Ndahet nga jeta Vebi Velia !!!

[faruk_01]

Pas një sëmundje të rëndë, te premtem ne mes nate në Shkup, ndërroi jetë në moshën 61-vjeçare zoti Vebi Velija, pronar i Korporatës Rajonale Ballkanike të Industrisë dhe Konsulencës VEVE Group dhe i rrjetit televiziv ALSAT në Maqedoni, Shqipëri dhe Kosovë, si edhe themelues dhe president i Institucionit Kulturor “Fondacioni Velija”. Përmes angazhimeve të tij në ekonomi dhe me pjesëmarrjen personale në trupat dhe forumet e shumta rajonale dhe ndërkombëtare ekonomike dhe politike, përmes sistemit të Televizionit “Alsat” dhe Fondacionit “Velija” për kulturë, 61-vjeçari Vebi Velija në vazhdimësi në dy dekadat që kaluan, kontribuoi për zhvillimin e lirisë, demokracisë dhe bashkëpunimit rajonal në të gjitha sferat në Ballkan.

Grupi VEVE, i themeluar nga zoti Velija, në fillim të viteve nëntëdhjetë, u bë njëra nga kompanitë më të mëdha për tërheqje të investimeve të huaja në Ballkan, sidomos në sektorët e energjetikës, industrisë ushqimore, turizmit, transportit, telekomunikacionit etj. Ceremonia e varimit zhvillohet sot në orën 15:00, në vendlindjen e tij, në fshatin Gradec të Gostivarit, në Republikën e Maqedonisë.

Vebi Velija lindi në vitin 1948, në fshatin Gradec të Gostivarit, në Maqedoni. Ai studioi për ekonomi, ndërsa e nisi biznesin e tij në Kroaci në vitin 1971. Më pas, në vitin 1981, ai i përqëndroi bizneset e tij edhe në Vienë të Austrisë. Ai ka qenë i pranishëm në Shqipëri që në vitin 1990, duke themeluar biznese në fushat e medias dhe telekomunikacionit, industrisë së duhan-cigareve, industrisë së përpunimit ushqimor, shërbimeve financiare, ndërtimtarisë, kërkimit të naftës dhe në sektorin e energjisë.

Zoti Vebi Velija ishte president i Veve Group, themelues i rrjetit televiziv ALSAT në Maqedoni, Shqipëri dhe Kosovë, dhe president i Institucionit Kulturor “Fondacioni Velija”. Ai ka qenë President i Bashkimit të Industrialistëve dhe Investitorëve të Shqipërisë. Velija themeloi Radiotelevizionin e parë Satelitor Shqiptar, rrjetin televiziv “Alsat”, i cili transmeton 24 orë programe në Shqipëri, Maqedoni, Kosovë, si dhe nëpërmjet satelitit në Evropë, Amerikë, Kanada e me gjere.

Televizioni Alsat u krijua fillimisht në Tiranë si ekrani i parë mbarëshqiptar. Më pas, ALSAT-M mori licensën e parë të një televizioni kombëtar në gjuhën shqipe në Maqedoni, ndërsa një vit më parë u mor edhe licensa e televizion Alsat në Kosovë.Alsat është televizioni që bashkoi të gjithë shqiptarët, ata në Shqipëri, Kosovë, Maqedoni, Malin e Zi, Preshevë si edhe në mbarë botën ku jetojnë.

Po ashtu, Zoti Vebi Velija ishte themelues dhe kryetar i Fondacionit “Velija”. Fondacioni u themelua më 13 korrik të vitit 1994 dhe ekziston si shprehje e bindjes së themeluesit të tij se një komb mund të mbijetojë me pak ushqim, por kurrë me pak kulturë.Fondacioni “Velija” është organizatë nacionale jofitimprurëse që funksionon përmes përkrahjes financiare të themeluesit të saj. Fondacioni Velija inicioi gjithashtu çmimin vjetor ndërkombëtar “Kadare”.

Zoti Velija është autor i librave të tillë si “Quo Vadis Albania”, një monografi mbi vizionin e programit për rimëkëmbjen ekonomike të Shqipërisë, apo “Mes Ekonomisë dhe Politikës”, një përmbledhje diskutimesh, fjalimesh dhe dorëshkrimesh. Mes të tjerash, Z.Velija ka qenë gjithashtu anëtar i Bordit Këshillimor të Biznesit në Paktin e Stabilitetit si edhe i Bordit Këshillimor të Biznesit në Iniciativën e Bashkëpunimit të Evropës Juglindore.






Politikanë, ministra, diplomatë dhe gazetarë nga Maqedonia Shqipëria dhe Kosova që erdhën për ti dhënë lamtumirën e fundit Vebi Velia, e kujtojnë atë si një njeri me energji të jashtëzakonshme dhe me vision të gjërë. Të gjithë ata shprehen se janë të tronditur nga vdekja e parakohëshme e një njeriu të madh, veprat e të cilit kanë lënë gjurmë të pashyeshme në Maqedoni popr edhe në rajon.


Mijëra vetë u mblodhën të shtunën në vendlindjen e presidentit të ‘VEVE Group’ dhe rrjetit televiziv ‘Alsat’, Vebi Velija për t’i dhënë lamtumirën e fundit. Fshati Gradec i Gostivarit ishte në zi, ashtu si edhe të gjithë shqiptarët, pas lajmit të hidhur se zoti Velija humbi jetën nga një sëmundje e rëndë në moshën 61 vjeçare. Banorë të Gradecit, njerëz të ardhur nga zona të tjera të Maqedonisë, por edhe Shqipërisë dhe Kosovës, ku Vebi Velija u shqua për shtrirjen e aktivitetit të biznesit, e përcollën për në banesën e fundit. Njerëz të biznesit, politikës, përfaqësues të institucioneve, miq të të ndjerit, si dhe të afërm të tij, ndanë të gjithë së bashku dhimbjen për humbjen e njeriut, i cili me iniciativat e tij, asnjëherë nuk iu tremb sfidave në rajonin e Ballkanit, por përkundrazi me vendosmërinë që e karakterizonte arriti sukses me drejtimin e grupit ‘VEVE’ dhe rrjetit televiziv ‘ALSAT’, në Shqipëri, Maqedoni dhe Kosovë.
Fjalët ishin të pakta për të shprehur dhimbjen që të gjithë ndjenin për humbjen e njeriut të shtrenjtë të familjes, mikut, partnerit në biznes, zotit Velija.
“Ishte edhe kombëtar shumë i madh, njeri dashmarirës i kombit të tij, njeri luftëtar i madh për interesat kombëtare shqiptare, që angazhoi shumë faktorë ballkanikë, që të ndihmojë çështjen shqiptare, angazhoi dhe pati ndikim në shumë faktorë diplomatikë botërorë, që të ndihmojnë çështjen shqiptare... Vebi Velija sot ka një familje të fortë. Le një djalë, Ferikun, i cili besoj se do të vazhdojë veprën tënde, do të jetë në nivelin që ke qenë ti dhe se me punën e tij do të vazhdojë invencionin dhe kreativitetin tënd” u shpreh Hisen Ramadani, ish politikan dhe mik i z. Vebi Velija.
Disa vite më parë kur u inagurua televizioni ‘ALSAT’ në Maqedoni, Vebi Velija, u shpreh se “ai përfaqëson alternativen më serioze në ambientin mediatik në Maqedoni; me një staf të përbërë nga profesionistë, duke ruajtur profesionalizmin, pavarësinë si dhe standartet e larta kulturore dhe intelektuale”. Për stafin e ‘ALSAT’-it, të cilin ai e trajtoi si një këshilldhënës, në shërbim të informimit të lirë, dhe të saktë, lamtumira e fundit që iu dha zotit Vebi Velija, ishte edhe një premtim se puna e tij do të çohet më tej.
“Kjo është humbje e madhe për familjen, për ne të gjithë që e njohëm, por edhe më e madhe për shqiptarët anembanë trojeve ku jetojnë. Zoti Vebi! Nuk je më mes nesh por veprat dhe amanetet e tua, nuk do të vdesin kurrë, ato do të na përcjellin gjatë tërë jetës. Kur vetëm para disa vitesh zoti Velija mori iniciativën për themelimin e televizionit të pare kombëtar shqiptar në Maqedoni, nuk kishte shumë njerëz që besonin se për një kohë të shkurtër, falë energjisë së tij të madhe, vizionit dhe aftësisë të përzgjedh bashkëpuntorët e vërtetë, ky televizion do të bëhet një nga mediat udhëheqëse në Maqedoni. Ishte një nga pronarët e rrallë të mediave, i cili televizionin e tij nuk e trajtonte si vend për të realizuar interesat e tij personale, politike ose të biznesit. Nga mediat çdoherë kërkonte integritet profesional dhe politikë të pavarur redaktuese. Ai gjithmonë insistonte që media të jetë tribune e hapur për debat publik për çështjet më të rëndësishme në vend dhe rajon. Pusho i qetë zoti Vebi Velija, sepse amanetin tënd do ta çojmë në vend”, u zotua Muhamed Zeqiri, Kryeredaktor i ALSAT-M.
“Çdo vdekje e tillë, e cila pas vetes lë vepra gjigante, nuk është e hidhur, nuk është e errët, përkundrazi është e ndritshme dhe shndërrin mbi të gjithë ne të gjallët, që të veprojmë dhe punojme, ashtu siç ka jetuar i ndjeri, zoti Vebi Velija”, vlerësoi Shaqir Fetahu, myfti i Gostivarit.
Përmes angazhimeve të tij në ekonomi dhe me pjesëmarrjen personale në organizmat dhe forumet e shumta rajonale dhe ndërkombëtare, ekonomike dhe politike, përmes ‘VEVE Group’, rrjetit televiziv ‘ALSAT’ dhe Fondacionit kulturor ‘Velija’, 61-vjeçari Vebi Velija në vazhdimësi, në dy dekadat që kaluan, kontribuoi për zhvillimin e lirisë, demokracisë dhe bashkëpunimit rajonal në të gjitha sferat në Ballkan. Ai do të kujtohet tek të gjithë shqiptarët kudo që ndodhen, si një njeri që me dedikim, dha kontributin që të gjithë shqiptarët t’i afrojë më shumë me ëndrrën evropiane. Veprat e tij sot janë një dëshmi e pamohueshme për këtë impenjim të zotit Velija, i cili pasionin për punën e kaloi edhe tek djali i tij Ferik Velija, komuniteti i biznesit, i medias, miqtë, bashkëpunëtorët dhe çdo shqiptar që në shpirtin e tij ka përkushtimin e zotit Vebi Velija.


Humbje e madhe per ne Gradecasit por edhe per mbare shqiptaret kudo qe jane pasi qe ai dinte fort mire te bashkoje shqiptaret, te thith investitor te huaj po ashtu ne keto vende madje sherbeu si nje ure lidhes mes shqipatareve, informimit dhe biznesit...

i qofte i lehte Dheu...Zoti e bekofte..