Postuar më parë nga
MaDaBeR
Nëntë zyrtarë në pranga për kolaudimet, përgjimet zbulojnë rrjetin e prostitucionit
9 persona, përfaqësues të Drejtorisë së Rrugëve, kompanisë private të kolaudimit të mjeteve dhe të kompanive të sigurimit janë arrestuar dje nga policia në Durrës në një superoperacion të mbyllur pas 4 muaj hetimesh dhe përgjimesh. Policia e Durrësit njoftoi se në bashkëpunim me prokurorinë e këtij rrethi kanë finalizuar operacioni e koduar “Kolaudimi 2”, në kuadër të të cilit u arrestuan 9 persona, ndërkohë falë përgjimeve që po kryheshin për këtë operacion u zbulua edhe një rrjet prostitucioni. “Një prej të arrestuarve është punonjës i Drejtorisë Rajonale të Shërbimit të Transportit Rrugor, 3 janë punonjës të kompanisë së kontrollit teknik të automjeteve “SGS AUTOMOTIVE ALBANIA, dhe 5 janë agjentë të kompanive të sigurimeve”, njoftoi policia. Të arrestuarit sipas saj ishin përfshirë në një skemë korrupsioni, që detyronte shoferë apo drejtues mjetesh të jepnin para nën dorë për të kaluar verifikimin teknik të mjetit, edhe nëse ky nuk i plotësonte kushtet.
Arrestimet
Mësohet se operacioni i arrestimeve ka ardhur në mënyrë tepër të befasishme. Gjatë mëngjesit të së hënës, makinat e mbushura me punonjës të policisë kanë zbarkuar në ambientet e kompanisë së kolaudimit dhe kanë ndalur procesin e punës duke kontrolluar e sekuestruar të gjitha dokumentacionet që punonjësit dispononin, ndërsa ky kontroll është finalizuar me rreth 9 të arrestuar në lidhje me këtë çështje, të cilët dyshohen të jenë të implikuar në lëshimin e certifikatave të gjendjes së kontrollit të automjeteve. Ndalimi i punonjësve të kolaudimit dhe atyre të kompanive të sigurimeve mësohet të jetë bërë pas një pune operative disamujore nga ana e Task-Forcë e Prokurorisë së rrethit të Durrësit. Burime konfidenciale kanë bërë të ditur se personat e arrestuar, në bashkëpunim me njëri- tjetrin kanë abuzuar në dhjetëra raste në dhënien e dokumentacioneve të rreme, duke i pajisur mjetet me letra kontrolli, pa kaluar në proces kolaudimi. Policia tha se arrestimet janë bërë “nën akuzën e kryerjes së veprave penale të ‘korrupsionit pasiv të personave që ushtrojnë funksione publike’, ‘ushtrimit të ndikimit të paligjshëm ndaj personave që ushtrojnë funksione publike’, si dhe ‘falsifikimit të dokumenteve dhe formularëve”.
Hetimi
Policia dhe prokuroria kishin njoftim se persona të ndryshëm paguanin para për të marrë kolaudimin, ndërsa menjëherë kanë filluar hetimet në lidhje me këtë rast. Sipas prokurorisë dhe policisë, përgjimet telefonike, ato fotografike dhe regjistrimet filmike kanë filluar që në muajin shkurt dhe kanë vijuar deri dje, kur është dokumentuar veprimtaria e të gjithë personave të ndaluar. “Gjatë ecurisë së këtij hetimi rezultoi se këta shtetas në bashkëpunim me njëri-tjetrin në këmbim të kryerjes së procedurave të regjistrimit, kontrollit fizik dhe teknik të mjeteve, merrnin shuma të ndryshme parash, me qëllim përshpejtimin e procedurave, si dhe plotësimin e dokumentacionit për mjetet pavarësisht se nuk plotësonin kushtet teknike”, – njoftoi policia. Nga të dhënat mësohet se shumat që paguheshin për të mundësuar këtë shërbim varionin nga 5 mijë deri në 10 mijë lekë të reja. Ndërkohë veç të arrestuarve është pezulluar edhe aktiviteti i Bruno Shazivarit, inspektor i Kontrollit në Rrugë në Drejtorinë Rajonale të Shërbimit të Transportit Rrugor në Durrës.
I ndjekuri për korrupsion çoi policinë te rrejti i prostitucionit
Nga burime të policisë mësohet se ndjekja e njërit prej të arrestuarve, Idriz Hoxhës, agjent i një kompanie sigurimesh i përfshirë në këtë linjë korrupsioni me kolaudimin e mjeteve, zbuloi një grup të shfrytëzimit të prostitucionit dhe solli arrestimin e 6 personave, 2 të akuzuarve për tutorë dhe katër femrave. Policia nuk ka ngritur ndaj Hoxhës akuzë në lidhje me këtë rast, çka lë të kuptohet se 20-vjeçari mund të ketë qenë vetëm një klient i grupit të prostitucionit. “Nga hetimet intensive të kryera u bë i mundur arrestimi dhe ndalimi i 6 shtetasve të tjerë nën akuzën e kryerjes së veprave penale të “shfrytëzimit të prostitucionit”, dhe “ushtrimit të prostitucionit”, njoftoi policia.
Të arrestuar për korrupsion
1. Eugen Gjyzeli, 39 vjeç, banues në Shijak Durrës, me detyrë administrator i Sistemit Informatik në Drejtorinë Rajonale të Shërbimit të Transportit Rrugor në Durrës.
2. Albert Saraçi, 24 vjeç, banues në Gosë e Madhe Kavajë, me detyrë inxhinier mekanik pranë firmës SGS AUTOMOTIVE ALBANIA, Dega Durrës.
3. Lipion Goci, vjeç 24, banues në Krujë, me detyrë inxhinier mekanik pranë kompanisë SGS AUTOMOTIVE ALBANIA, Dega Durrës.
4. Artur Xhepmeta, vjeç 28, banues në Durrës, me detyrë inxhinier mekanik pranë firmës SGS AUTOMOTIVE ALBANIA, Dega Durrës.
5. Idriz Hoxha, vjeç 20, banues në Kavajë, agjent i kompanisë së sigurimeve “ATLANTIK” në Durrës.
6. Indrit Dervishi, vjeç 41, banues në Durrës, agjent i Shoqërisë së Sigurimeve “ATLANTIK” në Durrës.
7. Arben Ndreka, vjeç 41, banues në Durrës, agjent në Agjencinë e Sigurimeve “INTERALBANIA” në Durrës.
8. Ilir Nelaj, vjeç 36, banues në Durrës, agjent në Agjencinë e Sigurimeve “INTERALBANIA” në Durrës.
9. Enri Dervishi, vjeç 24, banues në Shijak Durrës, agjent i Shoqërisë së Sigurimeve “ATLANTIK” në Durrës.
Të arrestuar për prostitucion
1. Artur Shusha, vjeç 44, banues në Patos
2. Pëllumb Elezi, vjeç 51, nga Tirana
3. 4 vajza me inicialet N. N., A. Q. A. B. dhe I.M.
Mapo
Krijoni Kontakt