Arrestohet Paro Laçi, aksioneri i klubit te futbollit Partizani

[Albo]

Ryshfeti me 40 mijë euro, arrestohet Paro Laçi

Paro Laçi, personazh i njohur në botën e sportit dhe të biznesit, u arrestua dje me tetë persona të tjerë, nën akuzat për korrupsion dhe mashtrim në shuma të mëdha financiare.Ish-administratori i futboll-klub Partizani, aktualisht president i klubit të futbollit të Rubikut, ka rënë në pranga në lagjen Brrakë të Tiranës, fare pranë Prokurorisë së rrethit. Arrestimi ka ndodhur në flagrancë siç tha policia, sapo Paro Laçi kishte marrë në dorëzim një shumë ryshfeti prej 40 mijë euro nga një biznesmen, të cilit i kishte premtuar licencë nga Ministria e Ekonomisë. Akuzat që rëndojnë mbi Paro Laçin kanë të bëjnë me shumat financiare që ai ka përfituar kundrejt premtimeve për ndërhyrje të paligjshme në lirimin e një të akuzuari për vrasje në Gjykatën e Apelit Shkodër dhe mundësimin e një licence minerare për një biznes nga Ministria e Ekonomisë. Një tjetër akuzë e ngritur ndaj Paro Laçit, është ofrimi i ryshfetit prej 500 mijë lekë të reja për gjyqtarin e ndeshjes së klubit të Rubikut me një skuadër të kategorisë së dytë, e cila përfundoi me rezultatin e barabartë 1-1. Ndërkohë që Paro Laçi ishte mbyllur në dhomat e paraburgimit në Tiranë, edhe tetë persona të tjerë, bashkëpunëtorë në skemën e korrupsionit, u arrestuan me urdhër të Njësisë Task Force pranë Prokurorisë së Durrësit.

Ryshfet për vrasësin
Sipas burimeve nga Prokuroria, Paro Laçi akuzohet se ka marrë rreth 30 mijë euro nga të afërmit e një personi me iniciale A.V nga Shkodra, të akuzuar për vrasje. Dosja penale ndaj këtij personi po shqyrtohej në Gjykatën e Apelit, pasi shkalla e parë e kishte dënuar me 25 vjet burg. Duke premtuar lirimin e tij dhe shpalljen të pafajshëm, sipas akuzës, Paro Laçi ka marrë 30 mijë euro nga të afërmit e të akuzuarit. Personi në fjalë kishte kryer vrasje në Itali dhe ishte ekstraduar në Shqipëri në dhjetor 2010. Për lirimin e tij kishte ndërhyrë edhe Agron Arusha, i cili kishte marrë 10 mijë euro, për të cilat u arrestua dje gjatë aksionit, ku ra në pranga edhe Paro Laçi.

Trukimi i ndeshjeve
Zëdhënësja e Policisë së Shtetit, Laura Tutraku, deklaroi dje në një konferencë shtypi se Paro Laçi akuzohet edhe për trukim ndeshjesh sportive. Ndërkohë, nga burime të Prokurorisë, mësohet se trukimi ka ndodhur në një ndeshje të ekipit të Rubikut, president i të cilit ishte Paro Laçi. Sipas akuzës, ndeshja e cila ka përfunduar me rezultatin 1-1, pas favorizimit të Rubikut nga gjyqtari është drejtuar nga arbitri Shkëlqim Balliu, 45 vjeç, i arrestuar ditën e djeshme. Hetimet kanë zbuluar se për ndikimin në rezultatin e ndeshjes, ky gjyqtar sportiv kishte marrë një shumë prej 50 mijë lekësh nga Paro Laçi.

Korrupsioni me minierat
Akt-korruptimi i ditës së djeshme duket se është shfrytëzuar më së miri nga policia, për t’i vënë prangat në flagrancë Paro Laçit. Burime nga Policia e Shtetit thanë se biznesmeni u arrestua në momentin që po merrte 40 mijë euro nga një biznesmen. Kundrejt kësaj shume, Paro Laçi i kishte premtuar këtij biznesi sigurimin e një licence dhe leje minerare për shfrytëzimin e një miniere në veri të vendit. Biznesi në fjalë ishte kompania e të arrestuarit Altin Xhura, me të cilin mësohet se Paro Laçi kishte krijuar një shoqër biznesi me emrin L.D.Xh, në datën 15 mars 2011. Kjo kompani, me zyra në Bulqizë, kishte për objekt kërkimin dhe nxjerrjen e materialeve të kromit. Duket se Paro Laçi ka pasur përfitime pikërisht nga zotimi për ti siguruar kësaj kompanie licencën e nevojshme për ushtrimin e aktivitetit në minierë.

Të arrestuarit

1.Paro Destan Laçi, 42 vjeç, banues në Tiranë, president i ekipit të futbollit të Rubikut
2.Edmond Gjergj Temali, 42 vjeç, banues në Shkodër
3.Agron Gjon Arusha, 36 vjeç, banues në Velipojë, Shkodër
4.Bledar Bashkim Kume, 25 vjeç, banues në Laç, Kurbin, biznesmen celularësh
5.Kozma Lazri Kule, 52 vjeç, banues në Berat
6.Shkëlqim Jashar Balliu, 45 vjeç, banues në Berat, gjyqtar sportiv
7.Endri Ali Dimo, 20 vjeç, nga Elbasani
8. Altin Mehmet Xhura, 34 vjeç, nga Dibra, me aktivitet privat në fushën e tregtimit të gomave të automjeteve
9. Agron Faik Laçi, 34 vjeç, banues në Tiranë.
Akuzat:
1. Ushtrimi i ndikimit të paligjshëm ndaj personave që ushtrojnë funksione publike, neni 245/1
2. Paracaktimi i rezultateve në garat sportive, neni 197/a i Kodit Penal.

Sherri mes Laçit dhe Xhanit te Partizani

Disa muaj më parë Paro Laçi u ndalua për disa orë nga policia pas denoncimit për kërcënim nga një zyrtar i klubit Partizani. Ai u la i lirë pas tërheqjes së padisë. Historia filloi dy vite më parë, kur Paro Laçi u afrua te klubi i Partizanit, pasi arriti një marrëveshje me presidentin Albert Xhani, në bazë të së cilës bleu 40% të aksioneve, si dhe do të administronte klubin. Në sezonin e parë, Partizani iu afrua rikthimit në Kategorinë Superiore, por këtë vit, skuadra është pranë rënies nga kategoria pas konflikteve midis dy drejtuesve. Sherri midis të dyve ka shkuar deri në gjykatë me anë të padive të ndërsjella. Aktualisht, të dy drejtuesit janë larg ekipit, me Xhanin që prej tri vitesh nuk duket më e të kuqtë, ndërsa Laçi ka marrë drejtimin e një tjetër klubi, atij të Rubikut, që militon në Kategorinë e dytë. Midis aksionerit Paro Laçi, si edhe presidentit të Partizanit Albert Xhani, ka një proces gjyqësor në Gjykatën e Tiranës. Presidenti është paditur nga aksioneri, sa i përket çështjes së administrimit të klubit kryeqytetas. Vendimi është shtyrë disa herë, data 25 mars është caktuar nga gjykatësja e çështjes për të dhënë verdiktin përfundimtar.


Panorama
Trazhgim Sokolaj

[Albo]

Ryshfeti, Paro Laçi merrte aksione të kompanive

Paro Laçi, aksioner i klubit të futbollit “Partizani”, i akuzuar tashmë për korrupsion dhe mashtrim, është bërë “pronar” në dy kompani që vepronin në fushën e minierave, vetëm pak kohë para arrestimit.Biznesmeni që u kap me 40 mijë euro në makinën e tij, të marra ryshfet për një licencë minerare, sipas Prokurorisë ka pasur lidhje me biznesin në fjalë. Personi që ka paguar shumën mësohet se është shtetasi Altin Xhuma, i arrestuar me Paro Laçin ditën e diel. Kompania e parë, në të cilën Paro Laçi është bërë aksioner, është “Miti 03″ e themeluar në vitin 2003 me seli në Dibër, Bulqizë dhe me kapital 100.000.00. Objekti i kësaj kompanie është veprimtaria në fushën e import-eksport e tregtimi me shumicë e pakicë i mallrave industrialë e ushqimorë, materiale ndërtimi, hidrosanitare, kinkaleri, kozmetike, transport udhëtarësh e mallrash. Më tej, objekti i kësaj kompanie vazhdon me ndërtimin dhe montimin e impianteve për prodhimin e energjisë nga burime të ndryshme, tregti me pakicë të karburanteve e vajrave lubrifikant dhe, më tej, kërkim, zbulim, nxjerrje, prodhim e shfrytëzim të mineraleve të ndryshme metalore dhe jo metalore, me shumicë e pakicë, ndërmjetësim për tregje të mineralit të kromit, prodhim koncentrati, shpime nëntokësore, etj. Paro Laçi nuk ka pasur lidhje me këtë kompani deri në datën 18 mars 2011 (një ditë para se të arrestohej). Në këtë datë, personazhi i njohur është bërë aksioner në këtë subjekt, ku ka hyrë edhe shtetasi Altin Xhuma, i cili sipas Prokurorisë, ka dhënë ryshfetin 40 mijë euro tek Paro Laçi. Sipas dokumentacionit ligjor, kompania ka bërë transferim kuotash, duke ndryshuar të dhënat mbi përkatësinë e aksioneve dhe duke futur kështu emrin e Paro Laçit në listën e pronarëve. Deri në 18 mars, numri i aksioneve në këtë kompani ka qenë 100.00 në emër të shtetases Dhurata S. Por, në datën 18 mars 2011, aksionet janë ndarë dhe ish-pronarja ka mbajtur 25 për qind të aksioneve, duke transferuar pjesën tjetër të pronësisë. Kështu, Paro Laçi është bërë aksioner me 25 për qind me kontribut 25.000.00 lekë. Janë shtuar si aksionerë edhe shtetasit Radvest Dima me 25 për qind dhe Altin Xhurra, me 25 për qind të aksioneve. Pikërisht, përfshirja e Paro Laçit në këtë kompani po hetohet pasi dyshohet se kalimi i pronësisë së aksioneve ka qenë pikërisht favor shtesë, që i është bërë kundrejt nxjerrjes së licencës që kishte premtuar të ndërmjetësonte në Ministrinë e Ekonomisë.

Biznesi i dytë
Aktiviteti i Paro Laçit duket se ka qenë i dendur pak ditë para arrestimit. Më 15 mars 2011, ai së bashku me Altin Xhurën, i arrestuar edhe ky në aksionin e së dielës, kanë themeluar kompaninë me emrin “L.D.XH”. Objekti i veprimtarisë së kësaj kompanie është i njëjtë me kompaninë “Miti 03″, ku Paro Laçi ishte bërë aksioner një ditë para arrestimit. Vetëm se, në subjektin e ri, Paro Laçi zotëronte një numër më të madh kuotash pronësie, konkretisht 34 për qind. Dy anskionerët e tjerë të subjektit, që kishte në qendër të aktivitetit fushën e minierave, ishin shtetasit Altin Xhuma, me 33 për qind të aksioneve dhe Radvist Dhima, me 33 për qind të aksioneve, duke konfirmuar si aksioner maxhoritar, Paro Laçin.

Dyshohet se trukoi edhe 5 ndeshje futbolli, Paro Laçi s`dëshmon në qeli

TIRANË – Biznesmeni Paro Laçi, personazh i njohur si aksioner i Futboll Klub Partizani, aktualisht në proces gjyqësor me Fatos Xhanin, ka refuzuar të japë deklarime pas arrestimit në Tiranë. Pasi është vënë në pranga ditën e diel, mësohet se Paro Laçi ka refuzuar të japë shpjegime në lidhje me akuzat që janë ngritur ndaj tij. Grupi i hetimit ka shkuar ta marrë në pyetje në paraburgim, por Paro Laçi ka thënë se nuk dëshiron të japë shpjegime pa praninë e një avokati të zgjedhur me prokurë prej tij. Prokuroria pohon se gjatë hetimeve që kanë nisur që në maj 2010, ka mbledhur informacione, sipas të cilave presidenti i ekipit të Rubikut (kategoria e II-të), ka trukuar edhe pesë ndeshje të tjera futbolli kundrejt përfitimeve financiare. Këto dyshime janë krijuar nga hetuesit, pasi telefoni i Paro Laçit dhe personave të tjerë është mbajtur në përgjim për një kohë të gjatë në funksion të hetimeve. Prokuroria ka të dhëna për trukimin e këtyre ndeshjeve, por burimet thanë se ende nuk është arritur të faktohen ato, si në rastin e barazimit të Rubikut me një skuadër tjetër kur është arritur të provohet se Paro Laçi i kishte dhënë 50 mijë lekë të reja arbitrit për të ndikuar në rezultatin barazim. Gjyqtari që kishte marrë shumën në fjalë, u arrestua ditën e diel me urdhër të Prokurorisë. Shkëlqim Balliu, 45 vjeç, banues në Berat, me profesion gjyqtar sportiv, u arrestua nga policia me akuzën e korrupsionit. Ai mësohet se ka marrë 50 mijë lekë të reja nga Paro Laçi, duke paracaktuar rezultatin e ndeshjes mes Rubikut dhe një skuadre tjetër. Prokuroria është në fazën e mbledhjes së materialeve përfundimtare të akuzës, para se të dërgojë në gjykatë kërkesën për caktimin e masës së sigurisë ndaj Paro Laçit dhe tetë personave të tjerë të arrestuar në të njëjtin aksion.


Panorama
Trazhgim Sokolaj

[Albo]

Seanca në Durrës, Paro Laci akuza Berishës

DURRËS- Paro Laci, aksioner i klubit të futbollit “Partizani” ka lëshuar akuza në drejtim të kryeministrit Sali Berisha, duke e bërë atë përgjegjës për arrestimin e tij. Deklaratat janë bërë nga salla e gjyqit, ku Laci ka dalë para trupit gjykues në durrës në pritje të caktimit të masës së sigurisë. Para fillimit të seancës, Laci ka sulmuar verbalisht kryeministrin Sali Berisha duke deklaruar se, “kam mbështetur gjithmonë Berishën, ndërsa tani jam kundër tij”.

Gjykata vendos sot për masën e sigurisë së Paro Lacit dhe 8 perosnave të tjerë arrestuar të shtunën që shkoi për mashtrim, ndikimit në instiutucione dhe trukim të ndeshjeve të futbollit.

Panorama

[Albo]

Paro Laçi: Po përdorem si kokë turku

Nën masa të rrepta sigurie kanë mbërritur në Gjykatën e Shkallës së Parë në Durrës nëntë të arrestuarit dy ditë më parë për korrupsion, mes tyre dhe presidenti i ekipit të futbollit të Rubikut, Paro Laçi.Teksa ka mbërritur në Gjykatën e Durrësit i pandehuri 42-vjeçar Paro Laçi, në momentin që po zbriste nga furgoni i policisë, është konfrontuar me uniformat blu. Gjatë hyrjes në gjykatë e më pas brenda sallës së gjyqit, ai ka lëshuar një lumë akuzash kundrejt kryeministrit Berisha, me pretendimin se po e përdor si kokë turku. Po kështu, që në fillim të seancës Laçi ka deklaruar se procesi gjyqësor ndaj tij është një farsë, duke sulmuar sërish shefin e Ekzekutivit si të korruptuarin kryesor. “Unë jam i pafajshëm, arrestimi im është i paligjshëm, shumë shpejt gjërat do të zbardhen dhe do të dalë në dritë e vërteta. Unë di shumë në lidhje me korrupsionin. Në momentin që unë u arrestova, policia më tha që ‘duhet të kishe kaluar më parë në ministria dhe jo në shtëpi’, por unë bëra si doja vetë. Poshtë Berisha! Nëse deri dje kam qenë me dy gishtat lart, sot gjithçka ka ndryshuar”. Pas këtyre deklaratave kreu i trupit gjykues, Shpëtim Reka, ka urdhëruar boshatisjen e sallës nga media, për të vijuar seancën për vlerësimin si të ligjshëm të arrestimit të tij. Nga burime të gjykatës mësohet se Paro Laçi ka mohuar akuzat ndaj tij, duke u shprehur se do të flasë më vonë për të treguar me fakte të vërtetën. “Nuk pranoj asnjë akuzë që rëndon mbi mua, pasi jam i pafajshëm. Unë jam gabimisht këtu, pasi të tjerë persona duhet të ishin në këtë vend. Arrestimi im është një maskaradë që drejtësia po bën me mua. Arrestimi im është i padrejtë. Unë jam i pafajshëm, pasi të tjerë njerëz janë të implikuar”, mësohet të ketë thënë në sallë 42-vjeçari. Për të, trupi gjykues, i përbërë nga Shpëtim Reka, pranoi kërkesën e prokurorit të çështjes, Afrim Shehu, për caktimin e masës së sigurisë “arrest me burg”. E njëjta masë u vendos dhe për Edmond Temalin, Agron Arushën dhe Agron Laçin. Ndërsa për Bledar Kumen, Kozma Kulen, Shkëlqim Balliun, Endri Dimon, si dhe Altin Xhurën, gjykata vendosi masën e sigurisë “detyrim paraqitje”.
Arrestimi i zyrtarëve, të cilët akuzohen për korrupsion, u zhvillua nga Drejtoria Kundër Krimit Financiar në Policinë e Shtetit në bashkëpunim me Njësinë e Përbashkët Hetimore Task-Force, Kundër Korrupsionit dhe Krimit Financiar pranë Prokurorisë së Rrethit Gjyqësor Durrës, pas rreth një vit hetimi. Gjatë arrestimit, Laçit iu gjet një shumë prej 40 mijë eurosh, që sipas hetuesve i kishte përfituar në këmbim të premtimeve për ushtrim të ndikimit të paligjshëm për dhënien e një licence minerare. Gjithashtu, Paro Laçi akuzohet se në bashkëpunim me persona të tjerë kanë marrë shuma të konsiderueshme parash, me qëllim ndërmjetësimin në dhënien e pafajësisë për një të dënuar për vrasje nga Gjykata e Shkallës së Parë në Shkodër. Po ashtu, të arrestuarit akuzohen se në bashkëpunim me njëri-tjetrin kanë trukuar ndeshje futbolli, duke paracaktuar rezultatet e garave sportive, duke dhënë shuma parash.

Të akuzuarit

Në burg:

Paro Destan Laçi, 42 vjeç, banues në Tiranë, president i ekipit të futbollit të Rubikut
Edmond Gjergj Temali, 42 vjeç, banues në Shkodër
Agron Gjon Arusha, 36 vjeç, banues në Velipojë, Shkodër
Agron Faik Laçi, 34 vjeç, banues në Tiranë.

Të lirë:

Bledar Bashkim Kume, 25 vjeç, banues në Laç, Kurbin, biznesmen celularësh
Kozma Lazri Kule, 52 vjeç, banues në Berat
Shkëlqim Jashar Balliu, 45 vjeç, banues në Berat, gjyqtar sportiv
Endri Ali Dimo, 20 vjeç, nga Elbasani
Altin Mehmet Xhura, 34 vjeç, nga Dibra, me aktivitet privat në fushën e tregtimit të gomave të automjeteve


Panorama
DURRES/ LEONIDHA MUSAJ

[Albo]

Paro Laçi, kartëmonedha një mln dollarëshe me qira

TIRANE – Zbardhen përgjimet e Prokurorisë franceze në lidhje me veprimtarinë e aksionerit të skuadrës së “Partizanit”, Paro Laçi lidhur me falsifikimin e kartëmonedhave 1 milion dollarëshe. Sipas Prokurorisë, nga përgjimet e bëra në telefonin celular të një shtetasi me iniciale S.Sh, doli se gjatë muajve korrik, gusht dhe shtator 2007, Paro Laçi i kishte dhënë udhëzime bashkëbiseduesit për t’i çuar kartëmonedhat disa personave në Zvicër, më qëllim që këto kartëmonedha të shkëmbeheshin. Nga hetimet ka dalë se gjatë muajit maj 2007, shtetasi shqiptar me iniciale S.D, kishte shkuar në Zvicër për të çuar dy seri kartëmonedhash një milion dollarëshe. Në gusht 2007, Paro Laçi kishte dërguar një shqiptar me emrin Bashkim, për të marrë këto dy seri kartëmonedhash. Prokuroria në dokumentet hetimore të saj përshkruan se në vijim të bisedës telefonike të datës 14 shtator 2007 midis S.SH dhe Paro Laçit, S.SH përcaktonte që Paro Laçi duhet të dërgonte 5 seri të 100 kartëmonedhave një milion dollarëshe në Zvicër për z.Treguet, i cili duhet të negocionte dhe t’i jepte 5 milionë euro Paro Laçit. Prokuroria pohon se sipas deklarimeve të shtetasve S.Sh dhe S.D, se Paro Laçi ia jepte për një muaj me “qira” këto seri kartëmonedhash, në këmbim të pagesës 15.000 euro personit që duhet t’ia derdhte këtë shumë, dhe të negocionte për kartëmonedhat. Hetimet për këtë çështje kishin filluar në Francë pas zbulimit në kompjuterin e një juristi, me mbiemrin GOULLETQUER, të dokumenteve që flisnin për një negociatë qarkullimi kartëmonedhash një milion dollarëshe. Prokuroria franceze kreu ekspertizë mbi kartëmonedhat dhe rezultoi se ato ishin false. Hetimet gjetën më pas se në zyrën e avokatit me mbiemrin SOUSTRAS ishin kryer takime dhe negociata për disa seri të kartëmonedhave të prerjeve 1 milion dollarëshe. Sipas hetimeve, disa ndërmjetësues kanë ndërhyrë dhe është konstatuar se dy nga mbajtësit e kartëmonedhave ishin qytetarë që i përkitnin komunitetit shqiptaro-belg. Ata janë N.I, i cili është arrestuar kur po shkonte të merrte kartëmonedhat që i kishte lënë tek avokati SOUSTRAS. I implikuar ka dalë edhe një shqiptar tjetër me mbiemrin Sulaj, avokat, i cili ishte bashkëpronar i kartëmonedhave.

Dy të arrestuar implikuan biznesmenin

Emri i biznesmenit Paro Laçi ka dalë në dosjen e falsifikimit të kartëmonedhave 1 milion dollarësh, pas arrestimit të një shtetasi shqiptar në Francë dhe një tjetri në Belgjikë. Të dy këta shqiptarë kishin një ndërmjetës tjetër të përbashkët në kuadrin e negociatave për këto kartëmonedha, i cili quhej M.Q, shqiptar, mik belg i avokatit Sulaj. Shtetasi shqiptar N.Islamaj, sipas të dhënave në dosje, pas arrestimit ka thënë se pronari i vërtetë i kartëmonedhave ishte Paro Laçi, shtetas shqiptar me banim në Tiranë, Shqipëri. “Islamaj pranoi që kartëmonedhat ia kishte dhënë Z.Paro Laçi, të cilin e kishte takuar në Belgjikë, kur ky i fundit banonte atje së bashku me familjen”, thuhet në dosje. Sipas saj, hetimet kanë gjetur se në vitin 2006, shtetasi S.D, banues në Francë, ishte ngarkuar me detyrë nga kushëriri i tij, Paro Laçi ta përfaqësonte në mbledhjet që zhvilloheshin në Paris, lidhur me negociatat për kartëmonedhat 1 milion dollarëshe”, thuhet në dosje.

Panorama

[Albo]

Korrupsioni, masë e re arresti për Paro Laçin, dosja vjen në Tiranë

TIRANE – Mbërrin në Tiranë dosja penale e Paro Laçit, aksionerit të skuadrës së futbollit “Partizani”. Pak ditë më parë, Prokuroria e Durrësit, konkretisht Njësia Task-Force, ka vendosur të transferojë në Tiranë dosjen penale ndaj Paro Laçit dhe tetë personave të tjerë të akuzuar për korrupsion e mashtrim në shuma të mëdha financiare. Burime nga organi i akuzës thanë se dosja penale që është hapur dhe është hetuar nga Prokuroria e Durrësit tashmë është regjistruar në Prokurorinë e Tiranës. Kjo prokurori ka bërë kërkesë në Gjykatën e kryeqytetit për vlerësimin e masës së sigurisë të biznesmenit Paro Laçi dhe tetë të arrestuarve të tjerë që ranë në pranga më 19 mars 2011 gjatë një aksioni të policisë. Biznesmeni Paro Laçi, 42 vjeç, u arrestua së bashku me shtetasit Edmond Temali, Agron Arusha, Bledar Kume, Kozma Kule, Shkëlqim Balliu, Endri Dimo, Altin Xhura e Agron Laçi. Duke qenë se masat e sigurisë ndaj tyre janë vendosur nga Gjykata e Durrësit, e cila nuk ka kompetencë lëndore në territorin e Tiranës, Prokuroria e kryeqytetit, menjëherë pas dorëzimit të dosjes, ka hartuar kërkesat që do t’i paraqiten Gjykatës së Tiranës për caktimin e masës së sigurisë. Katër prej të akuzuarve, përfshi Paro Laçin dhe tre të tjerë, janë lënë në masën arrest me burg, ndërsa gjashtë persona të tjerë janë lënë në masa të tjera shtrënguese. Ata akuzohen se janë implikuar në episode të ndryshme abuzimi të Paro Laçit, biznesmen i njohur, aksioner i skuadrës së futbollit “Partizani” dhe presidenti i skuadrës së kategorisë së dytë, Rubiku. Paro Laçi është akuzuar nga Prokuroria e Durrësit për marrjen e një shume ryshfeti prej 40 mijë eurosh nga një biznesmen, të cilit i kishte premtuar licencë minerare nga Ministria e Ekonomisë. Akuzat që rëndojnë mbi Paro Laçin kanë të bëjnë me shuma financiare që ai ka përfituar kundrejt premtimeve për ndërhyrje të paligjshme në lirimin e një të akuzuari për vrasje në Gjykatën e Apelit Shkodër dhe mundësimin e një licence minerare për një biznes nga Ministria e Ekonomisë. Një tjetër akuzë e ngritur ndaj Paro Laçit është ofrimi i ryshfetit prej 500 mijë lekësh për gjyqtarin e ndeshjes së klubit të Rubikut me një skuadër të kategorisë së dytë, e cila përfundoi me rezultatin e barabartë 1-1.

Transferimi i dosjes

Sipas burimeve nga organi i akuzës, transferimi i dosjes penale në Tiranë është bërë pasi nga hetimet ka dalë se episodet dhe ngjarjet për të cilat akuzohen të pandehurit kanë ndodhur në kryeqytet. Duke qenë se ngjarjet kanë ndodhur në Tiranë, organi i akuzës, kompetent për hetimin e tyre sipas ligjit, është Prokuroria e kryeqytetit.

Panorama

[Albo]

Gjykata pranon ekstradimin e Paro Laçit



TIRANE – Gjykata e Tiranës pranoi dje kërkesën e Prokurorisë për ekstradimin në Itali të biznesmenit Paro Laçi dhe e liroi nga qelia. Në të njëjtin vendim, Gjykata e Tiranës vendosi dje pezullimin e ekzekutimit të ekstradimit të biznesmenit. Sipas Gjykatës, ekstradimi nuk duhet të realizohet derisa Gjykata e Lartë të mbarojë shqyrtimin e një dosjeje ku biznesmeni Laçi është i pandehur. Po në vendimin e shpallur dje Gjykata lehtësoi masën e sigurisë në ngarkim të Laçit nga “arrest me burg” në “arrest shtëpiak”. Biznesmeni Laçi u arrestua në dhjetor të vitit të kaluar me kërkesë të Drejtësisë italiane. Ai kërkohet nga drejtësia e vendit fqinj, pas dyshimeve të saj se në vitin 1997 ka qenë i përfshirë në veprimtari kriminale në vendin fqinj.

Panorama

[Albo]

Gjykata e Apelit e kthen në burg, arratiset Paro Laçi

Gjykata e Apelit Tiranë lëshon urdhërarresti për biznesmenin Paro Laçi për llogari të ekstradimit të tij në Itali. Me anë të një vendimi gjyqësor të shpallur të mërkurën, togat e zeza të Apelit ndryshuan në “arrest me burg” masën e sigurisë “arrest shtëpiak”, caktuar ndaj tij më herët në Gjykatën e Tiranës.
Në të njëjtin vendim, Gjykata i ka dhënë formë të prerë ekstradimit të biznesmenit në Itali. Ndërkaq, burime policore bënë të ditur se deri në orët e vona të ditës së djeshme ky vendim nuk ishte ekzekutuar, pasi biznesmeni nuk gjendej në banesë. Burime jozyrtare pohuan se janë verifikuar adresat e banimit të biznesmenit, por nuk është bërë e mundur gjetja e tij.
Biznesmeni Laçi, i njohur edhe si një nga aksionerët e Futboll Klub “Partizani”, u arrestua në dhjetor të vitit të kaluar me kërkesë të Drejtësisë italiane. Sipas autoriteteve të Drejtësisë së vendit fqinj, biznesmeni dyshohej se në vitin 1997 ka qenë i përfshirë në veprimtari kriminale në këtë vend dhe se figuron një dënim me burg i dhënë ndaj tij.

EKSTRADIMI
Më 8 mars 2013 Gjykata e Tiranës pranoi kërkesën e Prokurorisë për ekstradimin drejt Italisë të të dyshuarit Paro Laçi. Ishte po ky vendim ai që lehtësoi masën e sigurisë ndaj Laçit, duke zëvendësuar masën “arrest me burg” me “arrest shtëpie”.
Në atë vendim, gjykata shprehej se lejonte ekstradimin e Laçit “me qëllim vuajtjen e dënimit prej 10 vjet e 6 muaj burgim të dhënë për veprën penale të ‘trafikimit ndërkombëtar të lëndëve narkotike’”. Shkalla e Parë e pezulloi ekzekutimin e ekstradimit, derisa për të dyshuarin Laçi të përfundonte një tjetër gjykim në Gjykatën e Tiranës, ku ai është në pozitat e të pandehurit.

Panorama

[Albo]

Ministria e Drejtësisë nis ispektimin në Gjykata për çështjen e Paro Laçit

Mosrealizimi i ekstradimit dhe lënia të lirë të të dënuarve Paro Laçi dhe Sokol Bedini (Imami) ka bërë që Ministria e Drejtësisë bëri të ditur se ka nisur inspektimin e procedurave të ndjekura nga Gjykata e Shkallës së Parë dhe ajo të Apelit Tiranë. Ministria e Drejtësisë bëri të ditur se inspektimi kryhet nga Drejtoria e Përgjithshme Çështjeve të Drejtësisë me objekt kontrollin e veprimeve procedurale të ndjekura nga gjykatat në të dy rastet. Paro Laçi, aksioneri i klubit sportiv “Partizani” nuk u ekstradua drejt Italisë, ku është dënuar për trafik narkotikësh.Gjykatësi kërkoi që ekstradimi të bëhet në momentin që ai do të mbyllë hesapet me drejtësinë shqiptare dhe vendosi të ndryshojë masën e sigurisë nga ‘arrest me burg’, në ‘arrest shtëpie’.

MAPO