Nishani refuzon ta shkarkojë, Kodheli e largon me urdhër gjeneralin në NATO
Presidenti s’pranon largimin nga detyra të shefit të Logjistikës
Kodheli propozoi zëvendësimin e Gervenit me Zaimin
Shkarkimi nga detyra i kundëradmiral Kristaq Gervenit si përfaqësues ushtarak i Shqipërisë në NATO, është kapitulli më i fundit i konfliktit mes ministres së Mbrojtjes Mimi Kodheli dhe Presidentit Bujar Nishani.
Muaji i fundit e ka zgjeruar më tej përplasjen mes Qeverisë dhe Presidencës dhe për këtë kanë shërbyer disa lëvizje në strukturat drejtuese të Ushtrisë.
Përplasja
Ministrja e Mbrojtjes Mimi Kodheli mësohet t’i ketë kërkuar Presidentit Bujar Nishani, përmes një shkrese zyrtare, lirimin nga detyra të kundëradmiral Kristaq Gervenit (gradë e barasvlershme me atë gjeneral brigade). Argumenti i ministres ka qenë shkelja e ligjit nga ana e kundëradmiralit, i cili në një takim të 170 shefave të Mbrojtjes të vendeve të NATO-s dhe atyre partnere, të zhvilluar në Bruksel, ka mbajtur uniformën e gradës “Admiral”. Grada “Kundëradmiral”, sipas rregullores, është ideuar me një vizë të trashë dhe një të hollë me sfond në ngjyrë të verdhë. Ndërkohë që grada që ka mbajtur në krah Gerveni është me një vijë të trashë dhe tri vija të holla që korrespondon me atë të admiralit. Kodheli i ka propozuar kreut të shtetit që në vend të Gervenit të dekretojë këshilltarin e saj Arjan Zaimi, ish-kandidat për President në vitin 2002. Propozimi i dytë i ministres së Mbrojtjes ka qenë shkarkimi i gjeneral brigade Syrja Gjoka, i cili aktualisht mban pozicionin e komandantit të Brigadës Logjistike. Sipas Kodhelit, gjenerali ka kryer shumë abuzime me detyrën dhe për këtë qëllim duhet shkarkuar. Nga ana e tij, kreu i shtetit Bujar Nishani i ka kthyer përgjigje përmes një letre ministres së Mbrojtjes, ku për momentin refuzonte dy propozimet dhe kërkonte argumente shtesë për të kaluar më pas në një vendimmarrje. Lidhur me dekretimin e Arjan Zaimit si përfaqësues ushtarak i Shqipërisë në NATO, kreu i shtetit mësohet t’i ketë njoftuar ministres faktin se disa kohë më parë edhe i propozuari është akuzuar se ka mbajtur uniformën e një grade që nuk e ka. Ndërsa për propozimin e dytë, atë të shkarkimit të Syrja Gjokës, Nishani i ka kërkuar Kodhelit që të gjitha dyshimet për shkelje dhe abuzime me detyrën t’i depozitojë në Prokurori e më pas, kur të ketë një vendim të formës së prerë të Gjykatës, të bëjë vendimmarrjen përkatëse. Pas përgjigjes negative nga Presidenti, ministrja e Mbrojtjes ka nxjerrë një urdhër për të shkarkuar Kristaq Gervenin pak ditë më vonë. Në letrën që kundëradmirali i ka dërguar Presidentit Nishani ka vendosur si bazë ligjore një nen të ligjit “Për pushtetet dhe autoritetet e komandimit e të drejtimit strategjik të FARSH”, ku thuhet se “ministri i Mbrojtjes ka këto detyra e përgjegjësi: Emëron dhe shkarkon, me propozimin e shefit të Shtabit të Përgjithshëm, drejtorët e drejtorive ushtarake në Ministrinë e Mbrojtjes dhe në Shtabin e Përgjithshëm, me përjashtim të atyre që mbajnë gradën e gjeneralit”.
Kodheli akuzoi Nishanin: Po na pengon në punën tonë
Ministrja e Mbrojtjes, Mimi Kodheli, akuzoi pak ditë më parë Presidentin e Republikës se ka bllokuar strukturën e Forcave të Armatosura. “Ne kemi çuar pranë Presidentit strukturën e FA dhe planin e përhapjes ose planin e vendosjes së FA dhe prej më shumë se sa një muaji nuk kemi marrë përgjigje, megjithëse u jemi rikthyer disa herë kërkesave dhe të panevojshme teknike nga institucioni i Presidentit. Kjo na bën të besojmë që kjo është një procedurë e cila kërkon të pengohet nga ana e institucionit të presidentit, i cili në rastin më të mirë është vetëm miratues i asaj çka Ministria e Mbrojtjes dhe Kryeministri propozojnë pranë tij”, tha Kodheli. Nga ana e tij, kreu i shtetit sqaroi më 15 mars, në një intervistë për TV Klan, se i ka kërkuar ministres të konsultohet gjerësisht lidhur me planin e përhapjes së Forcave të Armatosura. “Çështja ka të bëjë me strukturën organizative dhe planin e përhapjes së Forcave të Armatosura të Republikës së Shqipërisë. Së pari, duke pasur parasysh që propozohet një reduktim i ndjeshëm i strukturave të Forcave të Armatosura, kam sugjeruar që të përfshihet edhe Kuvendi i Shqipërisë. Së dyti, Shqipëria është anëtare e NATO-s dhe nuk është më çështje dëshire, por një detyrim, që çështje të tilla të rëndësishme të konsultohen me struktura të specializuara të partnerëve tanë. Së treti, duke qenë se bëhet fjalë për një shkurtim jo të vogël të pjesëtarëve të Forcave të Armatosura, do të thotë që do të kemi disa pasoja sociale nga kjo reformë”, tha Nishani.
Kallëzimi i Ministrisë së Mbrojtjes
Blerja e pajisjeve për përgjimet, ish-kreu i SHIU në Prokurori
Ylli Zyla
Ministria e Mbrojtjes i është drejtuar për të tretën herë brenda një kohe të shkurtër organit të Prokurorisë së Përgjithshme për abuzime të kryera gjatë viteve kur drejtonin demokratët. Burime të Top Channel bëjnë të ditur se kjo ministri ka kallëzuar pranë Prokurorisë ish-drejtorin e Shërbimit Informativ Ushtarak, Ylli Zyla, i dorëhequr nga ky post pas akuzave politike për tregti armësh. Kallëzimi ndaj kolonel Zylës ka të bëjë me dyshimet që ekzistojnë se ai mund të ketë shkelur ligjin si kreu i Shërbimit Informativ Ushtarak, përgjatë blerjes së pajisjeve të posaçme të përgjimit. Sipas një urdhri të lëshuar nga ish-ministri i atëhershëm, Arben Imami, SHIU-t i është kërkuar të blejë këto pajisje, mes të cilave pajisje regjistrimi video dhe audio, pajisje analoge transmetimi dhe rrip përgjimi me prokurim të drejtpërdrejtë në një kohë që ishte caktuar edhe firma se ku do bliheshin. Mësohet se e gjithë kjo procedurë kap vlerën e 1.5 milionë eurove. Ish-kreu i SHIU-t, Ylli Zyla, pas dorëheqjes së tij nga kjo detyrë u emërua kreu i Policisë Ushtarake, ndërkohë që u shkarkua nga ministria e Mbrojtjes në shtator. Më herët, ministria e Mbrojtjes ka çuar në Prokurori një dosje për ish-ministrin Imami dhe disa ish-zyrtarë të tjerë të kësaj ministrie, si dhe ish-drejtorin e Uzinës së Mjekësit.
ADI SHKEMBI
Panorama
Përgjigju Duke Cituar
Postuar më parë nga Xhuxhumaku
Krijoni Kontakt