Mijëra hektarë tokë, por edhe banesa janë përmbytur nga reshjet e forta të ditëve të fundit. Zonat më të goditura janë në Shkodër, download (9)Lezhë, Fushë-Krujë e Thumanë. Në Lezhë, në zonën e Zadrimës ujërat e lumenjve kanë dalë nga shtrati duke përmbytur tokat. E gjithë zona e Zadrimës është në vështirësi dhe dëmet janë të mëdha, veçanërisht në tokat bujqësore. Shkak për përmbytjet nuk janë vetëm reshjet, por edhe kanalizimet kulluese të bllokuara, të cilat shfaqën probleme që në shiun e parë të fortë në këtë dimër. Drejtori i Bordit të Kullimit në Lezhë, Petrit Gjoni tha për mediat se situata mund të përkeqësohet. Ai shprehet se lumi Gjadër nuk është pastruar prej 25 vitesh. Gjithashtu bën me dije se reshjet kanë shkaktuar probleme edhe në Kurbin, Gjormë dhe Shëngjin. Gjatë ditës së djeshme kjo zonë u vizitua edhe nga ministri i Bujqësisë, Edmond Panariti. Pasi ka mbikëqyrur zonën e përmbytur, ministri Panariti deklaroi se shkak për këtë situatë është bërë sasia e madhe e reshjeve, por edhe ndërprerja e energjisë elektrike. Sipas tij, hidroforët nuk janë furnizuar me energji në kohën kur intensiteti i reshjeve ka qenë shumë i lartë. Ai theksoi se do të ndërhyhet në mënyrë urgjente për pastrimin e lumit Gjadër. Përmbytja është e konsiderueshme edhe në Shkodër, në komunën Bushat dhe në zonën e malit të Jushit. Reshjet e dendura të shiut, në pak orë, kanë rikthyer përmbytjet edhe në qarkun e Durrësit. Zona më e dëmtuar është komuna e Bubqit në rrethin e Krujës, ku 300 hektarë tokë gjenden nën ujë. Dalja nga shtrati e lumenjve Ishëm dhe Erzen ka çuar në përmbytjen e sipërfaqeve të tëra me tokë bujqësore dhe në komunat Thumanë, Nikël të Krujës, si dhe në Hamallaj të Sukthit. E ndërsa nga Shtabi i Emergjencave njoftohet se hidroforët po punojnë me intensitet të plotë, situata në grykëderdhjen e lumit Ishëm paraqitet e ngarkuar për shkak të prurjeve të shumta të lumenjve dhe morisë së mbeturinave urbane që rëndom depozitohen në to.
MAPO
Krijoni Kontakt