Zgjedhjet e parakohshme parlamentare 2011, në Maqedoni

[RaPSouL]

Largime të tjera nga radhët e DR-së


Demokracia e Re (DR) gjatë ditëve të ardhshme do të përballet me dorëheqje të tjera, pas dorëheqjes së liderit të saj, Imer Selmani dhe të nënkryetarit Abedin Zymberi.

Një zyrtar i lartë i kësaj partie deklaroi për agjencinë e lajmeve INA se subjekti po shkon drejt shpartallimit dhe se nuk ka asnjë mundësi për ringritjen apo stabilizimin e tij, pas situatës së krijuar të dorëheqjes së kreut partiak, për shkak të dështimit dhe humbjes së thellë në zgjedhjet parlamentare të 5 qershorit, ku kjo parti nuk arriti të fitojë asnjë mandat deputeti, përkundër pritjeve të mëdha.

“Ka largime masive në heshtje nga kjo parti, pasi që ka një dëshpërim të madh për rezultatin e zgjedhjeve. Është mëse e sigurt se ditëve në vijim do të pasojnë edhe largime të tjera, megjithatë duhet që kryesia dhe organet e tjera partiake të aktivizohen urgjentisht dhe ky proces të ndodhë me një përgjegjësi më të madhe nga kreu partiak”, deklaroi për agjencinë e lajmeve INA, zyrtari i lartë i DR-së, duke kërkuar që lideri i deritanishëm të marrë në dorë mbylljen e kësaj situate apo mbylljen e tërësishme të partisë.

Zyrtar të lartë të DR-së theksojnë se kreu i deritanishëm i partisë së tyre nuk përgjigjet pranë tyre dhe i shmanget çdo lloj komunikimi. Ky shqetësim është shprehur edhe nga nënkryetari Abedin Zymberi, i cili dje braktisi radhët e këtij subjekti.

“Çdo moment pres që të hapet zyra dhe të paraqesë dorëheqjen time sepse nuk dua të komprometohem me figura të cilat kanë vetëm interesin personal e aspak interesin shoqëror për të cilin kemi punuar ne për ata. Me këtë injorim ai realisht na ka nervozuar të gjithë strukturën e DR-së, konkretisht mua si nënkryetar partie. Unë edhe dje shkova në selinë e partisë, desha të takoj dikë. Atje pash dyert e mbyllura dhe deri në këtë moment edhe kryetari nuk është paraqitur në telefon, dhe kjo dëshmon se në këtë parti nuk ka më bukë. Fatkeqësia më e madhe është se paraqiti dorëheqjen pa u konsultuar as me strukturën dhe as me kërkon. Dha dorëheqje kokë në veti ç’ka tregon qartë se kjo parti paska qenë vetëm pronë e dikujt por jo edhe parti shoqërore ku marrin pjesë të gjithë dhe që e kemi ndërtua të gjithë”, deklaroi nënkryetari i DR-së, Abedin Zymberi.

Ditët e ardhshme pritet të jenë vendimtare për DR-në, subjekti në vitin 2008 nga Imer Selmani dhe tre deputetë që atëherë braktisën PDSH-në e Menduh Thaçit, me arsyetimin e mungesës së transparencës dhe demokracisë brenda këtij subjekti.

(INA)

[RaPSouL]

Protesta kundër dhunës policore në Manastir



Në Manastir gjithashtu po zhvillohen protesta kundër dhunës policore, pas vrasjes së një të riu nga Shkupi nga ana e një pjesëtari të njësitit policor “Tigrat”.

Protesta me moto kundër terrorit dhe dhunës policore nisi nga parku i qytetit të Manastirit, duke pasuar me një marsh drejt qytetit dhe stacionit policor.

Protestuesit janë ndaluar nga barrikadat policore, të cilat kanë pamundësuar marshimin e mëtejmë të të rinjve.

“Shtet policor”, “Përgjegjësi !??”, “Dorëheqje e kryeministrit dhe ministres së brendshme”, ishin disa nga parullat e të rinjve nga Manastiri. Të rinjtë apeluan që të ndërpritet ushtrimi i dhunës policore ndaj njerëzve të pafajshëm. Në protestë ishin të pranishëm edhe dhjetëra të rinj shqiptarë nga Manastiri dhe zonat përreth. Protesta u mbajtën disa ditë me radhë në sheshin e Shkupit, pas vrasjes së të riut maqedonas Martin Neshkovski nga ana e një pjesëtari të njësitit policor “Tigrat”, ndaj të cilit u shqiptua masë paraburgimi dhe po vijojnë hetimet për zbardhjen e vrasjes.

(Fërgim Demiri/INA)

[jeton_struga]

Ky lajm ska te beje fare me temen ne fjale............

[RaPSouL]

Ky lajm ska te beje fare me temen ne fjale............

Djali u vra në tensionet që u krijuan pas shpalljes së rezultateve të zgjedhjeve, jo spaska të bëj fare, lol.

Të përshëndes.

[TOMY_X]

mua me ngrive gjakun kujtova qe ndonje shqipetar ,shkova menjehere te verifikoj lajmin...

[RaPSouL]

mua me ngrive gjakun kujtova qe ndonje shqipetar ,shkova menjehere te verifikoj lajmin...

Jo i nderuari Tomy, ishte një maqedonas por koha dhe mënyra se si u vra e bëri lajmin të publikohet dhe të postohet tek kjo temë. Tu bëhet e qartë njëher e përgjithmon shqiptarëve tanë se Gruevski nuk mbyll syt për shkaun vllaun e vet, e le më për shqiptarët.

[RaPSouL]

PDSH plane për formimin e frontit opozitar


Partia Demokratike Shqiptare (PDSH) pas këtyre zgjedhjeve pritet të veprojë si parti opozitare dhe të formojë një pakt me partitë më të vogla për një front të fuqishëm opozitar.
Lajmi bëhet i ditur nga koluare brenda PDSH-së, të cilët pohojnë se në plan të parë, parashikohet krijimi i një fronti opozitar i cili brenda radhëve të tij do të përfshinte edhe parti të tjera opozitare. PDSH pritet të jetë një opozitë e fortë brenda Parlamentit.
Zyrtarë të lartë të PDSH-së nuk kanë dashur të flasin lidhur me idenë e frontit të tillë politik opozitar, ndërsa kategorikisht mohojnë mundësinë e përfshirjes së kësaj partie në ndonjërën prej kombinatorikave për formimin e koalicionit qeveritar. “Ajo që po dëgjojmë kohëve të fundit është vetëm një tentativë e BDI-së për të krijuar një alibi përpara opinionit dhe simpatizuesve të vet. Sipas gjitha gjasave BDI përsëri do të futet në Qeveri pa marrëveshje të definuar qartaz me VMRO dhe me këtë “alibi” që tentojnë ta krijojnë pregaditen që fajin për dështimet e mëtutjesshme të ia hedhin sërish PDSH-së, ashtu siç bërën mandatin e kaluar. PDSH pa legjitimitet nuk ka interesim për t’u inkuadruar në koalicion qeveritar vetëm sa për sy e faqe”.
Nga PDSH thonë se Platforma dhe koncepti i tyre politik dallon katërcipërisht nga planet dhe projektet që VMRO pregaditet të realizojë me ndihmën e BDI-së.
Ditë më parë në opinion qarkullonin zëra për mundësinë e kyçjes së PDSH-së dhe BDI-së në të njëjtin koalicion qeveritar. Përflitej që BDI me kerkesa dhe kushtëzime do të kërcënojë partnerin e deritanishëm qeveritar VMRO dhe pas përfundimit të afatit të paraparë për formim të Qeverisë, mandati do të kalojë tek partia e dytë fituese në kampin politik maqedonas LSDM, e cila numëron 42 deputetë dhe bashkërisht me partitë shqiptare BDI dhe PDSH do të përbënte maxhorancën e re të mundshme.

Shqipmedia

[RaPSouL]

Skenaret jozyrtare për koalicionime ndërshqiptare


Dy partitë e koalicionit BDI dhe PDSH jozyrtarisht përgënjeshtrojnë zërat për mundësinë e përfshirjes së tyre në një koalicion qeveritar.

Lajmi bëhet i ditur nga taboret partiake të këtyre dy partive, pas zërave të lansuar se Ali Ahmeti dhe Menduh Thaçi mbrëmë kanë zhvilluar një takim të përbashkët me rastin e ceremonisë për shpalljen e nobelistit shqiptar FeriD Murati për Qytetar Nderi të Tetovës.

“Ka qenë vetëm një takim i rastit ku dy liderët kanë qenë të ftuar dhe nuk ka pasur takim që mund të aludohet në ndonjë takim midis dy liderëve”, ka theksuar për agjencinë e lajmeve INA, një burim partiak.

Informacionet jozyrtare brenda partive theksojnë se dy partitë po hartojnë një marrëveshje të përbashkët dhe e cila do të përkrahet edhe nga RDK.

Në BDI theksojnë se nuk ka asgjë konkrete dhe se në mbledhjen e kryesisë së kësaj partie të shtunën në mbrëmje është formuar ekipi negociator për udhëheqjen e negociatave për formimin e koalicionit qeveritar me VMRO-DPMNE. Ekipi negociator do të përbëhet nga Musa Xhaferi, Abdylaqim Ademi, Izet Mexhiti dhe Ermira Mehmeti-Devaja.

BDI ka platformën e saj politike duke synuar disa kërkesa në planin politik dhe në ndarjen e resorëve ministror dhe në nivelet e tjera të pushtetit.

(INA)

[RaPSouL]

DR përfundimisht pa asnjë deputet


Demokracia e Re përfundimisht do të ngelet pa asnjë mandat deputeti, pasi që Gjykata Administrative hodhi poshtë ankesën e kësaj partie.

DR bëri një ankesë pranë kësaj gjykate për anulimin e një vendvotimi në Karadakun e Shkupit, për parregullsi në procesin e votimit më 5 qershor në zonën e dytë zgjedhore.

Por, pas shqyrtimit të kësaj ankese, trupi gjykues e ka vlerësuar si të pabazë, duke shuar shpresat që partia e Imer Selmanit në dorëheqje të përfitojë deputetin e vetëm në Parlamentin e Maqedonisë. Dy ditë më parë edhe KSHZ hodhi poshtë ankesën e DR duke e quajtur si të pabazë. Me këtë rast bartësi i listës së kësaj partie në njësinë e dytë zgjedhore Bastri Bajrami për rreth 40 vota ka humbur mandatin e deputetit.

(INA)

[RaPSouL]

KSHZ i kumtoi rezultatet përfundimtare


Shkup, 14 qershor – Në zgjedhjet e parakohshme parlamentare kanë votuar gjithsej 1.156.449 qytetarë apo 63,48 për qind e personave të regjistruarve në Listën zgjedhore. Këtë e kumtoi të martën Komisioni Shtetëror Zgjedhor.
Sipas KSHZ-së, 1.124.064 fletëvotime janë të vlefshme, 31.985 nuk janë të vlefshme, ndërsa 665.449 janë të papërdorura.
“Në zgjedhjet e mbajtura më 5 qershor, Koalicioni ‘Për Maqedoni më të mirë’ i kryesuar nga VMRO-DPMNE fitoi 438.138 vota apo 38,98 për qind të votave, koalicioni i kryesuar nga LSDM 368.496 apo 32,78 për qind, BDI 115.092 apo 10,24 për qind, PDSH 66.315 apo 5,90 për qind, Të bashkuar për Maqedoninë 17.081 apo 1,52 për qind, PLD 16.551 apo 1,47….”, informoi kryetari i KSHZ-së, Boris Kondarko, në konferencën për shtyp ku u publikuan rezultatet përfundimtare zyrtare nga zgjedhjet e 5 qershorit, pas përfundimit të afateve për ankesa.
KSHZ nesër do ta shqyrtojë raportin përfundimtar për zgjedhjet e mbajtura me çka ato edhe zyrtarisht do të jenë të përfunduara.

Koha

[RaPSouL]

Emrat e mundshëm nga BDI në Qeverinë e re


Edhe pse bisedimet për koalicionin e ri ( të vjetër ) mes VMRO DPMNE dhe BDI zhvillohen në fshehtësi të madhe, portali Shqipmedia mëson se sipas të gjitha gjasave posti i kryeparlamentarit është kërkesa kryesore që ka BDI ndaj VMRO-së dhe sipas gjithë gjasave ajo do të jetë edhe lëshimi më i madh që do i bëjë VMRO-ja Ali Ahmetit. BDI për këtë post do të propozojë Teuta Arifin.
Më interesant është fakti se prej postit të zv/kryeministrit do të largohet Abdilaqim Ademi ndërsa në vend të tij do të vijë ish-kryetari i komunës së Gostivarit Nevzat Bejta i cili tani në parti gëzon simpati të madhe pas fitores që ja morri Rufi Osmanit. Zv/kryeministri i tanishëm Abdilaqim Ademi i është garantuar nga Ali Ahmeti posti i ministrit edhe atë ajo e ministrisë së Transportit dhe Lidhjeve që BDI e kërkon me ngulm në negociatat që zhvillon me VMRO-në. Ish-kryetari i komunës së Tetovës Hazbi Lika përmendet si zv/ministër i Punëve të Brendshmë ku ministër pritet të jetë drejtori aktual i Drejtorisë së të Ardhurave Publike Goran Trajkovski kuadër i VMRO-DPMNE-së ndërsa ministrja e tashme Gordana Jankullovska do të udhëheq me Sekretarijatin për Eurointegrime.
BDI poashtu tenton që të marrë edhe ministrinë e Drejtësisë ndërsa si kandidat potencial përmendet Avokati i Popullit Ixhet Memeti ndërsa Artan Grubi atakon postin e zv/ministrit të Punëve të Jashtme.
Nga ministrat e BDI-së nga mandati i kaluar thuaj se sigurt postet do ti mbajnë ministri aktual i Shëndetsisë Bujar Osmani dhe ai i Punëve Politike dhe Sociale Xhelal Bajrami.
M.B

Shqipmedia

[RaPSouL]

Shkup: Opozita mendon t’i kthejë mandatet


Opozita është duke shqyrtuar mundësinë për bojkotim të mbledhjes konstituive të Parlamentit, e madje edhe kthim të mandateve të fituara, njoftojnë ekskluzivisht për “Lajm” burime nga partitë opozitare. Opozita maqedonase në këto zgjedhje fitoi 42 mandate, mirëpo ende nuk ka vendosur nëse do të marrë pjesë në mbledhjen konstituive të Parlamentit. Shkas për revoltën e tyre është rritja e fundit e tatimit që sipas Drejtorisë për të Hyrat Publike (DHP) duhet ta paguajë televizioni A1, vrasja e të riut Martin Neshkovski nga ana e policit Igor Spasov në festën e VMRO-DPMNE-së më 5 qershor, por edhe arrestimi i kryetarit të partisë “Të Bashkuar për Maqedoninë”, Lube Boshkovski. LSDM bojkotoi disa muaj rresht edhe përbërjen e kaluar parlamentare, pikërisht për shkak të ndërhyrjes policore të pushtetit në televizionin A1. Zyrtarisht përfaqësuesit opozitarë nuk dëshirojnë t’i konfirmojnë këto informacione, mirëpo jozyrtarisht thonë se janë duke e shqyrtuar seriozisht këtë mundësi.
Sipas ligjit, edhe nëse realizohet ky skenar i opozitës, Parlamenti do të mund të konstituohet dhe të funksionojë. Nënkryetari i Komisionit Shtetëror Zgjedhor (KSHZ) Subhi Jakupi thotë se për konstituimin e Parlamentit nevojitet prezenca e 62 deputetëve. “Në rast se opozita i kthen mandatet, atëherë shpallen zgjedhje në çdo njësi zgjedhore për aq mandate sa do të kthehen nga partitë opozitare”, sqaroi Jakupi.
Mirëpo edhe pse mund të funksionojë teknikisht, në rrethana të atilla Parlamenti vështirë se do të mund ta ushtrojë funksionin e vet real. Aq më pak kur pas zgjedhjeve të 5 qershorit, partitë fituese VMRO-DPMNE dhe Bashkimi Demokratik për Integrim (BDI) nuk posedojnë shumicën prej dy të tretave që është e nevojshme për ndryshime kushtetuese dhe miratim të projekteve të rëndësishme ligjore.
Nëse zhvillohen ngjarjet në këtë mënyrë, nuk përjashtohet mundësia që pas gjashtë muajve të formohet qeveri e zgjeruar ose të shkohet në zgjedhje të reja të parakohshme.
Ideator i zgjedhjeve të reja është Lidhja Social Demokrate e Maqedonisë (LSDM) dhe nuk ekzistojnë të dhëna nëse për këtë variant janë zhvilluar koordinime me partitë shqiptare në opozitë.
Burime partiake thonë se LSDM është inkurajuar nga rritja e numrit të deputetëve në zgjedhjet e 5 qershorit dhe se në këtë parti ekziston bindja se në zgjedhje të reja do të arrijnë të mposhtin Gruevskin.
Vazhdon heshtja për negociatat
Edhe të martën ka vazhduar heshtja rreth fillimit të negociatave mes VMRO-DPMNE-së dhe BDI-së. I vetmi informacion që kanë njoftuar taborret partiake është për marrëveshjen “që tani për tani të mos flitet asgjë për mediat”. Në ndërkohë media të afërta me Gruevskin kanë plasuar informacione se në VMRO-DPME i kanë dërguar sinjale edhe PDSH-së për koalicionim të mundshëm në Qeveri, mirëpo në PDSH kanë refuzuar t’i komentojnë këto informata.

Lajm

[RaPSouL]

Mosmarrëveshje për formimin e koalicionit



Mosmarrëveshje dhe rezistencë nga ana e VMRO-DPMNE-së për të mos pranuar kërkesat e BDI-së për formimin e koalicionit qeverisës, bën të ditur agjencia e lajmeve INA.

Kjo është atmosfera e fillimit të negociatave për formimin e koalicionit, ndërsa grupet punuese kanë hasur në dallime të mëdha rreth arritjes së një platforme të përbashkët të plotësuar me kërkesat e BDI-së.

Kërkesat e partisë së Ali Ahmetit janë që nga platforma politike, e deri tek ndarja e resorëve ministror në mënyrë proporcionale.

Grupi negociator i BDI-së ka zhvilluar disa takime me grupin negociator të VMRO-DPMNE. BDI përfaqësohet nga Abdilaqim Ademi, Izet Mexhiti, Musa Xhaferi dhe Ermira Mehmeti, ndërsa VMRO-DPMNE nga Gordana Jankullovska, Sasho Mijallkov, Vladimir Peshevski dhe Nikolla Todorov.

Të dyja palët zyrtarisht asgjë nuk kanë thënë lidhur me rrjedhën e negociatave. Por burime jozyrtare pranë partisë shqiptare theksojnë se Ali Ahmeti kërkon firmosjen e marrëveshjes nga ana e Nikolla Gruevskit, e cila përfshin realizimin dhe përmbushjen e kërkesave të saj brenda 100 ditëve.

“Negociatorët janë takuar në bazë të nevojës, ndonjëherë edhe nga 2-3 herë brenda ditës. Negociatat kanë filluar në kohë për partitë negociuese dhe nuk ka hapësirë që të jemi nën presion”, ka theksuar një nga udhëheqësit e grupit negociator të BDI-së, Musa Xhaferi.

Nga BDI bëjnë të ditur se kërkesat e tyre kanë të bëjnë me zgjidhjen e kontestin e emrit dhe zhbllokimin e proceseve euroatlantike, mbylljen e rasteve të Hagës, zgjidhjen e statusit të UÇK-së, përdorim më të gjërë dhe ridefinim të përdorimit të gjuhës shqipe si gjuhë zyrtare dhe simboleve kombëtare shqiptare, si dhe çështje të afatizuara për realizimin e plotë të Marrëveshjes së Ohrit, 10 vite pas nënshkrimit të saj.

Sa i përket ndarjes së posteve ministrore: BDI kërkon që të ketë njërën nga ministritë më të rëndësishme ndër të cilat: Ministrinë e Brendshme, Ministrinë e Mbrojtjes, Financave, Ministrinë e Drejtësisë, ndërsa ajo pretendon edhe drejtori të rëndësishme. Ndërsa, posti i kryetarit të Parlamentit, për këtë parti është çështje që duhet të realizohet dhe të pranohet nga ana e VMRO-DPMNE. Në lojë janë edhe Drejtoria e Sigurimit Shtetëror si dhe posti i Prokurorit të Përgjithshëm.

(INA)

[RaPSouL]

Bisedimet për koalicion korrekte


"Lidhur me negociatat për formimin e Qeverisë së re ndërmjet BDI-së dhe VMRO-DPMNE-së, dëshirojmë të informojmë opinionin se dialogu po zhvillohet në një atmosferë fer dhe konstruktive", thuhet në një deklaratë për media të Bashkimit Demokratik për Integrim.

Sipas kësaj komunikate, grupet për bisedime janë duke punuar në drejtim të përforcimit të partneritetit dhe besimit të ndërsjellt, si shtylla themelore për funksionimin e mirë të kabinetit të ardhshëm qeveritarë.

Nga kjo parti njoftojnë se, të gjitha informacionet që kanë qarkulluar në media gjatë këtyre ditëve janë spekulime të pabaza dhe BDI, si parti serioze politike, do ta informojë në mënyrë transparente, formale dhe me kohë opinionin dhe elektoratin, lidhur me çdo çështje sa i përket këtij procesi, njofton agjencia e lajmeve INA. Edhe VMRO-DPMNE-ja sot kumtoi se bisedimet për koalicion me Bashkimin Demokratik për Integrim po zhvillohen në atmosferë korrekte dhe konstruktive.

(INA)

[RaPSouL]

Ndërpriten sot bisedimet mes VMRO-së dhe BDI-së ?


Shkup – Edhe pse dje dy partitë fituese në kampin maqedonas VMRO-DPMNE dhe në atë shqiptar BDI nëpërmes komunikatave për shtyp deklaruan se bisedimet për formimin e qeverisë së re po i zhvillojnë në atmosferë korrekte dhe konstruktive, Shqipmedia mëson se sot pasdite bisedimet janë ndërprerë mirëpo deri në këto moment nuk është bërë publike zyrtarisht asgjë as nga VMRO dhe BDI.
Para disa ditësh mediat njoftuan se bisedimet janë para ndërprerjes mirëpo nga BDI i quajtën quajtën spekulime dhe të pabaza.
M.B

Shqipmedia

[RaPSouL]

Pacolli kërkon koordinim mes Ahmetit dhe Thaçit


Zëvendës kryeministri për njohje në Qeverinë e Kosovës Behgjet Pacolli vikendin e kaluar ka qëndruar në Tetovë ku ka realizuar takime të veçanta me kryetarin e Bashkimit Demokratik për Integrim (BDI) Ali Ahmeti dhe kryetarin e Partisë Demokratike Shqiptare (PDSH) Menduh Thaçi.
Burime partiake kanë njoftuar për “Lajm” se qëllimi i vizitës së Pacollit ka qenë afrimi i pozicioneve të dy partive më të mëdha shqiptare dhe në prag të formimit të koalicionit të ri qeveritar në Maqedoni dhe koordinim mes tyre për çështje të rëndësishme që tangojnë shqiptarët.
Pacolli në këto takime ka theksuar interesin e shtetit kosovar që gjatë formimit të qeverisë së re shqiptarët të ndikojnë për përshpejtim të procesit të integrimit të Maqedonisë në NATO dhe Bashkimin Evropian, si proces i cili është në favor të gjithë shqiptarëve të rajonit. Ai ka uruar liderët e partive shqiptare për fushatën e qetë dhe demokratike parazgjedhore, që ka ndikuar shumë në përmirësimin e imazhit para faktorit ndërkombëtarë.
Jozyrtarisht zëvendëskryeministri kosovar është interesuar edhe për mundësinë që BDI dhe PDSH bashkë të jenë pjesë e Qeverisë së ardhshme, mirëpo ky informacione nuk është konfirmuar zyrtarisht.
Pacolli në Tetovë është shoqëruar edhe nga ministrja e tregtisë dhe industrisë, Mioza Kusari Lila, andaj supozohet se është biseduar edhe për avancim të raporteve ekonomike mes Maqedonisë dhe Kosovës.
Ambasadori kosovar në Shkup Skënder Durmishi, konfirmoi qëndrimin e Behgjet Pacollit në Shkup.
“Qëndrimi i zotit Pacolli në Maqedoni ka qenë privat. Ne si ambasadë i kemi njoftuar organet kompetente në Maqedoni për këtë vizitë, mirëpo meqë ajo ka qenë private nuk i kam shoqëruar”, deklaroi Durmishi për “Lajm”
Pacolli është një nga bashkëpunëtorët më të afërt të kryeministrit kosovar Hashim Thaçi, mirëpo nuk dihet nëse në emër të tij ka sjellë edhe mesazhe tjera për Ali Ahmetin dhe Menduh Thaçin.
Qëndrimi i tij është dëshmi se Tirana dhe Prishtina me vëmendje po i përcjellin zhvillimet paszgjedhore në Maqedoni. Në opinion kanë qarkulluar informata të shumta edhe për gjoja vizita që Ahmeti dhe Thaçi kanë realizuar në Tiranë pas 5 qershorit, mirëpo këto informata nuk janë konfirmuar nga taborret partiake.
Tirana dhe Prishtina gjatë kohë tentojnë të ulin tensionet mes BDI-së dhe PDSH-së. Kjo u arrit në fillim të fushatës parazgjedhore, kur me iniciativë të ambasadorit shqiptar Arben Çejku, Ahmeti dhe Thaçi nënshkruan një marrëveshje për fushatë fer dhe demokratike, e cila u respektua në përpikmëri nga të dy partitë.

Lajm

[RaPSouL]

Fuqia e opozitës pas zgjedhjeve


Partia më e madhe e opozitës, Lidhja Socialdemokrate, pavarësisht disfatës në zgjedhje, i ka dhënë mbështetje liderit të partisë, Branko Cërvenkovski, jo vetëm në drejtimin e mëtejmë të kësaj partie, por në gjithë frontin opozitar.
Zyrtari i lartë i LSDM-së, Jani Makraduli, tha se Cërvenkovski kishte ofruar dorëheqjen, por në mbledhjen e mbrëmshme të Këshillit Qendror ajo është refuzuar unanimisht, pasi LSDM-ja, rezultatin zgjedhor, e vlerëson si arritjen më të madhe në disa vitet e fundit.
“Konstatimi është i përgjithshëm se kryetari Branko Cërvenkovski duhet të drejtojë jo vetëm LSDM-në, por gjithë frontin opozitar në luftën kundër kësaj qeverie jo popullore. Pra, nuk bëhet fjalë për kurrfarë dorëheqje, pasi LSDM-ja e vlerëson rezultatin zgjedhor. Kemi arritur të marrim 370 mijë vota apo 150 mijë më shumë se në zgjedhjet e kaluara, pra kemi përmirësuar pozitën tonë për 65 për qind”, u shpreh Jani Makraduli.
Por, ndryshe nga ai vlerësoi analisti Vlladimir Bozhinovski. Ai i cili tha se partitë duhet të japin llogari për disfatat në zgjedhje sikur edhe të ketë përmirësim të rezultatit nga zgjedhjet e kaluara.
Bozhinovski tha se mbetja e Cërvenkovskit në krye të LSDM-së më së shumti do t’i konvenonte VMRO-DPMNE-së.
“Është e qartë se duhet të bëhen ndryshime rrënjësore nëse dëshirojnë që në zgjedhjet e ardhme të fitojnë VMRO-DPMNE-në. Nëse nuk bëhen këto reforma, apo nëse nuk reformohet partia, do ta kenë shumë të vështirë të dalin fitues. Gabimi në këto zgjedhje u bë për faktin se kandidatja për kryeministre Radmilla Shekerinska u caktua vetëm një muaj para zgjedhjeve. Kandidaturat e këtilla duhet të bëhen shumë më herët, pra, edhe kryetari i ri i partisë duhet qysh tani të zgjidhet, nëse mendojnë të bëjnë ndryshime. Kështu, ai do të kishte kohë të mjaftueshme që të përgatitej dhe të tërheqë elektoratin dhe testin e parë do ta kishte në zgjedhjet lokale që pritet të mbahen për dy vjet”, u shpreh Bozhinovski.
Ndërkohë, sa i përket opozitës shqiptare nga Partia Demokratike Shqiptare nuk komentuan, ndërsa lideri i saj, Menduh Thaçi, rezultatin e partisë së tij e kishte vlerësuar të mirë, pavarësisht, siç kishte deklaruar, tentimit të pushtetit për ta dëmtuar atë përmes partive të vogla opozitare shqiptare.
PDSH-ja n zgjedhjet e 5 qershorit fitoi 8 mandate të deputetëve apo rreth 80 mijë vota, shifër kjo që është më e lartë se në zgjedhjet e kaluara.
Duke komentuar pozicionin e PDSH-së, analisti Xhelal Neziri theksoi:
“Kjo parti ka afër 30 mijë vota më shumë dhe mendoj se kërcim në vota apo ky rezultat i shënuar në krahasim me zgjedhjet e kaluara, i jep një kartë të fuqishme, një letër të fuqishme liderëve të partive që të arsyetohen se janë në rrugë të mirë për të arritur një fitore të sigurt në zgjedhjet e ardhshme parlamentare”.
Sa u përket partive tjera opozitare, Rilindja Demokratike Kombëtare siguroi dy mandate, ndërsa Demokracia e Re asnjë. Lideri i kësaj të fundit Imer Selmani, dha dorëheqje nga drejtimi i partisë, ndërsa Rufi Osmani tha se rezultati zgjedhor i dedikohet kohës së pamjaftueshme për t’u përgatitur për zgjedhje.
“Ky është një leksion, të cilin do të duhet ta mësojnë të gjitha partitë politike shqiptare, e në veçanti ato më të voglat dhe ta analizojnë realisht pozicionin dhe forcën e tyre në politikë. Në të kundërtën, do të vazhdojnë që ta copëtojnë elektoratin shqiptar dhe ta zvogëlojnë numrin e deputetëve shqiptarë në Kuvendin e Maqedonisë ”, tha Neziri.

Rel

[RaPSouL]

Gruevski: Katër premtimet që në mbledhjen e parë


Lideri i VMRO-DPMNE, Nikolla Gruevski deklaroi se katër premtimet e bëra gjatë fushatës zgjedhore do të realizohen që në mbledhjen e parë të kabinetit të ri qeveritar.

Heqja e Tatimit për kompanitë me të ardhura vjetore deri në 3 milion denarë, zvogëlimi i TVSH-së për turizëm dhe vajit të papërpunuar ushqimor, ulja e çmimit të Kartonit të Gjelbërt për veturat si dhe participim deri në 200 euro për të gjithë shtetasit që do të mjekohen jashtë vendit, do të jenë katër vendimet e para qeveritare, të cilat do të miratohen që në mbledhjen e parë të Qeverisë së re.

Këto paralajmërime u bënë nga Gruevski, i cili mbrëmë foli para përkrahësve të partisë së tij me rastin e shënimit të 21 vjetorit të themelimit të saj.

Gruevski paralajmëroi për negociatat për formimin e Qeverisë, mirëpo duke mos dhënë detaje mbi to, ndërsa burime pranë kësaj partie thanë se negociatat janë drejt finalizimit për formimin e koalicionit të ri qeveritar.

(INA)