Marre nga :“THE GUARDIAN”
Mourinho matador, jo dem
20-04-2010 14:50 CET
Puna e vrasësit të futbollit të bukur është një lojë të cilën Jose Mourinho nuk do të pritonte ta praktikonte në ndeshjen e sotme kundër Barcelonës. Ai do ta nxjerrë atë xhindin e vogël dhe ta fusë sërish në shishe. Nëse do të ketë sukses, siç pati njëra nga ish-skuadrat e tij.
Mourinho nuk ishte më trajner i Chelseat kur Jose Bosingwa, i cili e mbuloi Messin me aq sukses në barazimin e skuadrës në Barcelonë, 12 muaj më parë, sa që i ngjau një sherifi i cili po përpiqej ta prangoste një bandit. Guus Hiddink ishte autori i një plani taktik për mbulimin e Messit në ndeshjen e parë gjysmëfinale të Ligës së Kampionëve. Por, hija e Mourinhos ishte e dukshme në fushën e blertë. Bosingwës i takoi detyra e palakueshme e mbulimit të dribluesit më të mirë në botë. Portugezi e ndoqi të rrezikshmin shtatshkurtër në të gjitha pjesët e fushës.
Terrori komik
Sipas “Corriere dello Sport”-it, Mourinho kishte filluar t’ia përgatitë Messit një “batanije mbi krye”, një ditë pasi që futbollistët e Arsenalit ia dhanë lejen futbollistit nr. 1 në botë që të bredhë në zonën e tyre të rreptësisë, në disfatën 4:1, në ndeshjen e dytë çerekfinale. Mbrojtja e hapur vetëshkatërruese e Arsenalit e ndihmoi Messin në shënimin e katër golave mbresëlënës në “Camp Nou”. Në anën tjetër, Interi nuk do të jetë aq i mirësjellshëm ndaj Barcelonës sonte. Mourinho është matadori, e jo demi.
Hristo Stoichkov, pjesëtar i “Dream Team”-it të Barcelonës së Johan Cruyffit, e ka dhënë një deklaratë që i pushtoi mediet: “Dikur thoshin se ata mund të më ndalnin vetëm me një revole. Por, sot ju nevojitet një mitraloz për ta ndalur Messin”, tha ai.
Një shkrim në prag të “El Clasico”-s, thoshte: “Si të ndalet Messi pa e vrarë”.
Mourinhos do t’i pëlqejë ky terror komik. Njëra prej buzëqeshjeve me vetëkënaqësi do ta kaplojë fytyrën e tij. Pothuajse mund t’i shihni mendimet e tij duke gurgulluar si vijon: “Le të murmurisin njerëzit për atë djaloshin argjentinas dhe magjinë e tij. Le të kënaqen ata. Do t’u jap fund kënaqësive të tyre pas
vërshëllimës së fundit”. Lutja e tifozëve neutralë është që Mourinho të dështojë në detyrën e tij të errët dhe të përfundojë si një njeri i thyer. Do të ishte tepër e thjeshtëzuar nëse e prezantojmë atë si një lajmëtar të vdekjes së futbollit krijues. Por, karakteri i tij do të ofendohej nëse do të jetë dëshmitar i një spektakli të Leo Messit. Mund të shkojmë edhe më tej duke thënë se këto dy ndeshje janë një test i madhësisë së mundshme të Messit.
Mourinho ‘ndal’ Messin
Në zonën e teknikëve në “Stamford Bridge”, sytë e Mourinhos kryesisht janë të përqendruar në repartin defansiv të skuadrës. Në një intervistë për webfaqen e UEFA-së ai tha: “Në seancat stërvitore, nganjëherë, e praktikoj taktikën me pesë lojtarë prapa topit, në mënyrë që, edhe kur ta humbasim topin, mund ta ruajmë formën në fazën e mbrojtjes. Lojtarët duhet të mësohen ta lexojnë lojën, kur të bëjnë trysni dhe kur të kthehen në pozicionet e tyre defensive”.
Kjo nuk nënkupton se ai duhet të konsiderohet vetëm si mbytës i futbollit të bukur. Te Interi, ai e gjeti arsenalin e duhur sulmues për të fituar trofe, siç bëri me Porton dhe Chelsean. Esenca është se instinkti i tij parësor është që të mos e humbë ndeshjen, të mos pranojë gol, dhe, qartësisht, të mos i lejojë Messit lirinë që e gëzoi në “Emirates”. Talenti i tij i skajshëm duhet të këtë kundërfuqi.
Megjithatë, problemet e Mourinhos janë serioze. Siç zbuluan Chelsea, Manchester Unitedi dhe Arsenali brenda 12 muajsh, posedimi i topit nga ana e Barcelonës (70% në disa raste) është dërrmues. Mourinho mund t’i zërë frymën Messit në Milano, por në Spanjë mund të jetë ndryshe. Përfundimisht, pasardhësi i Maradonës tani luan më në qendër sesa vitin që shkoi, kur Chelsea e ndalonte në momentin kur dëshironte të depërtonte në zonën e rreptësisë. Kur e “sulmon banda”, Messi bëhet sikur një çun i cili fshihet nëpër shkurre, por i cili gjithashtu kthehet me topin e humbur dhe pa asnjë gërvishtje.
Nëse dikush mund ta ndalë Messin, ai duhet të jetë Mourinho. Por, gjatë gjithë sezonit, përpjekjet për ndaljen e Messit dukeshin si të provosh ta kapësh tymin në rrjetën e fluturave. “THE GUARDIAN”
Postuar më parë nga Black_Mamba
Krijoni Kontakt