Postuar më parë nga
Wordless
Trajektorja 23-vjeçare e pasurimit të familjes së Sali Berishës lë me gojë hapur edhe sheikët e naftës, konfirmon fundin e shtetit ligjor, sfidon inspektoratin e pasurive dhe Drejtorinë e Pastrimit të Parave. Sali Berisha, rrethi familjar i të cilit ka dominuar tranzicionin shqiptar, falë pushtetit ekonomik, politik dhe policor, gëzon dhe posedon sot një pasuri perandorake dhe përrallore. Nga një apartament modest dhomë e kuzhinë që kishte në Tiranë në vitin 1991, 22 vjet më vonë, familja Berisha posedon një pasuri me vlerë qindra miliona euro. Pa asnjë biznes të deklaruar zyrtarisht, Sali Berisha, Argita dhe Shkëlzeni kanë në pronësi dhjetëra apartamente në Tiranë, zyra superluksoze në zonat më të rëndësishme të kryeqytetit, kompleks vilash në Farkë, dhjetëra llogari bankare, vila në Gjirin e Lalzit, vila në bregdetin e Jugut, prona të pafundme dhe shumë pasuri të tjera të patundshme të padeklaruara. Por, pasuri të tjera të dyshimta po dalin në pah. Bëhet fjalë për zyrat e reja luksoze të Shkëlzenit, Berishës dhe Argitës.
Zyrat e reja dhe vila e Shkëlzenit
I biri i ish-kryeministrit Sali Berisha, Shkëlzeni, një ndër personazhet më të lakuar në Shqipëri për biznese të paligjshme, gjoba dhe pasuri të dyshimta, ka hapur zyra të reja në një nga zonat më të frekuentuara dhe të shtrenjta të Tiranës. Bëhet fjalë për dy kate në pallatin pranë Liqenit Artificial dhe parkut. Pas studios ligjore në fillim të Rrugës së Barrikadave, aty ku ndodhen edhe zyrat e Argitës, Shkëlzeni ka hapur zyra të reja pranë Liqenit Artificial, të cilat frekuentohen nga biznesmenë dhe njerëz të biznesit. Pasi arritën te kenë si klientë biznesmenët më të fuqishëm tek zyrat luksoze në krye të Rrugës së Barrikadave, fëmijët e Berishës e kanë zgjeruar aktivitetin e tyre me zyra dhe ambiente të reja. Zyrat e reja të Shkëlzenit kanë një sipërfaqe qindra metra katrorë. Vetëm qiraja mujore për këtë sipërfaqe e tejkalon disa herë pagën e deputetit Berisha. Ndërkaq, Shkëlzeni posedon një vilë superluksoze në Farkë, aty ky pushtetarët kanë investuar paratë e korrupsionit në pasuri të patundshme.
Zyrat e Berishës
Pas përmbysjes nga pushteti dhe dorëheqjes formale si kryetar i PD, Sali Berisha hapi disa zyra të Tiranës, në katin e 14 të pallatit më të lartë në Tiranë, në rrugën “Mustafa Matohiti”, përkatësisht pallati i klientit kryesor të familjes. Në zyrat e tij raporton çdo natë Lulzim Basha, ndërsa aty zhvillon takime me ambasadorë, sekserë, spiunë, bashkëpunëtorë etj. Por, zhvendosja e Berishës në kullën më të shtrenjtë të Tiranës është pasuar me shumë dyshime. Nuk dihet nëse Berisha i ka blerë zyrat, i ka marrë me qera apo ia kanë bërë dhuratë. Një gjë është e sigurt, që paga mujore e deklaruar nga Sali Berisha nuk mjafton për të paguar qiranë për zyrat perandorake. Disa ditë më parë, deputeti Erjon Braçe i ka kërkuar sqarime ish-kryeministrit për çështjen e zyrave. “Para se të them çfarë mendoj për gjithë “argumentat” e tu, po e nis me këtë pyetje: Kush ta ka blerë apo kush paguan qiranë e zyrës tënde në kullën më të shtrenjtë të Tiranës? Pronari i kullës është biznesmeni që ka marrë me firmën tënde: Kontrata publike në infrastrukturën rrugore e ndërtime të tjera civile”, ka pohuar ai.
Zyrat e Argitës
Argita Berisha, e njohur ndryshe në rrethet politike si “zonja 3 milionë euro”, për shkak të tarifave të saj për biznesmenët që synonin të investonin në Shqipëri me firmën e babait të saj, vijon të mbajë zyrat e avokatisë në një nga zonat me të frekuentuara nga bota e biznesit në Tiranë. Të gjithë biznesmenët që investonin në Shqipëri, duhet të kalonin tek zyrat e Argitës në krye të Rrugës së Barrikadave, për të paguar çmimin e firmës së Sali Berishës. Rasti më flagrant ka të bëjë me biznesmenin pakistanez, Zafar Ansar. Ndërkaq, Argita, përveç dhjetëra apartamenteve në Tiranë, posedon vila në Gjirin e Lalzit dhe Farkë.
Vilat në Farkë dhe Gjirin e Lalzit
Ka një humnerë mes deklaratave të pasurive të fëmijëve të ish-kryeministrit Sali Berisha dhe pasurive që posedojnë në realitet ata. Në deklaratat e saj të pasurisë, zonja Argita Malltezi ndër të tjera deklaron një gjysmë vile në Gjirin e Lalëzit me vlera 56 mijë euro. Pasi deklaron apartament 77 metra katrorë në Tiranë, apartament 95 m2 dhe garazh, apartament plus parking, 188 metra2, apartament 141 metra2, dyqan 33 metra katrorë, tokë tre mijë metra2, vlera gjashtë milionë lekë, apartament 120 metra2, apartament 200 metra2 etj., zonja në fjalë deklaron edhe një gjysmë vile. Në të vërtetë vila e Argitës në Gjirin e Lalzit është e plotë dhe kushton dhjetë herë më shumë se sa vlera e deklaruar. Ndërkaq, Argita posedon vila të tjera në Farkë bashkë me Shkëlzenin. Vila numër 9 B në kompleksin e vilave Garden në Farkë është në pronësi të Shkëlzen Berishës.
/Gazeta Sot/
Krijoni Kontakt