Postuar më parë nga
Akili-A
Anila Jole
Tronditje ka shkaktuar një dokument sekret i FMN, lidhur me vlerësimin e programit të parë të ekonomisë greke 2010-2012. FMN pranon se ka bërë gabime serioze me programin grek të shpëtimit dhe akuzon partnerët evropianë se përfituan prej tij.
Lajmi transmetohet nga gazeta Wall Street Journal që citon një dokument “rreptësisht konfidencial” të FMN.
Në këtë dokument, FMN pranon se ka nënvleftësuar dëmin që do të shkaktonin masat shtrënguese në Greqi dhe pranon se u shkelën rregullat, në mënyrë që vendi të mbushte 3 nga 4 kriteret e FMN për ndihmë financiare.
Raporti pranon se vlerësimet e gabuara nga ana e FMN ndikuan në një recesion më të thellë nga sa pritej si dhe në rritjen e madhe të papunësisë. Sipas gazetës, një numër i zyrtarëve të FMN-së, përfshirë edhe Christine Lagarde, kanë pohuar vazhdimisht se borxhi i Greqisë është "i qëndrueshëm", që ka gjasa të paguhet në kohë të plotë dhe me radhë, në një kohë kur nuk ishte kështu.
Gjithashtu, FMN ngarkon me përgjegjësi partnerët europianë për vonesat që u bënë sa i përket marrjes së vendimeve në nivel qeverish. Sipas dokumentit përfitimi më i madh nga kjo paketë nuk ka qenë aq për Greqinë sesa për Eurozonën. Raporti vë në dukje se përgjigja e koordinuar me BE për krizën, ka blerë kohën, në mënyrë që të kufizohet ndikimi negativ në pjesën tjetër të 17 shteteve anëtare të eurozonës. “Kjo paketë shpëtimi ishte një lëvizje, që i dha kohë eurozonës për të ngritur një mur që do të mbronte shtetet e tjera anëtare të cenueshme dhe do të parandalonte pasojat serioze për ekonominë globale”, thuhet në të.
Ndërmjet të tjerash, FMN e lavdëron Greqinë për gjithë sa janë arritur në kuadër të marrëveshjs për kredinë, kërkon korrektesë për zbatimin e plotë të pikave të dakorduara, shpreh kundërshtimin ndaj uljes së taksave në fazën aktuale dhe përsërit se çdo rilaksim për masat, do të duhet të presë konfirmimin e përshtatjes fiskale.
Sipas gazetës, në këtë dokument thuhet:
- FMN ka anashkaluar rregullat, në mënyrë që borxhi grek të paraqitej i qëndrueshëm dhe se Greqia nuk ka plotësuar tre nga katër kriteret e kërkuara që një vend të ketë të drejtë për ndihmën e Fondit.
- Fondi ishte tepër optimist rreth perspektivave të qeverisë greke për t'u kthyer në financim nga tregjet, por edhe mbi aftësinë e saj politike për të zbatuar kushtet e programit të shpëtimit.
- Përfitimin më të madh nga programi grek i shpëtimit i vitit 2010 nuk e kishte Greqia, por në përgjithësi Eurozona.
- FMN kritikon vonesën në ristrukturimin e borxhit të madh grek, i cili u bë në muajin mars të vitit 2012, dy vjet pas paketës së parë të shpëtimit, por ndërkohë pranon se ishte "politikisht i vështirë" një reduktim i borxhit më parë.
- Fondi gjithashtu pranon se analiza e tij për zhvillimin e ardhshëm ishte e gabuar "në një masë të madhe".
- Kritika të forta i bëhen edhe Komisionit Evropian, i cili "kishte tendencën për të formuar qëndrime politike nëpërmjet konsensusit, pati pak sukses në aplikim (rregullat buxhetore) dhe nuk kishte asnjë eksperiencë në menaxhimin e krizës".
- Fondi kishte parashikuar fillimisht se Greqia do të humbiste 5,5% të prodhimit të saj ekonomik midis viteve 2009 dhe 2012, ndërsa vendi ka humbur 17% të PBB-së reale. Programi i shpëtimit bënte fjalë për një normë papunësie prej 15% në vitin 2012, ndërsa shkalla aktuale e papunësisë u rrit në 25%.
Krijoni Kontakt