Presidentja, Atifete Jahjaga ka dënuar dhunën mbi forcat paqeruajtëse të NATO-s nga një grup i qytetarëve të komunitetit serb në rrugën Mitrovicë–Leposaviq, ku si pasojë janë lënduar disa ushtarë të KFOR-it dhe disa qytetarë.
“Zyra e Presidentes së Republikës së Kosovës mbështet aksionin e forcave paqeruajtëse të NATO-s për heqjen e barrikadave dhe zhbllokimin e rrugëve që përkon me misionin e KFOR-it për vendosjen e stabilitetit dhe të sigurisë si dhe për aplikimin e sundimit të ligjit në territorin e Republikës së Kosovës. Ky është veprim për të mos lejuar sundimin e anarkisë në tri komunat në veri të vendit”, thuhet në kumtesë.
Zyra e Presidentes së Republikës së Kosovës vlerëson se veprimi i strukturave kriminale dhe ilegale për bllokimin e rrugëve në komunat në veri të vendit si dhe pengimi i mekanizmave të sigurisë për vendosjen e rendit, është i dënueshëm dhe në kundërshtim me Kushtetutën dhe ligjet e vendit si dhe normat dhe ligjet ndërkombëtare për lirinë e lëvizjes.
Jahjaga kërkon vendosjen e gjendjes normale në këtë pjesë të vendit dhe shuarjen e strukturave ilegale e kriminale të cilat po pengojnë dhe mbajnë peng popullatën e kësaj pjese dhe po i shfrytëzojnë problemet reale të qytetarëve për qëllime të veta, duke i ftuar të gjithë qytetarët për veprime brenda institucioneve. /Telegrafi/
Krijoni Kontakt