Basha: Më 20 shkurt marshim proteste, të ndalim të keqen para se të na marrë frymën
DURRES - Kryetari i PD-së, Lulzim Basha përsëriti ftesën e tij ndaj të gjithë qytetarëve shqiptarë, pa dallime politike, që të marrin pjesë në marshimin e protestës popullore të 20 shkurtit, që përkon me 23-vjetorin e rrëzimit të monumentit të diktatorit Enver Hoxha. Gjatë fjalës së tij në Aktivin e PD-së në Durrës, Basha tha se lufta opozitare nuk do të ketë të ndalur, pasi siç tha ai, “është detyrë e qytetarëve të insistojnë në ndalimin e së keqes pa pritur që e keqja të marrë frymën”.
“Të jemi bashkë në ftesën tonë ndaj qytetarëve shqiptarë pa dallime politike që të marrin pjesë në 20 shkurt në Tiranë, në përkujtimin e 23-vjetorit të rrëzimit të diktatorit Enver Hoxha dhe në marshimin e protestës popullore. Përvjetorin e rrëzimit të monumentit të Hoxhës do ta përkujtojmë me mesazhe aktuale të drejtpërdrejta për qeverinë e sotme. Do ta ndërmarrim këtë marshim proteste sepse jemi të shqetësuar, jemi në këmbë e do të jemi në këmbë kundër çdo tundimi të kësaj qeverie dhe mazhorance arbitrare për të rehabilituar me forma dhe alibi të llojllojshme figurën e diktatorit. Do ta ndërmarrim këtë marsh proteste, jo se nuk kemi patur durimin për të pritur këtë qeveri të fillojë të mbajë premtimet, por kjo qeveri ka ngritur mashtrimin e publikut dhe paligjshmërinë. Kjo qeveri ka vënë në jetë një politikë ekonomike thellësisht të gabuar që po e rrokullis vendin në pikën zero e poshtë zero në të gjitha drejtimet.”- u shpreh Basha.
Sipas liderit të opozitës, “marshimi i protestës në 20 shkurt është detyrë e çdo qytetari në demokraci”.
Duke u ndalur në procesin e anëtarësimeve të reja në PD, kryetari Basha theksoi rëndësinë e kontaktimit të figurave të larguara dhe nxitjen e të rinjve për t’ju bashkuar Partisë Demokratike.
“Ata që janë larguar nga PD të kontaktohen, nxiten ti bashkohen PD-së. Të rinjtë ti presim krahëhapur, por nuk duhet të jemi vetëm në pritje por të shkojmë vetë tek rinia dhe ti ftojmë të anëtarësohen tek ne. Më të mirët duhet të vijnë tek ne, më të mirët në shkollë, në punë, në familje. PD ka lindur e re dhe do të mbetet e re. Një PD pa historinë e saj është pa shtyllë kurrizore, një PD pa brezin e ri është pa të ardhme.”- u shpreh Basha.
(er.nu/BalkanWeb)
Krijoni Kontakt