Pasuritë minerare të vendit janë tani të pasqyruara saktë në hartën e fundit të burimeve minerare me shkallë 1 me 200 mijë, e prezantuar dje nga Ministria e Ekonomisë, Tregtisë dhe Energjetikës. Kjo hartë ecën në të njëjtin drejtim me strategjinë minerare të vendit, duke ofruar më shumë transparencë për planifikimin minerar. Prezantimi i kësaj harte të përgatitur nga Shërbimi Gjeologjik Shqiptar pas një pune të gjatë, u bë dje nga ministri Nasip Naço, zëvendësministri Neritan Alibali, drejtori i Shërbimit Gjeologjik Shqiptar, Adil Neziraj dhe drejtues të tjerë pranë METE-s. Ministri i Ekonomisë, Nasip Naço, në fjalën e tij gjatë aktivitetet të djeshëm, vlerësoi punën e kryer për hartimin e kësaj harte dhe, mbi të gjitha, e vuri theksin në pasuritë që ka vendi ynë. Edhe pse ka një sipërfaqe të vogël, Naço këto pasuri i ilustroi duke iu referuar mineraleve të nxjerra ndër vite nga nëntoka shqiptare, duke dhënë me shifra edhe prodhimin. Harta e re e burimeve minerare vjen pak kohë pas miratimit të legjislacionit për sektorin minerar, duke plotësuar kështu panoramën e strategjisë së plotë të ndjekur për këtë sektor. Harta, që ka një shkallë 1 me 200 mijë, pasqyron saktë burimet e nëntokës dhe zonat se ku gjenden ato, duke filluar nga burimet minerare metalore e deri tek ato energjetike. Aktualisht është duke u punuar që të përgatitet edhe një hartë tjetër më e detajuar me shkallë 1 me 50 mijë për qarqet në vend.
PASURITË
Harta e burimeve të nëntokës reflekton zonat më të pasura më minerale në vend. Por cilat janë disa nga këto pasuri?
BURIMET MINERARE SIPAS METE
TË ZBULUARA
437 milionë tonë naftë
13 miliardë metra kub gaz
800 milionë tonë qymyr
57 milionë tonë kromite
69 milionë tonë bakër
300 milionë tonë hekur-nikel
230 milionë tonë nikel-silikat
133 milionë tonë titano-magnetik
13 milionë tonë bokside
500 milionë tonë kripë guri
108 milionë tonë olivinite
108 milionë tonë dolomite
54 milionë tonë fosforite
JANË PRODHUAR
50 milionë tonë naftë
10 miliardë metra kub gaz
38 milionë tonë qymyr
25 milionë tonë mineral kromiti
21 milionë tonë mineral bakri
56 milionë tonë hekur-nikel
VENDBURIME NË HARTË
15 vendburime nafte
6 vendburime gazi
500 vendburime të mineraleve të
ngurta, nga të cilat:
293 vendburime kromi
108 vendburime bakri
21 vendburime hekur-nikel
45 vendburime qymyrguri
Urdhri i Kryeministrit:Berisha: Ministritë të tregojnë të gjitha licensat
Të gjitha autorizimet e dhëna nga ministritë apo institucionet e tjera qendrore përgjatë viteve 2009, 2010 apo 2011 në përftim të subjekteve të ndryshme tregtare, do të kalojnë në sitë. Me një urdhër të Kryeministrit Sali Berisha është kërkuar që institucionet të dorëzonin deri më 30 nëntor gjithë detajet e autorizimeve pranë Ministrisë së Ekonomisë. Kjo nismë duket se vjen si një kërkesë për të inventarizuar të gjitha “licencat” e dhëna në vend për shërbime të ndryshme, por që nuk kalojnë nga Qendra Kombëtare e Licencimit dhe që janë lëshuar nga ministrat dhe titullarët e institucioneve qendrore për subjektet e ndryshme tregtare që operojnë në Republikën e Shqipërisë. Urdhri i kreut të Ekzekutivit përfshin që në dokumentacionin që këto institucione do të paraqesin pranë METE-s të përfshihen edhe të dhëna për bazën ligjore përkatëse, nga ligji deri tek udhëzimet, si dhe për kriteret e formularët e aplikimeve, gjithashtu edhe “listën me të gjitha subjektet e identifikuara, llojin e autorizimeve, sipas fushës së veprimtarive dhe me afatet e vlefshmërisë së tyre me të cilat këto subjekte janë pajisur për vitet 2009, 2010 dhe 2011. Kjo nismë në urdhrin e Kryeministrit shpjegon se Ministria e Ekonomisë, në bazë të kësaj, duhet të hartojë propozime konkrete për të mundësuar që gjithë kompetencat e autorizimeve të kalojnë nga duart e ministrive tek QKL.
NERTILA MAHO
Krijoni Kontakt