E majta del sërish në protestë. Avazit të kutive, tashmë, po u shtohet ai i gjendjes ekonomike, duke e shpallur vendin në një krizë që s’ekziston. Afërmendsh, më e pritshmja për një grumbullim rastësor krerësh të ca partive politike, pa alternativa politike.
Kutitë ose avazi i fyellit në një vrimë për më shumë se nëntë muaj rresht, i kanë velitur edhe mbështetësit më të skajshëm. Për t’i dhënë klimës së konfliktit pak frymëmarrje, qoftë edhe artificialisht, lidershipi socialist po shton motive të reja për protesta. Kohët e fundit, duke aktivizuar militantë të specializuar për punë “kokë më kokë”, po u kërkohet qytetarëve të protestojnë kundër rritjes së taksave.
Në pamje të parë, kërkesa duket e drejtë, sepse qytetarët, tregtarët, prodhuesit, konsumatorët, etj. po e ndiejnë mbi kurrizin e tyre efektin e rritjes galopante të disa lloj taksave.
Le ta shohim pak më afër këtë dukuri. Në ndihmë, na vjen botimi i fundit i Bashkisë së Tiranës “Taksat dhe tarifat vendore”. Si për t’u mburrur, atje pasqyrohet edhe rritja e përditshme e këtyre lloj taksave. Kështu, për shembull taksa e gjelbër për biznesin e vogël ushqimor është rritur nga 5000 lekë që ishte në vitin 2008, në 12.500 lekë sot. E tillë është edhe rritja për biznesin e mesëm të kësaj kategorie: nga 10.000, në 25.000 lekë. Për bar-kafetë, taksa rëndon më tepër: nga 14.000, në 35.000 lekë, për biznesin e vogël, dhe nga 20.000, në 50.000 lekë, për biznesin e mesëm. Brenda dy vjetëve, kjo taksë, falë drejtimit të Bashkisë së Tiranës nga socialistët e Edi Ramës, “është ngjitur në podium”, është shtuar në mbi dy herë e gjysmë.
Një tarifë tjetër e Bashkisë, ajo e pastrimit dhe e largimit të mbeturinave, gjatë kësaj periudhe është rritur për biznesin e vogël tregtar nga 17.000, në 22.000 lekë, dhe për biznesin e mesëm, nga 20.000, në 30.000 lekë, ose 150%. E njëjta rritje edhe për bar-kafetë etj.
Ngritja sistematike e këtyre detyrimeve nga Bashkia e Tiranës bëhet në një kohë që plehrat vazhdojnë të ndyjnë rrugët, rrugicat e sheshet e Kryeqytetit, të cilat janë bërë mjedis i përshtatshëm për rritjen dhe mbarështimin e një specieje të veçantë zoologjike që thirret me emërtimin e përbashkët “Qen Rrugaçë të Zgjebosur”.
Ndërsa rritet taksa e gjelbërimit, ndodh që, edhe kur një tregtar privat mbjell ndonjë pemë në vende të caktuara të trotuarit që t’i bëjë hije lokalit të vet, dikush nxiton ta shkulë në emër të Kryetarit të Bashkisë, Edi Rama, madje të ngushtojë edhe trotuarin jashtë çdo kriteri urbanistik. Mos u habitni! Ka ndodhur verën e shkuar në bllokun e njohur me emrin e NSHRAK, te një nga pallatet “Sinani”.
Të veprosh kështu, në kundërshtim me kërkesat e qytetarëve, do me thënë: beton, në kurriz të gjelbërimit, të ardhura të paligjshme për një klan të caktuar njerëzish, në kurriz të hijeshisë mjedisore.
Ndërsa, me një politikë të tillë, Bashkia e Tiranës ndërmerr dhe reklamon masa drastike në dëm të qytetarëve, krejt ndryshe ka vepruar pushteti qendror. Tatim-fitimi është ulur nga 23%, në 10%. Sigurimet shëndetësore janë ulur nga 42% të pagës, në 32%. Taksa e liçencimit ka qenë 50.000, deri në 100.000 lekë. Tashmë është ulur deri në kufijtë skajshëm të simbolikës: 100 lekë!
Ruana Zot, sikur Qeveria të kishte ndjekur të njëjtën politikë taksash si Bashkia e Tiranës! Do të kishim edhe një tregues tjetër në rritje: përqindjen e varfërisë.
Është e pashpjegueshme ajo çka po ndodh në tollovinë e politikës sociale të Edi Ramës. Kur opozita e majtë thërret njerëzit në protesta dhe atyre u thuhet: “Ejani të protestojmë për rritjen e taksave!”, ka edhe nga ata që gënjehen. Por ka edhe shumë të tjerë që replikojnë: “Taksat i ka ngritur Edi Rama. S’kemi punë me Qeverinë”. Çfarë pret, pra, Rama dhe ndjekësit e tij me protestat e shpallura që do të rrëzuakan qeverinë?
Protestuesit le të ngrihen kundër atij që u rrit taksat dhe, si për ironi të fatit, i thërret dhe i organizon në protesta. Protestuesit, po të duan, le t’i përgjigjen edhe thirrjes së kreut socialist për “mosbindje civile”. Në këtë rast, me besueshmja do të ishte të mos i paguanin Bashkisë taksat në rritje të vazhdueshme, sado që edhe kjo ka sanksionet e veta ligjore.
Eden Babani - Gazeta 55
Përgjigju Duke Cituar
![Maska e [Perla]](customavatars/avatar28193_17.gif "Maska e [Perla]"){kind=avatar}
Postuar më parë nga leci
Krijoni Kontakt