Kryeministri i vendit, Hashim Thaçi deklaroi të enjten se vizita e udhëheqësit të ekipit negociator të Serbisë, Borislav Stefanovicit në Kosovë është një hap drejt krijimit të marrëdhënieve të mira me Serbinë dhe de jure njohje e pavarësisë së Kosovës nga shteti serb. Thaçi nuk e përjashtoi mundësinë që një ditë edhe delegacioni kosovar të vizitojë Beogradin.
Kryeministri Thaçi tha me këtë rast se Kosova e konsideron si vlerë debatin që zhvillohen ndërmjet dy vendeve, prandaj tha se e ka mirëpritur vizitën e Stefanovicit në Kosovë
__________________________________________________ ______________
Stefanoviq: Çelësi i Prishtinës ndodhet në Beograd
Udhëheqësi i ekipit negociator të Serbisë, Borislav Stefanoviq, gjatë qëndrimit të tij në Prishtinë do të mundohet t'i bindë zyrtarët dhe qytetarët kosovarë se Beogradi ka ndryshuar, pavarësisht nga fakti që mban qëndrim të ngurtë kundruall pavarësisë së Kosovës. Sipas tij Prishtina është vendi i duhur për reflektimin e maturisë dhe konstruktivitetit të të dyja palëve para partnerëve evropianë, ku mund të jepen sinjalet se Beogradi dhe Prishtina mund t’i zgjidhin bashkë problemet ekzistuese, përmes dialogut. Mirëpo ai është i bindur se të gjitha "rrugët e Prishtinës kalojnë nga Beogradi".
"Kosova nuk mund të përmbushë pavarësinë e saj pa çelësin në Beograd, nuk mund të bëhet pjesë e organizatave ndërkombëtare pa ne, dhe pa marrëveshjen me Beogradin nuk do të ketë rrugë të qëndrueshme drejt Evropës", ka thënë Stefanoviq.
Gjithashtu ka konstatuar se "veriu i Kosovës është çelësi i zgjidhjes së problemit të Kosovës", dhe se të gjithë ata që nuk e pranojnë këtë fakt e gënjejnë veten.
__________________________________________________ ______________
Jeremiq insiston për hetim nga KB rreth raportit të Dick Martyt
Ministri i Jashtëm i Serbisë, Vuk Jeremiq, ka theksuar sot se është i nevojshëm një hetim i pavarur dhe i gjithanshëm rreth trafikimit të organeve njerëzore në Kosovë nën ombrellën e KB, siç ishte rasti me të gjitha krimet e luftës të bëra në Ballkan.
Jeremiq në konferencën e KB për vendet më së paku të zhvilluar se raportimet e të dërguarit special të Këshillit të Evropës, Dick Marty, kanë shokuar botën dhe ka theksuar se pohimet për këtë dhe krimet e tjera që kanë ndodhur gjatë luftës në Kosovë nuk mund të fshihen nën qilim.
Ky raport, ka thënë Jeremiq, identifikon Hashim Thaçin, kryeministrin aktual të Kosovës si organizator të komplotit për tregti me organe njerëzish, gjurmë të cilit çojnë jo vetëm nga një numër shtetesh evropiane, por edhe në disa pjesë të Afrikës, Azisë dhe të Lindjes së Afërme.
Ai ka falënderuar shumicën e vendeve anëtare të KB që nuk e kanë njohur Kosovën dhe që respektojnë sovranitetin dhe integritetin territorial të Serbisë.
(Koha.net)
Krijoni Kontakt