lajm i fundit, Politikë|14/09/2011 11:55
Berisha: Qeveria ime, ndër më të mirat në botë
Kryeministri Berisha tha sot se Shqipëria hyn në 20 vendet me qeverisjen më të mirë në botë. Duke analizuar një raport të Forumit Ekonomik global, Berisha tha se vendi ynë është sivjet 10 vende më sipër nga pozicioni që kishte një vit më parë në këtë klasifikim.
Kryeministri u ndal gjatë në treguesit që sipas tij e rendisin Shqipërinë në vendet e para të botës.
“Treguesi domethënës që e rendit Shqipërinë në vendin e nëntë në botë është barra e rregullimeve shtetërore. Ne jemi ndër 10 vendet me barrën më të vogël të ndërhyrjes shtetërore. Në raportin qeveri-shoqëri, qeveri-biznes, qeveri-ekonomi nuk ka asgjë më shpresëdhënëse se ky tregues. Në jemi qeveri e vogël, por përpjekjet tona për të zhdukur pengesat burokratike e rendisin Shqipërinë në 10-shen e parë në botë”, tha Berisha.
Kreu i qeverisë mohoi të ketë kritikuar ndonjëherë opozitën, duke iu referuar një thënieje të ish-presidentit amerikan Ronald Regan, të cilin e ka përdorur disa herë gjatë ditëve të fundit. “Qeveria është problemi, thoshte presidenti Regan. Unë nuk kam thënë kurrë se opozita është problemi, sepse që në ’90-n, unë e mbaj të stamposur në mendjen time këtë postulat”, tha kryeministri.
Për shefin e qeverisë, rritja e pagave dhe pensioneve mbetet dëshmi e zemrës së dhimbsur të qeverisë, çka e ka bërë atë të renditet “në grupin e 20 qeverive më të mira në përpjekjet e saj për ta lidhur në raport të drejtë prodhimin me prosperitetin, begatinë. I kemi rritur rrogat dhe do ta vazhdojmë këtë politikë të rëndësishme dhe mjaft të përgjegjshme, e cila bën që në epiqendër të jetë qytetari dhe mirëqenia e tij. Kjo dëshmon zemrën e dhimbusr të kësaj qeverie. Jemi ndër më të paktat qeveri që ka rritur me 3 për qind të GDP faturën sociale, e gjetëm 6 e bëmë 9 për qind”, tha Berisha.
Raporti thotë se Shqipëria mban vendin e 18-të për përdorimin e celularëve. “Në përdorimin e celularëve, ne renditemi të 18-t në botë. Tani janë bërë dhe me 3-4 celularë në xhep. Sa shpesh të ndodh të mendosh se je në një park me zogj kur dëgjon zilet e ndryshme që u dalin nga xhepat”, tha Berisha.
Kryeministri tha se përmirësimi i cilësisë së arsimit mbetet objektiv. “Ne renditemi të 45-tët për sistemin arsimor në tërësi. Përpjekje duhet të bëjmë në matematikë se ne e kemi dhunti leximin dhe poezitë. Nuk ka popull që të ketë më shumë poetë dhe shkrimtarë popullorë se ne. Na duhen matematicienë popullorë. Ne duhet të mbështesim talentet në matematikë. Ata do të mbështeten në mënyrën më të diferencuar”, tha Berisha.
Banka Botërore: Shqipëria, ende vendi më i korruptuar në Ballkan
2011-09-14
Ndërkombëtarët
Armitage: Niveli i ryshfetit ka rënë, por mbetet i lartë
Banka Botërore ka bërë të ditur se Shqipëria është vendi më i korruptuar në rajon dhe i kërkon qeverisë të përshpejtojë reformat për të nxjerrë sektorin publik nga korrupsioni. "Perceptimi i korrupsionit, në sensin e atyre që paguajnë ryshfet, ka ardhur në rënie në tre vitet e fundit, sipas studimeve tona, por është sërish i lartë dhe është më i lartë sesa në vendet fqinje. Mbetet ende shumë punë për t'u bërë në këtë drejtim", tha Jane Armitage, drejtoresha e BB-së për Europën Juglindore. Ndërkaq, Kryeministri Berisha tha se qeveria ka bërë përpjekjet të mëdha në luftën kundër korrupsionit duke përmendur një sërë reformash, që sipas tij e luftojnë atë. Arritjet janë të pamohueshme. Ky vend është i vetmi vendi në Europë që i ka dyfishuar të ardhurat nga taksat dhe tatimet nga viti 2004, krahasuar me vitin 2009. Ky vend vendosi i pari në botë sistemin 100 për qind të prokurimeve elektronike, në sajë të ndihmës që na dha USAID-i", tha Berisha. Po Armitage tha se ligji i prokurimeve është shumë i mirë, por më i rëndësishëm është zbatimi i tij. "Bizneset thonë se transparenca në prokurime është rritur, por disa prej tyre ngrenë shqetësimin se në fusha të caktuara ai nuk po zbatohet plotësisht", tha Armitage. Drejtoresha e Bankës për Europën Juglindore ishte në Tiranë për të prezantuar një sërë raportesh dhe studimesh që lidhen me qeverisjen në Shqipëri. Një nga pikat më të nxehta që ajo ngriti pas korrupsionit është çështja e pronave. Në veçanti, siguria e të drejtës së pronës është thelbësore. Kjo është një çështje që prek të gjitha vendet e rajonit. Ka një konsensus të gjerë mes gjithë faktorëve se kjo është një fushë, ku Shqipëria duhet të përshpejtojë reformat", tha drejtoresha. Banka thotë se ulja e korrupsionit dhe zgjidhja e çështjes së pronave janë jetike për të mos lënë ekonominë të zhytet edhe më thellë në vorbullën e krizës dhe pasigurive të mëdha që vijnë nga kriza europiane e borxheve. "Të gjithë janë të shqetësuar se kriza e borxheve në Eurozonë dhe normat e ulëta të rritjes, do të godasin ekonomitë në zhvillim të rajonit. Shqipëria është shumë e lidhur me prosperitetin ekonomik të Europës Perëndimore. Normat e rritjes ekonomike, nuk janë më si më parë dhe është e rëndësishme që qeveria të ulë borxhin publik e për këtë i duhet të miratojë buxhete me deficit më të lartë se 3 për qind", tha Armitage. Në kulmin e debatit mbi vrasjen e gjyqtarit Skerdilajd Konomi, i cili dyshohet se është ekzekutuar për çështje pronësie, Banka Botërore i kërkon qeverisë që të zgjidhë urgjentisht këtë problematikë. Në një raport të fundit banka evidenton, se Agjencia e Kthimit dhe Kompensimit të Pronave është institucioni i fundit, për sa i përket besimit që ka publiku. “Kjo është një çështje që prek jo vetëm Shqipërinë, por të gjithë rajonin, pasi trashëgohet nga e kaluara. Situata është shume komplekse, pasi ndikon në mjedisin ekonomik. Qeveritë në vite kanë marrë vendime për të përmirësuar ligjet, por Shqipëria duhet të përshpejtojë hapat për të përmirësuar këtë proces, problematika e te cilit është krijuar në 20 vjet”, është shprehur Jane Armitage, drejtore e BB për Shqipërinë. I gjendur përballë kësaj kërkese ultimative, Kryeministri Sali Berisha ka njoftuar ngritjen e një task-force për t’i dhënë zgjidhje çështjes së pronave. Konfliktet e pronësisë janë evidentuar nga raportet e Bankës Botërore si një nga problemet kryesore të ekonomisë shqiptare.
Përgjigju Duke Cituar
Postuar më parë nga juelda
. Po matematikanet akademike ca do te behen?
Krijoni Kontakt