Shqiptarët protestojnë në Mal të Zi, kërkojnë më shumë të drejta

[Albo]

Të dielën në Tuz të Malit të Zi u zhvillua një protestë paqësore e shqiptarëve raporton Malësia.org. Protesta u zhvillua në shenjë pakënaqësise kundrejt pushtetit malazez ndaj Malësisë, dhe organizatorët e kësaj proteste ishin Forumi Demokratik për Integrim (FDI), i përkrahur nga Lidhja Demokratike në Mal të Zi – Dega e Malësisë. Protestuesit mbanin në duar parulla me mbishkrimet “Bashkë t’i dalim zot Malësisë”, “Stop Diskriminimit”, “Duam Drejtësi”, “Mjaft me mashtrime”, “Malësia Komunë”. Në mesin e protestuesve ishin edhe disa qytetarë nga Plave e Gucia si dhe nga Malësia përtej kufirit. “Podgorica zyrtare vazhdon eksperimentet politike duke luajtur me fatin e territorit të Malësisë dhe qenjes së saj në përgjithësi. Kemi mbetur të papërfaqësuar. Ata që i votuam morën poste qeveritare dhe harruan votuesin,” tha Gjonaj anëtari i FDI-së. “Ne duam ta ndihmojmë këtë shtet, por ne kërkojmë që të jemi si partnerë të barabartë dhe asnjëherë si servil! Mali i Zi do të integrohet në BE, vetëm atëherë kur t’i respektojë të drejtat e popullit autokton shqiptar në Mal të Zi dhe të gjithë qytetarëve të Malit të Zi” tha Gjonaj. Protesta u mbyll me vendosjen e barrikadave të vogla në hyrje të ndërtesës së Komunës urbane të Tuzit.

MAPO