Kryeministri Thaçi: Pavarësia e Kosovës është minimumi i së drejtës historike të shqiptarëve
http://www.kryeministri-ks.net/repos...-03_%5B%5D.jpg
Prishtinë, 1 qershor 2011
Qeveria e Republikës së Kosovës, nën drejtimin e kryeministrit Hashim Thaçi, ka zhvilluar mbledhjen e saj të shtatëmbëdhjetë, në të cilën ka aprovuar katër projektligje dhe vendime tjera nga fushëveprimi i saj ligjorë dhe kushtetues.
Në hapje të mbledhjes, kryeministri Hashim Thaçi ka thekuar se ditëve të fundit janë shfaqur prononcime të liderëve të ndryshëm nga Serbia të përcjella me pompozitet edhe nga mediat, për Kosovën. “Në emër të Qeverisë së Republikës së Kosovës, të institucioneve dhe popullit të Kosovës, ritheksojmë fuqishëm se në asnjë rrethanë dhe me asnjë çmim, nuk do të ketë ndarje të Kosovës, nuk do të ketë shkëmbim territoresh, nuk do të ketë autonomi në veri por integrim territorial dhe gjithetnik, nuk do të ketë ndryshim kufijsh” – theksoi kryeministri Thaçi.
“Beogradi duhet t’u thotë troç serbëve në veri të Mitrovicës se ajo pjesë është territor i Kosovës dhe se ata janë qytetarë të Republikës së Kosovës dhe kryeqytet i tyre është Prishtina”, ka thënë kryeministri Thaçi në fjalën e hapjes.
Kryeministri Thaçi i ka vlerësuar antihistorike dhe antievropiane, idetë për ndarje dhe ndryshim kufijsh në rajon. ”Pavarësia e Kosovës është minimumi i së drejtës historike të shqiptarëve”, ka ritheksuar kryeministri Thaçi dhe ka theksuar përcaktimin e Qeverisë së Kosovës për paqe, stabilitet, bashkëpunim rajonal dhe perspektivë euroatlantike.
Në fjalën e hyrjes, kryeministri Thaçi ka fokusuar edhe bisedimet e zhvilluara me misionin e Fondit Monetar Ndërkombëtar i cili ka qëndruar në Prishtinë nga data 17 deri më 30 maj. Kryeministri Hashim Thaçi i ka vlerësuar diskutimet të hapura dhe të suksesshme.
“Si rezultat i këtyre diskutimeve është arritur pajtimi për një program të monitoruar nga Fondi Monetar Ndërkombëtarë deri në fund të vitit 2011. Kjo marrëveshja ka për synim kryesor ruajtjen e qëndrueshmërisë fiskale dhe menaxhimin e buxhetit”, ka thënë kryeministri Hashim Thaçi dhe ka theksuar se zbatimi i këtij programi do të mundësojë vazhdimin e asistencës nga Fondi Monetar Ndërkombëtarë dhe nga donatorët tjerë.
Çështja më e diskutueshme me Fondin Monetar Ndërkombëtarë ka qenë ngritja e pagave për punëtorët e sektorit publik në Kosovë. Fondi Monetar Ndërkombëtarë ka qenë kundër rritjes së pagave, por falë politikave të qëndrueshme të Qeverisë së Kosovës shumë të argumentuar është arritur marrëveshje dhe çështja e pagave është e zgjidhur një herë e përgjithmonë – u shpreh z. Thaçi.
Kryeministri Thaçi ka ftuar të gjithë ata që kanë pretenduar që këtë proces ta politizojnë, ta shikojnë këtë proces në prizmin e raporteve të Qeverisë së Republikës së Kosovës me Fondin Monetar Ndërkombëtar.
“Të gjithë duhet ta kuptojnë se Kosova është vend i pavarur dhe sovran dhe nuk është në kohën e UNMIK-ut. Ka politikat e veta, ka lidership të legjitimuar, ka qeveri të legjitimuar dhe të zgjedhur në mënyrë legale dhe me legjitimitet të plotë, dhe natyrisht se tani kemi partneritet definitiv me Fondin Monetar Ndërkombëtar.
Çështje tjetër që është diskutuar me Fondin Monetar Ndërkombëtarë ka qenë edhe çështja e Autostradës Vërmicë – Merdarë. Kryeministri Hashim Thaçi ka theksuar se edhe kjo çështje është e mbyllur dhe mjetet janë të siguruara, të garantuara dhe nuk do të ketë as edhe një ditë vonesë të punëve sa iu përket mjeteve dhe as rrethanave dhe faktorëve tjerë.
Qeveria e Kosovës ka miratuar Projektligjin për Mbrojtjen nga Fatkeqësitë Natyrore dhe Fatkeqësitë, Projektligjin për Markat Tregtare, Projektligjin për Dizajnin Industrial dhe Projektligjin për Patenta.
Në mbledhje është aprovuar edhe ndryshimi i vendimit të Qeverisë për pajisje me pasaportë diplomatike si dhe vendimi për kompensimin e qytetarëve të fshatit Debëllde për dëmet e shkaktuara nga mosshfrytëzimi i pronave të tyre.
Qeveria ka miratuar Projektrregulloren për Gradimin dhe Pagat e Krijuesve dhe Performuesve të Kulturës dhe Punonjësve Profesional të Trashëgimisë Kulturore.
Kabineti qeveritar ka aprovuar edhe vendimin për kompensimin e qytetarëve për dëmet nga vërshimet e vitit të kaluar dhe mjetet për mbështetjen e trajtimit të ujërave të zeza në Gjilan.
Krijoni Kontakt