Lidhja e Grave Orthodhokse rifilloi takimet shpirtërore.

[Irenna]

Lidhja e Grave Orthodhokse është krijuar që në vitin 1992 dhe ushtron veprimtari të ndryshme shpirtërore e sociale. Grupi ushtron veprimtari në familje të varfra, në burgje dhe azile, te fëmijët jetim e gra të veja, të pastrehë e persona të braktisur, të sëmurë në spitale dhe në shtëpi, të moshuar dhe persona të vetmuar, të paaftë për punë e të depresuar, lypsa etj. Ky grup gjithashtu organizon takime shpirtërore në mënyrë që gratë orthodhokse të rriten në dijen dhe përvojën e tyre në besim.

Kështu që çdo të mërkurë në orën 17:00, në ambientet e Katedrales së re “Ngjallja e Krishtit”, gratë orthodhokse mblidhen së bashku për të zhvilluar takimin e tyre shpirtëror. Për të drejtuar këto takime ftohen theologë, klerikë, gra orthodhokse etj.

Këtë të mërkurë priftëresha Urani Ritsi ndau përvojën e saj në lidhje me studimin e Shkrimit të Shenjtë dhe i orientoi gratë se si të zhvillojnë një studim biblik dhe si të praktikojnë në jetë ato që dëgjojnë përgjatë studimit të Shkrimit të Shenjtë.

Lidhja e Grave Orthodhokse mirëpret dhe fton të gjitha gratë që kanë dëshirë të thellohen dhe të kultivojnë besimin dhe dashurinë për Perëndinë dhe të afërmin e tyre.

Dhjakon Nikolla Kodheli.