21 janari, Apeli liron 3 gardistët: S'ka prova të mjaftueshme
TIRANE- Gjykata e Apelit urdhëroi sot paradite lirimin nga qelia të 3 gardistëve Gazmend Ahmetaj, dhe Sadik Çela dhe Mark Nikolli Nënoficerët ishin nën masën e arrestit burg me 30 ditë pasi dyshoheshin se kanë gisht në vrasjen e 4 civilëve në demonstratën e dhunshme të 21 janarit në bulevardin "Dëshmorët e Kombit".
Gardisti Ahmetaj së bashku me kolegët e tij Sadik Çela dhe Mark Nikolli nuk pranuan akuzat dhe i kërkuan Gjykatës së Apelit shfuqizimin e vendimit të gjykatës së shkallës së parë të Tiranës për masën e sigurisë arrest me burg 30 ditë.
Rreth orës 09: 50 minuta Gjykata e Apelit nisi shqyrtimin një nga një të dosjeve të gardistëve . Sipas NEWS24, në seancë Prokuroria kërkoi kohë për të bërë ekspertizën. Trupi gjykues i Gjykatës së Apelit pasi dëgjoi pretendimet e prokurorit të cështjes dhe avokatëve mbrojtës vendosi lirimin e gardistëve Ahmetaj pasi sipas gjykatës "ishin të pabazuara në ligj provat dhe faktet në të cilat mbështeste dyshimet prokuroria."
Ndërkohë “Gazeta Shqiptare” publikoi sot vendimin e Gjykatës së Tiranës për vlerësimin e masës së arrestit të gardistit Sadik Çela, ku sipas akt ekspertimit mjeko ligjor Faik Myrtaj nuk ishte qëlluar nga efektivat e gardës. (Detaje të vendimit mund ta lexoni në numrin e sotëm të gazetës)
Tre nënoficerët e njësisë speciale, u arrestuan më 10 shkurt si të dyshuar se kishin qëlluar me armë më 21 janar, ku për pasojë gjetën vdekjen katër demonstrues, Faik Myrtaj, Ziver Veizi, Aleks Nika dhe Hekuran Deda.
I vetmi që gjendet në qelitë e burgut nën masën e sigurisë "arrest me burg" është shefi i shtabit të njësisë speciale, majori Agim Llupo, nën akuzë për vrasje në rrethana cilësuese, në bashkëpunim dhe tejkalim kompetencash. Llupo akuzohet për vrasjen e demonstruesit Ziver Veizi nga Gjirokastra.
(s.g/balkanWeb)
Krijoni Kontakt