Parajsa dhe Ferri

[xemanuel]

Çfarë do të thotë të pranosh Jezus Krishtin?

Në këtë artikull ne do të shikojmë se çfarë thotë Bibla në lidhje me këtë pyetje. Njerëzit kanë ide të ndryshme në lidhje me këtë çështje, dhe nëse do të bazoheshim te çfarë njerëzit thonë, mendimi ynë do të ishte një më tepër se i të tjerëve, prandaj më mirë do të shohim se çfarë thotë vetë Zoti për këtë në Fjalën e Tij.


Sipas Biblës, së pari duhet të pranosh se ke mëkatuar kundër Perëndisë dhe për shkak të mëkateve ti meriton dënimin në ferr (Romakët 3:23, Zbulesa 21:8). Nqs dikush nuk bie dakort me këtë pikë, atëherë ai njeri nuk mund të shpëtohet, sepse ai nuk e sheh nevojën për një shpëtimtar. Tek Romakët 3:23 thuhet se “të gjithë kanë mëkatuar”, prandaj çdo njeri duhet të vendosë nëse do të besojnë këtë apo jo. Nëse dikush nuk beson këtë, nuk ka pse të besojë pjesën tjetër të Biblës.


Së dyti duhet të kuptosh që ti nuk e shpëton dot vetveten, pavarësisht nga përpjekjet e tua. Arsyeja është e thjeshtë: standarti që Perëndia kërkon që një njeri të shkojë në Parajsë është 100% shenjtërim, pra shumë i vështirë (i pamundur në fakt) që ndonjë njeri ta arrijë (Zbulesa 21:27). Kur dikush kupton dhe beson këto dy pika, atëherë, kupton gjithashtu që ka nevojë për një shpëtimtar. Perëndia (më mirë se çdokush tjetër) e dinte këtë, prandaj siguroi një shpëtimtar për ne, Jezus Krishtin. Romakët 5:8 thotë: “Por Perëndia e tregon dashurinë e tij ndaj nesh në atë që, kur ende ishim mëkatarë, Krishti vdiq për ne”. Jezusi nuk është një shtesë (apo pjesë) e rrugës për në Parajsë, Ai është vetë rruga, dhe nuk ka rrugë tjetër. Tek Veprat 4:12 duke folur për Jezusin Bibla thotë: “Dhe në asjë tjetër nuk ka shpëtim, sepse nuk ka asnjë emër tjetër nën qiell që u është dhënë njerëzve dhe me anë të të cilit duhet të shpëtohemi”.

A mund të thuhet më qartë se kaq ? Për shumë njerëz, të pranosh Jezusin do të thotë, ti shtojnë jetës së tyre diçka në lidhje me Perëndinë ose Jezusin, psh të shkojnë në kishë (me raste festash), apo të bëjnë kryqin, apo të pagezohen, apo gjëra të tjera si këto, por kjo është larg kuptimit që Bibla përkufizon për ne se çdo të thotë të pranosh Jezusin. Tek Galatasit 2:21 Bibla thotë: “Unë nuk e hedh poshtë hirin e Perëndisë sepse, në qoftë se drejtësia vjen me anë të ligjit, atëherë Krishti ka vdekur më kot”. Pra ky varg thotë qartë, se nëse ne mund të shkonim në parajsë duke zbatuar disa gjëra të caktuara (bëj këtë, mos bëj atë, dmth nje ligj të caktuar), atëherë Jezusi paska vdekur më kot, sepse unë mund të shkoja në parajsë edhe pa të, por padyshim që Jezusi vdiq në kryq duke marrë dënimin nga Perëndia në vendin tonë, sikur ai të kishte bërë të tëra mëkatet tona, me qëllim që ne të shpëtonim.

Kjo nuk do të thotë që automatikisht çdo njeri do të shkojë në Parajsë, sepse Perëndia nuk i ka bërë njerëzit si robotë, ata kanë mundësi të zgjedhin, por i dashur lexues mba mend që zgjedhjet që ne bëjmë kanë gjithmonë një pasojë, për të mirë ose për të keq. Zoti na e jep jetën e përjetshme falas, është një dhuratë për ne, që kjo dhuratë të bëhet e jona, ne duhet që thjesht ta zgjasim dorën dhe ta pranojmë atë. Kjo dhuratë është vetë Jezusi. Kur ju e kuptoni dhe besoni se Jezusi vdiq për ju personalisht dhe ju do shumë, dhe do që ju të shpëtoheni dhe te keni jetën e përjetshme, kur vendosni besimin tuaj me gjithë zemër pa hezitim tek Jezusi, atëherë jeni gati për ta ftuar atë të vijë në zemrën tuaj dhe t’ju shpëtojë. Kjo do të thotë të pranosh Jezus Krishtin. Ai bëhet jeta juaj, jo një shtesë e jetës suaj.

Nëse kjo është dëshira juaj, ajo që ju ngelet tani është thjesht një lutje shpëtimi, ku ju i drejtoheni Perëndisë dhe pendoheni për mëkatet tuaja dhe e ftoni Jezusin të vijë në zemrën tuaj dhe t’ju falë çdo mëkat e t’ju japë jetën e përjetshme. Nëse ju e dëshironi këtë, atëherë më poshtë po paraqesim një lutje që ju mund t’i drejtoni Perëndisë për shpëtim. Kjo lutje është thjesht një model, mos e mësoni atë përmendësh, mos harroni se Zoti shikon zemrën tuaj, dhe jo renditjen e fjalëve, por nëse nuk jeni të sigurt se si të luteni, atëherë mund të bëni këtë lutje:


Ati ynë qiellor, unë e di që jam një mëkatar dhe që për shkak të mëkateve të mija meritoj dënimin në ferr. Por faleminderit o Zot që me deshe kaq shumë saqë dërgove Jezus Krishtin për mua. Unë besoj se Ti, Zoti Jezus vdiqe në kryq për mua dhe tani pendohem para teje për çdo mëkat dhe të ftoj ty të vish në zemrën time, të më falësh çdo mëkat dhe të më japësh jetën e përjetshme. Faleminderit që më shpëtove. Amen

[xemanuel]

Patjetër që mund ta dish! Një gjë që dallon Biblën nga çdo libër tjetër në egzistencë është siguria me të cilën Bibla flet për çdo çështje të jetës. Dhe arsyeja për këtë është sepse Bibla është Fjala e Zotit, dhe Zoti si krijuesi i universit flet me autoritet për çdo gjë. Prandaj një njeri që vepron sipas Biblës për të shkuar në parajsë duke pranuar Jezus Krishtin në jetën e tij/saj, e di me 100% siguri se ku do ta kalojë përjetësinë. Nuk ka asnjë libër tjetër që mund të të japë atë siguri. Shikoni çfarë thuhet tek 1Gjonit 5:11-13:

"Dhe dëshmia është kjo: Perëndia na dha jetën e përjetshme dhe kjo jetë është në Birin e tij. Ai që ka Birin, ka jetën; ai që nuk ka Birin e Perëndisë, nuk ka jetën. Jua shkrova këto gjëra juve që besoni në emrin e Birit të Perëndisë, që të dini se keni jetën e përjetshme dhe që të besoni në emrin e Birit të Perëndisë."

Pra, sipas vargjeve të mësipërme ne mund ta dimë me siguri që kemi jetën e përjetshme, jo sepse jemi më të mirë se të tjerët, por sepse kemi pranuar Jezus Krishtin si Zotin dhe Shpëtimtarin tonë, dhe ai na ka shpëtuar. I dashur lexues, nëse ti nuk e ke marrë akoma atë vendim për shpëtimin tënd sot, Perëndia po pret krahëhapur për ty. Pranoje Jezusin sot. Për të mësuar më tepër se si të shpëtohesh dhe të pranosh Jezusin,

[xemanuel]

I dashur lexues, ky është vendimi më i rëndësishëm që do të merrni ndonjëherë në jetë. Bibla mëson qartë se e vetmja rrugë për të shkuar në parajsë është nëpërmjet Jezus Krishtit. Njerëzit kanë shumë keqkuptime se çdo të thotë të pranosh Jezus Krishtin, prandaj ne kemi shkruar një artikull të tërë për të shpjeguar qartë se çdo të thotë kjo. Prandaj nëse ju vërtet doni të shkoni në parajsë kur të vdisni

[xemanuel]

Unë e kam pranuar Jezus Krishtin, çfarë duhet të bëj tani?

Padyshim se vendimi më i rëndësishëm që një njeri mund të marrë është që të shpëtohet përjetësisht nga ferri duke pranuar Jezus Krishtin si Zotin dhe shpëtimtarin e tij. Bibla e quan këtë ngjarje “rilindje” (Gjoni 3:3-6), dhe besimtari i ri krahasohet shpirtërisht me një foshnje (1 Pjetrit 2:2). Prandaj është e rëndësishme që pas shpëtimit besimtari i ri të fillojë të rritet në besim dhe në ecjen me Zotin. Ashtu si një foshnje ka nevojë për kujdesin e më të rriturve, ashtu dhe një besimtar i ri ka nevojë për besimtarë të tjerë më të rritur në besim që ta ndihmojnë, inkurajojnë dhe të kujdesen për të. Kjo kërkon që besimtari i ri të kërkojë dhe të gjejë një kishë në qytetin ku ai banon, që mëson dhe predikon Fjalën e Zotit. Duke shkuar rregullisht në kishë do të mësoni më tepër për Zotin, karakterin dhe vullnetin e Tij, do të njiheni me besimtarë të tjerë që do të jenë një inkurajim për ju. Gjithashtu duhet të gjeni një Bibël, nëse ende nuk keni një të tillë, dhe duke lexuar atë rregullisht dhe duke u lutur, do të shikoni që Zoti do t’ju flasë nëpërmjet Fjalës së Tij. Efesianët 2:10 thotë: “Ne në fakt jemi vepra e tij, e krijuar në Krishtin Jezus, për vepra të mira, që Perëndia përgatiti që më parë, që ne të ecim në to”. Atëherë i dashur lexues, nëse ju jeni shpëtuar por akoma nuk jeni përfshirë në një kishë lokale, ne ju inkurajojmë që ta merrni këtë vendim sot, dhe të provoni në jetën tuaj çdo të thotë të jetosh një jetë me gëzim dhe të mbushur me bekimet e Perëndisë. Lutja jonë është si ajo e apostullit Pjetër tek 2 Pjetrit 3:18 “Por rrituni, në hirin dhe në njohjen e Zotit dhe të Shpëtimtarit tonë Jezus Krisht…”.

[xemanuel]

Ka shumë gjëra që mund të pengojë një njeri për të pranuar Jezusin midis të cilave mund të përmendim krenarinë, frika se çfarë do të mendojnë të tjerët, dëshira për të mos hequr dore nga mëkatet, frika se çfarë do të ndodhë me jetën e tij më pas, frika se shoqëria do ta përqeshë, etj. Pengesa më e madhe nuk jane faktet, apo mungesa e fakteve në lidhje me Biblën dhe Jezusin, fakte ka plot për të gjithë ata që duan si studiojnë faktet.

Tani kam një pyetje për ju. Në qoftë se do të bënit një listë të njerëzve që meritojnë të shkojnë në ferr, kë do të vinit ju në krye të listës? Nuk po kërkoj një emër të caktuar, por kë grup njerëzish do të vinit ju në krye të listës? Tani mbajeni mend atë, dhe të shohim në varg nga Bibla.

Zbulesa 21:8:

Kurse për frikacakët dhe të pabesët, dhe të neveritshmit dhe vrasësit, dhe kurvëruesit, dhe magjistarët, dhe idhujtarët, dhe gjithë gënjeshtarët, pjesa e tyre do të jetë në liqenin që digjet me zjarr dhe squfur, që është vdekja e dytë.

E shikoni se ke ka vënë Perëndia në krye të listës? Shumë ndryshe nga klasifikimi ynë apo jo? Frikacakët janë në krye të listës! Njerëzit që e dinë mirë se çfare duhet të bëjnë për të pranuar Jezusin, por kanë frikë se çfarë do mendojë shoqëria për ta. Ata thonë: “po ta pranoj unë Jezusin shokët e mi do të tallen me mua, prandaj më mirë të mos e pranoj”. Ose, “po ta pranoj unë Jezusin atëherë nuk flas dot me të shara dhe me një fjalor të ndyrë, por po nuk fola ashtu atëherë nuk pranohem nga shoqëria”. Frikacakët! Njerëz me karakter të dobët. Shpesh herë njerëzit akuzojnë të krishterët se janë njerëz të dobët sepse nuk besojnë të flasin me fjalë të ndryra apo nuk bëjnë gjëra të caktuara mëkatare. E di çfarë, është kollaj fare të bësh ato gjëra. Është më e vështirë të mos i bësh ato dhe ta kontrollosh veten! Le të shohim një herë burrërinë tuaj! Provoje një herë të jetosh 1 muaj pa i bërë ato gjëra që Bibla i quan mëkat! Të shohim një herë sa e lehtë është! Na tregoni burrërinë tuaj! Të rinjtë mburren me gjuhën e ndyrë, me mendimet e shthurura dhe kujtojnë se po tregojnë veten të fortë. S’kërkon asnjë vështirësi të sillesh si ata, sepse ajo është e natyrshme, është shumë herë më vështirë të sillesh ndryshe dhe t’i thuash jo mëkatit.

Atëherë, cila është pengesa më e madhe për të pranuar Jezusin? VETJA! Mos e kërkoni problemin tek asnjë njeri tjetër apo asnjë rrethanë. Pengesa e vetme është vetja! Nëse ju vendosni sot që Jezusi është më i rëndësishëm për ju sesa çdo gjë tjetër, atëherë nuk do të keni problem për t’u penduar përpara tij dhe ta pranoni atë, sepse kuptoni dashurinë e madhe që Ai ka për ju. Por nëse vendosni mendimet e tjerëve përpara Tij, mos ja hidhni fajin askujt për këtë, ju jeni vetë përgjegjës. Ju jeni pengesa më e madhe. Kuptohet që shoqëria në përgjithësi është kundër Jezusit dhe do të keni mjaft presione në çdo drejtim nëse vendosni të pranoni Atë, por ai vlen. Nuk humbisni asgjë të mirë dhe fitoni parajsen. Jezusi nuk donte t’ja dinte se çfarë menduan të tjerët kur ai shkoi në kryq për ne. Ata u tallen me atë, e përqeshën, fyen, e rrahën, e shpuan me eshtë në brinjë, e kryqëzuan, dhe ai megjithëse kishte fuqinë që t’i zhdukte në çast të gjithë ata, ai i duroi të tëra nga dashuria për ne. Ai është i fortë, sepse kërkohet më tepër për t’u sjellë ashtu si u soll ai sesa të ishte kundërpërgjigjur, aq më tepër me fuqitë që kishte Ai.

Në përfundim i dashur lexues, nëse akoma s’e keni pranuar Jezusin në jetën tuaj, ju lutem kuptoni që vendimi është plotësisht në dorën tuaj. Ju jeni pengesa më e madhe, jo të tjerët apo rrethanat. Por nëse e çmoni Jezusin mbi çdo gjë tjetër, atëherë nuk ka asnjë pengesë. Ai ju do, e dha jetën e tij për ju, dhe tani ju pret krahë hapur. Për të mësuar si ta pranoni Jezusin sot kliko këtu. Zoti ju bekoftë.

[xemanuel]

Si mundet Perëndia të jetë dashuri dhe të dënojë dikë në ferr, a nuk është kjo një kontradiktë?

Kjo nuk është aspak një kontradiktë. Le të mos harrojmë që Perëndia nuk është vetëm dashuri. Perëndia ka plot virtyte, dhe padyshim Ai është dashuri, por kjo nuk do të thotë që Ai nuk është i drejtë. Kjo nuk duhet të na habisë aspak! A nuk njihni ju dikë që është njeri i mirë, megjithatë zemërohet me padrejtësitë dhe korrupsionin e qeveritarëve? Mos vallë qënka një gjykatës që dënon një njeri që ka shkelur ligjin një njeri i keq? Padyshim që nuk është njeri i keq, ai thjesht po praktikon drejtësinë dhe ligjin! Perëndia është dashuri, por është edhe i drejtë. Drejtësia e tij nuk e lejon atë që të mbylli sytë kur vjen puna tek mëkatet përndryshe nuk do të ishte më i drejtë. Prandaj, Zoti siguroi një rrugë që edhe të shfaqë dashurinë e Tij ndaj njerëzve, por edhe të ruajë drejtësinë e tij. Ai e gjykoi mëkatin e gjithë botës në kryq, ku Jezusi vdiq duke marrë mbi vete dënimin për të gjitha mëkatet tona. Prandaj të gjithë ata që e pranojnë Jezusin, janë të falur nga mëkatet e tyre. Bibla thotë tek

Romakët 5:8

Por Perëndia e tregon dashurinë e tij ndaj nesh në atë që, kur ende ishim mëkatarë, Krishti vdiq për ne.

Pra, Perëndia e shfaqi dashurinë e Tij nëpërmjet Jezus Krishtit. Por nëse dikush vendos ta refuzojë Jezusin, atëherë ai vetë po pranon që të paguajë vetë për mëkatet e tij. Perëndia është i drejtë dhe i shenjtë dhe nuk do të lejojë që mëkatet të kalojnë pa paguar, dikush do paguajë për ato, nëse pranojmë Jezusin, atëherë pranojmë pagesën që ai bëri për ne dhe nuk kemi pse të shkojmë në ferr, por nëse e refuzojmë Atë, atëherë do të paguajmë vetë për mëkatet tona, dhe paga për mëkatet është dënimi në ferr. Perëndia është dashuri dhe nuk do që askush të shkojë në ferr, por nuk i detyron njerëzit se çfarë të bëjnë, ai na ka dhënë mundësinë të zgjedhim.

I dashur lexues, lutja jonë është që ju të pranoni rrugën që Perëndia vetë zgjodhi për shpëtimin tonë nëpërmjet Jezusit. Ai mori dënimin tonë mbi veten e tij për ne. Në këtë është shfaqur dashuria e Perëndisë për ne.

[xemanuel]

A i fal Zoti të gjitha mëkatet, apo ka ndonjë mëkat të madh që Zoti nuk e fal?

Ndonjë herë ndodh që takon një njeri që ndihet aq fajtor për diçka që ka bërë saqë mendon që Zoti nuk ja fal atë mëkat. Nga ana tjetër takon njerëz që mendojnë ngaqë janë njerëz të mirë dhe mëkatet e tyre nuk janë aq të mëdha sa të tjerëve, nëse ka një Zot, atëherë Ai patjetër do t'i falë ata për disa mëkate të vogla.

Sipas Biblës, mëkati përkufizohet në tre mënyra:

1. Çdo padrejtësi ( 1Gjonit 5:17).
2. Çdo gjë që e dimë që është e mirë dhe nuk e bëjmë (Jakobi 4:17).
3. Çdo gjë që bëjmë pa besim. (Romakët 14:23).

Këto janë ato gjëra që Zoti i konsideron mëkat. Së pari, çdo gjë që Ai e quan padrejtësi në Bibël, fjalën e Tij, kur ne shkelim ato që ai i quan mëkat. Së dyti, nëse ka diçka që nuk thuhet konkretisht në Bibël që është mëkat, atëherë, nëse ne dimë të bëjmë një gjë të mirë dhe nuk e bëjmë, ky është mëkat. Dhe së fundi, nëse ka diçka që përseri nuk thuhet direkt në Bibël që është mëkat, dhe ne e kemi me dyshim nëse është apo jo mëkat, nëse kemi ndonjë rezervim për këtë gjë sepse ndërgjegja dëshmon që mund të jetë mëkat, nëse e bëjmë atë gjë, atëherë edhe kjo konsiderohet mëkat.

Tani, nuk ka asnjë varg në të gjithë Biblën ku të thuhet se mëkati kategorizohet si i vogël, mesatar apo i madh. Siç e pamë më lart, për Perëndinë, çdo njëra nga tre pikat e mësipërme konsiderohet mëkat dhe nuk jepet ndonjë shkallëzim i mëkateve. Nga ana tjetër është e vërtetë që për disa mëkate të caktuara pasojat që ne heqim janë më të mëdha, apo pasojat që ato lënë tek njerëzit e tjerë janë të ndryshme, por kjo nuk do të thotë që Zoti i kategorizon mëkatet si të mëdha apo të vogla. Për Perëndinë mëkati është mëkat, dhe është i shëmtuar përpara tij.

Arsyeja pse njerëzit i kategorizojnë mëkatet, është për shkak të pasojave që ato mund të sjellin. Le ta shpjegojmë këtë. Nëse një njeri gënjen dikë tjetër le te themi për moshën e tij, atëherë kjo mund të mos ketë ndonjë pasojë të madhe për personin i cili u gënjye. Por nëse një njeri vret dikë, atëherë pasoja e viktimës së mëkatit është e madhe. Megjithëse pasojat që mëkati sjell në këtë jetë janë të ndryshme, ne duhet të kuptojmë disa gjëra. Kur ne mëkatojmë, mëkatojmë dyfish. Pra nëse gënjyem dikë, atëherë mëkatuam ndaj atij personi, por në të njëjtën kohë mëkatuam edhe kundër Zotit që thotë qartë që të mos gënjejmë. Mëkatet kundër të tjerëve mund të kenë pasoja të ndryshme, kjo është e vërtetë, por mëkatet ndaj Zotit, kanë të gjitha një ndëshkim, përjetësinë në ferr. Duke qënë e tillë, Zoti siguroi një rrugë që në të na falet çdo mëkat që kemi bërë kundër Tij dhe të mos marrim dënimin që meritojmë.

Shikoni një herë vargun më poshtë:

1Gjonit 1:8-10


Po të themi se jemi pa mëkat, gënjejmë vetveten dhe e vërteta nuk është në ne. Po t`i rrëfejmë mëkatet tona, ai është besnik dhe i drejtë që të na falë mëkatet dhe të na pastrojë nga çdo paudhësi. Po të themi se s`kemi mëkatuar, e bëjmë atë gënjeshtar dhe fjala e tij nuk është në ne.

Pra, për Perëndinë ka më tepër rëndësi pendimi sesa mohimi i gjendjes sonë. Ka njerëz që janë aq krenarë saqë nuk e pranojnë që janë mëkatarë. Kjo ndodh sepse ata e krahasojnë veten e tyre me njerëz të tjerë dhe thonë, unë nuk kam vrarë njeri, prandaj nuk jam mëkatar. Më vjen mirë që s'keni vrarë njeri por mëkati nuk është vetëm vrasja, ka plot gjëra të tjera që janë mëkat. Prandaj më sipër thuhet se po të themi se s'kemi mëkatuar, atëherë po e quajmë Zotin gënjeshtar, sepse ai ka thënë që të gjithë, pa asnjë përjashtim, kanë mëkatuar. Po ashtu, në vargun 9, thuhet se po të pendohemi dhe ti rrefejmë mëkatet tona ndaj Zotit dhe t'i kërkojmë falje Atij, Zoti na fal 90% të mëkateve! Jo nuk thotë ashtu, vargu thotë që Zoti na fal ÇDO mëkat, të gjitha pa asnjë përjashtim. A shihni ju ne atë varg që Zoti të thotë ndonjë mëkat të caktuar që nuk e fal? Atëherë nëse Zoti ju fal, pse nuk e falni ju vetveten? Nuk ka asnjë mëkat shumë më të madh sesa gjaku i Krishtit mund të mbulojë! Nga ana tjetër nuk ka asnjë mëkat aq të vogël, saqë ne të mos kemi nevojë për falje nga Perëndia. Mekati është mëkat, dhe ne duhet të pendohemi dhe të pranojmë faljen që Perëndia na jep nëpërmjet birit të Tij, Jezus Krishtit.

Nëse ju, i dashur lexues, akoma nuk keni pranuar Jezusin në jetën tuaj, dhe nuk keni përjetuar këtë falje, ne ju ftojmë që ta konsideroni këtë vendim sot.

[xemanuel]

Kush është Jezus Krishti?

Është e padiskutueshme që pavarësisht se çfarë beson një njeri në lidhje me Jezus Krishtin, ai është njeriu më i famshëm në botë. John Lennon, anëtar i grupit “The Beatles” tha në vitin 1966 se “Ne tani jemi më të famshëm se Jezusi” dhe “Krishtërimi do të kalojë, do të zhduket dhe zvogëlohet. Nuk kam nevojë të debatoj për këtë. Unë kam të drejtë dhe kjo do të provohet” (Newsweek, 21 Mars, 1966). Kjo ngjalli një pakënaqësi të madhe sidomos në Amerikë, protesta dhe bojkotime të albumeve të Beatles, gjë që e detyroi John Lennon të dalë në televizor dhe të lëpinte çdo gjë që kishte vjellë. Vras mendjen çfarë mendon John Lennon tani? E di, e di që ka vdekur, por trupi i tij ka vdekur, shpirti i tij nuk ka vdekur. Një ditë ai do të dalë përballë Jezus Krishtit vetë dhe do të ketë mundësi të shfaqë famën e tij!

Është qesharake dhe idiotike të thuash që Beatles ishin më të famshëm se Jezus Krishti. Doni t’i krahasojmë? Ok, le ta provojmë. 2000 vjet pas lindjes së Krishtit, ai adhurohet çdo ditë të javës nga të gjithë popujt e botës. 2000 vjet pas lindjes së tij njerëzit kanë shkruar dhjetëra mijëra këngë adhurimi ndaj tij që këndohen në çdo gjuhë të botës. Sa këngë janë shkruar për Beatles? Sa veta mblidhen çdo të Dielë në të gjithë botën dhe këndojnë këngë për Beatles? Edhe sot ka pak veta që akoma dëgjojnë këngët e tyre, por pas 200 vjetësh Beatles do gjenden vetëm në librat e historisë! Krishtërimi ka rezistuar 2000 vjet histori dhe vazhdon të qëndrojë. Nuk ka asnjë njeri që mund të pretendojë të qëndrojë para Krishtit e të krahasohet me të. Tek Gjoni 8:46 Jezusi u tha dëgjuesve të tij: “Cili nga ju më bind për mëkat? Nëse flas të vërtetën përse nuk më besoni?” Çfarë shprehje! Cili nga ju më bind për mëkat?! Nëse unë do ta thoja këtë gjë do ishin të paktën 1000 gishtërinj të drejtuar ndaj meje për mëkatet e mia, kurse Jezusi i sfidon ata që e kundërshtonin duke i ftuar të gjenin një mëkat në jetën e tij dhe askush nuk e bëri dot. Cili njeri tjetër mund të bënte një sfidë të tillë?

Cili ishte ky njeri që është figura më e debatueshme në gjithë historinë e njerëzimit? Hipotezat janë po aq të shumta sa edhe kundërshtarët e tij. Disa e shohin Jezusin si një filozof, disa të tjerë si një profet të Zotit, disa si një të çmendur, disa si një gënjeshtar, të tjerë e pranojnë atë si një krijesë të Perëndisë, të tjerë thonë që ai ishte Perëndia vetë i shfaqur në mish, disa thonë, duke shfaqur paditurinë dhe injorancën e tyre për faktet historike, se ai nuk ka egzistuar fare, është thjesht një përrallë e sajuar. Atëherë ku ta dimë se kush është Jezus Krishti? Kush mund të na tregojë më mirë sesa vetë thëniet e tij për vetveten se kush ishte ai. Nëse burimi i informacionit për të marrë një vendim se kush ishte Jezus Krishti nuk është Bibla, atëherë njerëzit do vendosin të besojnë çfarë duan ata të besojnë për Jezusin. Nëse ju e refuzoni Biblën si fjalën e Perëndisë, atëherë nuk keni si te dini se kush është Jezus Krishti. Në qoftë se refuzoni dëshminë e njerëzve që ecën me të, jetuan me të, panë mrekullitë që bëri Ai, dhe dhanë edhe jetët e tyre për Atë, atëherë nga mund ta dini të vërtetën? Ju padyshim që keni lirinë që ta refuzoni Biblën si Fjalën e Zotit, por të paktën nuk mund të thoni që Bibla nuk thotë gjëkundi që Jezusi ishte vetë Perëndia i shfaqur në mish, ashtu siç pretendojnë mjaft njerëz. Por nëse dëshironi të dini nga Bibla se kush është Jezus Krishti atëherë le të shikojmë këtë në hollësi.

Bibla thotë se Jezusi është Perëndia vetë i shfaqur në mish:

1 Timoteut 3:16

Dhe s`ka asnjë dyshim se misteri i mëshirës është i madh: Perëndia u shfaq në mish, u shfajësua në Frymë, u duk ndër engjëj, u predikua ndër johebrenj, u besua në botë, u ngrit në lavdi.

Lexoni vargun më lart dhe shikoni nëse vargu nuk thotë që Jezusi është Perëndia i shfaqur në mish. E theksojmë këtë, sepse mjaft njerëzve u ngrihen qimet përpjetë kur dëgjojnë një gjë të tillë. Nëse ju nuk e pranoni këtë, kjo do të thotë se nuk e besoni Biblën, sepse po ta besonit, vargu e thotë këtë qartë.

Tani, disa gjëra duhen theksuar në lidhje me këtë varg. Së pari, vargu thotë që ky është një mister, jo sepse nuk e di njeri, por sepse vetëm ata që e besojnë atë, mund ta dinë këtë mister. Së dyti, vargu tregon qartë, se ky mister është i madh, dmth, ka disa gjëra që nuk mund t'i kuptojmë në lidhje me këtë mister. Së treti, siç e theksuam më lart, vargu thotë që Perëndia u shfaq në mish. Le ta shpjegojmë këtë më qartë. Perëndia u shfaq në mish, do të thotë që Jezusi pati një formë trupore si të gjithë njerëzit e tjerë. Pra, Jezusi kishte dy natyra, ai ishte 100% njeri, dhe 100% Perëndi. Si njeri, Jezusi hante, flinte, u lodh, pati etje, vdiq në kryq. Si Perëndi, Jezusi, fali mëkatet e njerëzve, bëri mrekulli të pabëra më parë, pranoi adhurimet e njerëzve, shpëtoi njerëzit nga dënimi në ferr për mëkatet e tyre, etj. E theksojmë këtë dallim dhe natyrën e dyfishtë të Jezusit, sepse të gjithë ata që nuk besojnë se Jezusi është Zot, gjejnë ato vargje që flasin për anën njerëzore të Jezusit dhe debatojnë që ai nuk ishte Zot. Midis këtyre grupeve përmendim Muslimanët, Dëshmitarët e Jehovait, dhe Mormonët. Nëse kupton faktin që Ai ishte 100% njeri dhe 100% Perëndi, atëherë nuk ka problem për t'i shpjeguar ato vargje. Megjithatë, akti i shfaqjes së Perëndisë në mish, siç thotë vargu më sipër, është mister, ne si njerëz nuk mund ta kuptojmë plotësisht. Por kjo nuk do të thotë që nuk është i vërtetë.

Le te shikojmë një pasazh tjetër të ngjashëm:

Gjoni 1:1,3,14

Në fillim ishte Fjala dhe Fjala ishte pranë Perëndisë, dhe Fjala ishte Perëndi. Ai (fjala) ishte në fillim me Perëndinë. Të gjitha gjërat u bënë me anë të tij (fjala), dhe pa atë nuk u bë asnjë nga ato që u bënë. Dhe Fjala u bë mish dhe banoi ndër ne …


Jezusi në Bibël referohet me mjaft epitete të ndryshme. Këtu Ai quhet Fjala. Duket qartë në vargun 1 që flitet për vetë Perëndinë, ashtu si në vargun 3 ku shpjegohet që flitet për Perëndinë, sepse Ai krijoi gjithçka. Në vargun 14, thuhet që Fjala (Perëndia, pra) u bë mish dhe banoi ndër ne.

Këtu thuhet shumë qartë që Perëndia që krijoi gjithçka (v1,3) u bë mish dhe banoi ndër ne, (v.14) dhe nëse ka ndonjë dyshim se për kë flitet lexoni kontekstin (v.10-18).


Isaia 40:3

Zëri i dikujt që bërtet në shkretëtirë: "Shtroni udhën e Zotit, hapni në shkretëtirë një rrugë për Perëndinë tonë.

Mateu 3:3

Dhe në fakt për Gjonin kishte folur profeti Isaia kur tha: ``Një zë i atij që bërtet në shkretëtirë: "Përgatitni udhën e Zotit, drejtoni shtigjet e tij"``.

Libri i Isaia-s u shkrua rreth 700 vjet para Krishtit, dhe në profecinë e tij, ai flet për ardhjen e Perëndisë. Tek Mateu 3, Gjon Pagëzori, i referohet kësaj profecie duke thënë qartë që ajo profeci po flet për Jezusin. A nuk është kjo e qartë që Jezusi është vetë Perëndia?


Isaia 9:5

Sepse na ka lindur një fëmijë, një djalë na është dhënë. Mbi supet e tij do të mbështetet perandoria dhe do të quhet Këshilltar i admirueshëm, Perëndi i fuqishëm, Atë i përjetshëm, Princ i paqes.

Këtu jepet një profeci tjetër, në lidhje me lindjen e Jezusit. Për të sqaruar më tej se kush ishte ky fëmijë që lindi në Betlehem, Isaia tregon cilësitë e tij, duke e quajtur atë, Perëndi i fuqishëm, Atë i përjetshëm. Vargje të tillë i bëjnë mjaft njerëz që t'u ngrihen qimet përpjetë, sepse nga që s'duan të besojnë se cili është Jezusi, i vjen inat që vargje të tilla egzistojnë, dhe patjetër do gjejnë një justifikim për t'i refuzuar disi.


Isaia 7:14

Prandaj vet Zoti do t`ju japë një shenjë: Ja, e virgjëra do të mbetet me barrë dhe do të lindë një fëmijë të cilin do ta quajë Emanuel.

Mateu1:23

``Ja, virgjëresha do të mbetet shtatzënë dhe do të lindë një djalë, të cilit do t`i venë emrin Emanuel, që do të thotë: "Zoti me ne".

Më shqip nuk thuhet. Emanuel, emri që vetë Zoti lajmëroi që ta quanin Jezusin, do të thotë (lexoje) “Zoti me ne”.


Osea 1:7

Përkundrazi do të kem dhembshuri për shtëpinë e Judës dhe do t`i shpëtoj me anë të Zotit, Perëndisë së tyre; nuk do t`i shpëtoj me harkun as me shpatën apo me betejën, as me kuajt ose me kalorësit".

Titi 2:13

duke pritur shpresën e lume dhe të shfaqurit e lavdisë të të madhit Perëndi dhe të Shpëtimtarit tonë Jezu Krisht.

Tek Osea është Zoti që do të jetë shpëtimtari i njerëzve, por tek Titi thuhet që i vetmi shpëtimtar është Jezus Krishti. Si mundet të dyja të jenë të vërteta nëse nuk flitet për të njëjtin person?


1 Korintasve 15:47

Njeriu i parë i bërë prej dheu, është tokësor; njeriu i dytë është Zoti nga qielli.

Që kur qënka Zoti nga qielli bërë njeri? Vargu (lexo kontekstin) po flet qartë për Jezusin.


Veprat 20:28

Tregoni kujdes, pra, për veten tuaj dhe për gjithë tufën, në mes të së cilës Fryma e Shenjtë ju ka vënë ju kujdestarë që të kullotni kishën e Perëndisë, të cilën ai e ka fituar me gjakun e tij.

Këtu thuhet që Perëndia e fitoi kishën me gjakun e vet. Po pse paska gjak Perëndia? Patjetër që po flitet për Jezusin dhe gjakun që ai derdhi në kryq. Si mundet të refuzojë një njeri i ndershëm vargje të tilla dhe të thotë që Bibla nuk thotë se Jezusi është vetë Perëndia?


Marku 2:7

``Pse vallë ky po flet blasfemi. Kush mund të falë mëkatet, veç Perëndisë vetë?``.

Shumë prej njerëzve që panë dhe dëgjuan Jezusin, thanë gjëra të ngjashme me këtë varg. Padyshim që Jezusi nuk po blasfemonte, por ai i fali mëkatet pikërisht sepse ishte vetë Perëndia. Këtu s'ka asgjë për t'u çuditur.


1 Mbretërve 8:39

ti dëgjoje nga qielli, nga vendbanimi yt, dhe fal, ndërhy dhe jepi secilit sipas sjelljes së tij, ti që njeh zemrën e secilit; (në të vërtetë vetëm ti ua njeh zemrën gjithë bijve të njerëzve),

Ezekieli 11:5

Pastaj Fryma e Zotit ra mbi mua dhe më tha: "Thuaj: Kështu thotë Zoti: Ju thoni kështu, o shtëpi e Izraelit, dhe unë i njoh gjërat që ju shkojnë në mend.

Luka 5:22

Por Jezusi, duke i njohur mendimet e tyre, e mori fjalën dhe tha: ``Ç`po arsyetoni në zemrat tuaja?

Gjoni 2:24-25

por Jezusi nuk u zinte besë atyre, sepse i njihte të gjithë, dhe sepse nuk kishte nevojë që ndokush të jepte dëshmi për njeriun, sepse ai e dinte ç`kishte përbrenda njeriut.


A nuk thuhet qartë që vetëm Zoti mund ta dijë se çfarë kanë njerëzit në zemër dhe çfarë mendojnë ata? Por nga ana tjetër, vargjet e fundit tregojnë që Jezusi kishte këto aftësi. A është kjo një kontradiktë? Aspak, Jezusi është vetë Perëndia i shfaqur në mish, për çdo njeri që di të lexojë.


Psalmi 97:9

Sepse ti, o Zot, je Shumë i Larti mbi tërë tokën, ty të përlëvdojmë mbi gjithë perënditë e tjera.

Gjoni 3:31

Ai që vjen nga lart është përmbi të gjithë; ai që vjen nga dheu është nga dheu dhe flet për dheun; ai që vjen nga qielli është përmbi të gjithë.

Ja që Zoti qëndron mbi të gjithë ata që njerëzit i quajnë Perëndi (Zeusi, Allahu, Baali, mendja e njeriut, shkenca, paraja, etj). Dhe ky Zot, që është përmbi të gjithë, është Ai që erdhi nga qielli në Tokë, Jezus Krishti.


Isaia 44:6

Kështu thotë Zoti, mbreti i Izraelit dhe Çliruesi i tij, Zoti i ushtrive: "Unë jam i pari dhe jam i fundit, dhe përveç meje nuk ka Perëndi.

Zbulesa 1:17,18

Dhe kur e pashë, rashë para këmbëve të tij si i vdekur. Dhe ai vuri dorën e tij të djathtë mbi mua, duke më thënë: ``Mos u tremb! Unë jam i pari dhe i fundit, dhe i gjalli; isha i vdekur, por ja, jam i gjallë në shekuj të shekujve, amen.

Zbulesa 22:13

Unë jam Alfa dhe Omega, fillimi dhe mbarimi, i pari dhe i fundit``.

Shikoni sa qartë është thënë. Zoti thotë që Ai është i pari dhe i fundit, dhe përveç Atij nuk ka Perëndi tjetër. Nga ana tjetër, Jezusi tha që Ai ishte i pari dhe i fundit, dhe si i tillë, i vetmi Perëndi.


Isaia 6:1-3

Në vitin e vdekjes së mbretit Uziah, unë pashë Zotin të ulur mbi një fron të ngritur dhe të lartë, dhe cepat e mantelit të tij mbushnin tempullin. Mbi të ishin serafinët; secili prej tyre kishte gjashtë krahë: me dy mbulonte fytyrën, me dy të tjerë këmbët dhe me dy fluturonte. Njeri i bërtiste tjetrit dhe i thoshte: "I Shenjtë, i shenjtë, i shenjtë është Zoti i ushtrive. Tërë toka është plot me lavdinë e tij".

Gjoni 12:41

Këto gjëra tha Isaia, kur e pa lavdinë e tij dhe foli për të.


Tek Isaia 6 thuhet që profeti Isaia pa Zotin të ulur në fronin e Tij. Tek Gjoni 12:41 thuhet që Isaia po fliste për Jezusin, kur pa lavdinë e tij. Cili është ai njeri që ka kaluar klasën e dytë fillore dhe di të lexoje këto vargje, që të mos kuptojë, se Jezusi është Zoti i gjithësisë? Të gjithë ata që e kanë zemrën të mbyllur.


Joeli 2:32

Dhe do të ndodhë që kushdo që do t`i drejtohet emrit të Zotit do të shpëtojë, sepse në malin Sion dhe në Jeruzalem do të ketë shpëtim, siç e ka thënë Zoti, edhe për ata që kanë mbetur gjallë dhe që Zoti do t`i thërrasë".

Romaket 10:9,10,13

sepse, po të rrëfesh me gojën tënde Zotin Jezus, dhe po të besosh në zemrën tënde se Perëndia e ngjalli prej së vdekurish, do të shpëtohesh. Sepse me zemër, njeriu beson në drejtësi dhe me gojë bëhet rrëfim për shpëtim, Në fakt: ``Kushdo që do ta thërrasë emrin e Zotit do të shpëtohet``.


Citimi nga Romakët 10 ka të bëjë me Jezusin (lexo vargjet më lart) dhe është një citim direkt nga Dhjata e Vjetër, ku thuhet qartë që po flitet për Zotin. Nëse Jezusi nuk është Zot, atëherë si shpjegohen vargjet e mësipërme?


Predikuesi 12:14

Sepse Perëndia do të vërë të gjykohet çdo vepër, edhe çdo gjë që është fshehur, qoftë e mirë apo e keqe.

2Timoteut 4:1

Po të përbej, pra, përpara Perëndisë dhe Zotit Jezu Krisht, që ka për të gjykuar të gjallë e të vdekur, në dukjen e tij dhe në mbretërinë e tij:

2Korintasve5:10

Sepse ne të gjithë duhet të dalim para gjyqit të Krishtit, që secili merr shpagimin e gjërave që ka bërë me anë të trupit, në bazë të asaj që ka bërë, qoftë në të mirën apo në të keqen.

Tek Predikuesi 12 thuhet që Perëndia do të gjykojë njerëzit për çdo gjë që kanë bërë, por tek 2Korintasve thuhet që Jezusi është Ai që do t'i gjykojë. Pra është e qartë që Jezusi është vetë Perëndia.


1Samuelit 2:2

Nuk ka asnjë të shenjtë si Zoti, sepse nuk ka asnjë tjetër veç teje, nuk ka asnjë shkëmb si Perëndia ynë.

Veprat 3:14

Por ju e mohuat të Shenjtin, të Drejtin, dhe kërkuat që t`ju jepej një vrasës.

1Samuelit thotë që asnjë nuk është i shenjtë si Zoti, dhe tek Veprat e Apostujve, duke folur për Jezusin thuhet, se Ai është i Shenjti (në trajtën e shquar).


Zanafilla 1:1

Në fillim Perëndia krijoi qiejt dhe tokën.

Nehemia 9:6

Vetëm ti je Zoti! Ti ke bërë qiejtë, qiejtë e qiejve dhe tërë ushtrinë e tyre, dheun dhe tërë ato që qëndrojnë mbi të, detet dhe gjithçka që është në ta. Ti i mban gjallë tërë këto gjëra dhe ushtria e qiejve të adhuron.

Gjoni 1:3

Të gjitha gjërat u bënë me anë të tij (fjala), dhe pa atë nuk u bë asnjë nga ato që u bënë.

Kolosianeve 1:16

sepse në të u krijuan të gjitha gjërat, ato që janë në qiejt dhe ato mbi dhe, gjërat që duken dhe ato që nuk duken: frone, zotërime, principata dhe pushtete; të gjitha gjërat janë krijuar me anë të tij dhe në lidhje me të.


Perëndia është krijuesi i gjithë universit, dhe ky Perëndi është vetë Jezus Krishti, sipas vargjeve të mësipërme.


Të gjitha referencat e dhëna më sipër thonë qartë që Jezusi është vetë Perëndia i shfaqur në mish. Këto vargje janë vetëm një pjesë e vargjeve që vërtetojnë këtë doktrinë. Pse nuk japim më tepër? Sepse këto vargje mjaftojnë për çdo njeri që do të dijë të vërtetën. Nëse një njeri refuzon vargje të tilla, padyshim që do refuzojë vargje të tjera. E theksojmë, që vendimi se cili ishte Jezusi nuk varet nga sa vargje kemi dhënë apo nuk kemi dhënë këtu, ne gjykojmë që këto janë të mjaftueshme, vendimi varet nga qëndrimi dhe zemra e atyre që lexojnë këtë artikull.

Padyshim që ky artikull krijon pyetje të tjera. Ne do mundohemi që të pasurojmë arkivën e artikujve me ato pyetje që bëhen me shpesh, apo që kanë më interes. Nëse ju keni një pyetje, ju lutem na shkruani dhe ne do t'ju japim përgjigjen me kënaqësi.

Çfarë kuptimi ka që Jezusi ishte Perëndia në mish? Në fund të fundit pse duhet të vinte Perëndia në formë njeriu?

Një studim i hollësishëm i Biblës na mëson që ardhja e Jezusit ishte pjesë e planit të Perëndisë për shpëtimin e botës nga mëkatet e tyre. Bibla mëson se të gjithë njerëzit kanë mëkatuar, dhe për shkak se Perëndia është i shenjtë, atëherë njerëzit nuk mund të kenë bashkësi me Perëndinë. Gjatë Dhjatës së Vjetër (para ardhjes së Jezusit), Perëndia dha disa rregulla dhe ligje nëpërmjet kombit të Izraelit. Këto rregulla tregonin se sa larg ishte njeriu prej shenjtërisë së Perëndisë. Megjithëse këto ligje ishin të shenjta, ato nuk u dhanë për shpëtimin e njerëzve, sepse asnjë njeri nuk ishte në gjendje që të zbatonte ato rregulla 100%. Njerëzit atëherë duhet të flijonin mjaft flijime para Perëndisë (p.sh një qengj), për mëkatet e tyre, si një dëshmi që ata ishin mëkatarë, dhe se mëkati kërkon një pagesë. Ato ligje u dhanë në mënyrë që njerëzit të kuptonin se ishte e pamundur që ata të arrinin drejtësinë e Perëndisë me anë të zbatimit të këtyre ligjeve, sepse standarti që Perëndia kërkonte ishte shumë i lartë.

Prandaj Jezusi erdhi në formë njeriu. Ai u lind nga një virgjëreshë, dhe Ai ishte Njeriu-Perëndi. Ai ishte i vetmi që jetoi një jetë pa mëkat, dhe si i tillë, ishte i vetmi që mund të bëhej ura lidhëse midis Perëndisë dhe njerëzve, sepse ai ishte 100% njeri dhe 100% Perëndi, dhe ishte i vetmi pa mëkat. Asnjë njeri nuk mund të vdesë për mëkatet e dikujt tjetër, sepse ata kanë mëkatet e tyre. Por meqënëse Jezusi ishte pa mëkat, atëherë Ai ishte i vetmi që mund të merrte dënimin e mëkateve të botës mbi veten e Tij.

Në këtë pikë shumë njerëz pyesin, pse duhet të vdiste dikush në fund te fundit? A nuk mundet Zoti t'i falë mëkatet? Në fund të fundit vetëm krishtërimi mëson një gjë të tillë, të gjitha fetë e tjera thonë që po të bësh më shumë të mira se të këqija, atëherë Zoti t'i fal ato mëkate që ke bërë.

Kjo është pyetje shumë e mirë, por megjithëse duket sikur është e drejtë në të vërtetë nuk është ashtu. Çfarë do të thotë që t'i falë Zoti mëkatet, që Ai të mbyllë sytë para tyre? Mëkati duhet dënuar, sepse një Zot i shenjtë nuk mundet ta lejojë mëkatin të banojë në prezencën e Tij. Ideja e shumë njerëzve për “faljen e mëkateve” nga Zoti, nuk ka të bëjë asgjë me faljen, ajo ka të bëjë me anashkalimin, dhe Zoti nuk e bën një gjë të tillë. Dikush duhet të paguajë për mëkatet e bëra. Tek Galatasve 2:21 Bibla thotë:


Unë nuk e hedh poshtë hirin e Perëndisë sepse, në qoftë se drejtësia vjen me anë të ligjit, atëherë Krishti ka vdekur më kot.


Vargu thotë qartë që nëse ne do të mund të shkonim në parajsë dhe të fitonim drejtësinë që Perëndia kërkon që njerezit të jetojnë në prezencën e Tij me anë të ligjit, pra zbatimit të disa urdhërimeve (bëj këtë, mos bëj atë), atëherë, Krishti ka vdekur kot, sepse ne mund të bënim këtë pa vdekur ai. Por problemi qëndron në faktin se Zoti është i Shenjtë dhe nuk toleron dot asnjë mëkat. Në këtë gjë shfaqet dashuria e Perëndisë ndaj krijesës së Tij, saqë Ai erdhi në formë njeriu, dhe mori atë dënim që të gjithë njerëzit do merrnin në përjetësi për mëkatet e tyre, dhe në këtë mënyrë krijoi rrugën e vetme për shpëtim. Ne nuk themi se kjo është e vetmja rrugë për shpëtim që të përçmojmë çdo filozofi tjetër, por sepse Bibla e mëson këtë. Perëndia na deshi aq shumë saqë nuk kurseu asgjë për shpëtimin tonë. E vetmja pjesë që na ngelet ne, është thjesht që zgjasim dorën dhe ta pranojmë këtë dhuratë. Ne nuk e meritojmë dot, prandaj Zoti na e jep si dhuratë. Duke vënë besimin tonë te ajo që Jezusi bëri në kryq për ne, dhe duke besuar me gjithë zemër që Ai vdiq për të paguar për mëkatet tona, duke iu lutur Atij që të na falë mëkatet, ne marrim shpëtimin që Perëndia do që ne të marrim. Perëndia nuk detyron asnjë njeri që ta marrë një vendim të tillë, por dëshiron që ne të mos paguajmë vetë për mëkatet tona, por të pranojmë dashurinë e tij. A e keni marrë ju këtë vendim? Zoti ju do dhe ju pret krahë hapur. Zoti ju bekoftë.

[albani1]

Per sa i perket shpetimit jam dakort me Jesushaus-in.Une besoj qe eshte e vertet qe ashtu sic Perendia te jep kete dhurat pa detyrim ashtu njeriu ka zgjedhje te lire edhe te mos e kete me kete dhurate .Une besoj qe shpetimi nuk humbet vetevetiu por nese ti zgjedh te mos e kesh me Perendia do te trishtohet .Sa besimtare e dine ketu qe nuk duhet ta trishtojme Frymen e Shenjte?
Shpetimi eshte dhurate qe nuk humbet kur e merr por kur e le .

Sa per vellezerit dhe debatet qe kam lexuar po ju kujtoj fjale te palit qe thote ju lutem vellezer mos kini asnje zemerim apo cfaredo tjeter asgje kunder njeri tjetrit sepse nuk ka shume kohe dhe ka njerez qe po humbin dita dites por ta doni njeri tjetrin ashtu sic Krishti na ka dashur neve.Zoti ju bekofte.

[albani1]

Shikoni kete video ........