazetareske.

“Gjurmët e kësaj lëvizje të çojnë te një ujk, i cili zakonisht është i madh, me pushtet dhe me para” – thotë ish-drejtuesi i botimeve MAPO, Alfred Lela.

Ai shtoi se brenda një jave në radhët e medias u shfaq në këto dy raste vetëm maja e ajsbergut e një morie problemesh të shtypit shqiptar dhe mekanizmave politike që e trysnojnë atë.

Zoti Lela tha se gjatë bisedës për një kontratë të re pune, pas skadimit të kontratës së fundit, ai vendosi të mos pranojë kërkesat për një politikë të re editoriale nga pronari, edhe pse ai kërkoi të vazhdohej me një profil sadopak opozitar.

Ndërsa drejtuesit të tv ABC NEWS, Armand Shkullaku, me një përvojë 25 vjeçare në shtypin shqiptar, u largua pas 4 vjetësh me një ndërprerje kontrate, pasi pronari i grupit mediatik kërkoi një politikë të re editoriale dhe menaxheriale.

“Bashkë me kolegët u përpoqa disa vjet që ta bënim TV ABC NEWS një ishull të lirisë, të profesionalizmit, për aq sa ia arritëm” – thotë zoti Shkullaku.

Ai vetë tha se nuk pati presione apo negociata, por thjesht iu komunikua se stacioni do të ndryshojë menaxhimin dhe qëndrimin editorial.

Zoti Shkullaku shtoi se klima ndaj mediave është e rëndë prej disa vitesh dhe gazetarët punojnë në kushte të vështira.

“Pa diskutim që ka një klimë kur i pari i vendit, pra kryeministri, i quan mediat “kazanë”, “baltë”, “moçal” etj., etj. Ka pra, si të thuash, një strategji për asgjësimin e çdo mendimi të lirë, çdo hapësire të pavarur” – tha zoti Shkullaku.

Dy gazetarët e njohur shprehën shqetësim rreth faktit që zërat kritikë po shmangen me një mënyrë a një tjetër, dhe mediat proqeverisë po krijojnë realitete virtuale, që po largohen çdo ditë e më tepër nga jeta e vërtetë e qytetarëve.

(Marrë nga “Zëri i Amerikës”)

[Albo]

Pse Aleksandër Frangaj largoi Armand Shkullakun nga ”ABC News”?



Largimi nga posti i drejtorit të ABC News i Armand Shkullakut ka shkaktuar komente dhe reagime të shumta të rrjetet sociale. Në median online qarkullojnë mjaft shkrime që japin disa motive të për largimin. Portali i ri “Shuplaka.com” shkuan se pas kësaj lëvizje në “ABC News” fshihet ndikimi i kreut të Bashkisë së Tiranës, Erion Veliaj.

Më poshtë shkrimi i plotë i Shuplaka:

“U duk jo i vërtetë fillimisht lajmi për largimin e Armand Shkullakut nga televizioni informativ “ABC News”. Shkullaku është nga të paktët analistë me prerje tipike gazetareske në Shqipëri. Në drejtim të një prej televizioneve të suksesshme informative dhe me shkrime në portalin ”Lapsi”, Shkullaku ka qenë herë pas herë kritik me zhvillimet në vend. Ndryshe nga të gjithë, për Shkullakun, në çdo analizë apo shkrim ka patur rëndësi vetëm një gjë: fakti.

Prandaj, në situatën kur Shkullaku ishte duke bërë sukses në punët e tij si profesionist, u duk krejt e pabesueshme lëvizja e beftë e pronarit Aleksandër Frangaj.

Sot në një intervistë për gazetën “Mapo”, Shkullaku me fjalët e tij shpjegonte se kishte ardhur një moment që Frangaj kërkonte një qasje të re menaxheriale dhe editoriale, duke lënë të kuptohej qartësisht se pse kishte ndodhur largimi.

Por pse është larguar në të vërtetë Shkullaku?!

Kur kolegu i tij i ”Lapsi”-t, Andi Bushati akuzonte Erjon Veliajn në ditët e fundit të 2016 se ka blerë Aleksandër Frangajn dhe Vjollca Hoxhën me planin urbanistik të “Boerit”, pritëm faktet.

Po Bushati nuk foli më. Faktet dolën sot. Frangaj ka hequr Shkullakun nga ABC me “takt”. I ka ofruar një pozicion në Klan Tv me pretekstin që ”ABC News” del me humbje.

Pas më shumë se 5 vjetësh, u bë më në fund bilanci negativ i ”ABC News”. Dhe kështu i vetmi TV që ende ishte oponent me qeverinë dhe Bashkinë e Tiranës doli me staf të tepërt.

Frangaj shkurtoi një pjesë të madhe të stafit, korrespondentët jashtë vendit, gazetarët në rrethe dhe drejtorin. Në fakt ”Lapsi” i Shkullakut e ka kritikuar gjithmonë Erion Veliajn. Shkullaku e bënte këtë edhe te ”ABC Neës”. Por kohët e fundit u vu re që sulmet te ”Lapsi” po shtoheshin madje u bënë fushatë, ndërsa sulmet te ”ABC Neës” pakësoheshin derisa Veliaj u shfaq vetë te te ky televizion. ABC Neës” tani i takon Rilindjes”.

Koha Jone

[Albo]

Lubonja dhe Bushati, Henri Çilit: Ti je fashist ekonomik, do ekzekutohesh



Debati për ndërhyrjen e miliarderit amerikan George Soros në politikën shqiptare, ka kaluar në ofendime mes gazetarit Andi Bushati dhe botuesit Henri Çili.

Gjatë diskutimit në emisionin “Të Paekspozuarit” të Ylli Rakipit në News24, Çili i është drejtuar Bushatit duke e quajtur komunist, ndërsa gazetari iu kthye duke i thënë hajdut.

Pjesë nga debati në emision:

Andi Bushati: Me politikat që ndjek duhet të ishe futur në LSI..se me gardistët në 21 janar, me hajdutët në Rilindje, vetëm ty të kanë parë shqiptarët.

Henri Çili: Dhe hiperbola juaj që këtu ka rrezik përgënjeshtrohet menjëherë…

Andi Bushati: Ti je rreziku

Henri Çili: Patjetër liberalizmi është rreziku jot.

Andi Bushati: Anti-liberali më i madh. Një karikaturë e liberalizmit. Do të respektoja si liberal.

Henri Çili: Nuk kthehen më komunistët e tu Bushat..

Andi Bushati: Komunistët nuk kthehen por hajdutët si ty do ekzekutohen

Henri Çili: Kjo është akuzë. Hajdut mund të jesh vet..po nuk e di a je, dhe s’po të akuzoj kot.

Fatos Lubonja: Në këtë fashizëm që po ndodh, kontrollet e gjithë pushteteve. Edi Rama kontrollon dhe artistët, edhe ekspozitat i bën te kati i parë i kryeministrisë. Këtu shteti kontrollon gjithçka.

Henri Çili: Mua nuk më kontrollon

Fatos Lubonja: Ty s’të kontrollon se ti je vetë pushteti. Ty ta tha

Bushati: Ti e ndërrove dhe shkove te pushteti tjetër

Henri Çili: Nuk ndërrova asnjë pikëpamje.

Fatos Lubonja: Ti veprimet i ke komplet në kundërshtim me pikëpamjet.

Henri Çili: Asnjë pikëpamje dhe asnjë veprim nuk kam ndryshuar.

Fatos Lubonja: Ti je fashist ekonomik, nuk je liberal.

Henri Çili: Jam për liberalizmin ekonomik, për konkurrencën, jam kundër sektorit publik, jam pro privatizimeve, pro-partneritetit publik privat, pro konkurrencës, kundër taksës progresive.

Koha Jone