Një grup me emigrantë shqiptarë, që jetojnë e punojnë në Bruksel, e pritën kryeministrin Rama me protestë.
Sipas ABC, ishin të gjithë të afërm dhe familjarë që iu janë prishur shtëpitë në Shqipëri.
Protesta vazhdoi për disa minuta, ndërkohë Kryeministri hyri në selinë e KE për të vazhduar takimet sipas një axhende paraprake.
Rama u takua me Presidentin e Komisionit Europian, Jean- Claude Juncker.
Takimi Rama-Juncker zgjati më pak se një orë dhe në përfundim nuk pati deklarata për median, siç parashikohej, për shkak të axhendës së ngjeshur të presidentit të Komisionit.
“Presidenti Juncker priti kryeministrin shqiptar, zotin Edi Rama. Ata diskutuan për perspektivën e integrimit të Shqipërisë në Bashkimin Europian, për rolin konstruktiv të saj përgjithësisht në rajon, si dhe u riafirmua angazhimi i Komisionit për të vazhduar ndihmën ndaj vendit në mënyrë që të ecet përpara me perspektivën europiane. Kjo është hera e parë që presidenti Juncker takohet me kryeministrin shqiptar, që pas zgjedhjes në krye të KE-së”, deklaroi Margaritis Schinas, kryezëdhënëse e KE-së.
“Presidenti shprehu gjithashtu shqetësimin e tij të thellë për dëmet e shkaktuara nga përmbytjet në disa rajone të Shqipërisë. Komisioni është duke mobilizuar ndihmën emergjente përmes mekanizmit të BE-së për mbrojtjen civile”, tha më pas Natasha Bertraud, zëdhënëse e KE.
Kryeministri Rama u befasua kur presidenti Juncker e prezantoi atë me një nga asistentet e kabinetit të tij me origjinë shqiptare, Shpresa Ismajlaj.
MAPO
Krijoni Kontakt