TIRANE- Pas 68 vjetësh historia është përsëritur, por në krahë të kundër. Mijëra manifestues çamë, të ardhur nga rrethe të ndryshme të vendit, kanë marshuar pasditen e sotme drejt vendkalimit kufitar të Qafëbotës në Sarandë rreth orës 19:00, ndërsa stacioni i parë i tyre kanë qenë varrezat masive të Kllogjerit, ku është përuruar një memorial dhe janë ndezur qirinj në respekt të viktimave të spastrimit etnik grek.
Mbi 2 mijë vetë kanë qënë të pranishëm në këtë aktivitet, mes tyre edhe kreu i PDIU-së Shpëtim Idrizi, deputeti Dashamir Tahiri. Këtij marshimi i është bashkëngjitur edhe kreu i Vetëvendosje në Kosovë, Albin Kurti.
Pas vendosjes së gurit të parë për ndërtimin e varrezave çame, kreu i PDIU-së, Shpëtim Idrizi ka deklaruar se, “ky është guri i themelimit të çështjes Çame”.
Këto varreza, ka shtuar Idrizi, janë detyrimi moral për pararaardhësit, prandaj ai i quajti këto varreza, “pikë kthese për çështjen çame”. “Çështja çame do të futet në kanalet diplomatike dhe kthimi pranë vatrave tona nuk do të jetë i largët", tha ai më tej.
Në përurim të punimeve për ndërtimin e varrezave, përfaqësues të PDIU-së, Shpëtim Idrizi, Dashamir Tahiri dhe kreu i Vetëvendosje, Albin Kurti mbollën një rrënjë ulliri.
Qafë-Botë
Në ndalesën e fundit të marshimit, në Qafë-Botë, kreu i PDIU-së, Shpëtim Idrizi mbajti fjalimin në shenjë nderimi për 2960 çamë të masakruar nga grekët.
Ai deklaroi se ndërtimi varrezave ishte një akt i nderuar, ndërsa shtoi se, “hoqëm pllakën e turpit, mundëm harresën dhe neglizhencën, që i bëri shteti komunist kauzës çame. Ne sot jemi para zotit për veprën tonë, duke i dhënë dinjitet 2960 viktimave të Camërisë”, tha ai.
Gjatë fjalës së tij, Idrizi theksoi ndër të tjera se: “Dëshira për paqe, drejtësi është më e madhe se sa lufta. Ne jemi këtu për të dhënë drejtësi, për të vendosur paqen dhe dinjitetin. Ne jemi të mbushur me dëshirën për paqe, e pajtim, ne ecim në anë të kundërt me ata që na masakruan. Ne e fituam betejën me kohën, do ndërtojmë botën dhe urat e Camërisë. Në rugëtimin tonë ne kemi me vete të gjithë shqiptarët kudo që ndodhen”, nënvizoi ai.
Idrizi u shpreh gjatë fjalës së tij se një ditë do realizohet kthimi në Çamëri dhe ndërtimi i varrezave që kujtojnë çamët e masakruar atje.
“Në 100 vjetorin e Shqipërisë shtet, ne kemi një platformë për cështjen çame, ata që na pengojnë për realizimin e drejtësisë, ju themi që ne nuk jemi për ndryshimin e kufijve, ne e duam Europën. Nuk gëzohemi për fatin e Greqisë, ne aty kemi tokat dhe pronat tona, dhe ne do kthehemi në Camëri, do bëjmë edhe atje varreza. Brenda Europës ka shanse për ta zgjidhur këtë cështje. Në drejtësinë europiane ne do tregojmë se gjenocidi duhet riparuar me drejtësi”, u shpreh kreu i PDIU.
Për çamët që jetojnë ende në Greqi Idrizi premtoi se do kërkojë për ta statusin e minoritetit, që edhe ata të kenë shkalla në gjuhën e tyre.
67 vjet më parë, në tokën e tyre, Çamëri, u vranë rreth 3000 vetë, kryesisht gra, pleq e fëmijë, ndërsa rreth 2960 të tjerë vdiqën në kufirin e Çamërisë me Shqipërinë, në Kllogjer. Mbi çamët u ekzekutua një plan i përgatitur, për t’i asgjësuar tërësisht si komunitet nga dheu i të parëve , vetëm sepse ata i përkisnin një komuniteti etnik, fetar dhe social, të ndryshëm nga popullsia shumicë.
Çështja e Çamërisë, krahinës së mbetur jashtë kufijve të Shqipërisë në vitin 1913, e lënë në harresë gjatë dekadave të diktaturës, është rikthyer në vëmendje gjatë viteve të fundit në sajë të përpjekjeve të komunitetit çam përmes shoqatave të tyre dhe të Partisë për Drejtësi, Integrim dhe Unitet.
(ma.ar/d.b/BalkanWeb)
Përgjigju Duke Cituar
Postuar më parë nga Blizoo
Krijoni Kontakt