Basha: Cënimi i kompetencave vendore nga qeveria, do i drejtohemi Kushtetueses

[Albo]

Basha: Cënimi i kompetencave vendore nga qeveria, do i drejtohemi Kushtetueses


Kryebashkiaku i Tiranës Lulzim Basha ka mbledhur sot konventën e të zgjedhurve vendor. Në detyrën e kryetarit të shoqatës së bashkive Basha ka vënë theksin tek pavarësia e pushtetit vendor nga qeveria qendrore. Nëse shkelet kjo pavarësi atëherë do të kërkohet mbrotje ligjore nga Gjykata Kushtetuese, ka bërë të qartë ai. Ndërkohë ai tha se për reformën elektorale do të kërkohet një konsensus popullor.

Basha tha se i vetmi vullnet i shprehur deri më sot nga kryeministri është përqëndrimi total i pushtetit në zyrën e tij.

“Kryetarë dhe këshilltarë, të majtë apo të djathtë ndodhen nën goditje dhe breshëri goditjesh ilegjitime, njësoj si institucionet e tjera të pavarura.Një akt i qartë, e zezë mbi të bardhë janë vendimet e Këshillit Kombëtar të Territorit që në mënyrë antikushtetuese bllokojnë planet e zhvillimit në komunat e bashkitë e vendit, komunat e bashkitë e kurorës së Tiranës, të zonës bregdetare, të aksit Tiranë-Durrës, akset kombëtare e pastaj një sërë bashkish të tjera, të majta e të djathta sot gjenden në këtë ngërç të provokuar tërësisht nga papërgjegjshmëria dhe antikushtetueshmëria, si mentalitet dhe si kulturë veprimi e ish-kryebashkiakut të Tiranës. Sindroma e vitit “zero” i dikton pushtetit bllokimin e kredive për të pastrehët, për një ndër shtresat më në nevojë e pa dyshim përmes këtij bllokimi, bllokon edhe shumë interesa të tjera, duke përfshirë këtu edhe interesa zhvillimorë të kreditimit të një prej degëve më të rëndësishme të vendit, siç është industria e ndërtimit të cilën të gjithë e dimë që tërheq një zinxhir të madh punësimi dhe zhvillimi pas vetes”, u shpreh Basha.

Kryetari i PD-së, Basha, deklaroi se pa kosensus dhe konsultim të gjerë nuk do të njihet asnjë produkt i reformës territoriale. “Reforma territoriale që është njëkohësisht reformë elektorale dhe reformë e pushtetit vendor nuk mund të hedhë asnjë hap legjitim përpara, pa rivendosur konsensusin e plotë në çdo hallkë të vendimmarrjes midis mazhorancës dhe opozitës”, tha ai.

MAPO