TIRANE- Për drogën kisha dijeni vetëm unë. Motra dhe kushërira nuk kanë asnjë lidhje, i keni arrestuar kot. Mua më bënë presion dhe më kërcënuan me jetën e vajzës (fëmija nuk ka mbushur ende 4 vjeç), për të bërë transportin drejt Italisë. Droga u vendos në makinën time nga ...., i cili më tha se në Bari do më priste një person, emrin e të cilit nuk ma dha. Kur të dorëzoja drogën dhe të kthehesha në Tiranë, do më shpërblenin me 8500 euro". Donika Dervishi, pronarja e makinës tip "Ford Focus", me targa AA465DD në të cilën u gjet sasia prej 8 kilogramë heroinë, u ka rrëfyer hetuesve arsyet përse pranoi të shndërrohej në trafikante. Me një qetësi të madhe, krejt e ftohtë dhe e vendosur Dervishi është shprehur se ishte detyruar të bëhej pjesë e rrjetit të trafikut, për shkak se kishte marrë kërcënime me jetën e vajzës së mitur. 27-vjeçarja ka shfajësuar të motrën Migenën dhe vajzën e tezes Sonila Popa, duke u shprehur se asnjëra prej tyre nu k kishte dijeni për drogën që gjendej e fshehur në kroskotin dhe serbatorin e makinës. Donika Dervishi u dha hetuesve dhe emrin e personit që i dha drogën, i cili për arsye hetimore nuk bëhet i ditur. Edhe pse ajo ka mohuar kategorikisht të ketë lidhje me këtë person, pasi pretendon se është detyruar të bëjë transportin për shkak të kërcënimeve, prokuroria dyshon se Donika Dervishi kishte njohje të afërta me të.
VERDIKTI I GJYKATËS
Tre të dyshuarat për trafik narkotikësh dolën dje para Gjykatës së Krimeve të Rënda për tu njohur me masën e sigurisë. Prokurorja e Krimeve të Rënda, Elisabeta Imeraj rindërtoi të gjithë skemën e trafikut dhe në përfundim i kërkoi gjykatës që Donika Dervishi, e cila ka fajësuar vetën të qëndrojë prapa hekurave. Për Migena Dervishin dhe Sonila Popën, përfaqësuesja e organit të akuzës kërkoi të hetoheshin në gjendje të lirë, por t'u bllokoheshin pasaportat për të shmangur një largim të mundshëm nga Shqipëria deri në përfundim të hetimeve. Gjykata e gjeti të drejtë kërkesën e Akuzës dhe vendosi ta lërë prapa hekurave Donika Dervishin, e dyshuar kryesore për trafikun e heroinës. Për motrën dhe vajzën e tezes së saj u vendos bllokimi i pasaportave. Donika ka pranuar fajin dhe është shprehur se as motra dhe as kushërira nuk kishin dijeni për drogën që fshihej në makinën e saj. Migena do të udhëtonte drejt Italisë për të bërë furnizim për butikun e saj që zotëronte në Tiranë, ndërsa vajza e tezes, ishte një pasagjere rasti, që për fat të keq përfundoi prapa hekurave si e dyshuar për trafik narkotikësh.
ARRESTIMI NË PORT
Dy motrat Donika dhe Migena Dervishi dhe vajza e tezes së tyre, Sonila Popa, u arrestuan në Portin e Durrësit, teksa po tentonin të udhëtonin drejt Italisë me tragetin e Linjës Durrës - Bari. Në makinën tip "Ford Focus", me targa AA465DD në pronësi të Donika Dervishit dhe që drejtohej nga kjo e fundit, u gjetën dhe sekuestruan 10 pako, me një peshë prej 8 kilogramë, e cila ka rezultuar e llojit heroinë. Nga hetimet rezultoi se droga kishte si destinacion Italinë. Vajzat e dyshuan si pjesë e një rrjeti trafiku ndërkombëtar. Dje gjykata ka vendosur që dy prej tyre t'i lirojë, duke u bllokuar pasaportat dhe duke u hequr çdo mundësi për të udhëtuar jashtë vendit, ndërsa e vetmja që mbetet prapa hekurave është Donika Dervishi e cila ka marrë përsipër fajin.
(m.a/Gazeta Shqiptare/BalkanWeb)
Përgjigju Duke Cituar
Krijoni Kontakt