09/05/2010
Gazeta Shqip
Policia e Tiranës arreston fqinjin e viktimës dhe kushëririn e tij
Loja me armë dhe dëshira për të dalë në fotografi me automatik, që t’i përdorin për miqtë në rrjetin social në internet “Facebook”, i ka kushtuar me jetë një 19-vjeçari në Kodër-Kamzë. Ngjarja e rëndë ka ndodhur dje pasdite, kur Bledar Lusha është vrarë me një plumb gabimisht teksa pozonte me armë. Policia ka ndaluar dy kushërinjtë, njërin për posedimin e armës ndërsa tjetrin për vrasje nga pakujdesia.
Policia tha se ngjarja ka ndodhur rreth orës 17:30 në Kodër-Kamzë dhe menjëherë në vendin e ngjarjes kanë shkuar shërbimet e policisë. Sipas të dhënave, Bledar Lusha, 19 vjeç, ishte takuar me fqinjin e tij, Gertian Gjika, 18 vjeç. Të dy kishin nisur të diskutojnë për shoqërinë që kanë në rrjetin social “Facebook” dhe kanë nisur të fantazojnë për fotot e tyre në këto faqe, me qëllim që t’i shikonin vajzat, që kishin bërë mikesha. Pas pak, me ta është bashkuar edhe kushëriri i Gjikës, Mersin Gjoka, 18 vjeç. Të tre kanë vendosur të shkojnë në shtëpinë e Gjikës. Atje, Gertiani ka nxjerrë një armë automatike “Kallashnikov” dhe kanë filluar të luajnë me të. Duke bërë poza të ndryshme, njëri mbante celularin në dorë dhe fotografonte dy të tjerët. Gjatë kësaj kohe, Mersin Gjoka, i cili kishte shkuar te shtëpia e djalit të tezes, ka marrë në dorë armën dhe ka filluar të pozojë për fotografi, duke krijuar situata sikur donte të vriste ndonjë. Por gjatë kësaj kohe, ai ka shtypur këmbëzën dhe arma ka bërë qitje, duke qëlluar në kokë Bledar Lushën. I riu ka gjetur vdekjen e menjëhershme, ndërkohë që të afërmit e viktimës dhe autorëve kanë mbërritur në vendin e ngjarjes, të cilët nuk banonin larg prej njëri-tjetrit.
Nga ana tjetër, policia është njoftuar nga banorët dhe shumë shpejt ka mbërritur në vendin e ngjarjes. Policia tha se me të arritur ka neutralizuar të dyshuarit, duke i shoqëruar në komisariat. Bashkë me dy të rinjtë, Mersin Gjoka dhe Gertian Gjika është shoqëruar edhe babai i këtij të fundit, si dhe është sekuestruar arma e krimit. Policia tha se të shoqëruarit janë marrë në pyetje në lidhje me këtë krim dhe kanë pranuar vrasjen, duke shpjeguar edhe mënyrën sesi kishte ndodhur. Gjithashtu, në celularin e njërit prej të rinjve janë gjetur edhe fotografitë me armë, që i kishin bërë njëri-tjetrit. Ndërsa në lidhje me origjinën e armës, policia ka pyetur të rinjtë, të cilët kanë deklaruar se e kishin marrë në shtëpi dhe mendohet se ishte e babait të Gertianit. Në këto kushte, policia ka vendosur që Gertian Gjika të arrestohet për armëmbajtje pa leje, ndërsa kushëriri i tij bashkëmoshatar është arrestuar për vrasje nga pakujdesia.
Vetëm pak kohë më parë, shërbimet e Komisariatit nr. 5 kapën dy grupe të tjerë të rinjsh, të cilët dilnin në mal dhe shtinin me armë automatike. Ata ishin kthyer në një shqetësim për banorët e zonës, kështu që ishte kërkuar ndihma e policisë. Rreth dy muaj më parë, shërbimet e Komisariatit nr. 5 ndërmorën një aksion dhe kapën një grup prej 15 të rinjsh. Gjatë marrjes në pyetje, ata deklaruan se kishin shkuar në mal për të bërë foto me qëllim që t’i nxirrnin në “Facebook”. Kur shërbimet po shoqëronin grupin për në ambientet policore, dëgjuan krisma nga ana tjetër e kodrës po në të njëjtin vend. Kështu, aty u realizua edhe kapja e dy personave të tjerë, që edhe ata kishin dalë për të bërë fotografi dhe video për “Facebook”, duke lënë përshtypjen se ky fakt ishte kthyer në “epidemi” për adoleshentët kryeqytetas. Tashmë, nga këto gabime, të riut Bledar Lusha nga Dibra i kushtoi shumë, ku u nda nga jeta dhe të afërmit sot i japin lamtumirën e fundit.
Krijoni Kontakt