Januzaj gjithçka, përveçse anglez
tweet
Nga MARTIN SAMUEL
Adnan Januzaj është belg. Nëse dëshiron, në rregullat strikte të futbollit ai mund të zgjedhë të jetë shqiptar ose kosovar, serb apo turk. Por ajo që ai nuk është me siguri, është të qenit anglez. Këtë e dimë, sepse ai është 18 vjeç dhe luan në Premier Ligë. Jo shumë adoleshentë anglezë arrijnë ta bëjnë këtë. Januzaj ka lindur në Bruksel dhe Belgjika do ta bëjë pjesë të brezit të tyre të artë. Babai i tij është shqiptar dhe djali i tij ka një ndjeshmëri të veçantë për këtë vend gjithashtu. Por, Shqipëria nuk ka arritur ende të kualifikohet në një turne ndërkombëtar dhe aktualisht renditet në vend të pestë nga gjashtë skuadrat e Grupit E të kualifikueseve të Botërorit. Por, edhe pse situata e Shqipërisë është kjo, Januzaj ka refuzuar deri tani shansin për të përfaqësuar moshat U-18 dhe U-19 të Belgjikës, duke lënë të kuptohet se Shqipëria do të jetë zgjedhja e tij e preferuar. Nëna e tij është nga Kosova, një vend që u jep fund ambicieve të një futbollisti, sepse duke moszgjidhur ende statusin e saj territorial me Serbinë, nuk njihet nga FIFA dhe nuk mund të marrë pjesë në kompeticionet e saj. FIFA i lejon Kosovës të luajë ndeshje miqësore, por pa shfaqur simbolet kombëtare. Për më tepër, gjyshërit e Januzajt vijnë nga Serbia dhe Turqia, por ai s’ka dhënë asnjë sinjal që dëshiron të përfaqësojë ndonjëherë prej këtyre vendeve. Sidoqoftë, i vetmi vend për të cilin ai nuk mund të luajë, është vendi ku punon. Është me të vërtetë qesharake, madje edhe ta spekulosh se Januzaj do të veshë fanellën e “Tre Luanëve”. Moralisht nuk do të ishte e drejtë, ndërsa në parim do të shkelte Marrëveshjen e Vendeve Kombëtare. Hoxhsonin mund ta ketë tunduar ideja ta ketë në skuadër pas paraqitjes me Sandërlendin, por ky do të ishte një dështim. Le ta lëmë moralin për një moment dhe idenë që Federata Angleze mund të sillet si një klub elitar dhe joshë një lojtar të largohet nga vendi ku i takon të luajë pas ai duket inferior, me premtimin e famës dhe pasurisë. Edhe nëse FA do përpiqej ta realizonte haptazi objektivin e saj, ajo do të ishte e detyruar të injoronte Marrëveshjen e Vendeve Kombëtare e amenduar së fundmi, e cila nuk i jep më të drejtën e përzgjedhjes një lojtari përmes vendbanimit. Marrëveshja e re konstaton se një lojtar, që nuk ka lindur në Angli apo nuk ka asnjë prejardhje prej andej, duhet të ketë studiuar 5 vite përpara moshës 18-vjeçare që të jetë i disponueshëm për Anglinë. Thjesht po të jetonte në Angli deri në vitin 2018, nuk do e bënte Januzajn anglez edhe sikur ai të plotësonte kushtet e FIFA-s. S’ka përse Hoxhson të jetë në dijeni të këtyre burokracive, edhe pse në deklaratën e tij ai u duk dyshues për etikën e një qasjeje të tillë: “Sigurisht që më parë kjo duhet debatuar seriozisht përpara se të nisim dhe natyralizojmë lojtarët”. Hoxhson është një burrë i ndershëm dhe e di që thellëthellë nuk është e drejtë që të zhvatësh apo vjedhësh. Ngutja në të shkuarën për të zgjidhur problemet e Anglisë me lojtarë të huaj ishte e pacipë dhe e dëmshme. Erikson, i cili ishte bërë pjesë e futbollit anglez në të njëjtën mënyrë, tentoi të bënte të njëjtën gjë kur konsideroi natyralizimin e Kudiçinit, Edusë, Malbrankës dhe Sahasë. Pati dhe një debat për Artetën kur Kapelo drejtonte Anglinë, pa dyshim edhe kjo për të njëjtat arsye pragmatiste. Teknikisht po, Januzaj mund të jetë anglez, nëse FA sillet në mënyrën më cinike të imagjinueshme. Do ta mësojmë së shpejti se çfarë dëshiron të jetë Januzaj. Por ajo që ai nuk duhet të bëjë, është të shndërrohet në një shembull për oportunistët, apo në një zgjidhës qesharak të një problemi që është i gjithi përgjegjësi e futbollit anglez.
Opinionist i “DailyMail”
Burimi: http://www.panorama-sport.com/lajme-...#ixzz2hABBWR00
Krijoni Kontakt