Ymeri ka thënë se Lëvizja “Vetëvendosje” nuk e njeh himnin e shtetësisë së Kosovës.
Ymeri: Katër vjet pa sovranitet
16-02-2012 18:26 CET
Shefi i Grupit parlamentar të “Vetëvendosjes”, Visar Ymeri ka deklaruar se katër vjet pas shpalljes së pavarësisë, Kosova vazhdon të mbetët pa sovranitet, i cili vazhdon të cungohet nga misionet ndërkombëtare me pushtet ekzekutiv, vazhdon të cungohet dhe sulmohet nga strukturat ilegale armiqësore të Serbisë, të cilët kontrollojnë një pjesë të konsiderueshme të territorit.
Ky sovranitet, sipas tij, pamundësohet edhe me kufizimet dhe kushtëzimet të cilat janë futur në Kushtetutë nga plani i Ahtisaarit dhe të cilat e definojnë politikën e jashtme të Kosovës.
Ymeri, shpalljen e pavarësisë së Kosovës, katër vjet më parë e ka quajtur një hap para. Por, sipas tij, me vetë deklaratën e pavarësisë janë bërë disa hapa prapa.
Ai ka folur për përmbajtjen e deklaratës së pavarësisë, duke thënë se, teksti i saj, i shpallur në Kuvend më 17 shkurt 2008, përmban disa pika jashtëzakonisht problematike.
Obligimi kryesor në deklaratën e pavarësisë, sipas “Vetëvendosjes” është propozimi gjithëpërfshirës i ashtuquajturi plani i Ahtisaarit, i cili drejt për së drejti cungon të drejtën dhe mundësinë e përcaktimit për një shtet të cilin të gjithë e dëshirojmë.
Termi me të cilin cilësohet shteti i Kosovës si “Sui generis”, sipas tij, përjashton mundësinë e të qenit shtet sovran dhe pamundëson përpjekjet për një bashkim kombëtar.
Ai ka kritikuar edhe fjalimet e sotme të mbajtura për 4 vjetorin e pavarësisë në Kuvendin e Kosovës nga udhëheqësit shtetërorë, duke thënë se të njëjtit kanë vazhduar dhe vazhdojnë ta pranojnë një shtet i cili ndërtohet në dokumente të cilat përjashtojnë luftën dhe historinë e popullit shqiptar.
Ai e ka arsyetuar edhe mosprezencën e deputetëve të “Vetëvendosjes” gjatë intonimit të himnit në Kuvendin e Republikës së Kosovës.
Ymeri ka thënë se Lëvizja “Vetëvendosje” nuk e njeh himnin e shtetësisë së Kosovës. /rtk/
http://www.zeri.info/artikulli/1/1/4...pa-sovranitet/
Krijoni Kontakt