Incident në paradën e shkollave të Farsalës në Greqi, me rastin e festës kombëtare të 28 tetorit.
Një nxënëse shqiptare, edhe pse e para në mësime në gjithë shkollën, përfundimisht nuk ishte ajo që mbajti flamurin grek në paradë, siç kërkohet me ligj. Kjo për shkak të reagimeve të shokëve, të cilët kërcënuan se do të njoftonin anëtarët e Agimit të Artë, sepse ajo nuk është shtetase greke.
Reagimet e nxënësve kishin filluar prej rreth 2 javësh, pas lajmit se flamurtarja në paradë do të ishte nxënësja shqiptare.
Pas kërcënimeve, drejtori i shkollës Kostas Panos e adresoi çështjen drejtorinë arsimore të Larisas. Përgjigja ishte se "duhet të zbatohet ligji", i cili kërkon që flamuri të mbahet nga nxënësi me rezultatet më të mira.
Megjithatë, reagimet u intensifikuan, ndaj drejtori për të mos lejuar përshkallëzimin e situatës, vendosi ta diskutojë çështjen me studentët. Këshilli i nxënësve të shkollës (i përbërë nga 15 përfaqësues) nuk kishte kundërshtim, që nxënësja shqiptare të mbante flamurin, por ishte vetë vajza që i dha zgjidhje konfliktit duke ia ofruar flamurin shoqes së saj të klasës.
Ajo shpjegoi se e mori këtë vendim për shkak se “respekton flamurin, drejtorin, mësuesit dhe shokët e klasës, jo sepse është e frikësuar".
Në përfundim, nxënësja shqiptare marshoi në paradë me grupin e nxënësve të shkollës, jo si mbajtësja e flamurit
Krijoni Kontakt