C'fare hane shqiptaret ne kapitalizem

[Brari]

gaz shqiptare

---------

Po hetohet nëse ky ishte rast i vetëm apo veprim i përsëritur. Flasin tregtarët e mishit

Kasapët: "Lopën e ngordhur e gjetëm te Zalli i Kirit"


------------------------------------------------------

SHKODER

Kemi rrjepur lopë të ngordhur dhe kemi dashur ta tregtojmë mishin e saj. Atë e gjetëm rastësisht te Zalli i Kirit". Kështu kanë deklaruar dje para bluve të Shkodrës kasapët Hiqmet Kozmaj dhe Pjerin Huti, të cilët u arrestuan dy ditë më parë në flagrancë, teksa kishin bërë gati 100 kg mish për ta tregtuar në treg.

Ndërkohë burime nga policia e qytetit verior pohojnë se po hetohet për të parë nëse ky ishte rasti i vetëm i tentativës së dy të pandehurve apo një veprim i përsëritur. Dyshimet e qytetarëve shkodranë për cilësinë e mishit të blerë në merkaton e qytetit nuk kanë dalë pa gjë. Falë sinjalizimeve të tyre është bërë e mundur prangosja e dy shtetasve të papërgjegjshëm (kasapë) Kozmaj dhe Huti, të cilët kanë tentuar të tregtojnë mish të bagëtisë së ngordhur. Kësaj here ata janë kapur "mat". Mishi i bërë gati për treg në një sasi të madhe nuk u ka lënë kohë për një alibi të mundshme. Dje të pandehurit kanë pranuar para bluve për "mëkatin" e tyre. Dy kasapët kanë pohuar se lopën e ngordhur e kishin gjetur te Zalli i Kirit. Ndërkohë edhe fshatari (banues në fshatin Bardhaj) që kishte nën pronësi lopën ka deklaruar se e kishte hedhur kafshën në plehra pasi ajo kishte ngordhur. Tashmë policia po heton faktin nëse tregtia e kafshëve të ngordhura është praktikuar edhe më parë. Prej disa kohësh qytetarët shkodranë dyshonin për kasapët e merkatos, pasi nga konsumimi i mishit të blerë aty, jo në pak raste kishin përfunduar në spital. Nga të dhënat e familjarëve në polici rezultojnë disa emra të dyshuarish, për tregtinë e mishit. Momentalisht janë të arrestuar vetëm 40-vjeçari Hiqmet Kozmaj nga fshati Grizhë dhe 22-vjeçari Pjerin Huti nga lagjja "Skëndërbeg" e qytetit të Shkodrës. Fakti që këta dy shtetas u kapën në flagrancë nga policia duke rrjepur dhe bërë gati për tregti mishin e lopës së ngordhur i ka shqetësuar pa masë qytetarët shkodranë, pasi merkatoja ku shisnin kasapët është cilësuar si i vetmi vend i sigurtë për blerjen e mishit të kontrolluar. Duke qenë në rolin e blerësit qëytetarët ndihen të pasigurtë për cilësinë e mishit të tregtuar tashmë jo në rrugë por në merkaton e ngritur nga bashkia. Do të jetë hetimi ai që do të zbardhë nëse ka të tjerë kasapë që kanë tregtuar mish të ngordhur.

----------