Kriza greke

[DYDRINAS]

Kreditim i mëtejshëm vetëm në qoftë se bashkë me borxhin “qethen” dhe pagat e sektorit privat

17-01-2012


Paralelisht me nënshkrimin e marrëveshjes për “qethjen” vullnetare të borxhit, Greqisë i duhet të ndërmarrë masa të reja shtrënguese në sektorin privat që të sigurojë paketën e re të ndihmës prej 130 miliardë eurosh.


Kryeministri grek Llukas Papadhimos foli shkoqur dhe pa hezitimin më të vogël për vendosmërinë e qeverisë së tij: “Më e preferueshme është ekzistenca e bizneseve të hapura, me paga pak më të ulëta, me konsensusin e të dyja palëve, sesa biznese të mbyllura dhe më shumë të papunë”. Edhe këto masa që tingëllojnë realiste, në kushtet e recesionit të thellë ekonomik dhe me rreth 1 milion të papunë, për fat të keq imponohen nga troika për nënshkrimin e marrëveshjes së re të ndihmës kolosale prej 130 miliardë eurosh.

Pa masa strukturore Greqia nuk mund të kreditohet më tej

Gjërat janë shumë të thjeshta: që Greqia të mund të vazhdojë të kreditohet duhet që ekonomia e saj të bëhet më kompetitive, duke ulur vetëkuptohet koston e punës për shërbim dhe produkt. Këtë gjë e di mirë në radhë të parë ministri i Zhvillimit, Kompetivitetit dhe Marinës Tregtare Mihalis Hrisohoidis, i cili njëkohësisht shprehet autokritik që “kjo nuk ishte bërë më parë dhe nga vetë grekët”: “Për fat të keq janë ata që thonë, bëni ndryshime strukturore, modernizoni ekonominë, shtetin, reduktoni kostot, bëhuni më kompetitivë për njësi” thekson ministri, që e pranon se në qoftë se të gjitha këto do të ishin bërë me kohë dhe siç duhet, “nuk do të ishte e nevojshme që të bëheshin shkurtime horizontale pagash dhe pensionesh”.

Një ekonomi konsumi dhe shërbimesh nuk mund të jetë kompetitive

“Të fillojë të prodhojë sërish ekonomia, kjo është baza e kompetivitetit” i thotë DW ekonomisti dhe analisti Dhimitris Kazaqis, që jep një tablo të zymtë të shndërrimit shkatërrimtar të ekonomisë greke në një ekonomi konsumi dhe shërbimesh. Sipas tij, në qoftë se 25 vjet më parë kontributi i industrisë në GDP-në ishte 27-29% sot është 14%, kurse i bujqësisë nga 10% sot është 2%. “Të ashtuquajturat shërbime të llojit parazitar, si spekulimet me paranë, bursa dhe transaksionet e pasurisë së patundshme nga 14% sot kanë arritur afër 60%” thotë Kazaqis, që në frymën e oponencës së tij të njohur ndaj programit të kursimeve i konsideron reduktimet e pagave të sektorit privat një tjetër “fiasko” të kursit të ndjekur.

“E drejta për punë dhe pagë dinjitoze nuk janë komoditet”

Për profesorin e së Drejtës së Punës Aris Kazakos po synohet një “zhvleftësim i brendshëm”, për të cilin nuk mund të thuhet lehtë se bëhet me qëllime spekulative nga të huajt apo parallinjtë vendas për të blerë badihava biznese dhe prona që kriza së shpejti do t'i nxjerrë në ankand. “Preferoj të flas për rezultatet e kësaj politike dhe rezultati është ky, recesion më i thellë dhe varfërim më i madh i shtresave të tëra” thotë Kazakos dhe shton se “e drejta për punë dhe një pagë dinjitoze nuk janë komoditet por të domosdoshme për një jetesë të denjë por edhe për vënien në eficiencë të ekonomisë”.

Një ekonomi nuk bëhet kompetitive me paga Indie dhe Sudani

Terreni ofrohet për oponencë të ashpër nga e majta që thekson se kompetiviteti presupozon 100 faktorë të tjerë si teknologjia apo mungesa e korrupsionit dhe burokracisë që i kanë vendet e zhhvilluara si Gjermania dhe aspak paga të ulëta që i ka India apo Sudani. “Në qoftë se zoti kryeministër doni të na bëni Indi ose Sudan, atëherë nuk është e nevojshme të bëhet me ndihmën e fuqive të huaja, mund ta bëjmë edhe vetë” theksoi kreu i partisë së majtë SIRIZA Aleksis Cipras. Vetë partnerët qeveritarë të së djathtës dhe nacionalistëve janë deklaruar kundër paketës së paralajmëruar me shfuqizimin e pagës minimale (751 euro), prerjen e dy pagave suplementare dhe “ngrirjen” e çdo shtese deri në vitin 2015. “Nuk do të votojmë asgjë që nuk do të ketë vulën e dialogut social” thotë e djathta e Andonis Samaras.

“Troika” do të thotë fjalën e fundit

Por konsensusi i partnerëve socialë nuk është aspak çështje e lehtë për qeverinë e Papadhimosit, ashtu siç i ndodh edhe me kreditorët privatë që pritet të rifillojnë këto ditë negociatat e ndërprera të PSI për “qethjen” e një pjese të borxhit. Sindikatat flasin për “vija” të kuqe dhe paralajmërojnë qeverinë se e drejta për rregullim ligjor në rast se nuk arrihet konsensusi nuk është zgjidhje. “Të braktiset çdo mendim për rregullim ligjor” paralajmëroi në tone ultimatumi presidenti i Konfederatës së Përgjithshme të Punonjësve të Greqisë Janis Panagopullos, që ndërkohë të mërkurën ulet në tryezën e dialogut të partnerëve socialë me organizatat e punëdhënsve dhe sindikatave. Por qeveria nuk e fsheh se edhe marrëveshje të arrihet është “troika” ajo –të premten mbërrijnë dhe krerët e saj në Athinë- që do të thotë fjalën e fundit se ku dhe si do të bëhen shkurtimet dhe çdo të bëhet me pagën minimale.

Autor: Niko Anagnosti

Redaktoi: Elert Ajazaj

dw

[Shkelqesia_E_Tij]

E cfar krize thoni ju.......... keta ne mars kane kerkuar te blejne 60 avione luftarak nga Gjermania

T'emen o rrufjane te medhenj paskan qene keta greqaret

[DYDRINAS]

Dështojnë bisedimet, Greqia pranë falimentimit

22/01/2012 11:20

Bisedimet midis Greqisë dhe kreditorëve për një kredi të ri madhore kanë dështuar, pasi kryenegociatori u largua të dielën nga Athina pa arritur në një marrëveshje paraprake.

Instituti Ndërkombëtar i Financës, që përfaqëson grupin e huadhënësve, informoi se një skuadër teknike do të mblidhet së shpejti dhe do të punojë për detajet e negociatava, të cilat do të vazhdojnë me telefon.

Më parë, Athina kishte shprehur besimin e saj se një marrëveshje për këstin e ti madhor të huasë mund të arrihej përpara fundit të kësaj jave. Kryeministri Papadhimos ka bërë të qartë se nëse nuk do të marrë ndihmën financiare, vendit nuk i mbetet gjë tjetër përveçse të shpallë falimentimin.

”Pa paketën e shpëtimit prej 130 miliardë eurosh nga BE dhe FMN, është e pamundur që Greqia të paguajë detyrimet e dy muajve të ardhshme”, u shpreh ai.

Instituti Ndërkombëtar i Financës, që përfaqëson kreditorët privatë, mohoi që drejtori i tij i përgjithshëm, Charles Dallara dhe këshilltari i tij, Jean Lemierre, u larguan papritur të shtunën, duke argumentuar se kishin “takime të paanullueshme të fiksuara që më parë”.

Një marrëveshje tashmë duket e pamundur të arrihet përpara mbledhjes së Ministrave të Financave të Eurozonës, javën e ardhshme.

Në muajin nëntor, vendet e BE-së pranuan që t’i akordonin Greqisë një hua të re madhore dhe t’i falnin 50% të borxheve, në këmbim të disa reformave thelbësore. Pamundësia e autoriteteve për të zbatuar të gjitha reformat e kërkuara, ka vendosur në pikëpyetje vazhdimin e mbështetjes së Brukselit për vendin Helen.

top-channel

[DYDRINAS]

Greqia përfundimisht falimenton

Edhe nëse qeveria arrin marrëveshje me rektorin privat për uljen e nivelit të borxhit, Greqia nuk mund të shmangë falimentimin thotë ekspertët.

John Chambers, drejtues i Standard & Poor’s thotë se negociatat me sektorin prijatar mund të shihet si falimentim. Sipas tij në Greqi do të ndodhë një “faliment selektiv”.

Chambers ka bërë këtë deklaratë gjatë diskutimeve të një paneli mbi borxhin evropian. Të tre ekspertët thanë se Greqia nuk do mund të shlyej borxhin dhe falimenti është i pashmangshëm.

“Nuk është e thënë që falimenti i Greqisë të ketë një efekt dominon në eurozonë” nënvizon Chambers.

top-channel


Si thote i nderuar Brari di fjale ne lidhje me krizen greke.

Shqiptare qe jetoni ne Greqi. Parate ne Shqiperi se perndryshe mbetet me gisht ne goje.

Mos t'ju zere muaji mars parate ne bankat greke se pastaj le qe do t'ju zhvleresohen, por edhe nuk do te arrini ti merrni per shume vite!

[alem_de]

Te gjithe shkruaj artikuj gazetash dhe as nje nuk thote qe Greqia duhet te ndryshoje strukturat e shtetit.Me ata struktura qe ka nuk i pershtatet EU.E mbyt Europa me parat qe i jep.

[DYDRINAS]

Makthi i falimentimit nuk i shqitet Greqisë

Marrëveshja e PSI për “qethjen„ e borxhit grek me rreth 100 miliardë euro është çështje kohe. Por kjo nuk shihet me optimizmin e duhur nga vetë grekët


Në Athinë, ku u gjend sërish dhe të premten u takua me kryeministrin Papadhimos dhe ministrin e Financave Venizellos përfaqësuesi i Institutit të borxhit privat "IIF" Charles Dallara, vazhdojnë bisedimet intensive për arritjen e marrëveshjes për “qethjen” e borxhit grek. Marrëveshja e shumëpritur, që do të reduktojë me rreth 100 miliardë euro borxhin aktual prej 375 miliardë eurosh dhe do të hapë rrugën për marrëveshjen e re të kreditimit prej 130 miliardë eurosh, mund të arrihet sikurse tha vetë komisioneri evropian për çështjet ekonomike Olli Rehn “brenda wikendit dhe sidoqoftë brenda janarit dhe jo shkurtit”.

“Qethje” deri 70% por edhe memorandum masash të reja shtrenguese


Por ky lajm i mirë -thuhet se “qethja” mund të arrijë në 70% dhe kamata e obligacioneve të reja do të kufizohet në 3.75% - shoqërohet dhe me një lajm të “keq”: një memorandum masash të reja shtrenguese nga ana e troikës me reduktime pagash dhe pensionesh, tatime të reja të pronave, lirime nga puna në sektorin publik dhe hapjen e profesioneve të mbyllura që në formën e ultimatumit iu dorëzua partive dhe qeverisë për adoptim dhe zbatim. “Do të nënshkruajmë marrëveshjen e kreditimit për të siguruar vijimësinë e financimit që i nevojitet ekonomisë greke apo jo?” ishte pyetja e shtruar nga zëdhënësi i qeverisë Pandelis Kapsis në formën e një dileme të re për forcat politike dhe shoqërinë greke që reagon e shokuar ndaj cunamit të ri të masave.

PSI nuk e bën borxhin të menaxhueshëm

Qeveria shpreson se me “qethjen e shekullit” -do të ulë me 4.5 miliardë euro kuotën e përvitshme të kamatave prej 17 miliardë eurosh- dhe krijimin e tepricave të para primare për këtë vit do të fillojë edhe kthesa në ekonominë e saj në recesion të thellë (aktualisht -7%) për të pestin vit me radhë. Por nuk ndajnë të njejtin optimizëm edhe qytetarët grekë, që të rrënuar nga papunësia dhe taksat e njëpasnjëshme, bëhen gjithnjë e më mosbesues ndaj kursit të ndjekur. “Kurrë dhe asnjë nuk u ka premtuar grekëve se në qoftë e do të merret edhe ky këst, në qoftë se do të nënshkruhet edhe kredia e re, në qoftë se do të kurorëzohet edhe PSI (Private Sector Involvement) borxhi do të mund të bëhet i menaxhueshëm” thotë profesori i së drejtës së punës Aris Kazakos, i cili si shumë oponentë të tjerë të kursit të ndjekur e cilëson edhe marrëveshjen e PSI “katastrofale” për ekonominë greke.

“Vendi ndodhet në falimentim de facto”

Borxhi i ri do të shkojë për shlyerjen e borxhit të mëparshëm dhe jo për rivënien në efiçensë të ekonomisë dhe tek e fundit në kohën që do të ulet me 100 miliardë euro do t'i shtohen 130 miliardë euro të tjera, mendon Kazakos, që e konsideron të paevitueshëm falimentimin. “Në këto momente vendi ndodhet në një falimentim de facto. Falimentimi i kontrolluar, që propagandojnë zonja Merkel dhe zoti Sarkozy, do të ketë të njëjtin rezultat me falimentimin e pakontrolluar, me të vetmin ndryshim se do të jenë varfëruar skajshëm njerëzit e këtij vendi dhe do të ketë dalë në ankand pasuria publike” thotë Kazakos, i cili sheh si zgjidhje pezullimin e pagesave. Nuk ka përgjigje të lehtë sigurisht kur pyetet se çdo të bëhet me pagat dhe pensionet apo me bankat në qoftë se vendit i hiqet papritur “priza” nga kreditorët, pra me menaxhimin e asaj situate që guvernatori i Bankës së Greqisë Provopullos e quan “skëterra e daljes nga euro”. Por si shumë ithtarë të “dëbimit të troikës” sjell shembullin e Argjentinës që 10 vjet pas falimentimit të saj ka 6.5 % ritme zhvillimi dhe 6% papunësi.

“Edhe receta e gabuar edhe kuzhinieri i keq”

Skenarët e falimentimit marrin e japin dhe fiksohen akoma edhe në tituj librash si ai i analistit më në zë të Greqisë Stavros Ligeros të promovuar këto ditë me titullin “Nga kleptokracia tek falimentimi”. Analisti grek, që më se një herë ka theksuar se “për fat të keq edhe falimentim do të ketë edhe i pakontrolluar do të jetë”, shikon përgjegjësi të dyfishtë për kolapsin e ekonomisë greke. “Edhe receta ishte e gabuar edhe kuzhineri i keq” thotë Ligeros, duke fajësuar si troikën po kështu edhe qeverinë që e pavullnetshme, siç është treguar, edhe një herë këto ditë u përball me barazhin e kritikave të partnerëve evropianë për “kalendat greke” në zbatimin e programit.

Analistët: “Rrugë pa kthim drejt varfërimit të popullit”

I njëjti skepticizëm edhe në media, ku vështirë së mund të gjesh një fjalë të mirë për programin e troikës. “Unë besoj se kemi hyrë në një rrugë pa kthim dhe se fundi i saj do të jetë varfërimi i plotë i popullit grek” i thotë DW analisti politik Fotis Papulias, i cili beson se “edhe kurorëzimi i PSI nuk do ta bëjë të menaxhueshëm borxhin grek”. E keqja më e madhe, sipas tij, janë masat që e shoqërojnë dhe kushtëzojnë kreditimin e ri të “që në qoftë se do të zbatohen atëherë dilema shekspiriane të jetosh apo të mos jetosh do të ketë marrë përgjigjen e saj në Greqi, dhe sigurisht do të jetë të mos jetosh”. Por sikurse thuhet, nuk ka situatë pa një të dalë dhe në këtë rast analisti grek tregon kutinë e votimit, zgjidhjen e vetme për demokracitë. “Ose shoqëria greke do të dërgojë disa njerëz në shtëpinë e tyre dhe do të ulet poshtë të shikojë se ç'ekonomi dhe ç'shoqëri do, ose zonja Merkel do të dërgojë komisionerin e saj për të qeverisur Greqinë” përfundoi analisti grek.



Autor: Niko Anagnosti

Redaktoi: Esat Ahmeti

dw

[DYDRINAS]

Evropa | 24.01.2012

"Lista e turpit" - Një hap para në krizën e borxheve greke?

"Lista e turpit" në Greqi

Rreth 15 miliardë euro borxh i kanë shtetit të kapluar nga kriza mëkatarët grekë të taksave. Sipërmarrës të mëdhenj, sportistë dhe këngëtarë ndodhen në listën e publikuar në internet me mbi 4.100 emra.


Që legjenda e muzikës greke, Tolis Voskopoulos do të trajtohej para medieve si një kriminel i rëndomtë, fansat e tij do ta konsideronin si të pamundur para pesë vitesh. E megjithatë kjo ndodhi: këngëtari i këngëve sentimentale, i cili në vitet e shtatëdhjeta theu zemrat e grave më krenare është një nga mëkatarët më prominentë të borxheve në listën që ministri grek i Financave Evangelos Venizelos e publikoi të dielën mbrëma (22.01.) në internet.

"Mëkatarët" e famshëm

Fillimisht ylli i muzikës pop i kishte borxh shtetit grek 5.5 milionë euro. Kur gazeta më e njohur e Athinës "Eleftherotypia" zbuloi në vitin 2010 mashtrimet tatimore të Voskopoulos-it, gruas së tij iu desh të japë dorëheqjen nga posti i zëvendësminisres së Turizmit, ndërsa kryeministri i sapozgjedhur Giorgos Papandreou u ballafaqua me skandalin e parë të madh - për ironi në një kohë kur ai planifikonte t'iu bënte thirrje grekëve për kursime.

Edhe sipërmarrësi dhe ish-pronari i klubit futbollistik të Ligës së parë "PAOK Saloniki", Giorgios Batatoudis mund të shihet si një figurë simbolike e krizës greke. Në fillim të viteve nëntëdhjetë, ai bëri emër si sipërmarrës në sektorin e ndërtimeve. Sipas medias greke ai në atë kohë kishte përfituar nga fondet e BE-së si dhe nga kontaktet e tij të mira me socialistët në pushtet. Brenda pak vitesh ai ishte aktiv në shumë fusha, si sipërmarrës televiziv, spekulant bursash dhe pronar i një kompanie të telekomunikacionit për tu larguar pas ca vitesh përfundimisht nga Greqia. Ai u arrestua në Libi në shtator të vitit 2011, vetëm pas përmbysjes së regjimit të Gaddafit dhe u ekstradua për në Greqi. Ai i ka sot borxh shtetit grek 2,5 milionë euro.

"Lista e turpit" me 4152 emra

Lista e evaduesve të taksave është bërë temë në Greqi: 4152 emra në gjithsej 170 faqe, borxhi total i tyre rreth 15 miliardë euro. Qysh verën e kaluar, ministri i Financave Evangelos Venizelos donte të publikonte këtë "Listë të turpit", siç e quan ai, por kjo gjë i mori më shumë kohë. Avokatët e tij u desh së pari të sqaronin çështjet që kishin të bënin me ruajtjen e të dhënave private, thuhet në qarqet e ministrisë së Financave.

Në mes të nëntorit Venizelos shtoi edhe njëherë presionin: sipërmarrës të famshëm dhe figura të shquara publike u prangosën si mashtrues të taksave dhe të gjithë grekëve të cilët i kishin shtetit borxh më shumë se 150 mijë euro iu dha një ultimatum i qartë: ata ose do të lajmërohen vullnetarisht brenda dhjetë ditëve në zyrën e tatimeve për të shprehur pendimin ose ministria e Financave do të publikojë listën me emrat e tyre.

U tha, u bë. Por tani shumë kush shtron pyetjen nëse kjo është e mjaftueshme për të mbledhur detyrimet tatimore. Përvoja e deritanishme është e hidhur: në dhjetor 2011 e përditshmja e Athinës "Ta Nea" raportonte se nga 17 sipërmarrësit e arrestuar të cilët akuzohen për gjithsej 5.5 milionë euro borxh, janë mbledhur vetëm 50 mijë euro. Për më tepër, ligji grek i taksave është tejet i komplikuar dhe konfuz, shpesh puna e inspektorëve tatimorë has në pengesa për shkak të rregulloreve kontradiktore dhe difektet në ligj. Kështu që edhe nën drejtimin e ministrit Venizelos, ministria greke e Financave do të jetë në gjendje të mbledhë vetëm një pjesë të vogël të miliardave që i takojnë me ligj.



Autorë: Jannis Papadimitriou / Esat Ahmeti

Redaktoi: Mimoza Kelmendi

dw

[DYDRINAS]

Greqinë nuk e beson njeri

01/02/2012 02:35


Pas një samiti që u zhvillua në një klimë të rëndë për Greqinë kryeministri Lukas Papadhimos ka parë se askush nuk e ka dëgjuar dhe besuar raportin e tij, se vendi ka kryer në 2011 gati 80% të reformave që për më se një dekadë Greqia nuk kishte mundur t’i zbatonte.

Athinës i është dhënë një afat prej vetëm 7 ditësh për marrjen e masave të reja shtrënguese në mënyrë që të përfundojë marrëveshja me ekspertët e troikës dhe më pas të procedohet për lëvrimin e ndihmës prej 130 miliard eurosh.

“Bëni mirë punën tuaj dhe deri në fund të javës të keni rezultate”, ka deklaruar kreu i Eurogrupit, Jean Clode Junker.

Papadhimos që konsideron të mbaruar marrëveshjen për shkëmbimin e bonove dhe reduktimin e borxhit grek, do të negociojë vetë me specialistët eBE, FMN dhe BQE, që kërkojnë pushimin e 150 000 nënpunësve shtetërorë deri në 2015, shitjen e shumë pasurive shtetërore me një vlerë prej 35 miliard euro, një sistem modern taksash dhe sigurimesh shoqërore, modifikimin e marrëdhënieve të punësimit dhe liberalizimin e profesioneve.

“Kjo përpjekje nënkupton sakrifica të rëndësishme për popullin grek, të cilat shprehen në tregues të ndryshëm sic janë papunësia e madhe dhe reduktimi i të ardhurave reale”, tha Lukas Papadhimos, Kryeministër i Greqisë.

Kreu i qeverisë greke beson se paketa e masave të reja do të votohet nga parlamenti, sepse ky veprim do të shpëtojë vendin.

Duke parë presionin mbi Athinën dhe pamundësinë e saj për zbatimin e reformave, britanikët këmbëngulin për daljen e "butë" të Greqisë nga zona e euros.

Ashtu sic shkruan sot “The Times” e Londrës, Greqia duhet të përvetësojë monedhën e saj, dhrahminë e re, që do të jetë ekuivalente si me dollarin ashtu edhe me euron. Në këtë mënyrë do të ketë vlerësim pozitiv nga tregjet dhe do t’i mbijetojë krizës, duke ndihmuar edhe vetë vendet e euros.

top-channel

[ilia spiro]

Një eurodeputet krahason projektin gjerman për Greqinë me periudhën naziste




BRUKSEL - Eurodeputeti euroskeptik britanik, Nigel Farage, krijoi një skandal dje në Parlamentin Evropian duke krahasuar projektin gjerman për të vendosur Greqinë nën mbikëqyrjen buxhetore të një komisioneri evropian me një "gauleiter" nazist në Athinë.

"Në fakt, është thjesht një pozicion negociues, por tani askush nuk mund të mohojë se Greqia nuk është gjë tjetër veçse një koloni", deklaroi eurodeputeti Farage.

Mbiemri "Gauleiter", i referohet administratorëve politikë nazistë për ndarjet territoriale të Rajhut nazist, çka shkaktoi menjëherë reagime zemërimi tek deputetët gjermanë.

Kështu që, i zgjedhuri Vert Reinhard Bütikofer akuzoi eurodeputetin Nigel Farage se po përhapte urrejtje në Parlamentin Evropian, urrejtje mes popujve evropianë dhe i kërkoi të kërkonte falje.

Duke refuzuar të kërkonte falje, Nigel Farage justifikoi krahasimin duke argumentuar se gazetat gjermane portretizonin grekët si dembelë dhe të padobishëm dhe italianët si frikacakë dhe në këmbim shtypi i këtyre vendeve krijonte karikatura të figurave të rëndësishme të skenës politike gjermane, të cilët vishen me uniforma naziste.

[Qyfyre]

Kontrolli eshte normale te kete se po kerkojne miliarda dollare borxh. Nuk ti jep njeri qe te besh qef pa patur garanci se ke ne plan ti paguash ato borxhe.