Tenderi - Duma: Nuk është shaka e 1 Prillit, mbi 9 mln dollarë vetëm për 950 metra rrugë
Partia Demokratike bëri një denoncim të ri për aferat korruptive të qeverisë, siç i quan ajo. Sipas opozitës, për vetëm 950 metra rrugë në Pogradec, qeveria ka paguar 9 milionë e gjysmë dollarë. Grida Duma u kujdes të theksonte se kjo nuk ishte shaka e 1 prillit.
Duma: Një aferë skandaloze zbulon mekanizmin se si Edi Rama dhe qeveria e tij ndajnë paratë e shqiptarëve me miqtë e tyre. Mbi 9 milionë e gjysmë dollarë, ose 9 miliardë e 720 milionë lekë i ka dhënë Edi Rama një firme ndërtuese për të bërë më pak se një kilometër, saktësisht 950 metra rrugë në Lin të Pogradecit. Një shifër rekord abuzimi dhe korrupsioni.
Sekretarja e Marrëdhënieve me Publikun në PD, tha se ky tendër ka edhe paligjmëri të tjera, si fakti që mungon mbikëqyrja e punimeve, që sipas saj është kërkesë e ligjit, duke shtuar se të dhënat mungojnë edhe në tabelën e objektit.
Duma: Qeveria me kontratën e lidhur me 2 shkurt ka favorizuar firmën PE-VLA-KU, pasi siç shihet qartë nga dokumentacioni, ky ndërtues ka marrë 99 për qind të fondit limit. Është e dukshme se nuk ka pasur garë. 9 milionë e gjysmë dollarë për 950 metra rrugë kanë shkuar drejt e tek miku i qeverisë. Cila është pjesa e Edi Ramës në këtë aferë, i cili jo më kot cilësohet edhe nga mediat ndërkombëtare si politikani më i pasur në Evropë? Kjo është pra oligarkia në veprim.
ORA NEWS
Krijoni Kontakt