Ndryshimet në qeveri, pritet spastrimi i kundërshtarëve të Bashës në parti dhe kabinet.
Berisha, gati t’i hapë rrugën Bashës drejt kreut të PD
Përpos në Tiranë, edhe në Partinë Demokratike ka filluar të fryjë era e Bashës. Lulzim Basha tashmë e ka rrugën e hapur për të marrë kreun e PD. Konfirmimi i tij kryebashkiak i Tiranës është në të njëjtën kohë konfirmim edhe si pasardhës absolut i Berishës. Në këtë kuadër, me përfundimin de fakto të betejës ligjore për zgjedhjet në Tiranë, kryeministri Berisha njëherësh kryetari i Partisë Demokratike,
pritet të ndërmarrë së shpejti një aksion spastrimesh në qeveri. Burime pranë selisë blu dhe ekzekutivit bënë me dije se objekti kryesor i fshesës së Berishës janë kundërshtarët e Lulzim Bashës si brenda qeverisë, ashtu edhe brenda partisë. Nën justifikimin e domosdoshmërisë së plotësimit të dy vendeve vakante, kryeministri Berisha pritet të bëjë ndryshime radikale në qeveri, duke larguar në mënyrë selektive të gjithë kundërshtarët e njohur tashmë të Bashës brenda kabinetit. Sipas burimeve brenda Partisë Demokratike, ende nuk janë zbardhur emrat e kabinetit qeveritar që pritet të largohen nga Berisha, por të njëjtat burime shtojnë se të gjithë e dinë se kush janë kundërshtarët e Bashës. Në shënjestër nuk janë vetëm armiqtë e heshtur të Bashës, por edhe ata që kanë qëndruar indiferentë ndaj fushatës së tij novatore në Tiranë. Nga ana e tij, kandidati i Aleancës për Qytetarin, Lulzim Basha i ka shmangur të gjitha këto figura nga fushata e tij në Tiranë. Basha ka vendosur që fushatën të bëjë me njerëzit e tij të medias, si me Henri Çilin, Artur Zhejin, Jorida Tabakun e etj., pa figurat qendrore të Partisë Demokratike, respektivisht kundërshtarët e tij në parti. Në këtë mënyrë, Basha ka vendosur të rrezikojë, duke marrë përsipër përgjegjësinë e një humbje të humbje të mundshme, por nga ana tjetër atij i takon merita e fitores. Kjo betejë ishte edhe prova e Bashës për të qenë pretendenti kryesor për kreun e PD. Në këtë kuadër, kryeministri Berisha pritet të bëjë lëvizjet e para, për t’i hapur rrugën Bashës drejt kreut të PD. Rikonfigurimin e qeverisë e ka konfirmuar dy ditë më parë kryeministri Berisha gjatë një interviste. “Është një parti e koalicionit, është pjesë e bashkëqeverisjes, problemet do të diskutohen gjatë javëve që vijnë. Qeveria me vend vakant nuk ecën. Do të plotësohen. Të përmbyllet procesi”, ka theksuar kryeministri Berisha.
Berisha akuzon strukturat për humbjen
Ndërsa për humbjen e PD në bastionet e vendit, kryeministri fajësoi strukturat e PD duke theksuar se do të bëhet analiza e këtyre humbjeve. “Shqiptarët besimin e kanë tek PD, për probleme menaxheriale zgjedhin sipas shijes së tyre. Nuk kam vënë në diskutim asnjë prej fitoreve të këtyre zotërinjve, kanë fituar dhe nuk ka pasur asnjë lloj kundërshtie nga ana e koalicionit tonë. Kemi humbur qytete që kanë qenë tradicionalisht tonat. Janë humbur për përgjegjësitë e PD, të drejtuesve të saj lokalë dhe qendrorë. Nëse arritëm këtë rezultat e arritëm për koalicionin, përgjegjësia në rastet konkrete është e PD. Po nuk bëre analizën, nuk mund të ecësh”, tha ai.
Emrat e përfolur për dy vendet vakante
Burime parë ekzekutivit bëjnë me dije se pas dorëheqjes së dy ministrave, janë disa emra të rinj që presin “pas derës” për të marrë stafetën e të pakën të dy portofolave ministrore të mbetura vakant. Kështu, në postin e Ministrit të Kulturës, kryeministrit Berisha duket se ka piketuar deputeten Mesila Doda, e cila ka qenë tepër aktive gjatë viteve të fundit. Por, zonja Doda duket se nuk është pretendentja e vetme për postin në fjalë. Të njëjtat burime shtojnë se edhe një deputet tjetër demokrat mund të emërohet në vend të Xhaferrajt. Ndërkohë, burime parë ekzekutivit bëjnë me dije gjithashtu se po përfliten tre emra për të marrë postin e ministrit të Brendshëm, më konkretisht përflitet deputeti Ilir Rusmajli, Viktor Gumi si dhe Eduard Halimi.
Berisha priti fituesin në Tiranë
Kryeministri Berisha priti zyrtarizimin e fituesit për Bashkinë e Tiranës, për të plotësuar mandej vendet vakante në qeveri, përkatësisht postin e Ministrit të Drejtësisë dhe postin e Ministrit të Kulturës, dikastere të cilat prej disa javësh drejtohen nga zëvendësministrat përkatës. Kryeministri Berisha pati deklaruar se postet ministrore të lëna vakant nga Lulzim Basha dhe Ferdinant Xhaferraj, do t’i plotësonte para zgjedhjeve lokale të 8 maj. Megjithatë, kryeministri Berisha nuk mbajti fjalën, por bëri një tjetër ndryshim në qeveri të diktuar më fort nga faktori ndërkombëtar. Në kushtet kur pas ikjes së Bashës nga ministri e Mbrojtjes, në këtë institucion plasi sherri për kompetenca, Berisha emëroi Bujar Nishanin ministër të Brendshëm. Lëvizja e Nishanit erdhi edhe për shkak të shqetësimit të madh të ndërkombëtarëve për mundësinë e përdorimit të policisë në zgjedhje. Gjithsesi dy portofole ministrore mbetën sërish bosh.
Adriatik Doçi
Gazeta Sot
Krijoni Kontakt