Platini ne Tirane per 80-vjetorin e FSHF-se

[shigjeta]

Festimet për 80 vjetorin e Federatës Shqiptare të Futbollit do të sjellin të martën në Tiranë presidentin e UEFA-s dhe një prej futbollistëve më të mëdhenj të të gjitha kohërave, Mishel Platini.
Në vizitën e tij të katërt në tokën shqiptare numri 1 i futbollit europian do të shoqërohet nga 11 presidentë të tjerë Federatash dhe shumë zyrtarë të tjerë të futbollit europian. Francezi ka dy misione në tokën shqiptare: i pari është ai i përshëndetjes së përvjetorit të FSHF-së dhe tjetri, arritja e një akordi me qeverinë shqiptare për ndërtimin e stadiumit të ri në vend. Platini e pati premtuar këtë që në vizitën e tij të fundit në vitin 2008, kur në një bisedë me ish-ministrin e sporteve Ylli Pango, premtoi se do të akordonte një fond të madh nga UEFA pikërisht për ndërtimin e një impianti modern për ndeshjet e kombëtares.
Përsa i përket itinerarit, Platini do të mbërrijë në tokën shqiptare rreth orës 13 të mesditës. Një orë më pas, bashkë me presidentët e tjerë të federatave që do të jenë në Shqipëri, ai do të shkojë në kompleksin “Skënder Halili”, ku do të përurohen fushat e reja stërvitore të Tiranës. Rreth orës 16, kreu i UEFA-s ka parashikuar disa takime me përfaqësues të qeverisë shqiptare, ku në qendër të vëmendjes pritet të jetë çështja e stadiumit kombëtar. Ky i fundit është kthyer në një problem shqetësues edhe për vetë UEFA-n, duke qenë se në ndeshjet ndërkombëtare ekipet e huaja kanë vuajtur deri në mungesën e ujit të ngrohtë në dhomat e zhveshjes, ndërkohë që pamja e “Qemal Stafës” është një shëmti më vete.

Balkanweb

[Bamba]

Bravo Platini, perpiqet qe te ndihmoje kombtaret e vogla edhe pse nuk e votuam me sa mbaj mend kur u zgjodh pres. i Uefa's.

[SKRAPARI]

ne e votuam por ai nuk humbet ndonje gje te madhe pse i fut nje dreke te mire ne shqiperi

[{A_N_G_E_L_69}]

Platini dhe Berisha: Shqipëria, me stadium modern në 100-vjetorin e Pavarësisë!


Me rastin e festimeve të 80-vjetorit të krijimit të FSHF-së, ka mbërritur në Tiranë edhe presidenti i UEFA-s, Mishel Platini, bashkë me disa presidentë federatash të tjera europiane. Kreu I futbollit europian, Platini, ka mbërritur diku afër mesditës në kryeqytetin shqiptar, për ta mbajtur frymën në inagurimin e një fushe stërvitore, në kompleksin sportive “Skënder Halili” të Tiranës. Aty, në prani edhe të kryebashkiakut të kryeqytetit, Edi Rama, presidenti i UEFA-s ka siguruar për mbështetjen e tij dhe të institucionit që drejton karshi futbollit shqiptar. Më pas, Platini është takuar me ministrin e sporteve, Ferdinand Xhaferri, ku janë diskutuar problematika të ndryshme mbi sportin shqiptar dhe futbollin në vecanti. “Stacioni” i radhës i kreut të UEFA-s ka qenë zyra e Kryeministrit Sali Berisha, ku kanë diskutuar për stadiumin e ri, që pritet të ndërtohet aty ku është “Qemal Stafa” ekzistues. Përmes një konference të përbashkët për shtyp, Berisha dhe Platini kanë konfirmuar marrëveshjen e ndërtimit të një stadiumi të tillë, që të plotësojë të gjitha kushtet dhe kriteret për zhvillimin e ndeshjeve të të gjitha llojeve dhe kompeticioneve europiane në të. Sihariqi që ka dhënë Kryeministri Berisha, i pari, ka qenë: “Stadiumi i ri, gati në 100-vjetorin e Pavarësisë!” Më tej, në fjalën e vet, Kryeministri Berisha ka deklaruar: “Së shpejti, kryeqyteti do ketë një stadium të ri, më të bukurin në Ballkan. Ky stadium do të jetë gati për 100-vjetorin e Pavarësisë. Në bashkëpunim me federatën e futbollit do të bëjmë stadiumin shqiptar, një nga stadiumet më të bukur në rajon. Stadiumi do të jetë gati në 100 vjetorin e Pavarësisë. Qeveria do të vërë në përdorim fondet, për ta bërë Tiranën me stadiumin që meriton, më të madhin jo, por më të bukurin po”.
Edhe kreu i UEFA-s e vuri theksin tek nevoja e madhe që ka Shqipëria për ndërtimin e një stadiumi të ri, duke aprovuar vendimin e Kryeministrit Berisha, ndërsa shtoi se “stadiumi aktual nuk i përmbuash kushtet”. Sidoqoftë, kreu i UEFA-s ka nënvizuar se institucioni që ai drejton mund të investojë në një stadium, që do të jetë pronë e FSHF-së, e familjes së futbollit, ndërkohë që nuk merret vesh se cili do të jetë statusi i këtij stadiumi të ri, edhe për faktin se kryeministri Berisha ka deklaruar se stadiumi do të mbetet pronë e shtetit. Format e parashikuara nga legjislacioni shqiptar, ndoshta, si dhënia me koncesion apo dicka e tillë, mund të jetë njëlloj emëruesi i përbashkët mes qeverisë shqiptare, FSHF-së dhe UEFA-s, që investimi të jetë trepalësh, në të mirë të futbollit shqiptar. Më tej, Kryeministri Berisha, ndër të tjera ka shprehur mirënjohje dhe simpati të vecantë për Platininë, duke thënë se, “doja futbollin, por më shumë doja Platininë”.
Gjatë konferencës për shtyp në Kryeministri, Mishel Platini u pyet nga gazetarët edhe për djegien e flamurit shqiptar gjatë ndeshjes Itali-Serbi në stadiumin e Xhenovas, por sipas tij, UEFA nuk mund të përgjigjet për këtë problem, para se Komisioni i Disiplinës, një organ krejtësisht i pavarur, të vendosë. Por, Platini e tha me plot gojën se: “Ajo që ndodhi në Xhenova nuk ka lidhje me futbollin!”