Tjetër atentat me eksploziv ka tronditur sot qytetin e Durrësit vetëm dy ditë pas një atentati të ngjashëm në Vlorë. Një sasi tritoli i është vendosur makinës së një binesmeni ndërtimi në qytetin e Durrësit ditën e sotme. Lënda eksplozive shpërtheu teksa automjeti tip “Citroen” me targë AA759EY po lëvizte në aksin nacional Plazh-Plepa.
Policia bën me dije se i plagosur ka mbetur Xhemal Çela, që njihet si biznesmen ndërtimi në këtë qytet. Për shkak të gjendjes së rëndë biznesmeni Çela është transportuar drejt Tiranës për të marrë një ndihmë më të specializuar. Sipas mjekëve ai ndodhet në gjendje kome dhe ka hemorragji të brendshme dhe ka pësuar dëmtime të rënda në pjesën e këmbëve.
Nga hetimet e para bëhet e ditur se shpërthimi është rezultat i aktivizimit të një sasie lënde eksplozive që ishte vendosur më parë në automjet. Grupi hetimor ka kryer veprimet e para në vendin e ngjarjes dhe nisur punën për zbardhjen e këtij krimi, duke nisur nga konstatimi i konflikteve të mundshme të të plagosurit.
MAPO
Krijoni Kontakt