Kodheli: Korrupsioni në ushtri, NATO nuk ndan sekretet me ne

[Albo]

Kodheli: Korrupsioni në ushtri, NATO nuk ndan sekretet me ne

TIRANE- Ministrja e Mbrojtjes, Mimi Kodheli tha dje se korrupsioni i trashëguar në këtë ministri ka çuar deri në dyshimin e aleatëve të NATO-së për besueshmërinë e informacionit sekret. E ftuar në emisionin “Studio e Hapur”, të gazetares Eni Vasili në News24, Kodheli e cilësoi të keqpërdorur Shërbimin Informativ të Ushtrisë për detyra jashtë ligjore. Ministrja e Mbrojtjes tha se në çdo sektor të këtij dikasteri gjen nga paraardhësit vetëm shkelje të ligjit.

Ku është politizimi i Ushtrisë dhe pse duhet depolitizuar ajo?
Nuk dua ta shoh kaq ngushtë. Politizim është dhe kur një ushtarak nuk u përgjigjet detyrimeve të tij ligjore, por u përgjigjet urdhrave të titullarit të tij edhe kur këto janë joligjore. Ushtria në këto vitet e fundit është përballur me një sistem nga më të korruptuarit në Shqipëri. Ka pasur korruptim sa i takon marrjes së gradave, rekrutimeve, mënyrës se si janë nxjerrë njerëzit jashtë Forcave të Armatosura. Një nga gjërat që na është kërkuar nga të gjithë protagonistët ndërkombëtarë që kam pasur në tryezë, që nga sekretari i Përgjithshëm i NATO-s, te ndihmëszëvendëssekretarja e Shtetit për Mbrojtjen, ka qenë: luftoni korrupsionin. Madje është shkuar deri atje ku më është thënë se ne nuk mund të ndajmë informacion të klasifikuar me ju sepse nuk është besimi i mjaftueshëm pranë institucioneve tuaja se ky informacion del jashtë sekretit. Kjo më është thënë në Ministerialin e parë të NATO-s. Jam ndier shumë keq në atë tryezë kur një koleg të thotë se nuk mund të ndaj me ju një informacion për shkak të trashëgimisë korruptive që keni pasur. Për fat të mirë gjërat po ndryshojnë.

Si, në ç’mënyrë?
Ne kemi dhënë provat. Kemi ndryshuar shefin e Shtabit disa muaj më parë, lidershipi ka ndryshuar, kohët kanë ndryshuar, nuk ka më vend dhe kohë për korrupsion dhe për abuzime.

Pra nënkuptohet se largimi i shefit të Shtabit u bë sepse ai ishte i korruptuar?
Largimi i shefit të Shtabit u bë për disa arsye, por ai është larguar duke dhënë dorëheqjen. Por shefi i ri i Shtabit është një person me virtyte, cilësi dhe bekgraund shumë të mirë.

Ju keni pasur një takim me prokurorin e Përgjithshëm, zotin Llalla. Ka të bëjë kjo me dosjen që ju keni çuar në Prokurori”

Jo, takimi me prokurorin ka qenë në vazhdën e takimeve që bën me institucionet e pavarura për punë. Është krejt normale që unë të takoj prokurorin e Përgjithshëm dhe ishte një takim i nevojshëm. Veçse kam dalë publikisht dhe kam thënë se unë e çoj këtë dosje në hetuesi sepse besoj akoma tek institucionet e pavarura, ashtu si u besoj dhe materialeve. Është abuzuar me paratë e publikut në mënyrën më të keqe të mundshme, kur paratë e modernizimit shkuan për festivalin e muzikës popullore. Shqipëria nuk është vend i pasur. Duhet t’i bëjmë modestisht gjërat, jo për megalomanira. Nga viti 2008 shqiptarët janë bërë 36% më të varfër.

Ju kanë akuzuar për hakmarrje për dosjen ndaj Imamit.
Jo, nuk ka lidhje. Ministria është një makinë shumë e madhe dhe ka aktivitete nga më të ndryshmet. Ne vazhdojmë punën normalisht. Ka një mal me gjëra për të inspektuar. Unë vazhdoj punën time. Nëse ata gjykojnë se dosjet duhet të shkojnë në prokurori, le të shkojnë. Nëse paratë shkojnë në një drejtim tjetër sikur të ishin paratë e tua, ky është në detyrimin tim dhe jam e vendosur të ndjek rrugën time ligjore, të drejtë dhe në raport me publikun shqiptar.

Ju, kur ishit në opozitë keni akuzuar për korrupsion dhe SHIU-n. Çfarë po bëhet aty?
Struktura sot quhet AIM. Ne do ta reformojmë, do ta ndryshojmë ligjin. Është agjencia më e keqpërdorur.

Për çfarë?
Janë publike pretendimet e opozitës së asaj kohe për përgjime të opozitës nga SHIU.

Ju keni gjetur prova për këtë?
Gjërat janë në proces dhe në investigim, janë në auditim dhe vetmja gjë që mund të them sot është se do zbardhim një anë shumë të errët të Forcave të Armatosura. Ajo çka mund të them është se është shkelur ligji me të katër këmbët.

Po përplasja mes maxhorancës dhe opozitës për SHISH, si e shihni? Shumë interesant fakti që opozita flet sot për gjëra që i ka bërë dje në mënyrë fare trimërore duke mos pasur frikë ndaj ligjit. Unë ju siguroj se gjërat kanë ndryshuar thellësisht. Këtij shërbimi (SHISH) i është kërkuar të informojë Policinë, të bëjë detyrën, arsyen se përse ekziston. I është thënë që duhet të informohemi. Duhet të jemi seriozë, siguria është gjë serioze, e njerëzve shumë seriozë. Maxhoranca do të bëjë me SHISH atë që i kërkon ligji.

Ju jeni te hyrjet e reja në PS, ka kontribues më të vjetër se sa ju. A duhej të ishin përfshirë edhe ata në qeveri si persona të rëndësishëm në parti?
Nuk e ndiej pakënaqësinë e tyre. Ndiej suportin e tyre miqësor dhe profesional. Fjala e tyre në Parlament dëgjohet sa është dëgjuar edhe më parë. Erjon Braçe vazhdon të dëgjohet në Parlament siç është dëgjuar. Po ashtu zoti Blushi, po kështu zonja Leskaj dhe deputetë të tjerë. Nuk gjej asnjë arsyeje dhe nuk e shikoj këtë gjë që ju thoni.

A duhet të ishin përfshirë këta emra në qeverinë e zotit Rama?
Në demokraci, ai që zgjidhet Kryeministër bën përzgjedhjen e kabinetit të tij. Unë besoj se Kryeministri Rama ka bërë zgjedhjen e duhur në kohën e duhur. Koha do të vërtetojë nëse kjo që them unë ishte më e mira.

Duket se po merreni me qeverinë dhe keni harruar partinë, p.sh. kryetarit i ka mbaruara mandati…
Jo për sa kohë kryetari është dhe Kryeministër, mandatin i rri aty ku është, pra e ka marrë dhe mandatin e ri si kryetar.

Panorama