Armando Sadiku

[[HD]]

Sadiku i shumëkërkuar, në garë futet edhe Uest Bromuiç





Armando Sadiku është bërë objektiv i shumë skuadrave europiane. Sulmuesi shqiptar, i cili po shkëlqen me Luganon në Zvicër, pëlqehet nga ekipi anglez Uest Bromuiç Albion, njofton ueb faqja “tribalfootball.com”. Sadiku, i cili iu bashkua Luganos nga Lukarno gjatë kësaj vere, ka realizuar 10 gola nga 11 ndeshje këtë sezon. Përpos ekipit nga Premierliga, në ditët e fundit flitej se për përfaqësuesin shqiptar ka shfaqur interesim edhe kampioni aktual i Gjermanisë, Borusia Dortmund. Kurse, kohë më parë, për 21-vjeçarin kishin lëvizur edhe ekipet italiane si Fiorentina, Katania, Siena e Kievo, plus ai gjerman Mynih 1860. Vetë menaxheri i sulmuesit ka pohuar interesimin e kampionëve të Gjermanisë për futbollistin elbasanas. Nga shkurti i vitit 2011, Sadiku ka realizuar 36 gola në 49 ndeshje në kategorinë e dytë zvicerane. Vitin e kaluar ai ishte golashënuesi më i mirë te Lokarno. Gjatë verës, Lugano pagoi 415 mijë euro për kartonin e Sadikut, ndërsa vetë lojtari përfiton rreth 166 mijë euro në vit. Presidenti i skuadrës së Luganos, Anxhelo Renxeti, pati deklaruar pak ditë më parë se një ndër futbollistët që mund të largohet gjatë merkatos së janarit është edhe sulmuesi shqiptar, për shkak të ofertave të shumta që kanë ardhur në adresë të lojtarit.

[[HD]]

[[HD]]

Sadiku “zverdhet”



Ndërkohë, në Ligën e Dytë zvicerane Lugano i Armando Sadikut ka humbur në transfertë me Vaduzin me rezultatin 1-0. Sulmuesi shqiptar, edhe pse ka luajtur për 90 minuta, këtë herë nuk ka mundur të shënojë, por ka qenë protagonist me një karton të verdhë në minutën e 79-të për një simulim në zonë.

[[HD]]

Servete “bllokon” Sadikun për në janar







Servete, skuadra e Gjenevës, synon që të ketë shërbimet e Armando Sadikut që në janar të vitit të ardhshëm. Këtë e bën të ditur media zvicerane “nachrichten.ch”, e cila sqaron se klubi i Superligës së Zvicrës e ka “bllokuar” kartonin e sulmuesit 21-vjeçar të Kombëtares shqiptare. Nuk jepen hollësi lidhur me këtë lëvizje të Sadikut, por nuk besohet se Lugano do të pranojë ta humbasë sulmuesin e saj më të mirë pa fituar një shumë të mirë parash. Shënuesi më i mirë i Challenge League, me 9 gola (10 gola në sezon për Luganon), po kalon një formë shumë të mirë edhe me Kombëtaren shqiptare, ndërsa sipas mediave edhe klube në Itali e Gjermani i kanë kërkuar së fundmi shërbimet e tij. Sakaq, përveç Fiorentinës, Xhenovas, në garë së fundmi në Serinë A është futur edhe Peskara e Lacio e Igli Tares. Sadiku pritet të ftohet për ndeshjen kundër Kamerunit, më 14 nëntor, por kjo ende nuk është konfirmuar, pasi lista e trajnerit De Biazi ende nuk është publikuar nga Federata Shqiptare e Futbollit.

[[HD]]

Haxhia: Sadiku shko në Itali ose Gjermani



Menaxheri i Armando Sadikut ka konfirmuar se sulmuesi i Kombëtares shqiptare mund të transferohet në Bundesligën 1 ose në Serinë A në janar. “Edhe nëse ai nuk do të lëvizë në janar, atëherë me shumë gjasë do të largohet në verë”, – ka thënë Sokol Haxhia për “itasportpress.it”. Ai ka hedhur poshtë kështu “prenotimin” e ndonjë klubi zviceran të Superligës për në merkaton e janarit, sikundër u publikua dy ditë më parë se Servete e kishte bllokuar kartonin e lojtarit që aktivizohet te Lugano.





Bisedimet Deri tani janë përmendur emra të rëndësishëm që interesohen për Sadikun, por vetë menaxheri pohon se nuk ka pasur kontakte të drejtpërdrejta me klube të Serisë A. Të paktën jo me ato që janë lakuar deri tani në media. “Sadiku është një sulmues i jashtëzakonshëm dhe e ka golin në gjak. Pesë vite më parë ai luante në Kategorinë e Dytë dhe ishte kryeshënues i kampionatit. Në moshën 16-vjeçare debutoi në Kategorinë Superiore dhe u shndërrua në një ndër sulmuesit më të mirë. Me Kombëtaren U-21 zuri vendin e dytë si golashënues, sepse realizoi 6 gola në 7 ndeshje. Te Lokarno shënoi 28 gola në 39 ndeshje dhe sot te Lugano vazhdon të shënojë, duke konsoliduar edhe vendin në përfaqësuese. Në ekipin kombëtar ai ka shënuar 1 gol në tri ndeshje. Normalisht një futbollist me këto parametra do të vlerësohej 5 deri në 10 milionë euro nëse do të vinte nga Brazili. Ndaj edhe mendoj se kush blen Sadikun, ka bërë një investim kolosal për të ardhmen”, – ka deklaruar Haxhia. Ai më tej ka konfirmuar se nuk ka biseduar me ndonjë përfaqësues të Fiorentinës apo Sienës. “I kam dëgjuar këta emra në media, por nuk kam folur me drejtuesit e Fiorentinës, Sienës dhe Katanias. Mbase ata e kanë vëzhguar lojtarin, sepse një si Sadiku bie shumë në sy, por unë nuk kam pasur kontakte. E megjithatë, po ju them se jam në bisedime me klube të tjera të Serisë A dhe të Bundesligës 1, por emrat e tyre dua t’i mbaj sekret. Ajo që mund të them është se në janar, ose maksimumi në verë, Sadiku do të transferohet në një prej këtyre kampionateve”, – ka thënë menaxheri.

[drague]

urime djalit.

do me pelqente te lunte ne bundeslige

[[HD]]

Edhe mendimi im pesonal eshte qe me e mira per te eshte te luaja ne Kampionatin Gjerman.

seria a pavarsishte se eshte nje nga kampionatet me te ndjekur , ne krahasim me Bundesligen Gjermane eshte shum poshte.

Urime gjths djaloshit Elbasanas me paraqitjet dhe golat e tij.


E rendesishme eshte qe ne te ardhmen e pret nje karriere super e mire..

[murik]

djaloshi elbasanas ne fakt esht prej Cerriku.Djaloshi shqiptar thuj me mire.

[[HD]]

Cerriku lagje e Elbasanit eshte.

[murik]

I bi qe te jete tirons atehere se edhe Elbasoni me autostraden e re lagje e Tirones bohet lol

[[HD]]

Shqipëri-Kamerun, “lumë” menaxherësh në stadium


Armando Sadiku apo edhe disa lojtarë të tjerë të Kombëtares sonë do të jenë në qendër të vëmendjes së menaxherëve në ndeshjen e mbrëmje së sotme. Sfida me Kamerunin mendohet se do të jetë vendimtare për të ardhmen e Edgar Çanit, pasi Polonia e Varshavës ka konfirmuar se do ta largojë atë në merkaton e janarit. Mirëpo në optikën e menaxherëve do të jetë edhe Etrit Berisha. Portieri kuqezi luajti titullar në ndeshjen e fundit ndaj Sllovenisë dhe bëri një paraqitje të shkëlqyer, ndaj për të nuk kanë munguar ofertat edhe nga skuadra të Serisë A. Ndërkaq, edhe Armando Sadiku kërkohet nga disa klube të Serisë A, pa lënë pas lojtarë të rinj si Bala e Vajushi, të grumbulluar rishtazi me Kombëtaren. Ndërsa bie në sy dueli Cana-Eto, dy lojtarët këta më të mirëpaguar në skuadrat respektive

[[HD]]

Menaxheri: Sadiku si Vieri, e do Fiorentina





Menaxheri i Armando Sadikut, Sakol Haxhia, ka pohuar në një intervistë për mediat italiane se lojtari është në vëzhgim nga Fiorentina dhe Siena. “Armando është një futbollist i fortë fizikisht. Nëse do kërkonim një krahasim, i ngjan shumë Vierit, por luan qoftë si mesfushor krahu dhe si sulmues kryesor. Gjuan njëlloj me të dyja këmbët dhe është i paparashikueshëm, sepse e godet portën nga çdo pozicion. Për momentin mund të them se për të janë interesuar Fiorentina dhe Siena, por unë personalisht nuk kam folur ende me drejtorët sportivë të këtyre klubeve”, – ka sqaruar Haxhia

[[HD]]

Bazeli piketon Sadikun


Merkato “e çmendur” për kuqezinjtë. Dhjetori dhe janari pritet të jenë muaj vendimtarë për disa nga titullarët e Kombëtares shqiptare. Në fokusin e klubeve të ndryshme evropiane janë vënë sulmuesit Edgar Çani dhe Armando Sadiku. Miqësorja e fundit e Shqipërisë kundër Kamerunit, bëri që të ketë një dyndje menaxherësh në stadiumin e Gjenevës. Kësisoj, burime të sigurta të “Panorama Sport” pranë agjentëve treguan dje se përfaqësues të klubit italian të Katanias dhe atij qipriot të Apoel Nikosias, kanë qenë në stadium enkas për Çanin. Ky i fundit pritet të prishë kontratën me Polonia Varshavën, ndërkohë që interesim për të ka edhe nga dy klube angleze, por që emrat nuk bëhen të ditur për efekt tratative. Deri më tani bisedimet mes palëve janë në fazën fillestare. Nga ana tjetër, për Sadikun, i cili duhet thënë se është i shumëkërkuar, së fundmi ka dalë në skenë edhe Bazeli. Dje mediat zvicerane konfirmonin se klubi kampion në fuqi kërkon shërbimet e sulmuesit të Luganos. Më parë për Sadikun janë përfolur Borusia Dortmund, Mynih 1860, Fiorentina dhe Siena, të cilat interesohen për 20-vjeçarin. Gjithçka tashmë është në dorë të Luganos, klubit që disponon kartonin e talentit shqiptar.

[[HD]]

Parma, ofertë konkrete për Sadikun





Klubi italian i Parmes i ka vënë syrin sulmuesit të Kombëtares sonë Armando Sadiku, i cili aktivizohet në radhët e Luganos. Edhe më parë është folur për interesimin e disa klubeve të rëndësishme për të marrë shërbimet e sulmuesit, por këtë herë gjërat duket se janë edhe më serioze. Sipas faqes fussball.ch, bëhet e ditur se Parma ka bërë një ofertë konkrete pak ditë më parë për lojtarin dhe mbetet për t’u parë nëse do ta bindë bomberin tonë, duke qenë se tashmë në mes është futur edhe Kaizerslauten. Ajo që ka bërë që gjatë kësaj kohe të vërshojnë një lumë ofertash për Sadikun janë pikërisht cilësitë e sulmuesit tonë dhe mosha e tij e re, vetëm 21 vjeç. Siç është shprehur disa ditë më parë menaxheri i tij Haxhia, një nga cilësitë më të mira të tij është instinkti për golin. “Armando është një lojtar i jashtëzakonshëm, mund t’ju them se ai e ka golin në gjak”, – është shprehur Haxhia. Madje ai ka folur për interesimin e katër klubeve të tjera, dy nga të cilat italiane e dy të tjera gjermane, por ai deklaroi se nuk mund t’i bëjë të ditur emrat e tyre. Sulmuesi u transferua këtë verë te skuadra e Luganos dhe deri tani ka realizuar 10 gola për Luganon. Me përfaqësuesen shqiptare është aktivizuar në gjashtë ndeshje dhe ka shënuar 1 gol. Sadiku mbetet një nga futbollistët e rinj më të vlerësuar nga tekniku De Biazi.

[[HD]]

Sadiku , shenon gol ndaj ish ekipit






Armando Sadiku është rikthyer dje në Lokarno, ku ka luajtur titullar dhe ka fituar me rezultatin 3-0 përballë ish-skuadrës së tij. Sulmuesi i përfaqësueses kuqezi, që ka veshur fanellën e Lokarnos në sezonin 2011-2012, gjatë të cilit shënoi edhe 28 gola në 39 ndeshje, dje i ka hapur rrugën suksesit të Luganos. Një penallti e tija e ekzekutuar në mënyrë perfekte në minutën e 33-të i ka hapur rrugën suksesit 3-0 të miqve (një dopietë e Botanit në pjesën e dytë plotësoi rezultatin më pas). Sadiku vazhdon të tregojë formën e tij fantastike, ndërkohë që Lugano vijon të ngjisë shkallët e renditjes, ndonëse vazhdon të jetë ende larg kreut, në 12 pikë distancë

[[HD]]

Sadiku mund të qëndrojë

Armando Sadiku është një ndër futbollistët e Kombëtares shqiptare më të kërkuar sot, për shkak te ecurisë së tij të shkëlqyer me Luganon, por edhe me ekipin kuqezi. Për të interesohen disa klube zvicerane, gjermane dhe italiane. Lajmin se ai mund të largohej që në janar e pat konfirmuar edhe presidenti i Luganos, por sipas asaj që raportojnë mediat zvicerane orët e fundit, duket se klubi ka ndryshuar strategji dhe dëshiron ta mbajë futbollistin deri në fund të sezonit.

[[HD]]

Sadiku shihet si zevendesues i Bogdanit te Siena


Erjon Bogdanin mund ta zëvendësojë Armando Sadiku te skuadra e Sienës. Lajmin e ka pohuar vetë drejtori sportiv i Luganos, Françesko Grilo, i cili ka pohuar se Siena është futur seriozisht në bisedime për të marrë sulmuesin e Kombëtares shqiptare. “Siena interesohet prej disa muajsh për sulmuesin tonë. E kanë ndjekur disa herë nga afër dhe na kanë kontaktuar, por të shohim se çfarë do të ndodhë”, ka thënë drejtori Grilo. Për Sadikun interesohen edhe skuadra të tjera, si Borusia Dortmund, Fiorentina, Kaizerslautern dhe Zyrih. Me shumë gjasë në janar do të largohet Bogdani, i cili nuk po luan thuajse fare te bardhezinjtë dhe, duke qenë se ka një pagë shumë të majme, Siena mund të pranojë kërkesën e tij për t’u larguar me parametra zero. Për shtatlartin kuqezi interesohet Peskara, por jo vetëm. Ky i fundit ka deklaruar se do të vlerësojë çdo mundësi që do t’i vijë edhe nga jashtë Italisë. “Jam në një formë shumë të mirë dhe mendoj se mund të luaj në nivele të larta edhe për një vit tjetër. Të shohim se çfarë do të ndodhë në janar”, pat deklaruar 35-vjeçari.

[[HD]]

Sulmi i Kombëtares, “varemi” nga Sadiku





Trajneri i Kombëtares së Shqipërisë, Xhani de Biazi, si një italian ka punuar shumë në aspektin mbrojtës të ekipit që drejton, por i mbetet të zgjidhë edhe problematikën me sulmuesit. Në fakt, një pjesë e mirë e kuqezinjve aktualë vuajnë ose aktivizimin, ose mungesën e golit. Madje, ky i fundit është kthyer në problem, pasi dyshja titullare Bogdani-Salihi janë në krizë të vërtetë, ndaj edhe në dy takimet e fundit zyrtare, tekniku kuqezi i ka besuar më së shumti një vend titullari Çanit dhe Sadikut. 35-vjeçari ka shënuar vetëm një gol për këtë sezon, në kampionat dhe në kupë, me Sienën. Në fakt, “Bogu” është aktivizuar shumë pak, vetëm 159 (nga 1620 në dispozicion), ndaj edhe rendimenti i tij ka qenë goxha i ulët në raport me sezonet e tjera. Kjo gjë ka ndikuar jo pak edhe në Kombëtare, ku sulmuesi ka shënuar vetëm një gol në ndeshjen me Qipron, duke luajtur vetëm një herë si titullar (ndaj Zvicrës). Në këtë këndvështrim, pritet që Bogdani mos ta mbyllë sezonin te Siena, duke kërkuar një kontratë të re, ndoshta e fundit në karrierën e tij në Serinë A (kërkohet me ngulm nga Peskara). Nuk është më mirë Salihi, i cili e ka humbur me kohë shqisën e golit. Gjithsesi, shkodrani ka shënuar të paktën 6 gola gjatë këtij sezoni në kampionat, por këta nuk i kanë mjaftuar që të fitonte besimin e drejtuesve të DC Junajtid, dhe ca më pak të tifozërisë. Madje, në muajt e fundit në Amerikë janë shtuar zërat e një largimi të parakohshëm të shkodranit nga kjo skuadër, kjo edhe për faktin se është një ndër më të paguarit në klub (merr rreth 750 mijë dollarë neto në sezon). Sakaq, largësia nga Europa dhe ndryshimi i kampionatit ndikoi edhe te Kombëtarja, aq sa nën drejtimin e De Biazit Salihi nuk ka shënuar qoftë edhe një gol, duke humbur kështu edhe vendin e titullarit. Një pjesë e parë e një sezoni totalisht për t’u harruar ka qenë dhe mbetet ky i sivjetmi edhe për Edgar Çanin. Sulmuesi fitoi “me dhunë” një vend në Kombëtare, por ka pasur shumë probleme me klubin e Polonia Varshavës, aq sa divorci mes tyre është vulosur prej kohësh. Çani është aktivizuar vetëm në 5 ndeshje për vetëm 49 minuta (nga 1350 në dispozicion), duke mos arritur të shënojë. Ndërkohë, ka pasur mundësi aktivizimi nga ana tjetër Ahmed Januzi te Vorskla Poltava në Ukrainë, por nga 1620 minuta në dispozicion, lojtari ka luajtur vetëm 851, duke shënuar 3 gola në 12 ndeshje aktivizim. Por, nuk duhet harruar edhe fakti se Januzi ka vuajtur edhe disa dëmtime të shpeshta, të cilat e kanë lënë në mjaft raste jashtë fushës së lojës. Nuk pritej më shumë nga Bekim Bala, i cili në aventurën e tij të dytë jashtë Shqipërisë (para 1 viti luajti për 6 muaj te Gençlerbiligi), te Sparta e Pragës është aktivizuar për 755 (nga 1440 në dispozicion), duke shënuar edhe tre gola. Por De Biazi mund të krenohet me Armando Sadikun. Sulmuesi elbasanas është i vetmi që ka luajtur rregullisht te Lugano në Zvicër, duke u aktivizuar për 1464 (nga 1620 në dispozicion), dhe duke shënuar 11 gola. Sadiku ka shënuar dy gola më pak sesa pesë sulmuesit e tjerë të Kombëtares të marrë së bashku, që tregon rendimentin dhe lojën efikase të këtij lojtari. Pikërisht falë kësaj loje dhe golave, Sadiku ka fituar jo vetëm një vend titullari në Kombëtare, por është në krye të listës së merkatos edhe të disa skuadrave si në Serinë A, por edhe në Gjermani e Angli.



Merkato, nga E.Berisha dhe Çani, te Sadiku



Nuk ka sezon merkatoje, ku të mos jenë përfshirë lojtarët e Kombëtares shqiptare. Ca për shkak të përfundimit të kontratave, ca për shkak të problematikës që hera-herës hasin në klubet ku luajnë, ca për rendiment të dobët dhe drejtuesit mezi presin që t’i largojnë, por ca edhe për shkak të formës së shkëlqyer që kalojnë dhe në këtë rast klubet rreken që t’i largojnë për të përfituar ekonomikisht nga shitja e kartonëve të tyre. Kështu, Edgar Çani shihet thuajse 99.99 për qind i larguar nga Polonia e Varshavës. Problematika e tejskajshme që sulmuesi ka pasur që nga maji i këtij viti te ky klub është “kurorëzuar” me nxjerrjen zyrtarisht në merkato, nga shitja e kartonit të të cilit drejtuesit pretendojnë të përfitojnë një shumë të majme parash. Thuajse i larguar është edhe Armando Sadiku nga Lugano, por ky i fundit jo për shkak të problematikës, por sepse falë lojës së tij shumë klube nga Gjermani, Anglia, Italia, por edhe Zvicra kanë trokitur në derën e presidentit të klubit. Ndërsa Hamdi Salihi pritet të lërë Amerikën dhe të rikthehet në Europë. Sulmuesi nuk po arrin të gjejë formën e tij më të mirë te DC Junajtid dhe nga ana tjetër, drejtuesit e këtij klubi nuk duken më të interesuar për të. Një tjetër shkodran që mund të ndryshojë ajër është edhe Armando Vajushi. 20-vjeçari po shkëlqen te Liteksi në Bullgari, prandaj drejtuesit e këtij klubi duan ta shesin me qëllim që të përfitojnë ekonomikisht. I njëjti arsyetim edhe për Etrit Berishën. Portieri po kalon një moment të mirë te Kalmari në Suedi dhe klubi dëshiron ta shesë për të përfituar nga kartoni i tij.

[[HD]]

De Biazi: Montela le ta marrë Sadikun te Fiorentina, sepse do t’i bëjë shumë punë



Armando Sadiku ka një “aleat” të fortë dhe bindës për të ardhmen në karrierën e tij futbollistike. Bëhet fjalë për trajnerin e Kombëtares shqiptare, Xhani de Biazi, i cili së fundmi i ka bërë goxha publicitet, teksa ka komentuar pjesën e parë të sezonit të Fiorentinës. Tekniku kuqezi komenton shpesh në mediat italiane ecurinë e Serisë A dhe, për këtë javë, në qendër të vëmendjes ka qenë skuadra toskane, e cila drejtohet nga Vinçenco Montela. Sipas De Biazit, ky i fundit meriton çmimin “Pankina e Artë” për punën që ka bërë te Fiorentina dhe në komentin e tij nuk harron që të bëjë edhe shkesin për Sadikun. Sipas trajnerit, Armando është një lojtar, i cili i bën punë jo vetëm Fiorentinës, por edhe një pjese të mirë të skuadrave në Serinë A. “Sadiku është një lojtar që ka shumë cilësi fiziko-taktike. Nga ana psikologjike është më së i motivuar dhe ju garantoj se është i lindur për të qenë një ‘bomber’. Jeton me vetëm një synim: të shënojë gol, paçka se nuk përton që të luajë sa në mesfushë, por edhe në mbrojtje. Mund të luajë qoftë si sulmues i parë, por edhe si shoqërues, ose mesfushor krahu. Ka një të djathtë të fuqishme dhe gjuan nga çdo pozicion i fushës. Sipas meje, mjafton të shikosh statistikat e atij lojtari dhe të bindesh për fjalët që them. I ngjan shumë Andrea Karnevales (sulmues i viteve ’80-’90, i cili ka luajtur për Napolin, Udinesen, Peskarën dhe për Kombëtaren e Italisë) sepse është shumë i mirë edhe në lojën në ajër. Normalisht është i ri dhe ka pak eksperiencë, ndaj është e kuptueshme edhe ndonjë “djallëzi” e moshës. Unë jam i sigurt se Fiorentinës i bën shumë punë dhe besoj se është gati për të luajtur në Serinë A, edhe pse ka pasaportë ekstrakomunitari. Kam pasur disa miq, drejtorë sportivë, që gjatë kësaj kohe më kanë kërkuar informacione rreth tij”, – ka përfunduar De Biazi. Sadiku kërkohet nga disa skuadra në Itali, si Katania, Siena etj., por edhe në Gjermani (Mynih 1860). Gjithsesi, për të do të jenë drejtuesit e Luganos që do vendosin nëse do ta shesin që në merkaton e janarit, apo jo.

[[HD]]

Armando Sadiku prezantohet te F.C Zyrihu

Armando Sadiku ka firmosur dhe është prezantuar me ekipin e tij të ri, FC Zyrihu, me të cilin do të luajë që prej janarit 2014. Sulmuesi shqiptar ka nënshkruar kontratë 5-vjeçare me skuadrën e Superligës Zvicerane. Armando Sadiku, pjesë e kombëtares kuqezi, tashmë edhe zyrtarisht është pjesë e FC Zurihut. Ai kaloi nga skuadra e Luganos, e cila bën pjesë në kategorinë e dytë helvete, për te skuadra e re në elitën e futbollit të këtij vendi. Ai do të mbajë fanellën me numër 11, ndërsa mendohet se shuma e transferimit shkon te 500 mijë eurot.