Leximi

[Edmond.S]

Te nderuar forumist,

ne kohet e sotme leximi eshte bere per shume ke nje gje mjaft monotone,por,nuk duhet thene per te gjithe.Nuk di nese ne forum ekziston nje teme e tille,por do doja te hapja kete,te shtjellojme pervojat tona ne te lexuarit.

Si ju duket kjo gje,a ju pelqen?Cilat kane qene leximet me te pelqyera,llojet,pastaj vendi preferues... !

Respekte

[gloreta]

Lexoj kur jam e lire nuk ka gje me te bukur dhe me shplodhese se leximi, lere se cfare lexon.

[Xhenet.M.S.]

Po shume lexoj,ne internet romane gazeta,shkurt qka te me bjere ne dore...

[Mr-Bledi]

me pelqen te lexoj, Dan Brown, Khaled Hossein, Paulo Coelho, Rhonda Byrne, ... tani kam ne dore "Manual i drejtuesit te mjetit"

[Prizrenasi_40]

Ja një kolazh që e bëra sot!

A pajtoheni me mendimin tim?

[sirena_adria]

Çfarë lexuan shqiptarët në kohë pandemie, ja 10 librat më të shitur përgjatë vitit 2020

Viti 2020 ka qenë një vit i vështirë për të gjithë për shkak të pandemisë së Covid-19, por për tregun e librit pati disa zhvillime domethënëse.

Ngujimi i gjatë në shtëpi i njerëzve e riktheu vëmendjen tek libri, si dhe pati një rritje të interesit tek letërsia e vlerave, kryesisht tek klasikët dhe autorë të rëndësishëm të letrave. Tregu i botimeve pati ulje drastike të botimeve të hedhura në qarkullim nëse e krahasojmë me vitet e kaluara, si dhe ndërprerje të kontratave me agjencitë dhe autorët, shoqëruar edhe me probleme të tjera.

Bukinist ndan librat më të kërkuar nga lexuesit gjatë vitit 2020, ku kryesojnë botime të zhvillimit personal dhe të motivimit. Edhe për shkak të pandemisë, por edhe të nevojës për më shumë motivim, kjo kategori po shënon rritje domethënëse të kërkesës së lexuesit nga viti në vit. Po ashtu, autorët bestseller botërorë mbeten të tillë edhe për lexuesit shqiptarë.



1.“Mendo dhe bëhu i pasur” nga Napoleon

Ky libër ka ndihmuar shumë njerëz të ndryshojnë rrjedhën e jetës së tyre. Ai mbetet një shtysë e shkëlqyer motivuese për zhvillimin e intelektit personal. Napoleon Hill shpjegon se filozofia që mësohet në libër mund të përdoret për t’i ndihmuar njerëzit që të kenë sukses në të gjitha fushat dhe të bëjnë ose të arrijnë të jenë pothuajse çdo gjë që duan. Sipas revistës “Forbes” (mars 2011) “ky libër është shitur në më shumë se 70 milionë kopje që prej botimit të tij të parë dhe vazhdon të shitet vrullshëm edhe sot”.


2. “Tatuisti i Aushvicit” nga Heather Morris

Një roman i bazuar në një histori të vërtetë nga Heather Morris! Një histori dashurie në një kamp përqendrimi; ajo e Lejli dhe Gita Sokolovit, jo vetëm që do t’u mbijetonte ditëve të vështira, por do të dokumentohej me detaje shumë vite më pas. Një histori e mbetur peng për shtatëdhjetë vjet me radhë, e cila do t’ju bëjë për të qarë, por edhe do t’ju falë optimizëm. Janë shkruar libra pa fund për Holokaustin, por asnjë si ky që ka në dorë lexuesi shqiptar prej dy vitesh, – i pasuar edhe me librin e dytë të kësaj autoreje, “Rrugëtimi i Silkes”.


3. “Gjuetari i balonave” nga Khaled Hosseini

Pa frikë, ky libër mbetet ndër më të pëlqyerit nga lexuesit shqiptarë, të cilët përgjithësisht janë të pasionuar pas historive me fund tragjik dhe realiteteve që përkojnë me ato të një mjedisi tipik shqiptar. Ky roman është i shkëlqyer; ka një fabul tronditëse e cila e bën këtë libër të paharrueshëm jo vetëm si një kronikë politike, por edhe si një rrëfenjë të thellë personale… Ndodh rrallë që një libër t’i përshtatet kaq shumë kohës dhe njëkohësisht të ketë cilësi kaq të lartë letrare. Ky roman dhe të gjithë romanet e tjera të Khaled Hosseini mbeten bestseller absolutë edhe për lexuesit shqiptarë. Ky libër ka vetëm një të metë, – mbaron shpejt, – thotë Amazon. Prandaj edhe në Shqipëri ka mbi 12 ribotime si roman.


4. “Baba i pasur, baba i varfër” nga Robert Kiyosaki

Çuditërisht, gjatë periudhës së pandemisë ky ka qenë ndër librat më të kërkuar nga lexuesit shqiptarë. “Baba i pasur, baba i varfër” është një pikë fillestare për secilin që dëshiron të marrë kontroll mbi të ardhmen e tij financiare. Ky botim do t’ua rrëzojë mitin se keni nevojë për të ardhura më të mëdha për t’u bërë i pasur; ta sfidojë besimin se shtëpia juaj është burimi financiar; t’u tregojë prindërve përse ata nuk mund të mbështeten në sistemin shkollor për të mësuar fëmijët e tyre rreth parasë; t’iu mësojë si t’i harxhoni burimet dhe shpenzimet financiare; t’iu udhëzojë si t’i mësoni fëmijët tuaj me paratë që të jeni më të sukseshëm financiarisht në të ardhmen. Robert Kiyosaki është një biznesmen, investitor, autor librash dhe mësues. Ai i mëson njerëzit që të bëhen milionerë. Për këtë arsye ata e quajnë mësues shkolle për milionerë…


5. “Dashuria në kohërat e kolerës” nga Gabriel Garcia Marquez

Një klasik modern që shitet në çdo lloj kohe, por gjatë vitit 2020 pati një rikthim të fuqishëm nga lexuesi shqiptar. Sikundër nënkuptohet nga titulli, Gabriel Garcia Márquez ka shkruar roman për dashurinë, për dashurinë me të gjitha fytyrat e saj: dashuri rinore, dashuri bashkëshortore, dashuri romantike, dashuri të mishit, dashuri, madje, edhe me shenjat e kolerës. Për më tepër, ai ka shkruar një vepër arti që rrezaton një humanizëm të atillë, që lexuesit do ta ruajnë thellë në zemër si diçka të shtrenjtë dhe do ta kujtojnë sa të kenë jetë në këtë botë. Kjo kryevepër e letërsisë botërore vjen në mënyrë dinjitoze falë shqipërimit mjeshtror nga gjuha origjinale prej Mira Meksit.


6. “Murtaja” nga Albert Kamy

Ky libër ishte një ndër tre librat më të kërkuar në botë gjatë vitit të pandemisë. Sigurisht, kjo falë meritës së gjenisë së nobelistit Albert Kamy dhe natyrës specifike të receptimit të veprave të gjithëbotshme letrare. Përmes kësaj vepre mësojmë më shumë për çështje thelbësore etike sesa ato që kanë të bëjnë me titullin, të cilat përkuan edhe me dramën e Covid-19 gjatë vitit që lamë pas: E keqja në botë vjen pothuajse gjithmonë nga padija, teksa vullneti i mirë, nëse nuk shihet qartë, mund të shkaktojë po aq dëme sa edhe ligësia. Njerëzit janë më “tepër të mirë sesa të ligj, por në të vërtetë çështja nuk qëndron aty. Njerëzit janë më pak apo më shumë të paditur dhe kjo është ajo që quhet virtyt ose ves, ndërsa vesi më dëshpërues është ai i padijes që pandeh se i di të gjitha dhe atëherë i jep vetes të drejtën për të vrarë.


7. “Arti i brishtë i not giving a f.ck” nga Mark Manson

Ky libër mbetet ndër më të kërkuarit nga lexuesit shqiptarë që kur është hedhur në qarkullim për herë të parë. Dhe a e dini se pse?! Mark Manson e sheh realitetin me qartësinë dhe sinqeritetin maksimal, duke e parë atë si një mjedis plot sfida dhe probleme për individin. Këtu nis edhe aventura narrative e autorit, i cili ka një optikë të kundërt me atë të të menduarit pozitiv. Në këtë udhëzues për zhvillimin personal, blogeri shumë i njohur na këshillon që të përmirësohemi përmes përballimit të vështirësive. Manson na këshillon të mësojmë kufizimet tona dhe t’i pranojmë ato. Ai thotë se ky është burimi i vërtetë i forcës. Kur përqafojmë frikën, fajet dhe pasiguritë tona – kur nuk u largohemi dhe nuk u shmangemi të vërtetave të dhimbshme, por përballemi me to – mund të gjejmë guximin dhe vetëbesimin, të cilat i kërkojmë me aq dëshpërim.


8. “Sekreti” nga Rhonda Byrne

Autorja Rhonda Byrne ka goditur në shenjë, duke përmbushur thelbësisht anën shpirtërore të lexuesit, prandaj ai konsiderohet si një Sekret i Madh që zbulohet pareshtur nga miliona lexues edhe sot. Ky Sekret shekullor është kuptuar nga disa prej njerëzve më të mirënjohur në histori: Platoni, Galilei, Bet’hoveni, Edisoni, Karnegi, Ajnshtajni – bashkë me disa shpikës të tjerë, teologë, shkencëtarë, dhe mendimtarë të mëdhenj. Tani Sekreti po i zbulohet botës.

Për herë të parë, të gjitha pjesët e sekretit bashkohen në një zbulim të pabesueshëm, që do t’ia transformojë jetën gjithkujt që do ta përjetojë. Në këtë libër do të mësoni si ta përdorni sekretin në çdo aspekt të jetës – me paratë, pasurinë, lidhjet, lumturinë dhe në çdo ndërveprim që keni në botë.


9. “Friend Request” nga Laura Marshall

“Kërkesë për miqësi” është romani që do t’ju mbërthejë që në faqen e parë dhe do t’ju lërë pa frymë deri në të fundit. Romani i Laura Marshall është konsideruar si trilleri më i bukur i vitit dhe pa frikë është sot thrilleri më i kërkuar edhe nga lexuesit shqiptarë. Për këtë arsye vazhdon të ketë kërkesa të shumta edhe sot, gati dy vjet pas hedhjes në qarkullim nga shtëpia botuese Living.


10. “Të bëhesh” nga Michelle Obama

Nuk ka një biografi të dytë që të jetë kaq e kërkuar sa “Të bëhesh” e Michelle Obama. Ky libër kërkohet jo vetëm nga lexueset femra, por edhe nga meshkuj dhe çuditërisht ka kapërcyer paragjykimet se ka një kosto të lartë. Librat me vlera i kërkon lexuesi shqiptarë, pavarësisht çmimit apo pengesave të tjera.

Në këtë libër, për herë të parë, Michelle Obama përshkruan jetën e saj, që nga fëmijëria, raportet me prindërit, fillimet e martesës, vështirësitë për të gjetur një ekuilibër mes karrierës, familjes dhe ngjitjes së vrullshme të të shoqit në politikë. Na zbulon debatet e tyre lidhur me mundësinë për të konkurruar për presidencën e Shteteve të Bashkuara dhe na rrëfen për popullaritetin që përjetuan dhe për kritikat që morën gjatë fushatës elektorale. Me finesë, sens humori dhe një sinqeritet të pazakontë, Michelle Obama shfaq gjithë jetën e një familjeje që, krejt befasisht, u ndodh nën dritat e projektorëve dhe përballë gjithë botës, si dhe tetë vitet më domethënëse në Shtëpinë e Bardhë, ku ajo e njohu më mirë vendin e saj, por edhe vendi i saj e njohu më mirë atë.

Becoming – Të bëhesh, na shoqëron në një udhëtim nga kuzhinat modeste të Jovas te sallat e ballos në Buckingham Palace, nëpër çaste dhimbjesh therëse dhe provash qëndrueshmërie këmbëngulëse, duke na zbuluar shpirtin e një gruaje të veçantë dhe revolucionare, e cila lufton për t’u ndier mirë me veten, plotësisht e zonja për të vënë gjithë forcën dhe zërin në shërbim të idealeve më të larta./Monitor


https://www.balkanweb.com/cfare-lexu...te-vitit-2020/

[sirena_adria]

Librat që duhet t’i lexoni të paktën një herë në jetë

Librat janë ato që na përcjellin e na bëjnë shoqëri në çdo hap të jetës. Janë ato që na japin mundësinë për të jetuar aventura të ndryshme të cilat fshihen në mes të rreshtave e që frymojnë brenda faqeve, shkruan KultPlus.

Më poshtë do gjeni një listë për 5 libra që ja vlen të lexohen të paktën një herë, transmeton KultPlus.


“ The Song of Achilles ” nga Madeline Miller

“ The Book Thief ” nga Markus Zusak

“ The Seven Husbands of Evelyn Hugo ” nga Taylor Jenkins Reid

“ The Kite Runner ” nga Khaled Hosseini

“ A Thousand Splendid Suns ” nga Khaled Hosseini


/ KultPlus.com

https://www.kultplus.com/libri/libra...ehere-ne-jete/

[sirena_adria]

Pse duhet të lexoni çdo ditë? 10 Përfitime

Leximi përfaqëson shumë më tepër nga sa mund ta imagjinojnë shumë njerëz. Leximi i një libri nuk është vetëm një mënyrë për të kaluar kohën. Faqet e librave përmbajnë fjalë, histori, ndjenja, që janë të afta të përçojnë emocione tek lexuesi, duke e bërë atë të zbulojë botë të pashkelura dhe të paimagjinueshme. Për më tepër, siç dëshmohet nga studime të ndryshme shkencore, leximi sjell gjithashtu përfitime për shëndetin mendor dhe fizik të njerëzve.

Stimulon mendjen

Studimet kanë treguar se stimulimi i mendjes, ndihmon në parandalimin ose ngadalësimin e zhvillimit të sëmundjeve si Alzheimer dhe demenca senile. Ashtu si të gjithë muskujt e tjerë të trupit, edhe truri duhet të ushtrohet për të mbetur në formë. Ndaj shprehja “ose e përdor ose e humb”, është veçanërisht e përshtatshme kur flitet për trurin.

Redukton stresin

Nuk ka rëndësi se sa stres ju shkakton puna, marrëdhëniet apo problemet e tjera që hasni në jetën e përditshme. Kur jeni i zhytur në një histori, e gjeni veten në një dimension tjetër, një lloj bote paralele, në të cilën do t’i harroni problemet. Një roman i shkruar mirë, do t’ju transportojë në një dimension tjetër.

Përmirëson njohuritë tuaja

Çfarëdo që lexoni do ta zgjerojë bagazhin tuaj kulturor, gjë që do t’ju vijë në ndihmë atëherëkur nuk e prisni. Sa më shumë njohuri të keni, aq më të gatshëm do të jeni të përballeni mesfidat që ju përball jeta. Për më tepër, leximi është një mënyrë e shkëlqyer për të ushqyer të menduarit tuaj. Në rrethana të vështira, mund të humbni gjithçka tjetër (para, punë, shtëpi, madje edhe shëndetin tuaj), por asnjëherë dijet që keni fituar.

E zgjeron fjalorin tuaj

Sa më shumë të lexoni, aq më e mirë do të jetë mënyra juaj për ta ekspozuar veten tek të tjerët. Fjalët e reja do t’i shtohen fjalorit tuaj të përditshëm. Të shprehurit mirë dhe në mënyrë të artikuluar, mund t’ju ndihmojë në vendin e punës. Dhe të folurit me vetëbesim para një personi të rëndësishëm, mund të jetë stimuluese për vetëvlerësimin tuaj.

Përmirëson kujtesën

Kur lexoni një libër, duhet të mbani mend një sërë personazhesh, historitë e tyre personale, ambiciet, pasi të gjitha detajet ndërthuren në një vepër. Edhe kujtesa e ka një kufi, por truri është një organ i mrekullueshëm, dhe mund t’i kujtojë të gjitha këto me një lehtësi të caktuar. Po ashtu është e jashtëzakonshme se si çdo kujtim që krijohet brenda teje, i jep jetë një sinapsi të ri, duke forcuar kujtimet ekzistuese.

E forcon aftësinë analitike të të menduarit

A keni lexuar ndonjëherë një roman të jashtëzakonshëm thriller, duke e zgjidhur misterin edhe para se ta përfundoni librin? Përveç kësaj, ju do të keni mundësi të përdorni aftësinë kritike dhe analitike të të menduarit edhe në punë, duke mbajtur parasysh të gjitha detajet që ju ofrohen, dhe që do t’i përdorni për të zgjidhur “misterin”.

Përmirëson nivelin e vëmendjes dhe përqendrimit

Në botën ku jetojmë të ndikuar shumë nga interneti, vëmendja shkon në të gjitha drejtimet e mundshme, duke na detyruar të bëjmë shumë detyra. Në vetëm 5 minuta, secili prej nesh bën një mijë gjëra:dërgon një e–mail, organizon punën, bisedoni më shumë njerëz (përmes Facebook, Skype, Whatsapp, etj), i hedh një sy në Twitter-it, monitoron smartfonin dhe ndërveproni me kolegët e punës.

Kjo sjellje shkakton një rritje të nivelit të stresit, duke e ulur produktivitetin. Kur lexoni një libër, e gjithë vëmendja juaj shkon tek historia. Gjatë leximit, pjesa tjetër e botës qëndron jashtë, dhe ju jeni të zhytur në çdo detaj. Përpiquni të lexoni 15-20 minuta përpara se të shkoni në punë (p.sh gjatë rrugës nga shtëpia në punë, nëse përdorni transportin publik) dhe do të habiteni nga niveli juaj i përqendrimit sapo të mbërrini në zyrë.

Përmirëson aftësitë tuaja në të shkruar

Ky përfitim ecën paralelisht me zgjerimin e fjalorit. Një shkrim i mirë në punë, ka një efekt të dukshëm në aftësitë e të shkruarit. Sa i përket rrjedhshmërisë dhe stilit të të shkruarit të autorëve të tjerë, leximi do të ndikojë shumë në punën tuaj personale. Shkrimtarët mësojnë se si të shkruajnë prozë, duke lexuar më parë veprat e të tjerëve.

Sjell qetësi

Përveç relaksimit që shoqëron leximin e një libri, ka mundësi që tema për të cilën po lexoni, t’ju çojë në një botë ku mbretëron paqja dhe qetësia e brendshme. Leximi i teksteve shpirtërore ul presionin e gjakut, duke ju dhënë një ndjenjë qetësie ekstreme, ndërsa leximi i librave me temë “Si të ndihmoni veten për të…” i ndihmon njerëzit me çrregullime të caktuara të sjelljes dhe sëmundje mendore.


/ Bota.al

https://bota.al/pse-duhet-te-lexoni-...-10-perfitime/

[sirena_adria]

Pse librat elektronikë e kanë ndryshuar perceptimin tonë mbi leximin

Debati midis librave elektronikë dhe atyre të printuar, ka shkaktuar prej kohësh diskutime familjare dhe midis miqsh, së bashku edhe me mendimet e kualifikuara të ekspertëve. Në një artikull të fundit, faqja e internetit Book Riot e ka rihapur këtë temë.

Në fakt, një studim i kryer që në fillimin e viteve 1990, kishte treguar se leximi në ekran ishte më i ngadaltë dhe më pak i saktë sesa ai tradicional. Tani le të shohim se si librat elektronikë,po e ndryshojnë perceptimin që kemi mbi një tekst kur lexojmë një libër.

Kuptimi i një teksti

Në vitin 2014, një eksperiment tregoi se fëmijët preferojnë më shumë librat e printuar, në vend të atyre që lexohen nëpërmjet një ekrani dixhital. Prindërit dhe mësuesit kanë vënë re se si rritet vëmendja dhe kurioziteti i të vegjëlve, kur ndërveprojnë me një libër letre, dhe jo me një libër dixhital.

Rëndësia e kontaktit fizik dhe perceptimi i ndryshëm vizual, e bëjnë më tërheqës për një fëmijë librat e printuar. Në të njëjtën linjë, një studim norvegjez vëzhgoi sjelljen e disa fëmijëve në klasat fillore. Ai tregoi se nxënësit që lexonin një tekst në letër, ishin më të aftë që t’i përgjigjeshin pyetjeve se çfarë kishin kuptuar prej tij.

Një studim nga Universiteti Stavanger në Norvegji, tregoi se pasi 50 njerëz u udhëzuan të lexonin të njëjtën histori, gjysma në një libër elektronik dhe gjysmën në letër, ata që kishin lexuar librin prej letre, kishin një ndjeshmëri dhe kujtesë më të madhe sa i përket përmbajtjes. Studiuesit vunë re se lexuesit e librit elektronik, e kishin më të vështirë të rindërtonin fabulën e tregimit.

Fiziciteti i librave

Disa studiues, thonë se ndryshimet midis lexuesve të librave elektronikë dhe atyre të librave prej letre, vijnë për shkak të lodhjes së syve të shkaktuar nga ekrani dixhital. Të tjerë thonë se librit i printuar, është një element kyç për të pasur një përqendrim më të mirë.

Kontakti fizik dhe mënyra përmes së cilës lidhet dikush me një libër tradicional, ështësigurisht e ndryshe nga ajo me një pajisje elektronike, madhësia apo pesha e së cilës, faqja që duhet shfletuar ose shenja që duhet mbajtur, nuk janë të njëjtat.

Për këtë arsye, ndodh shpesh që ata që lexojnë libra në pajisjet dixhitale, nuk e kanë ndjenjën e gjatësisë së asaj që janë duke lexuar. Megjithatë, ky aspekt i fizikës nuk ka të bëjë vetëm me librat, por edhe me filmat. Shikuesit janë më të përqendruar dhe të angazhuar kur shohin një film në kinema, sesa kur e shohin në shtëpi përmes një uebsajti në internet.


/Bota.al

https://bota.al/pse-librat-elektroni...e-mbi-leximin/

[sirena_adria]

50 libra të sugjeruar nga shkrimtari Ag Apolloni

Shkrimtari i njohur Ag Apolloni na sugjeron 50 libra nga letërsia botërore të cilat patjetër duhet të lexohen nga secili.


Kjo është lista e librave të sugjeruar nga shkrimtari Ag Apolloni:

1. Milan Kundera: Lehtësia e padurueshme e qenies

2. Philip Roth: Ankimi i Portnoit

3. Julian Barnes: Zhurma e kohës

4. D. M. Thomas: Hoteli i Bardhë

5. T. S. Eliot: Toka e shkretë

6. Michel Houellebecq: Nënshtrimi

7. Umberto Eco: Varreza e Pragës

8. Italo Svevo: Rrëfim për plakun e mirë dhe vajzën e bukur

9. Dante Alighieri: Komedia hyjnore

10. Nikos Kazantzakis: Tundimi i fundit

11. Jorge Luis Borges: Aleph

12. Voltaire: Kandidi

13. Hermann Hesse: Ujku i stepës

14. Mario Vargas Llosa: Pesë qoshet

15. Juan Rulfo: Pedro Paramo

16. Jean-Paul Sartre: Muri

17. Charles Baudelaire: Lulet e së keqes

18. Orhan Pamuk: Unë jam e kuqja

19. Isaac Bashevis Singer: Shosha

20. N. V. Gogol: Shpirtra të vdekur

21. L. Tolstoj: Atë Sergi

22. F. M. Dostojevski: Idioti

23. Gustave Flaubert: Zonja Bovari

24. Joseph Conrad: Zemra e errësirës

25. Franz Kafka: Procesi

26. G. G. Marquez: Njëqind vjet vetmi

27. J. D. Salinger: Rojë në thekërishten buzë greminës (anglisht: The Catcher in the Rye)

28. Kurt Vonnegut: Thertorja pesë

29. José Saramago: Ungjilli sipas Jezu Krishtit

30. Ernesto Sabato: Tuneli

31. Victor Hugo: Katedralja e Parisit

32. Denis Diderot: Nipi i Ramoit

33. Ariel Dorfman: Vdekja dhe vasha

34. Herman Melville: Kopisti Bartëlby (origjinal: Bartleby, the Scrivener)

35. F. Scott Fitzgerald: Getsbi i madh

36. John M. Coetzee: I ngadalti

37. Elie Wiesel: Natë

38. Albert Camus: I huaji

39. Vladimir Nabokov: Lolita

40. Doris Lessing: Fëmija i pestë

41. Mihail Bulgakov: Mjeshtri dhe Margarita

42. Yasunari Kawabata: Bukuroshet e fjetura

43. Yukio Mishima: Kinkakuxhi

44. John Steinback: Njerëzit dhe minjtë

45. Thomas Mann: Tonio Kröger

46. Marguerite Duras:

47. J. M. G. Le Clezio: Afrikani

48. Shakespeare: Hamleti

49. Cervantes: Don Kishoti

50. Goethe: Fausti


/ KultPlus.com

https://www.kultplus.com/libri/50-li...i-ag-apolloni/

[sirena_adria]

10 librat shqiptare sugjeruar si dhurate per te huajt


Sa herë keni dashur të prezantoni mikun apo mikeshën tuaj të huaj me kulturën shqiptare e ti tregoni atyre pjesët më interesante, të vërteta e të bukura të saj?

Më poshtë ju rendisim sugjerimet tona të librave që mund të dhuroni (apo të shfletoni edhe vetë!) të cilët janë të përkthyer në disa gjuhë të huaja dhe që përfaqësojnë e prezantojnë Shqipërinë me të gjithë kulturën, traditat, dhe artin e saj.

1. “Kronikë në gur”/ “Chronicle in stone” nga Ismail Kadare

Ismail Kadare-ja kryeson gjithnjë listat e librave shqiptarë! Por cila vepër, nga shumë prej atyre të autorit, do të ishte më e përshtatshmja si dhuratë? Sipas nesh, “Kronikë në gur.” I rrëfyer nga pikëvështrimi i një djaloshi, libri rrëfen me vemendje e ndjeshmëri ngjarjet e të tashmes e së shkuarës së Gjirokastrës, vendlindja e Kadaresë. Ky titull është për ata që e njohin apo duan t’a njohin Gjirokastrën, për një copëz tradite e një tregimi vërtet shqiptar në të gjithë kuptimet! Në gjuhë të huaja, libri gjendet në librarinë Adrion.

2. “Rrugëtimi i mbramë i Ago Ymerit”/ “The Last Journey of Ago Ymeri” nga Bashkim Shehu

Bashkim Shehu është një nga autorët shqiptarë më prodhimtarë të ditëve tona. Djali i ish-Kryeministrit të Shqipërisë, Mehmet Shehut, autori është ndër të paktët fëmijë të ish pushtetarëve të periudhës komuniste që ka dënuar regjimin e shkuar. Prej vitit 1997, jeton në Barcelonë por vazhdon të shkruajë në shqip e të rrëfejë histori shqiptare, si ky titull që përveç se në anglisht, gjendet i përkthyer edhe në frengjisht dhe spanjisht në site-in Amazon.

3. “Hana”/ “Sworn Virgin” nga Elvira Dones

Ai i virgjëreshave të përbetuara është një fenomen i pakuptueshëm për shumë perëndimorë që vizitojnë shqipërinë dhe diçka që i bën kuriozë. Elvira Dones ka qenë ndër shkrimtaret e para që ka sjellë një histori të letrarizuar, libër që bëri shumë bujë menjëherë pas botimit të tij në gjuhën italiane si fillim. Mbi këtë roman, vetë autorja ka realizuar një dokumentar dhe pak vite më vonë nga publikimi, është mbështetur edhe filmi Italian me të njëjtin titull. Aktualisht libri ekziston në shqip, italisht dhe anglisht. Gjejeni në Adrion dhe Amazon.

4. “Fluturim/Flight” nga Kleitia Vaso

Koleksioni me 64 ese është i shkruar në shqip dhe anglisht nga vetë autorja e kjo e bën një dhuratë shumë të bukur për shqipfolës dhe anglishtfolës. Me gjithë filozofinë elegante të autores, mbetet një libër i thjeshtë dhe argëtues që çdokush do ta shijonte. Ajo që bashkon esetë e K. Vaso-s është një kënd krejt i veçantë vështrimi mbi botën duke u nisur nga elementet më të thjeshtë të përditshmërisë, si dhe një stil shumë modern të shkruari. Esetë mund të trajtojnë një kënd në shtëpinë e saj të fëmijërisë në Tiranë, një vend në fantazinë e saj, një fotografi nga jeta në Amerikë apo një anekdotë e nxitur nga jeta në Poloni, ku aktualisht jeton. Gjëndet në libraritë Adrion dhe Albania

5. “Hapësirë Negative”/ “Negative Space” nga Luljeta Lleshanaku

Për shpirtrat e brishtë dhe më të ndjeshëm ndaj poezisë, Luljeta Lleshanaku është një nga poetet më në fjalë kohët e fundit në skenën ndërkombëtare. Nga katër përmbledhjet me poezi të poetes, të përkthyera në anglisht, ne sugjerojmë më të fundit prej tyre “Negative Space,” ndërkomëtarisht i recensuar, nominuar dhe vlerësuar me çmime të ndryshme. Gjendet në Amazon.

6. “Homeland” nga Fation Plaku

Ky koleksion i ri fotografish, ndonëse me çmim të lartë, paraqet Shqipërinë në çdo centimetër katror të saj. Mes destinacioneve të njohura, gjenden edhe shumë të tjera që mbeten të panjohura për shumë prej nesh. Përveç se një libër i bukur për tju shtuar bibliotekës tuaj personale, ky libër do të ishte një dhuratë serioze për miqtë tuaj më të mirë. Mund të shërbejë si një nxitës i menjëhershëm i oreksit pë ta vizituar vendin tonë! Gjendet në Adrion.

7. “Tirana Horizontale, Go West” nga Robert Aliaj Dragot

Libri i Robert Aliaj Dragot është një propozim artistik. Autori e zoomon lenten e aparatit duke e fokusuar interesin e tij te kryeqyteti. Krejt i kundërt në krahasim me librin e sipër përmendur, në këtë përmbledhje aspak formale, që në formën e tij të paraqitjes, nuk do të gjeni fotot e bukura të turistëve, por ato të faqes tjetër të medaljes, të një realiteti të ashpër dhe prezent. Gjejeni në Adrion.

8. “Marubi: Shqipëria-Albania 1858-1950”

Fati i Marubëve në Shqipëri nis me mbërritjen e italianit Pietro Marubi në Shkodër e përfundon me nipin e tij tashmë shqiptar Gegë Marubi. Pietro njihet si fotografi i parë në Shqipëri dhe arkivi i tij fotografik si një ndër më të pasurit në Ballkan. Për këtë arsye, koleksioni ku përmblidhen fotografi nga Shqipëria e viteve 1858-1950, është një dhuratë e çmuar për një mik të huaj. Janë fotografi artistike, në bardhë e zi, që shfaqin portrete njerëzish të thjeshtë por edhe personalitetesh të rëndësishëm të sferës kulturore, veshje tradicionale, si edhe pamje nga Shqipëria përgjatë një shekulli.

9. “Pastel 1960-2012” nga Maks Velo

Megjithëse jo i përkthyer në gjuhë të huaja, mund tju sigurojmë se ky libër i vogël me pastelet e Maks Velos nuk ka aspak nevojë për përkthim. Veprat e Velos janë po aq estetikisht të bukura sa edhe interesante, po aq personale sa edhe universale, duke e bërë këtë një dhuratë të veçantë dhe të bukura për miqtë tuaj. Mund të gjëndet në librarinë Adrion në qendër të qytetit.

10. “Albania through Art” (3rd Edition) nga Ferid Hudhri

Nëse keni shoqëri artdashëse, ky koleksion i veprave dhe artistëve më të mëdhenj të Shqipërisë në anglisht është pa dyshim një nga më të mirët. Çmimi i kripur kompensohet nga përzgjedhja e piktorëve, prezantimi e cilësitë e fotove, tregimi sipas periudhave kohore, e shumë arsye të tjera të cilat e bëjnë këtë enciklopedi të artit shqiptar një libër që shfletohet me dëshirë dhe interes! Gjejeni në librarinë Adrion.


https://www.intoalbania.com/sq/10-li...-per-te-huajt/

[sirena_adria]

Guadalajara, “Kryeqyteti botëror i librit” për vitin 2022

UNESCO tash e 22 vite ndan çdo vit çmimin “Kryeqyteti botëror i librit”, për qytetet të cilat shënojnë suksese të ndryshme në fushën e artit e të kulturës dhe të leximit në përgjithësi.

Këtë vit u zgjodh një qytet në pjesën perëndimore të Meksikës (Guadalajara), qytet ky i cili që nga viti 2017 solli për komunitetin vendas një numër të madh aktivitetesh me qellim heqjen e vëmendjes nga dhuna dhe fokusimin tek kultura e leximit.

Në qytet organizuan hapësira publike për lexim dhe aktivitete tjera, punëtori për shkrim, poezi rruge, punëtori për fëmijë etj. Përderisa kishte mbështetjen e UNESCO-së qyteti përkrahi talentet e rinj të cilët kishin prirje të ndryshme artistike në forma të ndryshme. Ideja kryesore u bë themelimi i shtëpive të reja botuese, e po ashtu bashkëpunimi me autorë më në zë në Amerikën Latine duke realizuar projekte artistike në Kullën Babel.

Qytetet që fituan këtë titull më herët ishin Aleksandria, New Delhi, Turini, Buenos Aires, Athina, Lublana etj.


/GazetaExpress

https://www.gazetaexpress.com/guadal...er-vitin-2022/

[sirena_adria]

"Të lirë", nga Lea Ypi! Librin që e prita 30 vjet!

Nëntor 2021 - LIBRAT E ARLINDËS


E di që kam bërë mungesa! Ky kthim pas kaq shumë kohësh i dedikohet një libri për të cilin ndjehem e shpërblyer si botuese që më në fund arrita ta kem në shtëpinë botuese.

Libri “Të lirë”- “Të rritesh në fund të historisë” shkruar nga Lea Ypi është pa asnjë hezitim libri i panairit, dhe bindshëm libri i 30 viteve për një histori që duhet ta shohim përmes inteligjencës dhe humorit.

E di që janë bërë filma, edhe shumë të mirë. E di që janë shkruar dhe libra shumë të mirë nga autorë që meritojne admirim, por ky libër është një risi. I shkruar fillimisht në anglisht, nga Lea Ypi, pedagoge në Londër, studiuese, shkrimtare, një shqiptare që siç thotë ajo, “u rrit në fund të historisë”.

Ky nuk eshte një libër, ky është vetë Libri që unë vetë kam dashur të lexoj në këto 30 vite, dhe nga ana profesionale, më përmbush plotësisht.

Mund t’ju duken të ekzagjeruara këto fjalë, por me këdo që nuk e ka lexuar këtë libër jam gati të vë bast se do të ndihet njëlloj pasi ta lexojë tani edhe në shqip, sepse siç ju thashë, libri u shkrua fillimisht në anglisht dhe po korr sukses.

Bëni një kërkim në Twitter e do te shihni sa vlerësime dhe vëmendje po rrëmben shqiptarja Lea Ypi që rrëfeu historinë tonë në anglisht.

Libri më në fund erdhi në shtëpi, dhe erdhi si një botim origjinal, për fat Lea e përktheu, e shkroi në shqip se ky është libri ynë, në fakt të duket sikur e ke shkruar vetë, ti ke aty një copëz tënden, një vend a një ndjenjë që të përket thellësisht. Dhe këtë e ndjen faqe pas faqeje, rresht pas rreshti.

“Të lirë”- “Të rriteshn në fund të historisë” -është një miks inteligjence me ndjesi e talent shkrimtareje. Flitet me gjuhën e një vajze të vogël, por nga pas qëndron mendja gjeniale e Leas.

Për mua ky libër është i rrallë për nga sinqeriteti, me të cilin është shkruar.

Janë vërtet të rrallë njerëzit që shkruajnë kaq pa komplekse dhe po aq me një kurajë për të treguar historinë që e kemi jetuar të gjithë, por jo treguar. Historia është një rrëfenjë për jetët e jetuara, fundja.

Unë do të dëshiroja që ky libër të lexohej nga kushdo, pa pikë përjashtimi, nga ne që u rritëm në fund të historisë, por dhe për ata që erdhën e do të vijnë më pas, do të doja që ky libër të provokonte një diskutim të gjatë, të mos mbyllej sot. Mendoj se sot, më shumë se kurrë kemi nevojë për një shkundje të fortë, të reflektojmë se nga erdhëm e ku po shkojmë.

Dhe për fat, sot e kemi edhe librin e duhur


Tiranapost.al

https://tiranapost.al/art-dhe-kultur...0-vjet-i506611

[sirena_adria]

23 Prilli, Dita Botërore e Librit| Lista e librave më të shitur në Shqipëri gjatë vitit 2021


23 prilli është shpallur si Dita Botërore e Librit që nga 15 nëntori i vitit 1995, e cila origjinën e idesë së përkujtimit të kësaj dite e ka në Spanjë, ku atij që blinte një libër i dhurohej edhe një trëndafil.

Dita Botërore e Librit dhe të drejtës autoriale këtë vit zhvillohet edhe në Kosovë në bashkëpunimin e organizatave të shoqërisë civile që mbështesin kulturën.

Librat janë miqtë, udhëzuesit dhe filozofët tanë më të mirë.

Në këtë datë në vitin 1616, lidhet vdekja e dy kolosëve të letërsisë botërore: Shekspirit në Angli dhe Miguel de Servantes në Spanjë.

Kjo datë është një thirrje për njerëzimin për të rritur respektin për kontributet e pazëvendësueshme të autorëve dhe librit në progresin social dhe kulturor të njerëzimit.


Lista e librave më të shitur për vitin 2021, vënë në dispozicion nga Adrion.

1 – Të lirë – të rritesh në fund të historisë nga Lea Ypi

2 – Sekreti i Krishtlindjes – nga Richard Paul Evans

3 – Gratë e padukshme nga Caroline Criado Perez

4 – Fajin ma ka gjuha nga Virgjil Muci

5 – Posteri shqiptar nga Rubens Shima


Burimi: Euronews

https://news-31.com/lifestyle/23-pri...e-shqip-i24728

[sirena_adria]

Presidentja Osmani: Librat na çojnë në vende ku nuk kemi qenë kurrë dhe na prekin në mënyra të paimagjinueshme

Sot në mbarë botën shënohet Dita Botërore e Librit, e cila origjinën e idesë së përkujtimit të kësaj dite e ka në Spanjë, në zonën e Katalonjës, ku atij që blinte një libër i dhurohej edhe një trëndafil.

23 prilli është shpallur si Ditë Botërore e Librit që nga 15 nëntori i vitit 1995. Dita botërore e librit dhe të drejtës autoriale këtë vit shënohet edhe në Kosovë në bashkëpunimin e organizatave të shoqërisë civile që mbështesin kulturën.

Për këtë ditë ka shkruar edhe presidentja e Kosovës, Vjosa Osmani, e cila ka thënë se librat na çojnë në vende ku nuk kemi qenë kurrë dhe na prekin në mënyra të paimagjinueshme.

“Çdo libër është një përvojë më vete dhe na hap për një të re. Librat na çojnë në vende ku nuk kemi qenë kurrë dhe na prekin në mënyra të paimagjinueshme. Gëzuar Ditën Botërore të Librit!”, ka shkruar Osmani në “Twitter”.


/KultPlus.com

https://www.kultplus.com/lajme/presi...imagjinueshme/

[sirena_adria]

Dita e Librit, shkrimtarët: Shumë krijues dhe veprat e tyre janë harruar, nga institucionet nuk ka platforma dhe strategji lidhur me trashëgiminë e librit shqip

Institucionet nuk kujtohen për krijuesit dhe veprat e tyre, shprehen autorë të ndryshëm. Dita Botërore e Librit, por autorët thonë se nuk janë sa duhet prezent në jetën kulturore. Shkrimtarët Xhahid Bushati, Mustafa Tukaj dhe studiuesi Behar Gjoka shprehen me kritika ndaj Ministrisë së Kulturës dhe institucioneve, që nuk po bëjnë sa duhet për librin dhe autorin.

Si autor, Xhahid Bushati thotë se Dita e Librit, është një ditë e shenjtë. “Kujtohen veprat që kanë përjetësi, kujtohen shkrimtarët që me talentin u dhanë veprave të tyre përjetësi dhe lexuesit, edhe pse kanë kaluar vite, dekada e shekuj vazhdojnë t’i lexojnë librat me ëndje. Pra, u japin përjetësinë. Libri nuk duhet të njoh harresën. Kjo ditë përkujtime, sipas meje, ende është e zbehtë. Nuk ka madhështinë e saj që duhet të kishte”, thotë autori Bushati.

Sipas tij, aktivitetet që zhvillohen në këtë ditë, me gjithë vlerat e tyre, nuk e përmbushin madhështinë e kësaj dite të shënuar që shënohet më datë 23 prill. “Ende shkrimtari me misionin e tij fisnik nuk është prezent në jetën kulturore, ku të shpërfaqen vlerat e tij. Shumë krijues janë harruar dhe nuk kujtohen. Po ashtu edhe veprat e tyre. Shpesh, edhe pse janë gjallë, përsëri janë të harruar. Ende, nga institucionet përkatëse kulturore, nuk ka platforma dhe strategji lidhur me trashëgiminë e librit shqip, për ato vlera që janë të domosdoshme e, të cilat flasin për identitetin libror të ekzistencës shqipe”, shton më tej autori dhe studiuesi Bushati.

Ka vlera dhe në periferi

Dita Botërore e Librit rikthen vëmendjen dhe në të tjera problematika, që shprehen autorë të ndryshëm shqiptarë. Për Xhahid Bushatin mungojnë dhe botimet kolona me vepra të autorëve tanë, që kanë një kontribut të madh në letërsinë shqipe. “Duhet të kishte në këtë ditë botimi i ndonjë kolanë të ndonjë autorit, me shënime e studime përkatëse që me veprën e tij ka shndritur letërsinë shqipe, si: përshembull Ernest Koliqi, Faik Ballanca, Vath Koreshi, Skënder Drini, Nasi Lera, etj”, thotë ai.

Problem për autorin Bushati është dhe fakti që askush nuk kujtohet që ka vlera edhe në periferitë e vendit. Sipas tij, ato duhen kërkuar nga institucionet. “Ajo që më shqetëson ka një raport të zhdrejtë, pothuajse të një komunikimi të dobët mes metropolit dhe periferisë letrare. Mendoj, se duhet të ndryshohet. Ka vlera edhe në periferi, gjenden gurë të çmuar që ende flenë dhe duhen zgjuar. Duhen kërkuar. Megjithatë, kushdo që në Ditën Botërore të Librit, flet për një vepër, dhe kujton një autor, meriton të nderohet. Nderimi duhet të bëhet jo në një ditë, por sa të jetë gjallë autori, por edhe ditëlindjet dhe ditë vdekjet e tij e atyre autorëve që nuk jetojnë. Jo vetëm kaq, por për herë duhet të ndërmerren aktivitete për nder të librit”, thotë Bushati.

Shkrimtari Mustafa Tukaj shprehet gjithashtu për rëndësinë kësaj dite, por sipas tij pak po vlerësohen autorët shqiptarë. “Nëse bibliotekat e shkollat nuk vlojnë nga diskutimet, nga takimet, sigurisht që do të kemi probleme. Autorët shqiptarë promovohen shumë pak. Vlera ka dhe në rrethe jo vetëm në Tiranë. Ne flasim por kush na dëgjon nga institucione, Ministri e Kulturës? thotë Tukaj.

Për studiuesin Behar Gjoka, libri është pasqyra e shpirtit dhe e dijes, është pasqyra e të gjitha kohërave dhe të gjitha hapësirave. “Njeriu duhet të kthehet në secilën ditë dhe më shumë tek kjo pasqyrë”, thotë Gjoka, i cili shton se problemet në fushën e krijimtarisë dhe mungesa e vëmendjes ndaj autorëve vazhdon.

23 prilli është shpallur si Dita Botërore e Librit më 15 nëntor të 1995, me një rezolutë të UNESCO-s.


Gazeta Sot

https://sot.com.al/kultura/dita-e-li...ruar-n-i508461

[sirena_adria]

Shtatë libra të Orhan Pamuk që duhet t’i lexojë çdokush

Orhan Pamuk, është laureati i parë turk i çmimit Nobel për Letërsi.

Mënyra e shkrimit të tij paraqet tensionet mes kulturës së Lindjes dhe Perëndimit, traditën dhe modernen, Islamin dhe sekularizmin brenda shoqërisë turke.

Këto tema janë mbizotëruese në të gjitha veprat e tij, dhe në qendër të saj gjithçka është një ndjenjë e konfuzionit dhe humbjes së identitetit, si dhe një lloj melankoli, ose hüzün, që është një karakteristikë përcaktuese e Stambollit dhe banorëve të saj.


Më poshtë keni shtatë librat e Pamuk që duhet patjetër t’i lexoni.

GRUAJA ME FLOKË TË KUQE

E botuar në fund të verës së vitit 2017, Gruaja me Flokë të Kuqe është romani i fundit i Orhan Pamukut dhe një ekzaminim perfekt i ndryshimeve kulturore momentale në Turqi.

STAMBOLLI

Është një arritje mahnitëse – një memoar thellësisht personal, por edhe një ekzaminim lirik dhe i thellë i vendit.Pamuk është një vendas i Stambollit dhe ai e përshkruan një portret të metropolës përmes përvojës dhe kujtesës. Ai kap jo vetëm kufijtë fizikë të Stambollit, por melankolinë e thellë e një qyteti të lashtë që ndodhet në majë të gërmadhave të një perandorie.

EMRI IM ËSHTË E KUQJA

Emri im Është e Kuqja është romani që i dha njohje ndërkombëtare Pamukut. Është një pjesë e thurur fort mister dhe një pjesë histori dashurie, e vendosur në sfondin e miniaturistëve islamikë të gjykatës otomane të shekullit të 16-të. Tregimi qëndron rreth zhdukjes së një artisti të porositur nga Sulltani. I mbushur me intrigë të pallatit, Emri im është e Kuqja është një ekzaminim i kryqëzimit të artit, fesë dhe pushtetit.

BORA

Bora ka në qendër një poet në mërgim i quajtur Ka, i cili kthehet në Turqi për të gjurmuar dashurinë e tij të humbur në një komunitet të largët kufitar, përcjell arbresh.info. Ka tërhiqet pashmangshmërisht në tensionet politike të qytetit dhe e gjen veten të kapur në mes të një grushti të mundshëm shteti. Si me të gjitha trillimet e tij Pamuk, edhe këtu ndërvepron tradita fetare dhe kultura moderne si një temë kryesore.

MUZEU I PAFAJËSISË

Muzeu i pafajësisë është një romancë melankolike dhe e butë. Tregon obsesionin e një burri të pasur të quajtur Kemal, fejesa e të cilit dhe marrëdhënia e tij me familjen prishen pas një afere pasionante me një grua të quajtur Fusun. Kemali shpenzon vite duke u përpjekur të rindezë romancën e tij me Fusunin tashmë të martuar dhe në mënyrë të detyrueshme mbledh një koleksion artikujsh që i kujtojnë për takimet e tij të ndryshme me të. Muzeu i pafajësisë është një histori e dashur dhe sensuale dashurie e ngjyrosur me humbje dhe dëshpërim.

LIBRI I ZI

Nga romanet e Orhan Pamuk, Libri i Zi mund të jetë më i pazakonti dhe ndoshta një nga më pak të arritshëm. Është një mister / thriller tepër origjinal për një eksplorim identiteti dhe dëshpërimi që është pothuajse e pamundur për t’u hedhur poshtë. Romani ndjek një avokat me emrin Galip, i cili ka frikë se gruaja e tij mund ta ketë lënë atë për ish-bashkëshortin e saj. Kur zhduket edhe bashkëshortja e tij dhe ish burri i saj, Galip tërhiqet në misterin që rrethon situatën dhe ngadalë fillon të marrë identitetin e ish-burrit, përcjell arbresh.info.

KËSHTJELLA E BARDHË

I vendosur gjatë shekullit të 17-të, Kështjella e Bardhë përqendrohet te një studiues të ri italian, i cili merret i burgosur dhe i dërgohet Konstandinopojës (Stambolli modern). Ai bie në paraburgim të një njeriu të cilit i është thënë të thërrasë Hojën, i cili potencialisht mund të jetë binjak i tij. Ndërsa vitet kalojnë dhe dijetari i ri udhëzon Hojën mbi risitë e Perëndimit, burrat bëhen më të afërt dhe identitetet e tyre përfundimisht ndërthuren. Kështejlla e Bardhë është një ekzaminim i errët fantastik dhe i egër i identitetit. Ajo shërben si një shembull i hershëm i temave që përcaktojnë aq shumë nga kanuni letrar i Pamukut.


/KultPlus.com

https://www.kultplus.com/libri/shtat...oje-cdokush-2/

[sirena_adria]

5 rekomandime librash nga Bill Gates për të lexuar gjatë verës

Bill Gates është rikthyer me listën e tij të rekomandimeve të leximit – këtë herë, për sezonin veror. Dhe, siç pranon Gates në një postim në blogun e tij Gates Notes, lista e këtij viti është "shumë e rëndë për leximin e pushimeve".


Lista e Librave:

Power - Nga Naomi Alderman

Why We're Polarized - Nga Ezra Klein

The Lincoln Highway: A Novel - Nga Amor Towles

The Ministry for the Future - Nga Kim Stanley Robinson

How the World Really Works: The Science Behind How We Got Here and Where We're Going - Nga Vaclac Smil


Tiranapost.al

https://tiranapost.al/stil-jete/5-re...-veres-i515665

[sirena_adria]

6 site ku mund të lexoni libra online

https://www.classlifestyle.com/news/...-libra-online/

Classlifestyle.com

[sirena_adria]

https://tiranapost.al/vere-e-bukur-libra-te-bukur

Verë e bukur me libra të bukur… - Nga Arlina Dudaj ( Korrik 2018)


https://tiranapost.al/librat-e-arlin...j-kete-vere-21

Libri që sugjeron më shumë botuesja Arlinda Dudaj këtë verë (Korrik 2020 )