Historia e dy çifteve që "kaluan një natë të paharrueshme së bashku", përfundon me vdekjen e një vajze. Gjyqi i rrallë në kryeqytet, historia e pazakontë e gjykuar nga togat e zeza të kryeqytetit
TIRANE- E kanë nisur si argëtim, por ka përfunduar në tragjedi. Një vendim i Gjykatës së Tiranës, i shkurtit të këtij viti, hedh dritë mbi një histori të pazakontë me sfond erotik, por që ka përfunduar me vdekjen e një 24-vjeçareje.
Gjithçka ka filluar në datën 7 prill 2007, ku në një gazetë nga ato që përmbajnë rubrikat, "Vajzat kërkojnë djem" dhe anasjelltas, botohet një kërkesë me këtë përmbajtje: "Jemi një çift 24 dhe 32 vjeç nga Tirana, duam një çift tjetër simpatik për të kaluar momente të paharrueshme së bashku..."
Kësaj thirrjeje i bashkëngjitej numri i telefonit (i shkruar me kod), dhe një emër (R), plus iniciali i mbiemrit.
Mesazhi i këtij çifti u lexua në Lushnje. Mesa duket kishin të njëjtin interes... Me pak sekonda bisedë në telefon, u la dhe ora e vendi i takimit të dy çifteve.
Akti i vendimit gjyqësor, sqaron më tej hollësitë: Rreth orës 19.30 të po asaj date, tek rruga "M. Shyri" në Tiranë, kanë ardhur S. X. me bashkëshorten K. dhe kanë njoftuar se ishin para godinës së "Bankës... " (në vendim është edhe emri i bankës). Në atë orë ka dalë për t'i marrë zonja R. dhe e ka mirëpritur çiftin lushnjar në shtëpinë e vet, e përshkruar nga dëshmitë në hetuesi si "një ndërtesë dykatëshe me portë hekuri". Më pas ka ardhur edhe bashkëshorti i saj. Grupi është formuar duke plotësuar dëshirën e të dyja palëve për të kaluar, sipas premtimit në gazetë, "momente të paharrueshme...". Por, e nesërmja e asaj nate ka qenë dita e fundit e jetës për një prej personave të përfshirë dhe pikërisht për zonjën R.
***
Me të zbardhur dita, çifti lushnjar është larguar. Janë nisur rrugës së kthimit për në qytetin e tyre, me motivin për t'u takuar sërish me çiftin tiranas. Me mbërritjen e tyre në vendlindje, vënë re se nuk kishin me vete portofolin. Pas disa tentativa të dështuara për t'u lidhur në telefon me bashkëshortët tiranas, nuk kanë mundur. Atëherë kanë ardhur sërish në Tiranë, kanë trokitur, por nuk u është përgjigjur njeri. Kanë pyetur një fqinje, por ajo u ka thënë që nuk i ka parë atë ditë komshinjtë, më pas kanë lënë një letër të shkruar me përmbajtjen: "Jemi... Kur të mundesh telefono në numrin...". Më pas janë larguar dhe janë kthyer në Lushnje.
Të nesërmen në darkë, në banesën e tyre ka shkuar policia dhe ka shoqëruar për në kryeqytet bashkëshortin e çiftit lushnjar. Portofoli i tij ishte gjetur në banesën e R., por R. nuk ishte më e gjallë. Çfarë kishte ndodhur pas largimit të çiftit lushnjar nga Tirana?
***
Atë ditë, më 8 prill, pas largimit të çiftit lushnjar drejt qytetit të tyre, bashkëshorti i R., ka dalë si zakonisht nga shtëpia. Por, përpara se të dilte diçka ka ndodhur mes çiftit. Gruaja, ndoshta, nuk ka përballuar atë që kishte ndodhur një natë më parë, ndoshta kishte një pendesë, apo diçka të tillë. Kjo nuk do të merret vesh kurrë, por duhet të ketë pasur një grindje e më pas goditje nga bashkëshorti, sepse në trupin e saj, disa orë më vonë, kur ajo nuk ishte më gjallë, u gjendën shenja të disa goditjeve që dyshohet se janë dhënë atë mëngjes fatal. Por nuk e kishin shkaktuar shpullat vdekjen.
Në vendimin e Gjykatës së Tiranës, nr.159, datë 11 shkurt, me gjyqtar Ilir Çelikun, lexojmë vijimin e kësaj historie, të denjë për filmat triller:
Kur është kthyer pasdite në shtëpi, (së bashku me një të njohurin e tij, edhe ky i marrë dëshmitar gjatë procesit) bashkëshorti tiranas e ka gjetur gruan të shtrirë përtokë në përpjekje për të vjellë, por në pamundësi për ta bërë këtë veprim. Dy burrat e kanë hipur R. në makinë dhe janë nisur me urgjencë drejt Spitalit Ushtarak të Tiranës.
Gjatë rrugës, pyetjes se çfarë kishte, R., i ishte përgjigjur se "kishte pirë disa ilaçe". Kanë mbërritur në Spitalin Ushtarak. Mjeku i turnit (edhe ky i marrë më pas i pandehur për veprat penale të "mjekimit të pakujdesshëm" dhe "korrupsionit pasiv"), e ka vizituar dhe i ka dhënë ndihmën e parë. Më pas i ka thënë se mund të dilte nga spitali dhe të rikthehej të nesërmen nëse kishte probleme.
Por e nesërmja nuk ka ardhur kurrë për R. Akti gjyqësor thotë se 10 minuta pas daljes nga spitali, rrugës për në shtëpi, brenda në makinë, ajo është bërë keq. Makina është kthyer mbrapsht drejt spitalit, por ishte vonë. Në dëshminë e tij, mjeku thotë:
"10-15 minuta pasi i përcolla vajzën dhe dy djemtë, pacientja kthehet në urgjencë, e shoqëruar po nga dy personat në gjendje të rëndë me cianozë (nxirje të fytyrës), puls shumë të dobët, tension 60-40, pulsacione të dobëta në arterien kardiake. Në këto rrethana, i gjithë stafi mjekësor filloi masazhim manual (me duar) të zemrës, iu vendos intanyl dhe u dërgua në urgjencë dhe, me gjithë ndërhyrjet mjekësore, rreth orës 22.00 të mbrëmjes, shtetësja R. ka ndërruar jetë.."
***
Historia rozë, e shndërruar kësisoj në tragjedi, nuk përfundon me kaq. Pas vdekjes së 24-vjeçares, gjithë ngjarja kaloi në filtrat e hetimit të policisë dhe të prokurorisë, për të zbuluar se çfarë kishte ndodhur me çiftin në fjalë, të cilët kishin 10 vjet që bashkëjetonin.
Sipas hetimeve mësohet se viktima, atë mëngjes, pas natës rozë, është goditur nga bashkëshorti i saj. Shenjat e goditjeve gjendeshin në trupin e të ndjerës, por sipas raportit mjekësor, nuk kanë qenë këto shkaktarët e vdekjes. Mekanizmi i vdekjes ka qenë arresti kardiak dhe pushimi i zemrës. Me sa duket, pas largimit të bashkëshortit nga shtëpia, atë mëngjes, zonja R. ka kaluar momente të tmerrshme vetmie dhe refleksioni. Sipas raportit mjekësor, vdekja ka ardhur nga "intoksacioni me kokainë".
Bashkëshorti i viktimës është shpallur fajtor nga Gjykata e kryeqytetit, duke u dënuar me 1 vit burgim dhe treqind mijë lekë gjobë, për veprën penale të "shtyrjes në vetëvrasje".
Kësaj i është bashkëngjitur edhe një akuzë tjetër: ajo e "korrupsionit aktiv të personave që ushtrojnë funksione publike" (sikur të mos mjaftonin gjithë të tjerat, i ka dhënë edhe 5000 lekë të rinj ryshfet mjekut).
E gjitha të ngjan me një skenar filmi, por është një histori e ndodhur në mes të Tiranës. Një nga çështjet gjyqësore më interesante të kohëve të fundit, që zbulon edhe një Tiranë të errët, të panjohur, atë që fshihet pas lajmërimeve në faqet e njoftimeve rozë.
SHËNIM I REDAKTORIT: Vendimi i plotë i Gjykatës së Tiranës për çështjen, ndodhet në redaksinë e Sh2-shit. Redaksia ka fshirë emrat e plotë të protagonistëve për arsye etike, që lidhen me ruajtjen e jetës së tyre private.
(C) Shekulli
----------
Interesante lol.
Përgjigju Duke Cituar
Postuar më parë nga [era]
![Maska e [Perla]](customavatars/avatar28193_17.gif "Maska e [Perla]"){kind=avatar}
Krijoni Kontakt