Kushtetuesja: Presidenti Sejdiu ka shkelur kushtetuten me mbajtjen e dy posteve

[MafiaWarz]

E ke shkelë rëndë





Gjykata Kushtetuese e ka konstatuar si “shkelje të rëndë” të Kushtetutës mbajtjen e dy posteve nga Presidenti Fatmir Sejdiu dhe tashmë e ka mbyllur këtë rast. Burime diplomatike kanë pohuar për Express se gjykatësit kanë votuar për këtë vendim në mbrëmjen e së mërkurës. Rezultati është 7 “për”, 2 “kundër”. Sipas Kushtetutës së Republikës së Kosovës, për “shkelje të rënda” shkarkohet Presidenti. Vendi pritet të shkojë drejt krizës.

Nga Leonard Kerquki më 24.09.2010 në ora 8:41 /express/
Gjykata Kushtetuese ka mbyllur tregimin për Fatmir Sejdiu të mërkurën vonë, kur nëntë gjyqtarët u përgjigjën në pyetjen e madhe nëse Presidenti po e shkel Kushtetutën e Republikës duke mos dhënë dorëheqje nga posti i Kryetarit të LDK’së.

Gjykata ende nuk e ka bërë publik vendimin, por Gazeta Express përmes burimeve të saj nga vendet e Quinti’it i ka mësuar të gjitha detajet e mbledhjes së Panelit të Gjyqtarëve, ku u vendos për Rastin e Presidentit.

Nga nëntë gjyqtarët sa ka kjo Gjykatë, shtatë kanë thënë Po - Presidenti po e shkel Kushtetutën, derisa dy prej tyre kanë votuan kundër.

“Paneli i gjyqtarëve ka votuar mbrëmë. Shumica e gjyqtarëve janë të mendimit se Presidenti e ka shkelur rëndë Kushtetutën”, ka thënë për Express një diplomat perëndimor i akredituar në Prishtinë.

Ky votim mbyll Rastin e Presidentit.

Tash, Gjykata Kushtetuese brenda një jave duhet të përgatisë raportin përmes të cilit i njofton palët dhe opinionin për vendimin e marrë.

Javë më parë, deputeti i pavarur Naim Rrustemi mori iniciativën e mbledhjes së nënshkrimeve të deputetëve për ta çuar në Gjykatën Kushtetuese Presidentin e Republikës. Ai arriti t’i mblidhte mbi 30 nënshkrime të deputetëve, të cilët kërkonin nga ky institucion që të deklarohet nëse Presidenti i Republikës po e shkel Kushtetutën duke mos dhënë dorëheqje nga posti i Kryetarit të LDK’së.

Pavarësisht se disa nga nënshkruesit e kërkesës së deponuar nga deputeti Rrustemi kanë tërhequr nënshkrimet, Gjykata ka pasur bazë ligjore të procedojë rastin deri në fund.

Burime të Express thonë se vendimi i Gjykatës Kushtetuese është marrë pasi që janë gjetur shumë fakte që dëshmojnë se Presidenti, megjithëse ka thënë se nuk po e ushtron funksionin e Kryetarit të LDK’së, në fakt e ka ushtruar këtë funksion kohë pas kohe.

Ish-Presidenti Ibrahim Rugova kishte dhënë dorëheqje nga posti i Kryetarit të LDK’së pikërisht për shkak se binte ndesh me Kornizën Kushtetuese. E, Korniza Kushtetuese dhe Kushtetuta e Kosovës kanë të njëjtin formulim kur flasin për Presidentin.

Dy vjet e gjysmë më parë, kur u zgjodh President pas hyrjes në fuqi të Kushtetutës së Kosovës, Fatmir Sejdiu refuzoi të jepte dorëheqje nga posti i Kryetarit të LDK’së duke shpikur formulën e “ngrirjes së funksionit”.

Megjithëkëtë, gjatë kësaj kohe ai është “shkrirë” disa herë.

Ai ka marrë vazhdimisht vendime në emër të LDK’së dhe për LDK’në.

Ka emëruar ministra dhe shkarkuar ministra.

Ka shkarkuar CEO’në e LDK’së, Blerim Kuçin.

Ka negociuar me Kryeministrin Thaçi për riformatimin e Qeverisë.

Ka negociuar me deputetë të LDD’së dhe AKR’së për kalimin e tyre në Grupin Parlamentar të LDK’së.

Ka negociuar me Teuta Sahaçiun për shkrirjen e Partisë Reformiste Ora në LDK.

Mbi të gjitha, emri i tij ende figuron si Kryetar i LDK’së në dokumentet e kësaj partie të dorëzuar në KQZ.

Të gjitha këto duket se kanë qenë disa nga faktet që i kanë shtyrë shtatë gjykatësit kushtetues të vijnë në përfundim se i pari i shtetit ka bërë shkelje të rëndë të ligjit themelor të Republikës së Kosovës.

Diplomati perëndimor, që foli për Express, ka thënë se vendimi i Gjykatës pritet të publikohet deri kah mesi i javës së ardhshme, derisa ka parashikuar se vendi “domosdo do të futet në krizë të thellë”.

“Askush nuk mund të jetë indiferent tash nga fakti se Gjykata Kushtetuese po thotë se Presidenti e ka shkelur rëndë Kushtetutën”, ka burimi i gazetës.

Normalisht, pas shpalljes së vendimit të Gjykatës, në Kuvendin e Kosovës duhet të nisin procedurat e shkarkimit të Presidentit Sejdiu. Sipas Kushtetutës, 2/3 ose minimum 80 deputetë të Kuvendit të Kosovës duhet të votojnë për shkarkimin e Presidentit.

[baaroar]

Robert Carolan, “Lee Harvey Oswald” i Gjykatës Kushtetuese të Kosovës Gazeta Sot
E Enjte, 30 Shtator 2010
Nga Kastriot MYFTARAJ

Gjëja më interesante në vendimin e Gjykatës Kushtetuese të Kosovës ndaj Fatmir Sejdiut se ky, duke mbajtur postin e Presidentit dhe kryetarit të LDK, kishte bërë shkelje të rëndë të Kushtetutës, është qëndrimi i gjyqtarëve ndërkombëtarë të kësaj gjykate.

Se në Gjykatën Kushtetuese të shtetit “të pavarur” të Kosovës, nga nëntë anëtarë, tre janë të huaj, jo qytetarë të Kosovës, të emëruar nga Pieter Feith, Përfaqësuesi Civil Ndërkombëtar. Feith, nga ana e vet, ironikisht është “double hatted”, pra një zyrtar i dyfishtë, gjë që iu zu për të madhe Fatmir Sejdiut.
Gjykata Kushtetuese e Kosovës, edhe pse në letër është unike, në realitet është një gjykatë e përbërë nga dy dhoma. Nga “Dhoma e Lartë”, në të cilën bëjnë pjesë tre gjyqtarët ndërkombëtarë, amerikani Robert Carolan, portugezi Almiro Rodrigues, bullgarja Snezhana Botusharova. Nga “Dhoma e Ulët”, ku bëjnë pjesë gjashtë gjyqtarët vendas, nga të cilët katër shqiptarë, një serb i Kosovës dhe një turk i Kosovës. Mjafton të shikosh se kush u caktua gjyqtar raportues për këtë çështje gjyqësore shumë delikate, dhe e kupton se kush është kryetari i vërtetë i Gjykatës Kushtetuese të Kosovës, dhe kush bëri puppet-master në këtë çështje, duke i luajtur si puppet-on-a string gjyqtarët që votuan pro kërkesës, pra se Fatmir Sejdiu kishte bërë shkelje të rëndë kushtetuese. Gjyqtar raportues u caktua amerikani Robert Carolan. Caktimi i gjyqtarit amerikan si gjyqtar raportues e ka kompromentuar që në fillim gjykimin.
Se nuk mund të mohohet që, nga mënyra e raportimit kuptohet dhe opinioni i raportuesit, sidomos mes juristësh. Dhe të gjithë anëtarët vendas të gjykatës qenë shumë të përqëndruar për të kuptuar se cili qe opinioni i amerikanit. Të katër gjyqtarët shqiptarë dhe ai turk do të votonin sipas opinionit të kolegut amerikan. Kështu që çështja praktikisht ishte e mbyllur që me raportimin e gjyqtarit Carolan. Gjyqtari serb, në çdo rast do të votonte pro pranimit të kërkesës, se për serbët janë të mirëpritura zhvillime të tilla në Kosovë. Kështu që mund të thuhet se, që me caktimin e gjyqtarit amerikan si raportues, u deklaruan praktikisht shtatë vota për pranimin e kërkesës, ashtu që u deklarua se Fatmir Sejdiu kishte bërë shkelje të rëndë të Kushtetutës.
Nëse Robert Carolan do të kishte minimumin e deontologjisë profesionale, ai nuk duhet të kishte pranuar që të ishte gjyqtar raportues në këtë çështje, madje asnjë nga gjyqtarët ndërkombëtarë nuk duhet ta kishte pranuar këtë detyrë. Fakti se Robert Carolan ishte i vetmi nga tre gjyqtarët ndërkombëtarë i cili votoi pro pranimit të kërkesës, pra se Fatmir Sejdiu kishte bërë shkelje të rëndë të Kushtetutës, e kompromenton përfundimisht gjyqtarin amerikan dhe provon se Carolan ka vepruar në keqbesim kur e ka marrë rolin e gjyqtarit raportues në këtë çështje. Dy gjyqtarët e tjerë ndërkombëtarë votuan kundër pranimit të kërkesës, duke qenë të vetmit nga nëntë anëtarët e Gjykatës që votuan kundër pranimit të kërkesës. Është shumë domethënës fakti se kundër pranimit të kërkesës votoi gjyqtarja bullgare Snezhana Botusharova, e cila është e vetmja nga tre gjyqtarët ndërkombëtarë që është specialiste e së drejtës kushtetuese.
Të tre gjyqtarët ndërkombëtarë të emëruar në Gjykatën Kushtetuese të Kosovës supozohet që të ofrojnë ekspertizë të nivelit të lartë sa i përket së drejtës kushtetuese, gjë që nuk e ka asnjëri prej tyre me përjashtim deri në njëfarë shkalle të bullgares Botusharova. Gjyqtari amerikan Carolan nuk ka asnjë lloj eksperience në jurisprudencën gjyqësore kushtetuese se në vendin e vet ai më tepër ka punuar si prokuror publik në shtetin Minesota dhe pak kohë si gjyqtar në shtetin Dakota. Në SHBA atributet e Gjykatës Kushtetuese i ka Gjykata e Lartë, kështu që do të kishte qenë më e përshtatshme që në Gjykatën Kushtetuese të Kosovës të ishte emëruar një jurist amerikan i cili të kishte punuar pranë Gjykatës së Lartë, nga të shumtët që punojnë në zyrat e saj për çështjet që kanë të bëjnë me gjykimet kushtetuese. Duke mos pasur asnjë eksperiencë në gjykimet kushtetuese, gjyqtari Carolan nuk duket të ketë kuptuar se vesi kryesor i gjyqtarëve të gjykatave kushtetuese në botë, duke përfshirë edhe SHBA, është ai i legjislatimit ilegal, do të thotë se ata në vendimet e tyre, në vend që të interpretojnë ligjin kushtetues, praktikisht marrin përsipër që ta shkruajnë atë ashtu siç duhej të ishte në fantazinë e tyre.
Në periudha të caktuara edhe Gjykata e Lartë e SHBA-ve nuk i ka shpëtuar kësaj joshjeje. Është e njohur lufta e Gjykatës së Lartë kundër Presidentit Roosevelt në vitet tridhjetë të shekullit të kaluar, kur Gjykata e Lartë e SHBA, me një papërgjegjshmëri totale, deklaroi si antikushtetuese një pjesë të madhe të akteve presidenciale dhe ligjeve që përbënin New Deal, agjendën e Presidentit Roosevelt për nxjerrjen e Amerikës nga kriza më e rëndë në historinë e saj.
Vendimi në fjalë i Gjykatës Kushtetuese të Kosovës është simptomë e qartë se anëtarët e kësaj gjykatë janë të infektuar keq nga ky virus juridik që është legjislatimi ilegal, do të thotë rishkrimi i ligjeve me anë të vendimeve gjyqësore, duke e rishkruar ligjin kushtetues ashtu siç duhej të ishte në fantazinë e tyre. Kjo paralajmëron se Gjykata Kushtetuese në Kosovë ka për t’ u kthyer virtualisht në një Dhomë të Lartë ilegale të legjislativit të Kosovës, se ka për të funksionuar si një Senat ilegal, duke invaduar sferën e ligjshme të kompetencave të legjislativit dhe të ekzekutivit.
Nëse të shtatë anëtarët e Gjykatës Kushtetuese të Kosovës që votuan pro pranimit të kërkesës do të kishin minimumin e përgjegjshmërisë për detyrën e tyre, ata do t’ i kishin sugjeruar Kuvendit të Kosovës që ta saktësonte nenin kushtetues mbi të cilin bazohej pretendimi se Presidenti kishte bërë shkelje të rëndë të Kushtetutës. Se neni është evaziv, çka kuptohet edhe nga fakti se Gjykatës Kushtetuese i është dashur që të bëjë një arsyetim të gjatë për të justifikuar pranimin e kërkesës. Por parimi minimal i së drejtës kushtetuese është se Kushtetuta duhet të jetë një tekst i përpiluar në terma të qarta, se supozohet që të kuptohet nga të gjithë qytetarët e vendit përkatës. Nëse Kushtetuta është një tekst ezoterik, i cili paska nevojë për kaq arsyetime të sofistikuara të jurisprudencës së lartë, për t’ u interpretuar, atëherë i gjithë procesi i arsyetimit juridik shndërrohet paradoksalisht në një argument të fortë se problemi është tek neni kushtetues dhe jo tek Fatmir Sejdiu, apo cilido person tjetër. Në aktgjykimin e Gjykatës Kushtetuese për këtë rast thuhet “Në rastin e Presidentit Sejdiu është e nevojshme të shohim situatën faktike”.
Por cilido jurist që ka minimumin e respektit për veten dhe ruhet që të mos bëjë kllounin juridik, do ta kuptonte se situata faktike në këtë rast është se Gjykata i kishte hyrë një ndërmarrjeje juridike të llojit boomerang, duke dashur që të vërtetojë se ishte bërë një shkelje e rëndë e një neni kushtetues, në një kohë që vetë arsyetimi i ndërlikuar i Gjykatës provon se neni ishte evaziv.
Por nëse ndiqet postulati i shpallur nga shtatëshja e gjyqtarëve në këtë gjykim, ashtu që të shihet situata faktike, atëherë një aspekt i faktualitetit të situatës gjyqësore është se të shtatë gjyqtarët që kanë përbërë shumicën në gjykim, në arsyetimin e vendimit kanë hyrë thellë në zhvillimet e brendshme në LDK, dhe kanë analizuar gjerësisht profilin politik të kësaj partie, çka përbën një shkelje të rëndë të Kushtetutës. E gjithë analiza e tyre për LDK në aktgjykim tradhton misionin e tyre si komando të hedhur në një mision për shpërbërjen e LDK. Ky mision i subversionit politik nuk mund të kamuflohet pas “gjethes së fikut” se ata duhet të bënin analizën e veprimtarisë politike të Presidentit Sejdiu dhe të raportit të LDK me Presidentin, për të verifikuar nëse Presidenti e kishte ushtruar ose jo detyrën e kryetarit të partisë dhe nëse kjo e fundit kishte përfituar prej qënies së tij President.
Derisa neni kushtetues ishte formuluar në mënyrë të tillë që nuk ndalonte mbajtjen e çdo posti tjetër publik veç atij të Presidentit, por vetëm ushtrimin e çdo posti tjetër, Gjykata Kushtetuese duhet ta kuptonte se, nga pikëpamja e gjyqtarit të përgjegjshëm, anëtarët e saj nuk mund ta anashkalonin dilemën se a duhej që Gjykata Kushtetuese të hynte në analizën e zhvillimeve të brendshme dhe të profilit të një partie politike, për hir të një neni kushtetues evaziv, për të cilin më e arsyeshme do të ishte që të sugjerohej saktësimi prej Kuvendit. Hyrja e Gjykatës në sferën e politikës derivon prej jurisprudencës sovjetike dhe jo prej asaj perëndimore. Në jurisprudencën sovjetike gjykata ishte një armë dhe kështu ka vepruar dhe Gjykata Kushtetuese e Kosovës, duke u bërë armë kundër LDK.
Nëse kqyrim situatën faktike, atëherë një fakt i pamohueshëm është se SHBA, vendi i gjyqtarit Carolan, nuk mund të qe krejt i painteresuar dhe i paprirur që të influenconte në këtë gjykim kaq delikat ku ishte në lojë posti i Presidentit të Kosovës, por edhe fati i partisë më të madhe në Kosovë 20 vitet e fundit. Nuk është se gjyqtari Carolan ka vendosur me mendjen e vet se Presidenti Sejdiu kishte bërë shkelje të rëndë të Kushtetutës. Është e vërtetë se gjyqtari Carolan ishte i prirur për të ushtruar veset e jurisprudencës kushtetuese të vendit të vet, por dikush e lejoi që ta bënte këtë gjë, madje e inkurajoi. Edhe gjyqtari Carolan ishte një puppet-on-a-string në një rrafsh më të lartë dhe komandohej nga një puppet master në Washington.
Nuk është një gjë e panjohur se, megjithëse SHBA-të kanë qenë vendi që e bëri kauzë të vetën çlirimin e Kosovës dhe pavarësimin e saj, në SHBA-të ka ekzistuar gjithëherë një linjë e fuqishme kundër shqiptarëve të Kosovës. Kjo linjë ka qenë e sponsoruar nga shumë kahje, për interesa të ndryshme. Kur kjo linjë e kuptoi se çlirimi dhe pavarësimi i Kosovës qenë bërë pjesë e agjendës së politikës zyrtare amerikane, ajo e ndryshoi taktikën, duke kërkuar të arrinte atë çka dukej e mundshme. Është shumë domethënëse se linja kundër shqiptarëve të Kosovës në Washington, në 20 vitet e fundit ka shënjestruar LDK-në. Në Washington, gjatë këtyre njëzet viteve ka ekzistuar një linjë e fuqishme kundër LDK, e cila ka luftuar Ibrahim Rugovën, ka nxitur Bukoshin kundër Rugovës, ka nxitur lidershipin e UÇK kundër Rugovës dhe LDK. Synimi ka qenë shpërbërja e LDK. Urrejtja kundër LDK vinte për shkak se armiqtë e shqiptarëve të Kosovës në Washington, dhe vetë Serbia, nuk mund ta duronin që partia më e madhe e shqiptarëve të Kosovës të ishte një parti e drejtuar nga intelektualë me profil perëndimor, njerëz të kultivuar.
Kjo vinte në kundërshtim me paradigmën që kërkohej të induktohej në perceptimin e perëndimorëve se shqiptarët e Kosovës qenë njerëz barbarë, të pagdhendur. Ata që donin dhe duan të shpërbëjnë LDK, duan që imazhi i politikës në Kosovë të jenë Hashimët, Jakupët, Xhavitët, Ramushët e lloji i tyre, “intelektualët” e sakicës, me frajericat e tyre në background. Pastaj ky lloj politikanësh do të nxjerrë ndonjë njeri si Enver Hasani në postin e Presidentit, si shpërblim që ai e bëri gjykatën armë në luftën politike. Se Enver Hasani sytë i ka tek kolltuku i Presidentit të Kosovës, jo tash, por kur t’ i mbarojë mandati si gjyqtar.
E keqja është se “Lee Harvey Oswald” që vrau Presidentin e Kosovës u bë një gjyqtar amerikan. Fjalën “vrau” e shkruaj pa thonjza se, derisa Fatmir Sejdiu dha dorëheqjen, Presidenti i Kosovës praktikisht u asgjësua si institucion, nga një skuadër pushkatimi juridik e përbërë nga shtatë gjyqtarë të gjykatës më të lartë të Kosovës. Derisa u krijua precedenti se kryetari i shtetit mund të shpallet me vendim gjyqësor të paapelueshëm si fajtor për shkelje të rëndë të Kushtetutës, në lidhje me një nen evaziv, atëherë kryetari i shtetit në të ardhmen është në mëshirën e tekave të anëtarëve të Gjykatës Kushtetuese. Këta mund të çohen në mëngjes dhe ta bëjnë si Destan Begu i këngës, e të thonë: “në Presidencë e kom konakun”. Por kjo që ndodhi paralajmëron se Gjykata Kushtetuese e Kosovës, ashtu si Destan begu i këngës, mund t’ i çojë institucionet e Kosovës tek “Abdullah aga”, që t’ ua masë “shtagën”.
Aspekti tjetër i keq i gjyqit në fjalë është se President i Kosovës, i cili i përkiste shumësisë shqiptare që përbën së paku 90% të popullsisë së Kosovës, u shpall fajtor nga një gjykatë e përbërë nga nëntë anëtarë, ku vetëm katër ishin shqiptarë. Kjo ndriçon realitetin e Kosovës ku shqiptarët janë të diskriminuar negativisht ndërsa minorancat janë të diskriminuara pozitivisht. Fati i Presidentit që i përkiste shumicës që përbën së paku 90% të popullsisë së Kosovës u vendos nga një gjykatë, ku kjo shumicë kishte vetëm dy herë më shumë anëtarë se minorancat! Gjyqtari serb dhe ai turk kanë votuar në bllok kundër Presidentit të Kosovës, me sa duket si shprehje e aleancës së re serbo-turke, të ideuar nga Davutoglu.

[Rina_87]

Dalan, me fal jashte teme, dhe nuk e lexova artikullin, por mos je ti Kastriot Myftaraj rastesisht se vetem shkrime te tij po sjell? : p

[baaroar]

Dalan, me fal jashte teme, dhe nuk e lexova artikullin, por mos je ti Kastriot Myftaraj rastesisht se vetem shkrime te tij po sjell? : p

Rina_87, më fal jashtë teme, unë e lexova artikullin, gjithkush mund të sjellë artikuj nga shtypi i ditës, ky nënforum për këtë punë është.

[Rina_87]

ok ok se hajgare bona. Me na fal a?

[Brari]

analiz shum e sakte kjo e kastriot muftarit.

ishte nje atentat i pa bese.. rrezimi i sejdiut..

ne se sejdiu.. e ka krijuar vete kte rrezim..athere bien hamendjet tona..

megjithate te presim..

une mendoj se dyshja sejdi-thaq.. po punonte mire.. per kosoven.. e se prishja e kesaj harmonije e stabiliteti nuk i ben mire kosoves..

te shikojme se si do e trajtojne ambasada amerikane.. revolucionin ed-ruco polpotist.. qe startoj sot ne shqiperi e konkretisht ne mocalin khmer ruzho-envero-zhabo-pleshtoisht me nick "fier".. e pastaj ti lidhim gjerat..



..

[Gogi]

Po pra, keshtu ndodh kur je shume i uritur, bile nuk do ta kishte refuzuar qe ta mbante edhe ndonje pozite tjeter, si psh Profesor ...

[Kënga]

Fitorja e Fatmir Sejdiut

-Derisa Hashim Thaci investoi ne percarjen e LDK-se tani rrezikohet percarja e PDK-se.

-Tani Fatmir Sejdiu e ka rrugen hapur per kryeminister te Kosoves.

Fatmir Sejdiu udhehoqi nje politike te urte e te bute ne kufijte e nenshtrimit saqe krijohej pershtypja se Kosova ka vetem kryeminister, por jo edhe president. Dita kur Fatmir Sejdiu u tregua tamam burre shteti ishte ajo kur ai dha doreheqje nga posti i Presidentit. Kjo ishte dita kur Sejdiu i tha partnerit te koalicionit se nuk shkon me tej, se deri ketu e ka kufirin durimi e toleranca. Ironia ishte se kjo ndodhi pikerisht ne piken ku ai kishte leshuar pe me se shumeti: perberjen e Gjykates Kushtetuese te Kosoves. Nga 4 gjykates nga radhet e komunitetit shqiptar per Gjykaten Kushtetuese te Kosoves, koncensuesi u arrit qe PDK t’i kishte 3 njerez te vet, AAK nje, ndersa LDK asnjerin. Vete formulimi i Kushtetutes qe presidenti nuk guxonte te ushtronte ndonje post tjeter ishte nje formule kompromisi qe Sejdiu e kishte pranuar urte e bute. Ai nuk insistoi qe formulimi i kushtetutes te jete qe presidenti i Kosoves ta kete te drejten e drejtimit te partise sic e ka presidenti i Serbise Boris Tadiq, por nuk deshi t’ishte nje president politikisht i pafuqishem si ai i Shqiperise Bamir Topi i cili ka dhene teresisht doreheqje nga partia. Sipas marreveshjes me partnerin e koalicionit dhe me protektoret e Kosoves ai mbajti te ngrire poziten e kryetarit te partise deri ne momentin kur partneri deshi ta poshteroj edhe me tej duke e turperuar me vendim gjykate kushtetuese. Por kjo ishte gracka ku Sejdiu nuk ra. Vendimi per doreheqje ishte nje shuplake e forte per Hashim Thacin, i cili po investonte ne zvetenimin e LDK-se duke i fryre percarjes se saj. Kthimi i Sejdiut ne LDK tani e bene LDK-ne kercenim serioz per PDK-ne. Ne anen tjeter, marrja e dy funksioneve te para te shtetit nga ana e Jakup Krasniqi i jep atij fuqi politike dhe pozicion te tille ku ai nuk mund t’i lejoje vetit te sakrifikohet per akrobacionet politike te Hashim Thacit. Ne interesin e Jakup Krasniqit eshte qe ai t’i mbaje keto dy funksione sa me gjate qe eshte e mundur, te pakten 6 muaj, aq sa lejon kushtetuta. Ne interesin e Hashim Thacit eshte qe sa me pare te vendose ndonje te propozuar te LDK-se ne menyre qe t’i fryje percarjes ne LDK. Nje variant me pak i mundshem por me shume i lakmueshem per Hashim Thacin do t’ishte berja e Behxhet Pacollit president i Kosoves. Arsyeja eshte se partine e Pacollit, Thaci e ka gerryer nga brenda dhe shumica e degeve te AKR-se jane me lojale ndaj Thacit se sa ndaj Pacollit. Pacolli, ne kete rast, do t’ishte politikisht shume me i pafuqishem se Sejdiu e se cilido kandidat nga radhet e LDK-se, taman ashtu si leverdise Hashim Thacit. Plus qe Pacolli si President mund ta shetiste Thacin ane e kend botes duke e takuar ate me aq mbreter, presidente e kryeministra sa Thaci perndryshe nuk do te mund t’i takonte edhe sikur t’ishte 100 vjet kryeminister. Por, berja e Pacollit President te Kosoves ka nje problem numrash ne Parlament. 33 deputetet e PDK-se e 9 te AKR-se bejne 42. Do te duhen edhe 9 deputetet e Dacit dhe me shume se gjysma e minoriteteve per ta zgjedhur presidentin me rundin e trete me 61 vota. Por, pazari i Dacit nuk mund te jete me poshte se kryetar Parlamenti. Keshtu, per ta arritur kete objektiv politik, Thacit i duhet ta sakrifikoje Jakup Krasniqin. Por a eshte e pritshme qe Jakup Krasniqi te sakrifikohet per te forcuar pushtetin e Hashim Thacit? A eshte e pritshme qe Jakup Krasniqi nga pozita e 01-shit e 02-shit te shtetit te pranoje vullnetarisht te jete bishti i kavallit?Ne anen tjeter, Thacit do t’i duhet fuqi me e madhe politike per bisedimet me Tadiqin. Leshimet qe Thaci pritet t’ia beje Tadiqit do te mund ta zvetenojne rrolin e tij si lider i PDK ashtu qe nje pjese e PDK-se t’i bashkohet Albin Kurtit. Ne shikim te pare duket se Thaci politikisht i eliminoi me radhe te gjithe rivalet e vet: Demacin, Qosjen, Surroin, Dacin, Ramushin dhe se fundit Sejdiun (pa harruar edhe rivalin brenda PDK-se Fatmir Limajn). Nga te gjithe keta, Sejdiu iu nenshtrua me se shumeti Thacit, por me gjase, Sejdiu do te jete ai qe do ta mbijetoje politikisht Thacin.Ajo cfare i duhet tani Sejdiut eshte kurs politik i orientuar qarte ne konsolidimin e LDK-se dhe synimi per vete i postit te kryeministrit ne zgjedhjet qe po e presin Kosoven. Cfaredo kalkulimi tjeter e bene ate ta humbe nga dora fitoren qe tashme e ka ne grusht.

[chino]

E ke shkelë rëndë

Gjykata Kushtetuese e ka konstatuar si “shkelje të rëndë” të Kushtetutës mbajtjen e dy posteve nga Presidenti Fatmir Sejdiu dhe tashmë e ka mbyllur këtë rast. Burime diplomatike kanë pohuar për Express se gjykatësit kanë votuar për këtë vendim në mbrëmjen e së mërkurës. Rezultati është 7 “për”, 2 “kundër”. Sipas Kushtetutës së Republikës së Kosovës, për “shkelje të rënda” shkarkohet Presidenti. Vendi pritet të shkojë drejt krizës.

Eshte obligim qytetar qe kur te flasi Gjykata Kushtetuese te gjithe te veprojne sipas asaj.

Por prape se prape po ia lejoj vetit te vej ne pah nje mossaktesi te vendimit. Behet fjale per nenin i cili thote se Presidenti nuk guxon te ushtroje nje funksion tjeter partiak-politik pergjate presidencise. Mossaktesia qendron ketu: Ish Presidenti Sejdiu ka bere te qarte dhe e dime te gjithe kete gje, se postin e kreut te LDK-se kishte poseduar vetem ne menyre pasive. Keshtu qe shtrohet pyetja, ne eshte ky "posedim pasiv" nje "ushtrim" ne kuptim te nenit kushtetutor. Pa u marre me kete pyetje, ne eshte apo jo, nje gje behet e qarte: Posedimi pasiv i nje posti nuk mund te jete shkelje e rende e nenit ne fjale. Shkelje me e rende se kjo duhet te jete posedimi aktiv i nje posti paralel. Ky do te ishte nje "ushtrim" ne kuptim te nenit. Ndaj me e sakte me duket do ishte sikur te kishte thene Gjykata se paraqet shkelje, por jo nje shkelje te rende. Me kaq ish Presidenti nuk do kishte qene i shtytur te heqe dore nga posti i Presidentit. Sepse Kushtetuta parasheh doreheqje vetem ne rast se Gjykata Kushtetuese deklaron shkelje te rende.

Mendoj se shkenca kosovare e jurisprudences do te vej ne pah kete mossaktesi te Gjykates ne kete vendim.

Besoj se ish Presidenti kete vendim do e kanalizoje ne rrjedha pozitive per vendin. Sic tha biseduesja Kenga me artikullin qe solli, ai tanime ka rruge tjera te hapura. Edhe nese nuk eshte ne dispozicion posti i kryeministrit, do te jete ndonje post tjeter, nga i cili ai kontribon ne vazhdimesi ne te miren e vendit, cfare personalisht do e deshiroja shume. Sejdiu per situaten ku ndodhemi per mua eshte saktesisht personi qe na nevojitet, pavaresisht ndonje kritike qe do mund t'i behet edhe atij. Askush nuk eshte i perkryer.

[Guri i Kuq]

Dell i tregon Sejdiut


Christopher Dell konfirmoi se ka ekzistuar një marrëveshje mes Fatmir Sejdiut dhe faktorëve relevantë në ditët kur u hartua Kushtetuta. Kjo marrëveshje nuk do duhej ta nxirrte atë si shkelës. Por, sipas amerikanit, kjo ujdi u pa se nuk ishte në pajtim me Kushtetutën

Nga Express më 02 tetor 2010 në ora 08:16

Ambasadori i Shteteve të Bashkuara në Kosovë, Christopher Dell, i është përgjigjur ankesave të ish-Presidentit Fatmir Sejdiu për vendimin e Gjykatës Kushtetuese që çoi në dorëheqjen e tij.


Që prej se Gjykata Kushtetuese ka bërë publik vendimin për Rastin e Presidentit, Fatmir Sejdiu ka shfrytëzuar të gjitha paraqitjet mediale për të përmendur një marrëveshje që ka ekzistuar me “faktorin e brendshëm dhe të jashtëm” për të mbajtur dy postet pa iu shkaktuar atij ndonjë dëm.


Dell thotë se ka dëgjuar se ka pasur marrëveshje të tillë, por ka dhënë një shpjegim për këtë.


“Shikoni, mendoj se në atë kohë vendimet merreshin në lidhje me atë se si të strukturohej kombi, kjo është para se unë të isha këtu, prandaj unë vetëm po raportoj çfarë kam dëgjuar. Njerëzit vepronin në mirëbesim dhe në baza të vullnetit të mirë. Njerëzit në atë kohë besonin se kjo ishte një ujdi që do të respektonte vullnetin e Kushtetutës. Ne asokohe nuk dinim gjë për të ardhmen e Kosovës se si do të funksiononte ajo”, ka thënë Dell, në një intervistë të transmetuar në televizionin publik.


Sido që të jetë, sipas Ambasadorit Dell, kjo “marrëveshje xhentëllmene” për të cilën është duke folur ish-Presidenti Sejdiu, nuk është në pajtim me Kushtetutën e Kosovës.


“Gjykata e shqyrtoi këtë, pa se këto ujdi nuk ishin me vend, nuk ishin në pajtim me Kushtetutën, prandaj për mua kjo në fakt ka vërtetuar se nuk ishin në pajtim me Kushtetutën, prandaj sërish për mua kjo në fakt ka vërtetuar se sistemi këtu funksionon”, ka thënë Dell.


Sejdiu, po ashtu, është ankuar se avokatët e tij që janë caktuar për të mbrojtur rastin e tij pranë Gjykatës, nuk janë dëgjuar fare.


Kjo është hedhur poshtë nga Ambasadori i SHBA’së.


“Presidenti kishte argumente të mira ligjore, historinë legjislative se si arritëm aty ku ishim, procesin e hartimit të Kushtetutës. Mendoj se këndvështrimi i tij e meritoi një dëgjim të paanshëm në Gjykatë, ashtu si edhe pala tjetër”, ka thënë Dell.


Sejdiu është duke insistuar se në vendimin e Gjykatës, të cilin e ka quajtur edhe të çuditshëm, ka pasur ndërhyrje të politikës.


Ambasadori i SHBA’së i ka mbajtur mend këto deklarata të Sejdiut.


“Edhe pse Presidenti tha që ai nuk u pajtua me vendimin e Gjykatës, prapëseprapë mendoj se ai ka meritë të madhe që e respektoi atë”, ka thënë ai.


Dell ka komentuar pozitivisht aktin e dorëheqjes së Sejdiut, e po ashtu edhe vendimin e Gjykatës, por nuk ka thënë asgjë për punën e Sejdiut gjatë periudhës sa ka shërbyer si President.


“Mendoj se është fillimi i një ere të re në Kosovë, institucionet e Kosovës, Gjykata Kushtetuese, ish-Presidenti kanë reaguar me shumë dinjitet, kanë vënë interesin e kombit para interesit të tyre personal apo politik dhe në rastin e Presidentit në një akt fisnik e dinjitoz, siç i thash atij”, ka thënë Dell.


Në reagimin e parë pas vendimit të Gjykatës, Sejdiu kishte vënë në pikëpyetje autoritetin e instancës më të lartë për interpretimin e Kushtetutës në vend, duke lënë të kuptohet se gjithçka kishte të bënte me një komplot kundër tij.


Ambasadori Dell ka dhënë një përgjigje për këtë.


“Askush nuk veproi me paramendim të keq në këtë proces që në fillim”.


Më pas, Dell ka thënë se zgjedhja e Sejdiut në postin e Presidentit të Kosovës pas vdekjes së Ibrahim Rugovës ka qenë një përzgjedhje e mirë.


“Vendimi i marrë vite më parë për t’i caktuar atij pozitën më të lartë në vend, sidoqoftë e arsyetoi mençurinë e atij vendimi në rend të parë dhe mendoj se flet shumë për njeriun që ai vendosi për të mirën e vendit të tij në rend të parë”, ka thënë ai.


“E dini, këto kohë janë më se të rëndësishme për Kosovën, çdo gjë që bëjmë tani, krijon precedent për të ardhmen. Vendimet e marra këto ditët e fundit do të kenë efekt me kohëzgjatje në vendin tuaj dhe për fatin e mirë të Kosovës. Vendimet kanë qenë gjithmonë të tilla që kanë vënë institucionet dhe vendin në radhë të parë, dhe thënë të drejtën, duke parë këto, unë kam shpresa të mëdha për Kosovën”, ka shtuar ai.