Jeta dhe Vdekja!

[hulumtuesi09]

Jeta dhe Vdekja!
"Si e mohoni All-llahun, e dihet se ju ishit të vdekur e Ai ju ngjalli, mandej ju bën të vdisni e pastaj ju ringjall, e mandej tek Ai do të ktheheni?" - Kur'an, 2:28
Shkruan: Avni Tafili
Jo s'ke për të menduar, e as për të medituar, e as për të kuptuar, përderisa ngre kokë kundër të Gjallit e ndaj Tij je i padëgjueshëm! Jo kurrsesi, Ai që gjallëron, e Ai që gjithçka bën të vdes, ndoshta të ka vdekur, e ti prej Tij gjallëri s'kërkon!
I Gjalli, Gjallërues, i Pavdekshmi që gjithçka bën të vdes! O Allah, mos na i vdis zemrat!
E njeh vallë, Zotin, që ti deklaron se e njeh! E njeh Atë që ti dëshmon se je i bindur ndaj Tij. Po si e njohe Atë, vallë! E ç'të bëri të mendosh se ti e ke njohur Atë, e ç'të mësoi për të Gjallin, Gjallërues, e për të Pavdekshmin, që gjithçka bën të vdes! Jo, ti s'e ke njohur ende, përderisa për Të, të mos mendosh, e Atë në thellësitë e natës të mos e përkujtosh, e përderisa në vetmi të mos e adhurosh i nënshtruar dhe i mbështetur plotësisht e tërësisht ndaj Tij.
Po, Ai është i Gjalli, kur gjithçka asgjë hiç s'kishte, Ai ishte kur asgjë s'ekzistonte, Ai është që jetë jep, Ai është që gjallëri jep, pa Të, s'ka as jetë e as gjallëri. Pa Të, zemra është e vdekur. E ti s'ke për t'u gjallërua përderisa me Të s'kërkon gjallërim! Mos mendon vallë, veç pse ti po lexon këtë letër, je i gjallë! Jo, përderisa zemra s'i rrit trokitjet e saja kur emrin e Allahut lexon!
Jetën s'e fillove me lindjen tënde, por me vdekjen para se dritën të shihje. Ishe në errësirë, ishe i vdekur, e t'u dha drita, t'u dha jeta. Por pak prej njerëzve këtë e kuptojnë. Pak prej njerëzve janë gjendje të kuptojnë të qenët as i gjallë e as i vdekur. E ç'di ti për të gjallët e për të vdekurit! E ç'të bëri të kuptosh se ç'është gjallëria e ç'është vdekja! Gjallëria është të njohësh vetveten. Nuk është i gjallë, ai që s'ka qëllim e mision në jetë. I gjallë është ai që njeh të Gjallin, të Pavdekshmin, Allahun e Madhërishëm!
A ka njeri që mendon! A ka njeri që në këtë mediton!
Jo s'ke për të menduar, e as për të medituar, e as për të kuptuar, përderisa ngre kokë kundër të Gjallit e ndaj Tij je i padëgjueshëm! Jo kurrsesi, Ai që gjallëron, e Ai që gjithçka bën të vdes, ndoshta të ka vdekur, e ti prej Tij gjallëri s'kërkon! E si vallë, i gjallë pretendon të jesh! E si vallë, pretendon se të Gjallin, Allahun e Madhërishëm, ke Zot që i lutesh! Jo, kur Zoti yt lutet prej teje, e s'të përgjigjet, dije se, Allahu i përgjigjet lutjes kur lutësi i lutet!
I Gjalli, Ai që gjallëron, ia mundëson njeriut të ndjejë jetë ose vdekje. Jetë nuk është vetëm të ecurit i lëvizshëm, e të folurit zhurmshëm. Po edhe vdekja nuk është vetëm qetësia e heshtur, e as shtangia nga të lëvizurit në sytë e të gjallëve. Sytë e njeriut nuk shohin më larg se drita, kur me rrëmbim të shpejtë lëshohet! Jo, njerëzit e gjallë nuk janë si njerëzit e vdekur. E njerëzit e vdekur janë në mesin e të gjallëve, por as të vdekurit e as të gjallët nuk e ndjejnë gjallërinë e as vdekjen e njëri-tjetrit.
E ç'di ti për të vdekurit! Të vdekurit janë ata që jetojnë, por jeta e tyre është e pakuptimtë. Janë ata që jetojnë pa qëllim e pa mision. Të vdekur, janë ata që të vërtetën s'e kuptojnë. Ata që zemrat dhe mendjet e tyre i kanë të vdekura në agoni të paditurisë. Jo, kurrsesi! S'janë të paditur, por të padritë! Errësira është vdekja. E vdekja e njëmendtë është shkëputja e shpirtit prej trupit!
E ç'di ti për vdekjen prapë! Ti prej vdekjes, u jetësove. Ti ishe asgjë, pastaj u bëre pikë. E para se pikë të bëheshe, Zoti yt të krijoi, që ti ende ndaj Tij s'je ndërgjegjësuar. Po, se po të ishe i ndërgjegjësuar, i gjallë në zemër do të ishe. Zemra e gjallë kur këshillohet, përmirësohet. E këshilla nuk i bën dobi atij që prej të ligave nuk largohet. E këshilla s'përmirëson përderisa Fundi nuk kujtohet! E kush pra, në Ditën e Fundit, nuk u bind! Shumë prej njerëzve, që vetveten të gjallë e mendojnë. Jo, ata ende janë në agoni të pavetëdijes, të pandërgjegjshë m. Por, atyre gjallëria sigurisht do t'u vijë, atëherë kur gjallëria s'u bën më dobi, atëherë gjithçka i është nënshtruar të Gjallit, të Pavdekshmit, Allahut të Gjithëpushtetshë m!
E ç'di ti për jetën! E çfarë për të gjallët! Ata çdo lëvizje që bëjnë, të Gjallin, të Pavdekshmin përkujtojnë. Ata janë të përshkuar me dritën e Zotit të tyre. Jeta e tyre nuk është vetëm prej baltës, por kanë shpirt të udhëzuar e të ruajtur. Jetojnë nën dritën e Allahut, Udhëzuesin! Jeta, e ç'di pra se ç'është jeta! Jetë nuk është si jeta e bimës! Edhe bima Krijuesin e vet madhëron, a nuk është Allahu Krijues i çdo gjëje! E dije se, shumë krijesa janë të gjalla, që ti i mendon të vdekura. Po edhe shumë krijesa janë të vdekura, e ti i mendon të gjalla. Jo, s'janë "shumë" krijesa, është krijesa njeri, e prej xhinëve!
Vdekja, i vdekur, e të vdekurit! Kush brendia e tij ka vdekje, e i vdekur është! Kush shkëputi shpirtin nga Zoti vet! Kush shkuli të menduarit nga të menduarit e thellë! Kush këshilla dobi s'i bën! Kush fundin s'e mendon!
Jeta, i gjallë, të gjallët! Kush brendia e tij ka jetë, i gjallë është! Kush shpirti i vet është i udhëzuar me dritën e Zotit të vet! Kush përkujton Zotin e vet! Kush për takimin me Zotin e vet përgatitet!
"Për t'ia tërhequr vërejtjen atij që është i gjallë (me mend e zemër)." – Kur'an, 36:70
O Allah! Gjallëro shpirtrat, zemrat e mendjet tona me udhëzimin e me dritën Tënde!
Ve-l-hamdu lilahi rabbi-l-alemin.
Burimi: Zëri i Pendës Islame | www.atafili. wordpress. com - Zgjohu!

[hulumtuesi09]

Tre definicione[1] rreth el-Islam
Përgatiti: Avni Tafili
- El-Islam është fjalë e shprehje; mbështetur në mendimin e Ibën Tejmije[2], i cili ka thënë: el-Islam është të adhurohet vetëm Allahu, të mos i shoqërohet shok në adhurim, të qenit i sinqertë në fe ndaj Tij; kjo është rruga e Allahut, nuk pranon fe tjetër përveç saj, e as prej të parëve, e as prej të mëvonshmëve. Adhurimi ndaj Allahut të jetë në mënyrën që na kanë urdhëruar të Dërguarit e Allahut, e nuk adhurohet në asnjë mënyrë që bie në kundërshtim me udhëzimin e tyre. Dërgimi i Profetëve u përmbyllë me dërgimin e të Dërguarit të fundit, Muhammedin salAllahu alejhi ve selem, e nuk mund të jetë besimtar musliman ndaj Allahut veçse duke dëshmuar se s’ka zot tjetër përveç Allahut dhe se Muhammedi është rob dhe i dërguar i Tij.
Me këtë deklaratë njeriu hyn në Islam. E kush thotë se el-Islam është fjalë, duke dashur të thotë: deklarata e dëshmisë, e ka thënë të saktën.
Pastaj, duhet përkushtim në atë që ka urdhëruar i Dërguari i Allahut, Muhammedi salAllahu alejhi ve selem rreth pesë shtyllave (të Islamit)…etj.
- El-Islam është sistem e program prej pesë shtyllash të njohura të tij: deklarata e dëshmisë, namazi, zekati, agjërimi dhe haxhi, dhe gjashtë kushtet e Imanit: besimi në Allah, engjëjt e Tij, librat e Tij, të dërguarit e Tij, Ditën e Fundit dhe në Përcaktimin e Tij, qoftë mirë a keq.
Kështu është definuar fjala El-Islam mbështetur në përgjigjen e Muhammedit salAllahu alejhi ve selem dhënë Xhibrilit kur është pyetur se ç’është Islam dhe Iman[3].
- El- Islam është sinonim i Imanit, ndërsa deklarimi: Islam është dëshmia se s’ka zot përveç Allahut, falja e namazit…, i kanë bërë manifestime të el-Islam; rite të tij. Sqarojnë duke thënë se, el-Iman është me vërtetim të zemrës.
Përkrahësit e këtij mendimi kanë thënë: el-Islam bashkë me el-Iman përbëjnë një gjë, që do të thotë se: el-Islam është vërtetim me zemër.
Arabologët nuk kanë aprovuar një shpjegim të tillë, pasi, sipas tyre fjala el-Islam do të thotë: bindje dhe nënshtrim në aspektin gjuhësor dhe kuptimor të fjalës.
El-Islam nuk përkufizohet vetëm me pesë shtyllat e njohura të tij, porse janë ritet më të madhërishme të Islamit; nëpërmjet tyre manifestohet bindja e plotë dhe nënshtrimi, kurse me lënien e njërës prej atyre shtyllave konsiderohet mangësi e madhe.
Ndërkaq, përgjigjja e Muhammedit salAllahu alejhi ve selem ndaj pyetjes së Xhibrilit për pyetjen “Ç’është Islami?”, me pesë shtyllat duke potencuar pra në fjalën el-Islam, është përmbledhje e më të rëndësishmeve dhe që është obligative për secilin musliman veç e veç.
E, çdo gjë përveç atyre pesë shtyllave, nuk përfshihen të gjithë muslimanët njëkohësisht; mund të ketë obligime që nëse një grup prej muslimanëve e kryen, shkarkohen të tjerët, si p.sh. urdhërimi për mirë dhe ndalimi nga e keqja.
Fusnota_____________________
[1] Shkoqitje e një artikulli të dr. Salah es-Savi
[2] El-Fetava, Ibën Tejmije : 7/269
[3] Transmetohet nga Omeri radijAllahu anhu, se, një ditë ishim duke ndenjur tek i Dërguari i Allahut, kur u duk një njeri me rroba shumë të bardha dhe flokë shumë të zeza. Në të nuk hetohej shenja e udhëtimit dhe askush prej nesh nuk e njohëm. U ulë pranë të Dërguarit të Allahut duke i mbështetur gjunjët e vet në gjunjët e tij, i vendosi duart e veta në kofshën e tij dhe tha: - O Muhammed, më trego ç’është Islami? – I Dërguari i Allahut tha: “Islami është të dëshmosh se nuk ka hyjni tjetër përveç Allahut dhe se Muhanmedi është i Dërguari i Allahut, ta kryesh namazin, ta japësh zekatin, ta agjërosh ramazanin dhe ta vizitosh Kaëben, nëse ke mundësi….” Hadith : Muslimi